Aꞌikakauma ai Aberahamo Bero Hauna.
4
Uahomana raninai taba kahaꞌuahina ꞌabaꞌabaka Aberahamo ꞌeunai?
Aꞌikakauma hoana hanona aea etabu ahi aihona?
2 Aberahamo ena aka paukiai bero haunai peao raninai,
taba weiakia paukiai peapa,
ia Tirama wairanai ahaꞌi.
3 Puka robena taba ṉa ehoma?
“Aberahamo hanona
Tirama eaꞌikakaumana paunai
Tirama ehore ia bero haunai
ebaona.” Gen 15.6
4 Aka hauna mai ꞌarana weiana hanona beruberu tabana ahaꞌi,
ia ena hau haiara ꞌarana.
5 Hau ha aka namona aꞌi nibabaina,
ia Tirama nihore kiꞌa hauna bero nibaibeni Tiramana niaꞌikakaumana hauna hanona ena aꞌikakauma paunai bero haunai kebaona.
6 Maearima aka paunai bero aꞌi teaꞌina ia Tirama herenai bero teaꞌina haukia ekia namo ꞌabina neiana Davida ehinana.
7 “Weiakia ekia aka kiꞌa obokia
ehina hao mai ekia kiꞌa eaꞌi obo
haukia hanona tenamo.
8 Obiapaka kehore ekia kiꞌa
aꞌi ketuabi haukia hanona
tenamo.” Sal 32.1, 2
9 Banamo neiana hanona tetarenakia haukia mo kateaꞌina ꞌao aꞌi tetarenakia haukia abokiamo kateaꞌina?
Aika aba haꞌabi,
“Aberahamo ena aꞌikakauma paunai Tirama ehore berona ehinana.”
10 Rani tabanai bero haunai ebaona?
Itare wairanai ꞌao murinai?
Tirama Aberahamo ena bero ehina ꞌuaina ba tetarena.
11 Aberahamo hanona aꞌi tetare bahana aonai ena aꞌikakaumai bero eaꞌina,
muriai tetarena,
weiana hanona aꞌikakauma hoana ibatohana.
Ua buonai Aberahamo hanona mai ekia aꞌikakauma haukia weiakia Tirama bero haukiai ebaonakia haukia ikoikiai hamakia.
12 Ba tetarenakia haukia abomo hamakia hanona Aberahamo.
Ia tetarenakia haukia maikoikiai ahaꞌi,
baika hamaka Aberahamo aꞌi tetare bahana aonai eaꞌikakauma,
taearana weiana ihobonai katekaꞌa haukia hamakia.
Kahaꞌikakauma Hanona Tirama Ena ꞌAbiꞌuai Kahaꞌina.
13 ꞌAbiꞌuai hanona ebaibeni Aberahamo mai ꞌabaꞌabana kipokia hanopaka maikoinai kateaꞌina ia ꞌeukia,
weiana hanona rauhubu paunai aꞌi ebena,
ia bero weiana aꞌikakaumai nimai hauna paunai ebena.
14 Pokina rauhubu tiaꞌi taeana haukia ꞌabiꞌuai pateaꞌina ia ꞌeukiai peao raninai aꞌikakauma hanona ena namo ahaꞌi,
ꞌabiꞌuai abomo anina ahaꞌi.
15 Rauhubu nikabena hanona Tirama ena opuere nibaramana,
ia rauhubu peahaꞌi raninai beho atetuakia abomo pateahaꞌi.
16 Weiana buonai ꞌabiꞌuai hanona aꞌikakaumai nimai baraibarai apaꞌuana ihobona,
Aberahamo ꞌabaꞌabana ikoinai kateaꞌina,
rauhubu tikaꞌai haraina haukia mo ahaꞌi,
ia Aberahamo eaꞌikakauma ihobonai tiaꞌikakauma haukia ikoikiai herekiai.
Pokina Aberahamo hanona aika ikoikai hamaka.
17 Puka robenai ṉa terere aihona,
“Au oi hanopaka boꞌona hamakiai nabaoniꞌo.”
Ua buonai Aberahamo hanona aika hamaka Tirama wairanai.
Aberahamo ehore Tirama weiana ꞌari haukia ebamaurinakia abomo aꞌi terama tabakia ebaramanakia hauna eaꞌikakaumana.
18 Tirama Aberahamo miori kebena weiana raona ikoinai anikia ahaꞌi ꞌekanai Aberahamo hanona eaꞌikakauma ena raona ikoinai,
ua buonai ia hanona hanopaka boꞌona hamakiai eao,
Puka robenai eꞌabi ihobona,
“ꞌAbaꞌabamu hanona bihiu ꞌabana ua keboꞌo aiho.”
19 Aberahamo ihauna hanona hinabu hamomo buonai eonobaina matoha ꞌari hauna ꞌabana mai Sara abomo miori kebaramana ꞌekana ahaꞌi,
ia Aberahamo ena aꞌikakauma hanona aꞌi ebaꞌabeꞌabena.
20 Weiana Aberahamo Tirama ena ꞌabiꞌuaiai aona aꞌi ebakaiꞌau kaiꞌauna ena aꞌikakaumai ekori ꞌini weianai etabura Tirama ebanamona.
21 Haeamona eꞌiobi haraina Tirama hanona mai hiabuna ena ꞌabiꞌuai kebabaina.
22 Neiana buonai,
“Tirama Aberahamo ena aꞌikakaumai eba tohana,
bero haunai ebaona.”
23 Ia ebatohana bero haunai ebaona ꞌabina tererena hanona Aberahamo ikupaiana paunai ahaꞌi.
24 Ia aika abomo bero haukai kebaonaka pokina Iesu eka Obiapaka,
ꞌariai ebamikiri muena Tiramana nahaꞌikakaumana paunai.
25 Tirama Iesu ebaibeni aina eꞌari aika eka kiꞌa paunai,
haeamona ebamikiri muena emauri aika bero kebenaka paunai.