Tirama Ikupaiana Keibatoha.
3
Uahomana raninai Iuda haukia ekia namo hanona taba?
Itare ena namo hanona taba?
2 Taeara boꞌokiai.
Kori ꞌuaina hanona Tirama ena ꞌabi Iuda haukia herekiai ehorotina kateꞌimana.
3 Weiana baika ekia aꞌikakauma peahaꞌi raninai aehoma?
Ekia aꞌikakauma ahaꞌi buonai Tirama kipona ena ꞌabiꞌuai aꞌi kebatohana, u?
4 Ua aꞌi kehoma.
Maearima ikoikiai katebaiꞌoi,
ia Tirama ikupaiana keibatoha.
Puka robenai tererena ihobona,
“Emu ꞌabiai kobatohaniꞌo obero.
Weiana kateba bakainiꞌo raninai
kotara haonakia.” Sal 51.4
5 ꞌA aika eka kiꞌa kehore Tirama ena babai berona kebawaira tinana raninai,
taba ṉa kahahoma?
Weiana Tirama puma ꞌekanai nihorotinaka hanona nibeho,
u?
Ahaꞌi.
Ua aꞌi kehoma.
(Neiana hanona maearima ekia raonaraona nahinana.)
6 Ua homana ahaꞌi.
Tirama aꞌi kebero raninai,
hanopaka aea kebabakai aihona?
7 Baika teꞌabi,
“Au eꞌu baiꞌoi pehore Tirama ena ꞌabi tohana pebawaira tinana abomo ena nuabi pebapaꞌuana raninai,
taba buonai au aka kiꞌa pumana kahoaina kiꞌa hauna ꞌabana?”
8 Baika ai tekai ahi ꞌabaeanamai teꞌabi ai hanona ṉa ṯaꞌabi aiho,
“Namo ibaramana paunai kiꞌa akakia kahababai.”
Ekia baiꞌoi pumana katehoaina hanona kenamo.
Hau Ha Aꞌi Ebero Kiꞌa Baha.
9 Uahomana raninai taba ṉa kahahoma?
Aika Iuda hauka hanona hanamo ba rama haeai haukia?
Ahaꞌi ꞌakina.
Pokina Iuda mai rama haeai haukia hanona kiꞌa aonai nahamiaho ꞌabina aba hahinana.
10 Puka Robenai tererena ihobonai,
“Maearima ha aꞌi ebero
kiꞌa baha Tirama wairanai,
tai ha ahaꞌi ꞌakina.
11 Abomo ao bero hauna ha ahaꞌi,
Tirama itabuna hauna ha ahaꞌi.
12 Ikoikiai aba tekaobo aba kiꞌa
aonai tetoto haeamo aka namo
hauna ha ahaꞌi,
tai ha ahaꞌi. Sal 14.1-3
13 Ekia ꞌabi timikia hanona
tekiꞌa matoha ꞌariahana
ikaikau,
maeakia baiꞌoi ꞌabikia
tehinanakia.
Pinakia ꞌabinai hanona ꞌabakia
tibahaiarakia matoha ꞌerau ekia
baꞌari muramurana ꞌabana. Sal 5.9
14 Pinakia hanona ururu mai aomabi
ꞌabikia tebonu. Sal 10.7
15 Ia tinoanoa maearima kateba
haiaranakia mai kateahu ꞌarinakia.
16 ꞌEka tabana kateao hanona
maearima kateba ꞌoatanakia
mai kateba atetuanakia.
17 Abomo baibua taearana hanona
aꞌi teꞌiobina. Isa 59.7, 8
18 Tirama aꞌi titaꞌuai ꞌapuana.” Sal 36.1
19 Aika haꞌiobina rauhubu taba neꞌuahina hanona weiakia rauhubu baꞌanai ṯemiaho haukia nehina benakia,
weianai maearima ekia baꞌame ꞌabikia ahaꞌi,
hanopaka maikoinai Tirama ena bakai aonai katetoto.
20 Tirama wairanai hau ha aꞌi ebero rauhubu ikaꞌai haraina paunai,
ba rauhubu hanona keba ꞌiobinaka aika kiꞌa hauka.
Maearima Keaꞌikakauma Hauna Berona Katehinana.
21 Bariu Tirama maearima bero kebenakia taearana aba ebawaira tinana,
rauhubuai ahaꞌi,
weiana hanona rauhubu mai mahabanai haukia tebatohana.
22 Bero Tirama herenai nimai hanona Iesu Keriso tiaꞌikakaumana haukia ikoikiai katetabu ahina maearima ikoinai herekiai ha aꞌi ehaeai.
23 Pokina ikoikiai aba teaka kiꞌa,
buonai Tirama ena nuabiai tetara kapu.
24 Iamo Tirama ena aokoꞌo hoana ebaibeni ꞌabaea,
ikoinai bero teaꞌina Keriso Iesu paunai,
pokina ia ehore ekawa muenakia.
25 Tirama ehore Iesu euhuna emai hanopakai eꞌari baibua hoanai eao,
Iesu eꞌari eka kiꞌa paunai hauna kahaꞌikakaumana hauka eka kiꞌa kehina hao.
Neiana ebabaina hanona ena bero ebaiha baiha aina.
Aona eaꞌi ꞌinina,
ꞌuainai maearima teaka kiꞌa haukia eiha haonakia puma aꞌi ebenakia.
26 Bariu rani neianai Tirama hoa weiana ebabaina kipona ena bero ebaiha baiha aina,
taeara weianai Iesu tiaꞌikakaumana haukia abomo bero kebenakia.
27 Uahomana raninai taba hauna kahapaina?
Ba taeara tabanai?
Rauhubu ikaꞌainai?
Ahaꞌi.
Taba ha ai ahaꞌi.
Ia aꞌikakauma taearanai.
28 ꞌAbi tohana aika haꞌiobina Tirama maearima aꞌikakaumai bero nibenakia,
ia rauhubu ikaꞌainai ahaꞌi.
29 Tirama hanona Iuda haukia mo ikupaiakia ekia Tirama,
u?
Ia rama haeai haukia ekia Tiramai aꞌi keao,
u?
Ahaꞌi.
Ia rama haeai haukia abokia mo ekia Tirama.
30 Weiana Tirama hanona hamona itare haukia aꞌikakaumai bero kebenakia mai itare ahaꞌi haukia abomo aꞌikakauma ihobonai bero kebenakia.
31 Ua homana raninai aika hanona aꞌikakauma neianai rauhubu nahaba ꞌakaumana,
u?
Ahaꞌi ꞌakina.
Aika hanona rauhubu nahabakori ꞌinina.