Tirama Ena Bakai Berona.
2
Weiana buonai ꞌabiai hau ha behoai nuhorotina haumu,
emu bero ꞌabina ha ahaꞌi.
Oi ꞌabiai hau ha behoai nuhorotina hanona kipomu puma nubeniꞌo.
Pokina ia behoai ohorotina akana ihobonai oi abomo nubabaina.
2 Aika haꞌiobina Tirama hanona mai ena bero ua tibabai aiho haukia behoai kehorotinakia.
3 Weiana oi ꞌabiai hau ha behoai nuhorotina ia akana ihobona nubabaina haumu,
oi nuraonana Tirama behoai kehorotiniꞌo ꞌekanai aba kokapare, u?
4 ꞌAo aehoma aꞌi oꞌiobina Tirama ena namo apaꞌuana weiana ehore eꞌuai ainiꞌo raona kabe taearanai ena namo apaꞌuana,
ena baiha hao mai ena bakiro oiha taꞌerainakia?
5 Ia aomu etubu,
emu raona kabe ahaꞌi paunai oi kipomu emu puma nubararona,
Tirama ena opuere mai ena bero bakai beraurana kekaraꞌau raninai emu puma weia kewaira tina.
6 Tirama kehore maearima ha ha ekia babai ihobohobokiai arakia kebenakia.
7 Maearima baika aka namokiai tibapahihi haukia abomo nuabi mai mariki abomo aꞌi kepua maurina titabuna haukia hanona Tirama kehore mauri banaibanai kebenakia.
8 Ia maearima baika tiani kiꞌa mai ꞌabi tohana tibaoao aina,
aka behokia tiaꞌi taeanakia haukia hanona Tirama ena opuere mai ena puma ahakiai kebaririna.
9 Aka kiꞌa obona tibabaina haukia ikoikiai hanona atetua mai haiara katehoaina Iuda haukia mo ahaꞌi rama haeai haukia abokia mo.
10 Ia aka namona tibabaina haukia ikoikiai hanona Tirama kehore nuabi,
mariki mai baibua kebenakia,
koriꞌuaina hanona Iuda haukia,
muriai hanona rama haeai haukia.
11 Pokina Tirama hanona maearima ha aꞌi nitaina.
12 Mose ena rauhubu kapenai ṯemiaho haukia tiaka kiꞌa hanona weianai aka kiꞌa haiarana kateaꞌina,
ꞌa rauhubu aonai ṯemiaho haukia tiaka kiꞌa hanona rauhubu kebabakainakia.
13 Rauhubu uruna tio ꞌabaeana haukia hanona Tirama wairanai bero aꞌi kateaꞌina,
ia rauhubu akana tibabaina haukia hanona berokia kehinana.
14 Rama haeai haukia herekiai Mose ena rauhubu ahaꞌi,
ia aokiai rauhubu hoana ihobona tebabaina raninai,
rauhubu herekiai ahaꞌi reꞌa,
ia kipokia rauhubuai teao.
15 Ia aokiai rauhubu ꞌabina tererena hauna ekia hoahoai niwaira tina aokia abomo weiana nibatohana,
ekia raonaraona weiana nihore behokia nehinana ꞌao berokia nehinana.
16 Pou namona airoro aina ihobonai,
beraurana kekaraꞌau raninai Tirama kehore maearima ekia raona bunikia kebakainakia Iesu Keriso paunai.
Iuda Haukia Teraonana Rauhubu Kebarainakia.
17 Ia wai kipomi tuꞌabi Iuda haumi,
rauhubuai tukori ꞌini abomo Tirama tuapaina,
18 abomo Tirama taba nenuatae aina hauna toꞌiobina mai bero nimai ꞌekana toꞌiobina pokina wai rauhubu tomarere aina.
19 Turaonana wai hanona mahaꞌiau haukia ibakaꞌa haraikia mai wapurai ṯemiaho haukia ekia ea
20 abomo poꞌo haukia irobekia mai aꞌi temarere haukia ibaꞌiobikia haumi,
pokina rauhubu aonai aotipa mai ꞌabi tohana maikoinai totabu ahinakia.
21 ꞌAbami tubaꞌiobinakia ia aehoma wai kipomi aꞌi tubatohana?
Ṯoiroro aꞌi katebainao,
ia wai tubainao?
22 Tuꞌabi aꞌi katenabau,
ia wai tunabau?
Kaibaꞌuku ꞌarikia aꞌi tuꞌari,
ia wai roꞌea aona tabakia tubainao ainakia?
23 Wai rauhubu nemiaho paunai tuapa,
ia rauhubu tukabena hanona Tirama atana tuaꞌi kiꞌana.
24 Puka robena aonai eꞌabi,
“Wai Iuda haumi paumiai rama haeai haukia Tirama atana tiaꞌi kiꞌana.”
25 Rauhubu kokaꞌai haraina raninai emu itare hanona namo kebeniꞌo,
ia rauhubu kokabena raninai oi hanona ihobona itare aꞌi oaꞌina ꞌabana.
26 Rama haeai hauna ha aꞌi tetarena ia Tirama ena rauhubu ꞌabina kekaꞌai haraina raninai Tirama kehore itare eaꞌina haunai kebaona.
27 Weiana hauaniai aꞌi etarena ia rauhubu ekaꞌai haraina hauna kehore oi Iuda haumu behoai kehorotiniꞌo,
pokina rauhubu tererena hauna heremuai abomo itare oaꞌina ia rauhubu nukabena.
28 Maearima hauaniai ihaihana Iuda hauna ia Iuda hauna tohana ahaꞌi abomo hauaniai itare teaꞌina hanona itare tohana ahaꞌi.
29 ꞌA aona nibamaha mahana hauna ia hanona Iuda hauna tohana,
abomo itare hanona aoai kebabaina Auba Robeai,
ia rauhubuai ahaꞌi.
Maearima uahomana hanona banamo Tirama herenai keaꞌina,
ia maearima herekiai ahaꞌi.