2 Pou namona neiana hanona Tirama ehore aba waꞌi baha eꞌabiꞌuai aina ena mahabanai haukia pinakiai tehinana Puka Robena aonai tererena,

3 ia Nahuna pouna,

eka Obiapaka weiana Iesu Keriso,

hauaniai hanona Davida nininai erama,

4 ia aubana robenai hanona ꞌariai ebamikirina raninai ebatohana mai hiabuna ia hanona Tirama Nahuna.

5 Iesu Keriso paunai mai ia atanai baraibarai apaꞌuana abomo iuhubeau hoana aba taꞌina,

weiana rama haeai haukia baiatakiai maearima ikoikiai kataparinakia aꞌikakaumai aia katekaꞌai.

6 Wai abomimo weia Iesu Keriso ꞌeunai Tirama ehore eaparinakia haukia baiatakiai.

7 Roma ai ṯomiaho Tirama eraonaꞌau ainimi eaparinimi ena maearimai ebaonimi haumi ikoimiai,

Hamaka Tirama mai Obiapaka Iesu Keriso herekiai aokoꞌo hoana abomo baibua katoaꞌina.

8 Eꞌu ꞌabi kori ꞌuaina neiana:

Iesu Keriso atanai eꞌu Tirama nabanamona wai ikoimiai paumiai,

pokina wai emi aꞌikakauma pouna hanopaka ikoinai aba teona.

9 Tirama weiana Nahuna pouna namona nairoro aina aonai taꞌarana ṉaꞌi mai aoꞌu ikoinai hauna eꞌiobina eꞌu bahubaꞌari ai au wai naraonanimi,

10 rani ikoinai eꞌu bahubaꞌari ai Tirama nanoina ena nuataeai taearaꞌu pekaikauna rani ha pawahi paihanimi.

11 Pokina au nanuatae kiꞌa baha kaihanimi,

auba ena beruberu kabaibeni katotabura.

12 Weiana hanona au mai wai kipoka kahabarainaka,

eka aꞌikakaumai ha ha kahataburanaka.

13 Uahoꞌabaꞌu e,

au nanuatae wai katoꞌiobina,

rani boꞌona anuatae kawahi heremi,

buabua katabu ahi ihobona rama haeai haukia baika ekia mauri tebaibeni aihanakia ꞌabana,

ia taba baika tehore tekaiabunaꞌu emaimo bariu.

14 Au hanona pou namona ihinanai ꞌara kahore maearima ikoikiai herekiai,

Helene haukia mai ea ahaꞌi haukia abomo ao ꞌabaea haukia mai aotipa haukia herekiai.

15 Weiana buonai au nanuatae kiꞌa baha wai Roma ai ṯomiaho haumi wairamiai abomo pou namona kairoro aina.

16 Au pou namona aꞌi nahaumaea aina,

pokina ia hanona Tirama ena hiabu,

aꞌikakauma haukia ikoikiai kebamaurinakia koriꞌuaina hanona Iuda haukia,

muriai hanona rama haeai haukia.

17 Pokina pou namona aonai bero Tirama herenai emai hauna ewaira tina,

kahaꞌi ramana aꞌikakaumai keaomo puana,

puka robenai tererena ꞌabana,

“Aka bero hauna hanona aꞌikakaumai kemauri.”

18 Maearima ekia kamuri mai babai kiꞌa paukiai Tirama ena opuere kupai emai ewaira tina,

weiakia ekia babai kiꞌai ꞌabi tohana tihao parena haukia herekiai.

19 Tirama iꞌiobina hanona aba emahanai harai herekiai,

pokina Tirama ehore ebaihanakia.

20 Hanopaka erama popounai emaimo bariu Tirama ꞌeunai aꞌi nahaihanakia tabakia ena hiabu banai banai mai ena auba maurina hanona ia ebabai tabakia aokiai tewaira tina harai teihanakia teꞌiobinakia,

weiana paunai maearima kebuniai hanona taearana ahaꞌi.

21 Tirama teꞌiobina iamo aꞌi teaꞌi taeana abomo aꞌi tebanamona ia hanona Tirama,

ia ekia ao ꞌabaea mai ekia ao poꞌoai wapura ehore aokia ekaiabuna.

22 Ia kipokia teraonana teaotipa,

iamo poꞌo haukiai teao.

23 Miaho banai banai Tiramana ikuti aina tehabona,

ia maearima aubaubakia aꞌi katemiaho banai banai haukia,

roborobo,

mahi,

mai tikara tabakia haukia,

aubaubakia imakiai tebabai tabakia tekuti ainakia.

24 Weiana buonai Tirama ehore aokiai kiꞌa tenuatae ainakia ꞌekanai ehabonakia,

weiana kipokia ekia babai kiꞌa obokia parikia akakia katebabai ha ha herekia.

25 Tirama ena ꞌabi tohana hanona ia tehore baiꞌoi tabanai tebaona,

iamo ꞌekanai hanona taba ebarama tabakia tekuti ainakia taꞌarakia teaꞌi.

Iamo ebabainakia hauna Ia ikupaiana kahabanamona keaomo banai banai.

Amen.

26 Tirama ehore ehabonakia teao ekia babai kiꞌa obokia aonai.

Ekia babiꞌe tehore babiꞌe tenabau ainakia weiana ua aꞌi pehoma hauna tebabaina.

27 Taeara ihobonai hau abomo babiꞌe kipokia hawainibena tehabona,

ia hau tehore hau tenuatae ai kiꞌanakia.

Hau kipokia ꞌabakia herekiai babai kiꞌa obokia tebabai.

Weiana hanona ekia babai kiꞌa ꞌarana kipokia pumana tehoa aina.

28 Ia tehore aokiai Tirama iraona ꞌininai aꞌi tenuatae aina,

weiana Tirama ehore ekia ao ꞌabaeai ehabonakia,

aꞌi patebabai akakia tebabai.

29 Aka kiꞌa obokia haeai haeai aokia tebonu,

babai kiꞌa obokia,

uhore mai raona kiꞌa obokia,

wamuru,

ahuahu,

ꞌau,

baiꞌoi mai ao bahaiara akakiai tebonu.

Ṯeuahiuahi,

30 mai ꞌabiꞌabiai ha ha atakia tiaꞌi kiꞌanakia,

Tirama tiꞌoatana,

tiaiahu ꞌabaea,

tiapa,

abomo tibaroꞌe,

raona kiꞌa obokia ꞌeka baikai tiraonanakia katebabai.

Hamakia mai hinakia aiakia aꞌi tioꞌo.

31 Ia hanona ekia raonaraona ahaꞌi,

ekia ꞌabiꞌuai aꞌi tibatohanakia,

mai maearima herekiai namo ꞌao aokoꞌo aꞌi tiba ihanakia.

32 Tirama ena rauhubu aba teꞌiobina maearima ꞌeka ua homanai ṯemiaho haukia hanona kateꞌari.

Ia kiꞌa weiakia tibabai toꞌo baihanakia abomo maearima baika tibabai raninai tiaonamo ainakia.