Paulo Ena Marere Koriꞌuaina
KORINTO
Haukia Herekiai
Banamo ꞌAbina.
1
Au Paulo,
Keriso Iesu ena iuhubeau hauꞌu Tirama ena nuataeai eaparinaꞌu,
mai aꞌikakaumai uahoꞌabaka Sostene ohi,
2 marere neiana ṯarerena niwahi Tirama ena marea maearimami Korinto aiaranai haumi heremiai,
wai Keriso Iesu aonai etinaꞌanimi eaparinimi Tirama ena robe haumiai katoao,
mai weiakia ꞌeka ikoikiai eka Obiapaka Iesu Keriso atana tiaparina ṯekuti haukia ikoikiai herekiai.
Iesu Keriso hanona ia mai aika eka Obiapaka.
3 Ṯabahubaꞌari Tirama aika Hamaka mai Obiapaka Iesu Keriso ekia aokoꞌo hoana mai baibua katebenimi.
Paulo Namo ꞌAbina Tirama Ebena.
4 Au rani ikoinai Tirama namo ꞌabina nabena wai paumiai pokina Keriso Iesu aonai Tirama ena aokoꞌo hoana ebaihanimi.
5 Pokina Keriso aonai wai hanona taeara ikoikiai aokiai,
emi ꞌabi ꞌabi ikoikiai mai emi ꞌiobi ikoikiai aba ebaobianakia.
6 Keriso pouna tahinana hauna aomiai aba etabura.
7 Ua buonai bariu wai hanona Auba Robe ena beruberu ha aꞌi tokapu aina ia tubaiꞌima keaomo eka Obiapaka Iesu Keriso kemai mue.
8 Iesu kehore kebakori ꞌininimi keaomo puanai,
ba ia ena mai wapunai wai hanona beho ahaꞌi haumiai katoao.
9 Tirama hanona aia ibabua ꞌauna hauna,
ia ehore wai eaparinimi katoao Nahuna Iesu Keriso aika eka Obiapaka ohi katobahaeamo.
Tirama Ena Marea Haukia Baiatakiai Hoa Tihore.
10 Uahoꞌabaꞌu e,
eka Obiapaka Iesu Keriso atanai nanoinimi,
ikoimiai emi ꞌabi ꞌabi kehamomo weiana baiatami aꞌi kepaꞌa,
ia katobahamomo harai aomiai abomo emi raonaraonai.
11 Uahoꞌabaꞌu e,
Koloe ena itu haukia baika tehina benaꞌu wai baiatamiai hanona baiara baiara tirama.
12 Au taba naꞌuahina hauna anina neiana,
ha nuꞌabi notibaha,
“Au hanona Paulo ꞌeuna,”
ha nuꞌabi,
“Au hanona Apolo ꞌeuna,”
ha nuꞌabi,
“Au hanona Peteroa ꞌeuna,”
ha nuꞌabi “Au hanona Keriso ꞌeuna.”
13 Ba Keriso hanona tehobina,
ꞌu?
Paulo wai paumiai matiu ibiri ropo ubinai teahu ꞌarina,
ꞌu?
ꞌAo Paulo atanai wai ꞌuere robe toaꞌina,
ꞌu?
14 Tirama namo ꞌabina nabena pokina au wai ha aꞌi abaꞌuere robenimi,
ia Krispo mai Gaio mo abaꞌuere robenakia.
15 Weiana buonai hau ha aꞌi koꞌabi oi hanona au ataꞌuai oꞌuere robe.
16 ꞌE,
Stefano ena itu haukia abomo abaꞌuere robenakia,
ia murinai aꞌi naꞌiobina hau ha abaꞌuere robena ꞌao ahaꞌi.
17 Keriso euhunaꞌu hanona baꞌuere robe paunai ahaꞌi ia pou namona kairoro aina,
ba maearima ena aobero ꞌabinai aꞌi kairoro,
pokina Keriso ena ꞌari matiu ibiri ropo ubinai hauna hiabuna aꞌi meahaꞌi marikina.
Keriso Hanona Tirama Ena Hiabu Mai Ena Aobero.
18 Keriso ena ꞌari matiu ibiri ropo ubinai pouna hanona aubai teꞌari haukia herekiai hanona poꞌo ꞌabinai niao,
ia aika nibamaurinaka hauka herekai weiana hanona Tirama ena hiabu.
19 Puka robenai aba tererena,
“Aobero haukia ekia aobero
kabapururuna,
mai aotipa haukia
ekia aotipa hanona taba ahaꞌiai
kabaona.” Isa 29.14
20 Ba aobero hauna hanona aeꞌe?
Marere harai hauna hanona aeꞌe?
Rani neianai ꞌabi eaotipaina hauna hanona aeꞌe?
Tirama ehore hanopaka haukia ekia aotipa hanona poꞌoai ebaona.
21 Weiana Tirama ena aobero hanona nahomana,
hanopaka haukia ekia aobero ai hanona Tirama aꞌi kateꞌiobina,
ia Tirama ena aonamo hanona iroro weiana poꞌo ꞌabinai tibaona haunai kateaꞌikakauma haukia kebamaurinakia.
22 Iuda haukia ekia nuatae hanona hoa apaꞌuakia kateihanakia ba Tirama katebatohana,
ꞌa Helene haukia hanona aobero titabuna.
23 Ia ai hanona Keriso matiu ibiri ropo ubinai eꞌari hauna ṯairoro aina,
weiana hanona Iuda haukia nibakaikai reanakia mai rama haeai haukia herekiai hanona poꞌoai tibaona.
24 Ia weiakia Iuda haukia mai Iuda haukia ahaꞌi haukia baiatakiai Tirama eaparinakia haukia herekiai Keriso hanona Tirama ena hiabu abomo Tirama ena aobero.
25 Tirama ena taba weiana poꞌoai tibaona hauna ehore maearima ekia aobero ekahaona,
abomo Tirama ꞌeunai ꞌabeꞌabe tabanai tibaona hauna ehore maearima ena tabura ekahaona.
26 Uahoꞌabaꞌu e,
wai maearima aea homamiai Tirama eaparinimi hauna katoraonana,
maearima ekia ihaihai hanona boꞌomi aꞌi toaobero,
boꞌomi aꞌi totabura,
abomo boꞌomi obiai aꞌi torama.
27 Ia Tirama ehore hanopaka haukia wai poꞌo haumiai tibaonimi haumi etinaꞌanimi aobero haukia keba haumaeanakia,
haeamona wai ꞌabeꞌabe haumiai tibaonimi haumi etinaꞌanimi tabura haukia keba haumaeanakia.
28 Hanopaka haukia maearima weiakia tibaꞌabaea ꞌabaeanakia haukia ṯeiha taꞌereainakia taba ahaꞌi ai tibaonakia haukia Tirama ehore etinaꞌanakia,
maearima weiakia hanopaka haukia tihore tibapaꞌuanakia haukia keaꞌi kiꞌanakia.
29 Weiana paunai maearima ha Tirama wairanai keapa ꞌekana ahaꞌi.
30 Ia wai hanona Tirama emaiainimi Keriso Iesu ohi ebahamomonimi.
Keriso hanona Tirama herenai emai eka aoberoai eao,
ba ia haunai hanona habero harobe mai kiꞌa ꞌekanai ebamaurinaka.
31 Weiana paunai Puka robenai aba ererena,
“Niapa hauna hanona Obiapaka
meapaina.” Ier 9.24