Paulo Keriso Matiu Ibiriropoai Hauna Robana Eahuna.
2
Uahoꞌabaꞌu e,
au awahi heremi Tirama ena ꞌabi bunikia airoro ainakia raninai,
ꞌabi aotipakiai mai maearima ekia aobero ai aꞌi airoro.
2 Pokina wai kipokia hamiaho aonai au aoꞌu aꞌiaꞌi haraina taba ha aꞌi kaꞌiobina ia Iesu Keriso mai ena ꞌari matiu ibiri ropo ai hauna mo kaꞌiobina.
3 Au awahi naia hamiaho aonai mai ꞌabeꞌabeꞌu mai taꞌu taꞌuꞌu mai ꞌururu ꞌururuꞌu.
4 Eꞌu ꞌabi mai eꞌu iroro hanona maearima ena aobero mai bahiahi ꞌabikiai ahaꞌi,
ia Auba Robe ena hiabu ai abawaira tinanakia.
5 Pokina wai emi aꞌikakauma hanona maearima ekia aobero ai aꞌi kekori ꞌau,
ia Tirama ena hiabu ai kekori ꞌau.
Tirama Ena Aobero.
6 Ia aꞌikakaumai tetabura haukia herekiai aobero ꞌabikia tairoro ainakia.
Aobero weiana hanona hanopaka neiana ꞌeuna ahaꞌi ꞌao hanopaka tipoki aina haukia ꞌeukia ahaꞌi,
poki haukia neiakia hanona ekia hiabu katepua.
7 Ia ai hanona Tirama ena aobero weiana maearima herekiai ebuni hauna ṯahinana,
weiana hanopaka aꞌi erama baha aonai Tirama hanona aobero weiana aba ebaꞌoruna aika eka nuabiai keao.
8 Aobero weiana hanona hanopaka tipoki aina haukia aꞌi teꞌiobina,
pateꞌiobina raninai Tirama ena nuabiai nemiaho Obiapakana matiu ibiri ropo ubinai aꞌi pateahu ꞌarina.
9 Puka robenai tererena ꞌabana,
“Taba weiana kerama hauna
hau ha aꞌi eihana,
ꞌao ꞌuruna aꞌi eona,
ꞌao hau ha aꞌi eraonana hauna
Tirama aba ebaꞌoruna weiakia ia
tiraonaꞌau aina haukia ꞌeukia.” Isa 64.4
10 Ia Tirama hanona ena Auba Robe ai taba bunina weiana aika herekai ebawaira tinana.
Auba Robe hanona taba ikoikiai nitabunakia buonai Tirama ena raona bunikia abomo ketabu ahinakia.
11 Tai ha maearima ha ena raona aꞌi neꞌiobina,
ia kipona aubana nihore ena raona ikoinai neꞌiobinakia.
Ihobona mo Tirama ena Auba hanona Tirama ena raona ikoinai eꞌiobinakia.
12 Aika hanona hanopaka ena raonaraona aꞌi haꞌina,
ia Auba Robe weiana Tirama herenai emai hauna haꞌina,
ua buonai Tirama ena aokoꞌo hoana ebenaka tabakia ikoikiai kahaꞌiobinakia.
13 Taba neiakia ai ṯahina haukia hanona maearima ena aobero ai teba ꞌiobinamai ꞌabikiai aꞌi ṯaꞌabi,
ia ꞌabi weiakia Auba Robe ebaꞌiobinamai haukiai ṯaꞌabi.
Auba tabakia hanona Auba Robe teaꞌina haukia herekiai ṯahinanakia.
14 Maearima aonai Auba Robe ahaꞌi hauna Tirama ena Auba Robe herenai timai tabakia ikoikiai aꞌi niaꞌi taeanakia,
taba weiakia ia herenai hanona poꞌo tabakiai nibaonakia,
abomo obokia aꞌi niobo,
pokina weiakia hanona Aubai mo kaha ꞌiobinakia.
15 Maearima aonai Auba Robe nemiaho hauna taba ikoikiai anikia keꞌiobi,
ia hau ha aonai Auba Robe ahaꞌi hauna hanona maearima weiana aonai Auba Robe nemiaho hauna ena mauri obona aꞌi keobo.
16 Puka robenai tererena ꞌabana,
“Tai Obiapaka ena raona eꞌiobi
ba ia kehore Obiapaka bairobe
kebena?”
Isa 40.13
Iamo aika hanona Keriso ena raona aba haꞌina.