Hoa Hore Tirama Ena Marea Aonai.
3
Uahoꞌabaꞌu e,
maearima weiakia Auba Robe ai tebonu haukia herekiai aꞌabi ꞌabana hanona wai heremiai aꞌi kahinanakia,
ia wai hanona hanopaka neiana haumi ꞌabanai nahina benimi,
matoha miori ꞌoruꞌoruna Keriso aonai ꞌabana.
2 Wai baꞌiobi abenimi hanona ihobona ꞌae ꞌabana weianai abanianinimi ia pohama pahihikiai ahaꞌi,
pokina wai hanona pohama weiana ianinai aꞌi tutabura baha,
bariu abomo katoana hanona aꞌi ketaina.
3 Pokina wai haumi hanona hanopaka haukia ekia miaho ai ṯomiaho ohomo,
wai baiatamiai wamuru mai baiara baiara ṯemiaho,
ba babai neiakiai hanona wai hanopaka ꞌeunai tuao,
ena miaho paipanai ṯomiaho.
4 Wai baiatamiai ha notibaha,
“Au hanona Paulo murinai nakaꞌa,”
ha nuꞌabi “Au hanona Apolo murinai nakaꞌa.”
Weiana wai hanona hanopaka haukia ekia babai tubabaina.
5 Ba Apolo hanona tai,
mai Paulo abomo tai?
Ai hanona Tirama taꞌarana taꞌi haumai,
ai emai aka haunai hanona wai tohore Tirama tuaꞌikakauma,
ai ha ha hanona Obiapaka aka ebenamai hauna mo ṯababaina.
6 Au hanona uho abatona,
Apolo hanona beiai eheina,
ia Tirama ehore uho ebaꞌomuna.
7 Ba batobato hauna mai hei hei hauna hanona aꞌi kahaba apaꞌuanakia,
ia Tirama mo kahaꞌi taeana pokina ia nihore taba weiakia nibaꞌomunakia.
8 Batobato hauna mai hei hei hauna ekia aka hanona aꞌi tehaeai,
Tirama kehore ha ha ekia aka ihobonai ꞌarakia kebenakia.
9 Ai tararua hanona Tirama ena aka haumai,
wai hanona Tirama ena uma haeamona ena itu.
10 Tirama ibeni ebenaꞌu ihobonai au hanona itu bakori harai haunai aeao itu kupuana aba abaꞌoruna,
ba baika hanona weiana ahanai itu tirobena,
iamo itu katerobena hanona aea katerobe aihona hauna kateraona harai ꞌuaina.
11 Pokina Tirama hanona aba Iesu Keriso weiana ebakorotina itu kupuanai eao,
ua buonai hau ha itu kupuana haeai ha aꞌi kebakorotina.
12 Itu kupuana ahanai hanona maearima baika gold,
silba ꞌao pihara ꞌimarekiai itu tirobena,
ia baika hanona matiu ai ꞌao tubu ai ꞌao aho ai itu tirobena.
13 Ia maearima ha ha ekia aka hoana hanona bakai wapuna weiana kehore kebawaira tinanakia,
wapu weiana hanona mai irubana kemai maearima ikoinai ekia aka keakabi ahinakia mai irubai kehobonakia ekia aka ena namo hauna kewaira tina.
14 Itu kupuana weiana ahanai maearima ha ha taba tebabai haukia irubai aꞌi kateꞌara ꞌakauma raninai ia ekia aka hanona ꞌarakia kateaꞌi.
15 Ia hau ha ena aka weiana iruba kebaꞌara ꞌakaumana raninai ia hanona kekapu,
iamo ia kipona hanona kemauri ihobona ia hanona iruba aonai ebeau ahi.
16 Toꞌiobina wai hanona Tirama ena marea robe abomo Tirama Aubana weiana hanona wai aomiai nemiaho.
17 Hau ha Tirama ena marea robe keaꞌi kiꞌana raninai Tirama kehore hau weiana keaꞌi kiꞌana,
pokina Tirama ena marea robe hanona erobe ba wai naiami hanona marea robe weiana.
18 Kipomi aꞌi tomoꞌoinimi.
Baiatamiai hau ha niraonana ia hanona eaotipa kiꞌa baha hanopaka neiana maurina aonai raninai,
ia hanona kipona poꞌo haunai kebaona,
weiana ia hanona aotipa hauna tohanai keao.
19 Pokina hanopaka neiana aotipana hanona poꞌo tabana Tirama wairanai.
Puka robenai ṉa terere aihona,
“Tirama ehore kipokia tiraonana
teaotipa haukia ekia aotipai
ebatoꞌonakia.” Iob 5.13
20 Haeamona etibaha,
“Obiapaka hanona eꞌiobina
aotipa haukia ekia raona hanona
anikia ahaꞌi.” Sal 94.11
21 Weiana paunai maearima ha aꞌi kahapaina.
Taba ikoikiai hanona wai ꞌeumi.
22 Paulo ꞌao Apolo ꞌao Petero,a
mai hanopaka neiana ꞌao mauri ꞌao ꞌari,
mai bariu tirama tabakia ꞌao wairai katerama tabakia,
ikoikiai hanona wai ꞌeumi,
23 ba wai hanona Keriso aonai ṯomiaho,
Keriso hanona Tirama aonai nemiaho.