Keriso Ena Iuhubeau Haukia.
4
Ua buonai maearima hanona ai Keriso ena aka haumai abomo Tirama ena raona ꞌabikia bunikia iꞌimakia haumaiai katebaonamai.
2 Aka uahomana iꞌimana hauna hanona poki hauna kebatohana ena aka kebabai haraina mai aona ikoinai.
3 Ia bariu wai ꞌao maearima ha bakai ai pehorotinaꞌu hanona aꞌi naraona apaꞌuana,
haeamona au kipoꞌu abomo bakai ai aꞌi nahorotinaꞌu.
4 Au kipoꞌu behoai aꞌi nahorotinaꞌu,
ia hoahoa weiana hauna hanona au aꞌi niba beronaꞌu,
Obiapaka mo kipona au kebabakainaꞌu.
5 Weiana paunai bakai ranina aꞌi nimai baha aonai hau ha bakai ai aꞌi katohoroti bahana katobaiꞌima keaomo Obiapaka kemai,
ba ia kehore weiakia wapurai tebuni tabakia eai kebakarahinakia,
abomo maearima aokiai tebuninakia haukia kebawaira tinanakia.
Ba rani weianai maearima ha ha Tirama herenai banamo ꞌabina kateaꞌina.
6 Uahoꞌabaꞌu e,
wai paumiai au mai Apolo ohi ibabataimaiai ꞌabi neiakia ahinanakia,
pokina ai heremai ai “Puka robenai tererena hauna aꞌi katokahaona” ꞌabina anina katoꞌiobi haraina,
hau ha aꞌi katoapaina mai hau ha aꞌi katobakiꞌana.
7 Tai ehore baika baiatakiai wai ebapaꞌuanimi?
Abomo taba naiana heremiai hauna Tirama aꞌi ebenimi tabana ha,
u?
Taba weiana toaꞌina hauna Tirama ebenimi raninai aehoma buonai tuapa?
8 Wai turaonana nuatae tabakia ikoinai aba toaꞌi.
Turaonana wai aba taba heremiai teboꞌo haumi.
Wai turaonana wai hanona aba obia haumiai toao ia ai hanona ahaꞌi.
Au naraonana wai patobia toha hanona penamo,
ba ai wai kipokia pahaobia oioi.
9 Ia au naraonana Tirama ehore ena iuhubeau haumai hanona muri ꞌakinai ehorotinamai,
ihobona kiꞌa haukia weiakia toꞌu wairakiai kateahu ꞌarinakia.
Ai hanona baiha baiha tabakiai kataeao hanopaka maikoina aonai maearima mai aneru ikoikiai katearurunamai.
10 Wai turaonana Keriso paunai ai hanona poꞌo ai ṯaeao,
ia wai Keriso aonai hanona tuaotipa.
Wai turaonana ai hanona ṯaꞌabeꞌabe,
ia wai hanona tutabura,
wai hanona timariki ainimi,
ia ai hanona ṯeꞌuahinamai.
11 Rani ikoinai emai mo bariu ai hanona mareꞌa ṯaꞌari,
ꞌakomai tiꞌororo,
emai habuni ahaꞌi,
tiahunamai,
emai miaho ꞌekana ahaꞌi ṯaruao aruao.
12 Ai hanona kipomai taburamai tohanai ṯamiaho.
Maearima ṯeururu ainamai raninai ṯabanamonakia,
tiꞌoatanamai raninai ṯabakiro,
13 atamai tiaꞌi kiꞌanakia raninai ai hanona ṯaꞌabiꞌabi harai ia herekiai.
Ai hanona ihobona hanopaka haena mai taba ikoikiai hamarakia ai tibaonamai emai mo bariu.
14 Au ꞌabi neiakia narerenakia hanona wai kaba haumaeanimi paunai ahaꞌi,
ia wai eꞌu raonaꞌau miorimi paunai narobenimi katoraona ꞌinina aꞌi katoapa.
15 Heremiai ibaꞌiobimi haukia peboꞌo kiꞌa Keriso aonai,
ia hamami hanona aꞌi keboꞌo.
Ia pou namona airoro aina mauri toaꞌina paunai au hanona hamami ai aeao Keriso Iesu aonai.
16 Weiana buonai nanoinimi,
au eꞌu babai ihobokia katobabai.
17 Neiana paunai Timoteo nauhuna niwahi heremi,
ia hanona au eꞌu raonaꞌau miorina mai ena aꞌikakauma Obiapaka aonai.
Ia kehore eꞌu mauri taearana Keriso Iesu aonai amiaho aina hauna weiana ꞌeka ikoinai aeao Tirama ena marea aokiai abaꞌiobi hauna wai kebaraona ꞌininimi.
18 Baiatamiai baika hanona tiapa pokina tiraonana au aꞌi kawahi mue heremi.
19 Ia Obiapaka kenuatae raninai,
au hanona aba kawahi heremi,
ba au kipoꞌu naiakia tiapa haukia ekia hiabu taba katebabai hauna kaꞌiobina,
ia taba taba ṯeꞌuahi haukia robakia aꞌi kahunakia.
20 Pokina Tirama ena obia aiarana hoahoana hanona ꞌabiꞌabi ꞌabaeakiai ahaꞌi,
ia mai hiabuna nemiaho.
21 Wai taba ṯonuatae?
Imaꞌu mai matiuna kawahi kababeronimi,
ꞌao raonaꞌau mai ꞌaiaunu hoahoanai kawahi heremi?