Nabau Kiꞌa Tirama Ena Marea Haukia Baiatakiai Erama.
5
Bariu emi babai hanona pouna aba aona wai baiatamiai nabau kiꞌa hoana erama hau ha hinana iꞌirina ohi tinabau,
ba babai weiana hanona babai kiꞌa obona maearima atapakai haukia abomo ua aꞌi tibabai aiho.
2 Ia wai hanona tuapamo,
ia aꞌi tuhai,
hau neiana baiatamiai ua ebabai aiho hauna ibakarahina robana patoahuna penamo.
3 Au wai baiatamiai ahaꞌi,
iamo raonaraonai hanona au aba wai heremiai,
ba hoa weiana ebabaina hauna hanona aba puma abena ꞌabana ihobona matoha au aba naia heremiai.
4 Eka Obiapaka Iesu atanai katotoꞌu raninai au abomo raona raonai aba naia wai kipokia,
eka Obiapaka Iesu ena hiabu kewaira tina herekai,
5 ba maearima naiana hauna Satani kahabena,
ia hauanina kiꞌa obona keaꞌi kiꞌana ia aubana hanona kemauri Obiapaka ena mai raninai.
6 Wai tuapa hanona aꞌi ebero,
wai aba toꞌiobina bakupu muramurana papana ꞌaki kehore parawa maikoina kebakupuna ihobona kiꞌa papana kehore mauri maikoina keaꞌi kiꞌana.
7 Wai bakupu muramurana ꞌaiꞌaina weiana kiꞌa ꞌabana katoneꞌena raninai wai hanona parawa mahamahana weiana aonai bakupu muramurana ahaꞌi haunai katoao.
Pokina aika eka Kabanai tatuna mamoena Keriso weiana hauna aba teahu ꞌarina eka kiꞌa iaꞌiobokia paukiai,
weiana buonai wai hanona aomiai bakupu muramurana ahaꞌi haumiai toao.
8 Weiana paunai aika eka Kabanai tatuna kahababaina parawa aonai bakupu muramurana ahaꞌi haunai,
pokina bakupu muramurana ꞌaiꞌaina hanona kiꞌa mai babai kiꞌa obokia ebenaka,
ia parawa weiana aonai bakupu muramurana ahaꞌi hauna hanona raona bero mai ꞌabi tohana parawana.
9 Eꞌu marere weiana arerena hauna aonai aba ahina benimi,
nabau haukia kipokia hanona aꞌi katobahaeamo.
10 Au aꞌi natibaha hanopaka maearimakia neiakia tinabau,
tianikiꞌa,
tibainao,
mai kaibaꞌuku ṯekuti ainakia haukia kipokia aꞌi katobahaeamo.
Herekiai katopihi raninai wai hanona hanopaka neiana katohabona katoꞌari.
11 Au wai narere benimi natibaha,
wai baiatamiai hau ha kipona netibaha,
ia hanona aꞌikakauma hauna iamo ninabau,
niani kiꞌa,
kaibaꞌuku nekutiai,
niꞌabi kiꞌa,
neinu ꞌari,
mai nibainao,
maearima uahomana hauna kipokia aꞌi katoaniani haeamo ꞌapua.
12 Atapakai ṯemiaho haukia aꞌi kababakainakia pokina weiana hanona au eꞌu aka ahaꞌi.
Ia wai emi aka hanona Tirama ena marea aonai ṯemiaho haukia katoba bakainakia.
13 Tirama kehore atapakai ṯemiaho haukia kebabakainakia.
Puka robenai eꞌabi etibaha,
“Aka kiꞌa hauna hanona baiatamiai katobakarahina.”