ꞌAbaka Aꞌi Kahaba bakainakia Atapaka Haukia Wairakiai.
6
Wai aꞌikakauma haumi baiatamiai hau ha uahoꞌabana ohi tiatetua raninai,
aehoma buonai niaoaina atapaka haukia wairakiai tibabakaina?
Ia taba buonai aꞌi niaoaina aꞌikakauma haukia herekiai aꞌi tibaberona?
2 Wai aba toꞌiobina Tirama ena maearima hanona hanopaka maearimakia kateba bakainakia,
ba wai hanopaka maearimakia katoba bakainakia haumi aehoma buonai atetua papakia baika baiatamiai hanona aꞌi tuba beronakia?
3 Wai aba toꞌiobina wairai aika hanona aneru kahaba bakainakia.
Ua buonai ꞌabi tohana mauri neiana tabakia kahaba beronakia hanona ketaina.
4 Atetua uahomakia heremiai tirama raninai taba buonai tuaoainakia bakai haukia weiakia Tirama ena mareai atakia ahaꞌi haukia herekia?
5 Au ṉa naꞌabi aiho hanona wai haumaea hoahoakia tobabai,
naia wai baiatamiai aobero hauna ha nemiaho raninai,
ia pehore aꞌikakauma haukia naiakia pebaberonakia.
6 Ia aꞌikakauma hauna ha nihore ꞌabana niꞌoatana ba bakai ꞌekana niaoaina,
wai tuhore atapaka haukia wairakiai ua tubabai aiho.
7 Weiana paunai wai aꞌikakauma haumi baiatamiai atetua uahomana tubabaina raninai ikoimiai hanona aba toꞌeho.
ꞌAbina ahaꞌi,
tibabehonimi ꞌao tiꞌoinimi reꞌa patobapahihi hanona penamo.
8 Iamo uahoꞌabami herekiai tubeho abomo tuꞌoinakia,
herekiai tubabai kiꞌa hanona aꞌi enamo.
9 Wai aba toꞌiobina aka kiꞌa haukia hanona Tirama ena obia aiaranai aꞌi katetoto.
Ia aꞌi temeꞌoinimi,
weiakia nabau haukia,
kaibaꞌuku ṯekuti aina haukia,
maearima atawakia tinabauai haukia,
mai hau rua tinabau,
babiꞌe rua tinabau haukia,
10 bainao haukia,
ani kiꞌa haukia,
inu ꞌari haukia,
ꞌabi kiꞌa haukia,
kakikaki haukia,
weiakia hanona ha Tirama ena obia aiaranai aꞌi ketoto ꞌapua.
11 Wai baika abomo ꞌuainai uahomami,
ia bariu hanona Obiapaka Iesu Keriso atanai mai eka Tirama ena Aubai emi kiꞌa aba eutu obonakia,
aba ebarobenimi,
abomo aba bero ebenimi.
Hauanimi Hanona Tirama Ibanuabina Akana Katobabaina.
12 Hau ha keꞌabi ketibaha,
“Au taba ikoikiai kababai hanona ketaina,”
ꞌabi tohana,
iamo ikoikiai hanona aꞌi tenamo heremiai.
“Taba ikoikiai kababai hanona ketaina,”
ia weiakia ha hanona au eꞌu mauri aꞌi kepoki aina.
13 Pohama hanona moꞌoru ꞌeuna,
mai moꞌuru hanona pohama keaꞌina.
Weiana hanona ꞌabi tohana,
iamo Tirama kehore terarua kebapururunakia.
Hauanika hanona nabau tabanai aꞌi keao,
pokina hauanika hanona Obiapaka ꞌeuna,
mai Obiapaka hanona hauanika keꞌimana hauna.
14 Tirama ehore ena hiabuai Obiapaka Iesu ꞌariai ebamikiri muena,
ihobonai aika abomo hiabu weianai kebamikirinaka.
15 ꞌAbi tohana toꞌiobina wai ha ha hauanimi hanona Keriso hauanina ꞌeteꞌetekia tubahamona hauani hamonai tuao.
Ba au aꞌi kahore Keriso hauna ꞌeteꞌetena ha aꞌi kaeaoaina nabau babiꞌena ohi aꞌi kabahaeamona.
Ahaꞌi ꞌakina.
16 Wai toꞌiobina hau ha nabau babiꞌena ohi tibahaeamo hanona terarua hauani hamona,
pokina Puka robena aonai ṉa terere aihona,
“Rua tibahamomo hanona hauani hamona.”
17 Ia hau ha Obiapaka ohi tibahaeamo hauna hanona terarua aubai hanona hamona.
18 Nabau herenai katoꞌuru,
pokina hau ha kiꞌa haeai haeai nibabai ikoikiai hanona ia kipona hauanina aꞌi niaꞌi kiꞌana,
ia nabauai hanona kipona hauanina niaꞌi kiꞌana.
19 Wai aba toꞌiobina hauanimi hanona Auba Robe ena marea robe,
ia hanona wai aomiai nemiaho,
Tirama ehore Auba Robe ebenimi.
Ua buonai wai kipomi aꞌi katopoki ainimi.
20 Pokina Tirama hanona aba ekawanimi mai ꞌarami.
Ua buonai hauanimiai katobabai tabakia ikoikiai aokiai hanona Tirama nuabina katobawaira tinana.