Hawainibe ꞌAbiꞌabina.
7
Bariu taba weiakia emi marereai tobakai bakai ainakia haukia ꞌarakia nabamuenakia.
Hau aꞌi patehawainibe hanona penamo.
2 Ia nabau ꞌabaea niboꞌo kiꞌa paunai hau hanona kipona atawana tohana herenai kemiaho,
abomo babiꞌe hanona kipona atawana tohana herenai kemiaho.
3 Hau kehore atawana herenai ena hawainibe hoana kebabaina,
ihobona mo babiꞌe abomo kehore atawana herenai ena hawainibe hoana kebabaina.
4 Babiꞌe hanona kipona hauanina aꞌi kepoki aina ia atawana abomo kepoki,
ihobona mo hau kipona hauanina aꞌi kepoki aina,
ia atawana abomo kepoki.
5 Atawami herenai hauanimi aꞌi katoubo aina ia torarua aomi etaina hanona katomiaho ꞌabaea rani papana,
hauanimi katerobe bahubaꞌari paunai,
ba murinai katobahamomo mue,
weiana Satani ꞌekana aꞌi katohorena aꞌi mehobonimi,
pokina hauanimi katoꞌima haraina aꞌi ketaina paunai.
6 Au ꞌabi neiana nahinana heremiai hanona rauhubu ꞌabina ahaꞌi ia baraibarai ꞌabina.
7 Au eꞌu nuatae maearima ikoinai au ihoboꞌuai pateao aꞌi patehawainibe.
Ia Tirama hanona ibeni ha ha ebenaka,
ha hanona ena ibeni neiana ebena aꞌi kehawainibe,
ha hanona ena ibeni weiana ebena kehawainibe.
8 Bariu hanona maearima weiakia aꞌi tihawainibe haukia mai babiꞌekia,
wapukia mai hau koaekia nahina benakia.
Aꞌi katehawainibe katemiaho ꞌabaea au ꞌabana hanona enamo.
9 Iamo ia kipokia hauanikia kateꞌima haraina aꞌi ketainakia raninai,
katehawainibe.
Katehawainibe hanona enamo ba nabau raona raonana weiana ekia mauri aꞌi meaꞌi kiꞌana.
10 Tohawainibe haumi nahina benimi,
ꞌabi neiana hanona au aiaꞌu ahaꞌi ia Obiapaka aiana.
Babiꞌe hanona atawakia herekiai aꞌi katekaobo ꞌabaea.
11 Ekaobo babiꞌena hanona ibaubo kemiaho,
ꞌao ahaꞌi raninai haeamona kemue keao atawana herena.
Hau abomo atawana aꞌi kebakarahina.
12 Harina ikoimiai e,
neiana Obiapaka ena ꞌabi ahaꞌi ia au wai haiamiai nahinana.
Aꞌikakauma hauna ha hanona aꞌi niaꞌikakauma babiꞌena eatawana,
ba babiꞌe weiana nenuatae atawana ohi katemiaho raninai,
hau weiana atawana aꞌi kebakarahina.
13 Aꞌikakauma babiꞌena ha aꞌi niaꞌikakauma hauna eatawana,
ba hau weiana nenuatae atawana ohi katemiaho raninai,
babiꞌe weiana atawana aꞌi kebakarahina.
14 Aꞌi niaꞌikakauma hauna atawana aꞌikakauma babiꞌena ohi tebahamomo paunai hau weiana aba erobe,
mai aꞌi niaꞌikakauma babiꞌena atawana aꞌikakauma hauna ohi tebahamomo paunai ia aba erobe.
Ia ua aꞌi pehoma raninai,
nahumi hanona pateꞌopu Tirama wairanai,
ia hoa weiana paunai nahumi hanona aba terobe.
15 Ia aꞌi niaꞌikakauma hauna ꞌao babiꞌena nenuatae atawana aꞌikakauma babiꞌena ꞌao hauna kehabona raninai aꞌi katokaiabuna,
hoa ṉa homakia aokiai aꞌikakauma hauna ꞌao babiꞌena buona aꞌi kehoaina.
Tirama hanona aika eaparinaka baibuai kahamiaho.
16 Aꞌikakauma babiꞌemu e,
oi aꞌi oꞌiobina atawamu paꞌe oi paumuai mauri keaꞌina,
abomo aꞌikakauma haumu e,
oi aꞌi oꞌiobina atawamu paꞌe oi paumuai mauri keaꞌina.
Oi Aea Homamuai Tirama Eapariniꞌo Hanona Uahomamu Komiaho.
17 Maearima ha ha Obiapaka ia ebena maurina ihobonai,
abomo ha ha Tirama eaparinakia maurina ihobonai katemiaho.
Rauhubu ꞌabina neiana hanona Tirama ena marea haukia ikoikiai herekiai nabaꞌiobi aina.
18 Aba tetarena hauna Tirama ena apari eaꞌi taeana raninai ena itare aꞌi kebunina,
ia aꞌi tetarena hauna Tirama ena apari eaꞌi taeana raninai katetarena raonana aꞌi keraonana.
19 Tetarena ꞌao aꞌi tetarena hanona taba apaꞌuana ahaꞌi.
Ia taba apaꞌuana hanona Tirama ena rauhubu mo kahakaꞌai harainakia.
20 Maearima ha ha mauri weiana temiaho aina aonai Tirama eaparinakia ihobonai katemiaho.
21 Oi taꞌaraꞌi haumu aonai Tirama eapariniꞌo raninai,
weiana aomu aꞌi kearoꞌari,
ia irubumu ranina ha kehaea raninai weiana koaꞌi taeana.
22 Taꞌaraꞌi hauna weiana Obiapaka ehore eaparina hauna hanona taꞌaraꞌi hauna ahaꞌi Obiapaka aonai.
Ihobona mo,
maearima taꞌara aꞌi niaꞌi hauna weiana Keriso ehore eaparina hauna hanona Keriso ena taꞌara iaꞌina hauna.
23 Wai hanona Tirama aba ekawanimi mai ꞌarami rarina,
paunai maearima ꞌeukiai aꞌi katoao.
24 Uahoꞌabaꞌu e,
ha ha mauri weiana tomiaho aina aonai eaparinimi ihobonai uahomami Tirama kipokia katomiaho.
Aꞌi Tehawainibe Haukia Ekia ꞌAbi.
25 Bariu aꞌi tihawainibe maearimakia ꞌabiꞌabina hanona neiana.
Obiapaka ena ꞌabi ahaꞌi ia au eꞌu ꞌabi wai heremiai nahinana.
Ia Obiapaka ena aokoꞌoai aobero ebenaꞌu paunai wai katobatohanaꞌu.
26 Bariu hanona atetua ranikia,
ua buonai au naraonana wai aea ṯomiaho aiho uahomanai mo katomiaho hanona kenamo.
27 Ohawainibe haumu atawamu aꞌi kobakarahina,
ia aꞌi ohawainibe haumu hawainibe aꞌi koraonana.
28 Ia kohawainibe raninai oi kiꞌa aꞌi nubabaina,
abomo uaho rari kehawainibe raninai ia kiꞌa aꞌi nibabaina.
Ia hawainibe haukia hanona aroꞌari boꞌona kateaꞌinakia ekia mauriai,
weiana paunai nabaraonanimi.
29 Uahoꞌabaꞌu e,
ṉa naꞌabi aiho,
rani puana hanona aba kemai,
ba bariu keaomo waira ranikiai tehawainibe haukia katemiaho matoha aꞌi tehawainibe ꞌabana Tirama ena aka katebabaina.
30 Taeara ihobonai,
weiakia tihai haukia katemiaho matoha aokia aꞌi tiaokoꞌo ꞌabana.
Tiaonamo haukia katemiaho matoha aꞌi tiaonamo.
Tikawakawa haukia taba weiakia tekawanakia hanona robakia aꞌi kateahu matoha ꞌeukia ahaꞌi.
31 Mai maearima weiakia bariu hanopaka tabakia boꞌokia tiakaina haukia hanona kateraonana matoha aka weiakia hanona herekiai taba ahaꞌi ꞌabana.
Pokina hanopaka neiana mai bariu nahamiaho aina maurina hanona aba kepua.
32 Au eꞌu nuatae hanona wai aomi aꞌi katearoꞌari.
Aꞌi ehawainibe hauna hanona Obiapaka mo ena aka nibabaina,
ena raona ikoinai Obiapaka aona kebanamona.
33 Ia ehawainibe hauna hanona hanopaka mo tabakia niraonanakia,
pokina ena nuatae hanona atawana aona kebanamona.
34 Abomo ena raona hanona nibaruana atawana aona kebanamona mai Obiapaka aona kebanamona.
Ia aꞌi ehawainibe babiꞌena ꞌao uahona hanona Obiapaka ena aka mo niraonana,
pokina hauaniai mai aubai kerobe.
Ia ehawainibe babiꞌena hanona hanopaka tabakia niraonanakia,
pokina ena nuatae hanona atawana aona kebanamona.
35 Au ṉa naꞌabi aiho ena poki hanona wai emi namo paunai,
ia aꞌi narauhubunimi.
Au nanuatae wai hanona mauri beronai katomiaho,
Obiapaka ena aka tubabaina raninai aomi aꞌi kerua.
36 Hau ha aonai niraonana nahuna uahonaa herenai aꞌi nibabai harai aba emiaho kiꞌa baha,
ia hau ena nuatae nahuna weiana pehawainibe raninai taeara ketabu kebahawainibena,
weiana hanona kiꞌa aꞌi nibabaina.
37 Ia hau weiana kipona aona eaꞌiaꞌi haraina abomo aona ebapahihina nahuna uahona aꞌi kehawainibe,
ba aꞌi ebahawainibena abomo ebero.
38 Ba hau weiana nahuna uahona ebahawainibena hanona ebabai harai,
iamo hau weiana nahuna uahona aꞌi ebahawainibena hanona ebabai harai kiꞌa baha.
39 Babiꞌe hanona atawana taina ketai kemiaho rani ikoinai.
Ia atawana keꞌari raninai,
ia hanona aba ebabiꞌe ꞌabaea,
ba kenuatae kehawainibe reꞌa aꞌikakauma hauna keatawana Obiapaka aonai.
40 Ia eꞌu raonaraona hanona nahomana,
wapu weiana aꞌi kehawainibe hanona keaonamo kiꞌa baha.
Au naraonana Obiapaka Aubana hanona au aoꞌuai,
buonai neiana nahinana.