Kaibaꞌuku Ekia Aniani ꞌAbiꞌabina.
8
Bariu neiana hanona baibeni anianikia kaibaꞌuku tebena hauna ꞌabina.
ꞌAbi tohana aika haꞌiobina,
“Ikoikai hanona mai eka aotipa.”
Ba aotipa nihore apa nibabua taeana,
ꞌa raonaꞌau nihore aꞌikakauma haukia niba taburanakia.
2 Hau ha kipona niraonana ia hanona mai ena ꞌiobi taba baika eꞌiobinakia,
iamo peꞌiobi tohanakia hauna aꞌi eꞌiobinakia.
3 ꞌA hau ha Tirama niraonaꞌau aina hauna hanona Tirama abomo hau weiana eꞌiobi aina.
4 Ua buonai baibeni anianina kaibaꞌuku tebena ba nahani hauna ꞌabina neiana.
Aika haꞌiobina kaibaꞌuku hanona tirama tohana ahaꞌi hanopaka neiana aonai,
haꞌiobina Tirama tohana hanona hamona mo.
5 Maearima tihore tiramai tibaonakia haukia baika kupai mai hanopakai,
(weiana ‘tiramakia’ mai ‘auba obiakia’ nahomakia hanona teboꞌo.)
6 Iamo aika hanona mai eka Tirama hamona,
Hamaka.
Ia hanona taba ikoikiai ebabainakia,
ba ia paunai nahamiaho.
Abomo Obiapaka hanona hamona Iesu Keriso.
Ia paunai taba ikoikiai terama,
ba ia paunai aika nahamiaho.
7 Ia aꞌikakauma haukia baika ꞌabi tohana neiana aꞌi ṯeꞌiobina.
Bariu rani neianai baika hanona kaibaꞌuku ena aka aba temamatai haraina buonai aniani uahomakia tiani raninai ia tiraonana weiana hanona kaibaꞌuku ꞌeuna,
ekia raonaraonai aokia aꞌi nibero,
tiraonana aniani weiana teani hauna aba ebaꞌopunakia Tirama wairanai.
8 Aniani hanona aꞌi keaoainaka Tirama herena,
aꞌi kahaniani reꞌa Tirama wairanai ena kiꞌa ahaꞌi ꞌao kahaniani reꞌa Tirama wairanai ena namo ahaꞌi.
9 Iamo katoꞌima ꞌima harainimi,
pokina emi ꞌiobiai tuaniani weiana kehore ekia aꞌikakauma teꞌabeꞌabe haukia aꞌi mebaꞌehonakia kiꞌa aonai.
10 Pokina hau ha ena aꞌikakauma eꞌabeꞌabe hauna oi aotipa haumu kaibaꞌuku ena itarai nuaniani keihaniꞌo raninai,
ia aona nuba taburana niraonana kebeho mo kaibaꞌuku ekia aniani keani.
11 Ba uahoꞌabamu ena aꞌikakauma eꞌabeꞌabe hauna weiana ia paunai Keriso eꞌari hauna hanona oi emu aotipa weiana kehore ia aubana keaꞌi kiꞌana.
12 Oi emu babai weianai uahoꞌabamu aona nuaꞌi kiꞌana ia niraonana ekiꞌa hauna kebabaina,
weianai oi uahoꞌabamu herenai nubeho abomo Keriso herenai nubeho.
13 Weiana paunai aniani weiana ehore uahoꞌabaꞌu ebaꞌehona raninai,
au aniani weiana aꞌi kani mue pokina aꞌi mabaꞌehona.