Paulo Pou Namona Paunai ꞌArana Aꞌi Nitabuna.
9
Au hanona taꞌara iaꞌina hauꞌu ahaꞌi.
Au hanona iuhubeau hauꞌu.
Au eka Obiapaka Iesu aihana.
Wai hanona Obiapaka ena aka nababaina hauna buabuana haumi.
2 Maearima baika herekiai au hanona iuhubeau hauꞌu ahaꞌi,
ia wai heremiai au hanona iuhubeau hauꞌu,
pokina wai Obiapaka tuaꞌikakaumana hauna nihore nibatohana au hanona iuhubeau hauꞌu.
3 Ṯeꞌuahinaꞌu haukia ekia ꞌabi ṉa kabamue aihona.
4 Au mai eꞌu bero eꞌu aka ꞌarana aniani mai bei paꞌi.
5 Iuhubeau haukia baika mai Obiapaka hatina mai Petero tibabai ihobokia pababai,
atawaꞌu aꞌikakauma babiꞌena pabakaꞌana eꞌu kaoao aokiai hanona mai eꞌu bero.
6 ꞌAbamai baika aꞌi kateaka iamo au Banaba ohi ikupaiamai hanona kipomai emai aniani akana kataka,
ꞌu?
7 Huari hauna tabana kipona ena aka ꞌarana kehorena?
Biraura hauna tabana kipona ena uma anianina aꞌi keani?
Mamoe bakori hauna tabana ena mamoe ꞌaena aꞌi keinu?
8 Au ibabatai rani ikoikiai nahaiha haukiai mo aꞌi naꞌabiꞌabi,
Tirama ena rauhubu abomo ꞌabi ihobona ehinana.
9 Mose ena rauhubu pukanai ṉa erere aihona,
“Poromakau witi ibaꞌitiꞌitina
akana nibabaina aonai pinana
aꞌi kobiri abuna ia kohabona
keaniani.”
Deu 25.4
ꞌAbi weiana hanona Tirama poromakau niraona kiꞌa bahanakia paunai,
ꞌu? Ahaꞌi.
10 Weiana ehinana hanona aika eꞌuahinaka.
ꞌAbi tohana ꞌabi weiana hanona aika paukai ua terere aihona.
Niꞌani hauna mai nieueu hauna terarua ekia aka tibabaina hauna buabuana ṯebuabena hana kateaꞌina.
11 Ai hanona auba ena ube tabatona wai heremiai,
ba hauani ibanamona tabakia heremiai kata aꞌinakia hanona aꞌi ebero,
ꞌu?
12 Ia baika baraibarai tobenakia hanona mai ekia bero raninai,
ai abomo emai beroai barai barai apaꞌuana heremiai kataꞌina.
ꞌA ai uahomana aꞌi tababaina.
ꞌA ai hanona taba ikoikiai herekiai tabapahihi pokina Keriso ena pou namona aꞌi tamakaiabuna marikina.
13 Wai aba toꞌiobina marea robeai tiaka haukia ekia aniani weia marea robeai tiaꞌina,
abomo itara robenai tibarai barai haukia baibeni anianina weia hauna tiwatena.
14 Ba taeara ihobonai mo Obiapaka eꞌabi weiakia pou namona ṯeiroro aina haukia ekia mauri ibanamona tabakia hanona uaꞌa pou namona tiaꞌi taeana haukia herekiai kateaꞌina.
15 Ia au eꞌu bero weiana panoinimi hauna akana aꞌi ababaina.
Mai bariu narere benimi hanona eꞌu bero weiakia kaꞌinakia paunai ahaꞌi.
Au paꞌari hanona penamo ba hau ha keꞌabi au eꞌu apa neiana anina ahaꞌi.
16 Pou namona nairoro aina paunai kapa hanona aꞌi ebero.
Pokina au nairoro aina hanona Obiapaka ehina benaꞌu kababaina akana nababaina.
Ba pou namona aꞌi kairoro aina raninai hereꞌuai hanona kekiꞌa kiꞌa baha.
17 Au kipoꞌu eꞌu nuataeai aka neiana pababaina raninai ꞌaraꞌu patabuna,
ia weiana Obiapaka ena aka ebenaꞌu raninai,
aka neiana hanona Tirama au ebapokinaꞌu kababaina mo.
18 Ba ꞌaraꞌu hanona taba?
Pou namona airoroai ꞌabaeana ꞌaraꞌu robana aꞌi nahuna mai pou namona akana nababaina aonai eꞌu bero aꞌi natabunakia.
Au ꞌaraꞌu hanona aonamo neiakia.
19 Au hanona hau ha taꞌarana aꞌi ṉaꞌi,
ꞌa au kipoꞌu eꞌu nuataeai maearima ikoikiai ekia taꞌaraꞌi hauꞌuai naeao,
weiana maearima boꞌokia kamaiainakia Iesu kate aꞌikakaumana.
20 Iuda haukia kipokia ṯamiaho aonai au hanona Iuda haukia ihobokiai naeao,
weiana ia kamaiainakia Iesu kate aꞌikakaumana.
(Abomo au hanona Mose ena rauhubu baꞌanai aꞌi namiaho,)
iamo weiakia rauhubu baꞌanai ṯemiaho haukia kipokia ṯamiaho aonai au rauhubu baꞌanai ṯemiaho haukia ihobokiai naeao,
weiana ia kamaiainakia Iesu kate aꞌikakaumana.
21 Taeara ihobonai Mose ena rauhubu aꞌi ṯeꞌiobina haukia kipokia ṯamiaho aonai au rauhubu aꞌi ṯeꞌiobina haukia ihobokiai naeao,
weiana rauhubu aꞌi ṯeꞌiobina haukia kamaiainakia Iesu kate aꞌikakaumana.
(Iamo ꞌabi tohana au Tirama ena rauhubu aꞌi ahabona,
au hanona Keriso ena rauhubu nakaꞌaina.)
22 Ekia aꞌikakauma teꞌabeꞌabe haukia herekiai namiaho aonai au abomo naꞌabeꞌabe ia ihobokiai naeao,
weiana baika kamaiainakia Iesu kate aꞌikakaumana.
Ua buonai au hanona taba ikoikiai ihobokiai naeao maearima ikoikiai herekiai,
ba taeara tabana ketaina haunai baika kamaiainakia bamauri kateaꞌina Keriso herenai.
23 Au taba neiakia ikoikiai nababainakia hanona pou namona paunai,
ba au abomo ia kipokia banamona weiana kataꞌi haeamo.
24 Wai toꞌiobi haraina beau baitaeai aonai beau haukia boꞌona tibeau,
ia hamona mo ꞌuai ꞌarana niaꞌina.
Ua buonai katobeau hanona ꞌuai beauna katobeau.
25 Beau baitaeai aokiai titoto haukia ikoikiai beau baitaeai weiana ena bairobe pahihina tiaꞌina.
Weiana tibabaina hanona ꞌuai ꞌarana weiana aꞌi kemiaho homaꞌa hauna kateaꞌina paunai,
ꞌa aika aka nahababaina hanona ꞌuai ꞌarana weiana kemiaho banaibanai hauna kahaꞌina paunai.
26 Ua buonai au nabeau bero baihana naeao mo beau pua irerenai kakaraꞌau,
abomo au hanona ꞌau hauna weiana aꞌi nikapo ꞌabaea kapo ꞌabaea hauna ꞌabana.
27 Au kipoꞌu hauꞌu nabataburana nabapahihina mai aoꞌu kekaꞌai haraina,
pokina baika herekiai pou namona kairoro aina murinai au aꞌi temebakiꞌanaꞌu ꞌara aꞌi maꞌubo aina taꞌuna.