Kaibaꞌuku Aꞌi Kahakuti ainakia.
10
Uahoꞌabaꞌu e,
au nanuatae ꞌabaꞌabaka Mose murinai teꞌau haukia herekiai taba erama hauna aꞌi katoreana.
Tirama ehore ikoikiai ꞌauhao baꞌanai ebakaꞌanakia ba ꞌAku Birona aonai tekabanai.
2 Ia ikoikiai ꞌauhao aonai mai ꞌaku aonai teꞌuere robe Mose iꞌabana haukiai teao.
3 Ikoikiai hanona anianina weiana Tirama ebenakia hauna ihobona mo teani.
4 Abomo ikoikiai bei weiana Tirama ebenakia hauna ihobona mo teinu.
Tirama ena pihara weiana kipokia tekaꞌa haeamo,
piharana weiana haunai bei eharu ahi teinu,
ba pihara weiana hanona Keriso.
5 Babai namokia weiakia ebabai,
iamo boꞌona ꞌakina hanona Tirama aona aꞌi tebanamona,
ua buonai hanoꞌakunai teꞌari ore hauanikia hanona ꞌeka haeaihaeai teno uraru.
6 Taba neiakia ikoikiai hanona ibabatai aika ꞌeuka,
kateba raonanaka taba kiꞌa obokia aꞌi kahanuataeai ꞌabaea ia tebabaina ꞌabana.
7 Kaibaꞌuku hanona aꞌi katokuti ainakia baika tebabaina ꞌabana,
pokina Puka robenai aba ererena,
“Maearima hanona temiati teaniani teinuinu ba temikiri hau mai babiꞌe kipokia ewa kiꞌa obokia tebabai.”
8 Aika hanona aꞌi kahanabau kiꞌa baika weia tebabaina ꞌabana,
ba rani hamona aonai ikoikiai taha harau rua aihau (23,000) teꞌari.
9 Aika hanona Obiapaka aꞌi kahahobona baika weia ia tehobona ꞌabana,
weiana ꞌerau tehore teara ꞌarinakia.
10 Abomo aika aꞌi kahaꞌarara ꞌarara ia teꞌarara ꞌarara ꞌabana,
weiana ahuahu aneruna ehore eahu ꞌarinakia.
11 Taba neiakia terama ia herekiai hanona ibabatai aika ꞌeuka,
ꞌabikia tererenakia hanona aika ibaraonaka hanopaka ena pua nimai aonai.
12 Ba oi nuraonana aba okori ꞌini harai raninai,
koꞌima harainiꞌo aꞌi moꞌeho.
13 Baihobo weiakia wai heremiai tirama haukia hanona maearima herekiai tirama haukia ihobokia.
ꞌA Tirama hanona aia ibabua ꞌauna hauna.
Ia aꞌi kehabo ꞌabaeanimi baihobo weiana emi tabura nitara haona haunai aꞌi tomoꞌeho marikina.
Ba baihobo tuaꞌina raninai,
ia taeara ha kebenimi katokapare,
weianai katokori ꞌini.
14 Ua buonai,
eꞌu raonaꞌau haumi e,
kaibaꞌuku ikuti aikia hanona katohabonakia.
15 Wai hanona aobero haumi nahina benimi,
eꞌu ꞌabi kipomi abomo katobabataina au taba naꞌuahina.
16 ꞌEre weiana Obiapaka ena anitoꞌu aonai nahaꞌina ba Tirama namo ꞌabina nahabena hauna nahainu raninai,
aika ikoikai Keriso aruaruna nahainu haeamo.
Abomo Parawa nahahobina ha ha nahani raninai,
aika ikoikai Keriso hauanina nahani haeamona.
17 Parawa hanona hamona Keriso hauanina,
aika hanona haboꞌo ia hauani hanona hamona,
pokina aika ikoikai parawa weiana hamona nahani haeamona.
18 Isaraela haukia ekia hoahoa kaharaonana,
itara robenai tekine mahikia tiani haukia ikoikiai hanona itara robena akana tibabai haeamo.
19 Au taba naꞌuahina,
baibeni tabana weiana kaibaꞌuku tibena hauna hanona mai anina,
ꞌu?
Abomo kaibaꞌuku hanona tirama tohana,
ꞌu?
20 Ahaꞌi ꞌakina.
Rama haeai haukia ekia baibeni hanona auba kiꞌa obokia ꞌeukia,
ia Tirama ꞌeuna ahaꞌi.
Au nanuatae wai auba kiꞌa obokia kipokia aꞌi katobahaeamo.
21 Wai Obiapaka ena ꞌereai ṯoinu haumi auba kiꞌa obokia ekia ꞌereai aꞌi katoinu.
Wai Obiapaka ena itarai tuaniani haumi auba kiꞌa obokia ekia itarai aꞌi katoaniani.
22 Aika Obiapaka aona kahabahaiarana hanona aꞌi kenamo,
pokina ena puma kebawaira tinana aonai kahakaobo taearana ahaꞌi.
23 Wai tuꞌabi “taba ikoikiai kahababai hanona ketaina,”
ia au naꞌabi ikoikiai hanona aꞌi mo katebanamonaka,
wai tuꞌabi “taba ikoikiai kahababai hanona ketaina,”
ia naꞌabi ikoikiai hanona aꞌi mo katebarai harainaka eka aꞌikakauma aonai.
24 Wai ha kipona ena namo mo aꞌi ketabuna,
ia ꞌabana baika ekia namo abomo ketabuna.
25 Mahi kawa ꞌekanai tikawa kawainakia mahikia hanona katoani,
ia aꞌi katobakai bakai weiana hanona kaibaꞌuku herenai tebaibeni hauna ꞌao ahaꞌi,
aomi aꞌi temearoꞌari.
26 Pokina Puka robena tererena ꞌabana,
“Hanopaka mai aonai ṯemiaho
tabakia ikoikiai hanona
Obiapaka ꞌeuna.” Sal 24.1
27 Aꞌi niaꞌikakauma hauna ha kebeauniꞌo torarua katoaniani ba oi nonuatae koao raninai,
wairamuai taba ehoroti haukia ikoikiai hanona koani,
aꞌi kobakai bakai aomu aꞌi mearoꞌari.
28 Ia hau ha kehina beniꞌo,
“Aniani neiana hanona kaibaꞌuku tebena hauna” raninai,
aniani weiana hauna aꞌi koani,
weiana ehina beniꞌo hauna paunai mai aona aꞌi mearoꞌari paunai.
29 Au aꞌi naꞌabi oi haumu nubeho,
ia ehina beniꞌo hauna keraonana oi nubeho.
Weiana hau ha kipona kebakai bakai,
aehoma buonai maearima ha ena raonaraonai au eꞌu bero kebakai bakai aina?
30 Eꞌu aniani Tirama abanamona ba ṉani raninai,
aehoma buonai hau ha au aniani abanamona ṉani hauꞌu neꞌuahinaꞌu?
31 Ia taba taba tuani ṯoinu ꞌao tubabai,
weiakia ikoikiai hanona Tirama ena nuabi ibawaira tinana paunai katobabaina.
32 Emi miaho aokiai weiakia Iuda haukia,
rama haeai haukia ꞌao Tirama ena marea maearimakia ibaꞌehokia akakia aꞌi katobabai.
33 Wai au nababaina ꞌabana katobabaina au maearima ikoikiai aokia kabanamona taeara ikoikiai aokiai.
Kipoꞌu eꞌu namo aꞌi natabuna,
ia ikoikiai ekia namo natabuna,
weiana hanona ia bamauri kateaꞌina paunai.