2 Au wai nabanamonimi,

pokina taba ikoikiai aokiai turaona ꞌini toꞌo baihanaꞌu abomo baꞌiobi abenimi haukia tuaꞌi ꞌininakia.

3 Bariu au nanuatae wai katoꞌiobi haraina,

hau ikoikiai ꞌarakiai hauna hanona Keriso,

babiꞌe ꞌaranai hauna hanona ia atawana,

Keriso ꞌaranai hauna hanona Tirama.

4 Ua buonai hau ikoikiai ꞌarakia mai ibahu abukia tibahubaꞌari ꞌao Tirama ena ꞌabi ṯehinana hanona ꞌarakiai hauna Keriso aꞌi timariki aina.

5 Abomo babiꞌe ꞌarana ibahu abu ahaꞌi nibahubaꞌari ꞌao Tirama ena ꞌabi nehinana babiꞌena hanona atawana ia ꞌaranai hauna aꞌi nimariki aina,

matoha ia buina terehe obona ꞌabana.

6 ꞌA babiꞌe ha ꞌarana aꞌi nibahu abuna raninai,

ia hanona buina mekabena.

Babiꞌe buina kerehe obona ꞌao buina kekabena hanona mai haumaeana buonai babiꞌe ꞌarana hanona kebahu abuna.

7 Hau hanona bahubaꞌari aonai ꞌarana aꞌi kebahu abuna,

pokina ia hanona Tirama ihaihana abomo ena nuabi nibawaira tinana,

ꞌa babiꞌe hanona hau ena nuabi nibawaira tinana.

8 Tirama hanona babiꞌe hauaninai hau aꞌi ebabaina,

ia hau hauaninai babiꞌe ebabaina.

9 Haeamona Tirama hanona babiꞌe paunai hau aꞌi ebabaina,

ia hau paunai babiꞌe ebabaina.

10 Ua buonai babiꞌe hanona ꞌarana kebahu abuna,

ba hoa weianai aneru kateꞌiobina ia hanona atawana ena hiabu baꞌanai nemiaho.

11 Eka mauri Obiapaka aonai haunai,

babiꞌe hanona hau herena aꞌi kehe ahi ikupaiana aꞌi kemiaho abomo hau hanona babiꞌe herenai aꞌi kehe ahi ikupaiana aꞌi kemiaho.

12 Babiꞌe hanona hau hauaninai emai,

abomo hau hanona babiꞌe hauaninai nirama.

Ia taba ikoikiai hanona Tirama herenai timai.

13 Kipomi aba tusuraonana,

babiꞌe ꞌarana aꞌi ebahu abuna ba maearima wairakiai nibahubaꞌari hanona aꞌi ebero.

14 Hanopaka maurina aonai aika aba haꞌiobina bui homaꞌana hau herekiai hanona haumaea tabana,

15 ia bui homaꞌana hanona babiꞌe ena nuabi tabana.

Tirama ehore babiꞌe ebena ꞌarana ibahu abunai keao.

16 Ia hau ha nenuatae hoahoa neiana kebaihara taeaina reꞌa,

au naꞌabi natibaha,

ai mai Tirama ena marea maearima ikoikiai kipokia heremai hanona kuti hoahoana haeai ha ahaꞌi.

17 Bariu eꞌu baꞌiobi ꞌabina neiana nahina benimi aonai au hanona wai aꞌi nabanamonimi,

pokina emi marea toꞌukia tuaꞌi haukia hanona babai kiꞌa boꞌona tibabai ia ekia baraibarai ahaꞌi maearima herekiai.

18 Koriꞌuaina hanona wai poumi aona emi marea toꞌukia tuaꞌi aokiai hanona hoa tuhore,

ꞌabi neiana papana nabatoha ꞌapuana.

19 (Hoa hore hanona katerama aꞌi keahaꞌi ba weianai ꞌabi tohana tehinana haukia hanona kahaiha tinanakia.)

20 Weiana paunai ꞌeka hamonai tusutoꞌu ani robe tuaꞌina,

iamo weiana hanona Obiapaka ena aniani robena aꞌi tuani.

21 Pokina tuaniani raninai,

ha ha emi aniani mo tuani ꞌabami aꞌi ṯoꞌimanakia,

weiana buonai baika hanona mareꞌa tiꞌari ꞌa baika ṯeinu ꞌari.

22 Emi ituai patoaniani mai patoinu.

Tirama ena marea haukia tubataeainakia mai herekia taba ahaꞌi haukia tuba haumaeanakia.

Aea kahinabe aihonimi?

Turaonana aka neiana tubabaina hanona kabanamonimi,

ꞌu?

Ahaꞌi ꞌakina.

23 Baꞌiobi neiana wai abenimi hauna hanona Obiapaka herenai aꞌina hauna ihobona.

Hinahinana ehina rabinai Obiapaka Iesu parawa eaꞌina,

24 namo ꞌabina Tirama herenai ehinana.

Epua hanona parawa ehobina ba eꞌabi etibaha,

“Neiana hanona au hauaniꞌu nabaibeni wai ꞌeumi.

Ṉa katobabai aiho au iraona ꞌiniꞌu.”

25 Teaniani murinai taeara ihobonai mo ꞌere eaꞌi taeana ba eꞌabi etibaha,

“ꞌEre neiana hanona Tirama ena ꞌabiꞌuai apaꞌuana mahamahana,

au eꞌu ꞌari aruarunai nabatohana.

Neiana katobabaina katoinu au iraona ꞌiniꞌu ranikia ikoikiai aokiai.”

26 Parawa neiana tuana mai ꞌere neianai ṯoinu ranikia ikoikiai,

wai hanona Obiapaka ena ꞌari pouna ṯohinana keaomo ia kemai.

27 Ua buonai,

hau ha ena raona aꞌi ebero aonai parawa keana ꞌao ꞌereai keinu raninai,

ia hanona aba ebeho Obiapaka hauanina mai aruaruna herekiai.

28 Weiana paunai hau ha kipona aona ketabu harai ꞌuaina ba parawa keana mai ꞌereai keinu.

29 Pokina ia parawa niana mai ꞌereai neinu iamo Obiapaka hauanina aꞌi nibabataina raninai ia hanona Tirama ena bakai anianina niana mai inuinuna neinu.

30 Weiana buonai,

wai boꞌomi hanona ṯoinawa,

tuꞌabeꞌabe abomo boꞌokia aba teꞌari.

31 Ia aika kipoka aoka kahatabu harai ꞌuaina raninai,

Tirama ena bakai aonai aꞌi kahatoto.

32 Ia Obiapaka aika nibabakainaka mai puma nibenaka hanona nirobenaka,

weiana hanopaka maearimakia kipokia puma aꞌi kahahoai haeamona paunai.

33 Ua buonai,

uahoꞌabaꞌu e,

tutoꞌu Obiapaka ena aniani robena katoani raninai ꞌabami katoꞌimanakia.

34 Hau ha mareꞌa keꞌari raninai,

ia hanona ena ituai keaniani ba kemai,

weiana katotoꞌu raninai wai Tirama ena bakai aonai aꞌi katototo.

ꞌAbi baika hanona muriai au kawahi aonai kahina benimi.