Iesu Ena ꞌAri Taearana Tetabuna.
22
Parawa ibakupu ahaꞌi tatuna beraurana teaparina Kabanai tatuna hanona aba niherekai.
2 Robe haukia apaꞌuakia mai rauhubu poki haukia Iesu iahu ꞌarina taearana tetabu iamo maearima tetaꞌu ainakia.
Luka 22:1-71
3 Satani ehore Iuda Kariote hauna Iesu iꞌabana haukia harauhaea rua ha aonai etoto.
4 Iuda eao robe haukia apaꞌuakia mai marea robe ṯeꞌimana poki haukia kipokia teroba ahu Iesu aea kehinahinai aihona.
5 Ia aokia enamo,
ba teꞌabiꞌuai moni katebena.
6 Iuda ekia ꞌabi eaꞌi taeana,
taeara etabu rani namona tabanai toꞌu ahaꞌi aonai imakiai keutana.
Iꞌabana Haukia Rua Kabanai Anianina Tebaꞌoruna.
7 Parawa ibakupu ahaꞌi tatuna wapuna etaina hanona Kabanai banamo mamoekia kateahu ꞌarinakia ranina.
8 Iesu Petero mai Ioane euhunakia eꞌabi etibaha,
“Tomoao eka Kabanai anianina aika kahani hauna katoaꞌiaꞌi haraina.”
9 Terarua tehina bena tetibaha,
“Nonuatae aeꞌeai kataꞌiaꞌi haraina.”
10 Ia ehina benakia etibaha,
“Aiara apaꞌuanai katokatoto aonai hau ha puou mai beina aronai kebuana katoihana,
murinai katoao ketoto itunai katokatoto.
11 Weiana itu poki hauna katohina bena,
‘Baꞌiobi hauna ninoiniꞌo,
baki ikaihurina hanona aeꞌe ai.
Weia au mai iꞌabaꞌu haukia kipokia emai Kabanai tatuna anianina katana.’
12 Ia kehore ikaihuri apaꞌuana ꞌubiai aba ibaꞌoru hauna kebaihanimi,
weia aniani katoaꞌiaꞌi haraina.”
13 Terarua tekaobo teao Iesu ehina benakia tabakia ikoinai ihobona tohanai tetabu ahinakia,
weia Kabanai tatuna anianina teaꞌiaꞌi haraina.
Obiapaka Ena Anitoꞌu Robe Orena.
14 Beraura hoana etaina Iesu ena iuhubeau haukia kipokia aniani ꞌekanai temiati.
15 Ia ehina benakia,
etibaha,
“Au eꞌu nuatae tohana hanona Kabanai tatuna anianina neiana kipokia kahaniani oioi ꞌuaina ba kateba haiaranaꞌu.
16 Pokina au wai nahina beninimi,
Au hanona neiana aꞌi kani muena keaomo anina tohana Tirama ena obia aiaranai ketohana.”
17 Ba ꞌere ha eaꞌina ebanamona eꞌabi etibaha,
“Neiana tomoaꞌina ikoimiai tomoinu.
18 Pokina au wai nahina benimi,
bine buana beina aꞌi kainu mue bariu keaomo Tirama ena obia aiarana kemai.”
19 Parawa ha eaꞌina ebanamona haeamona ehobina ebenakia eꞌabi etibaha,
“Neiana hanona au hauꞌu,
wai paumiai nabaibeni.
Neiana katobabaina au iraonaꞌu.”
20 Taeara ihobonaimo teaniani murinai ia ꞌere ha eaꞌina ehina benakia etibaha,
“ꞌEre neiana hanona baibua mahamahana ibatohana hoana au aruaruꞌu ai,
wai paumiai kekiki oioi.
21 Ia au hinahinaꞌu kehinahina hauna imana abomo neia au imaꞌu kipokia aniani ꞌekanai.
22 ꞌAbi tohana Maearima Nahuna hanona keao Tirama ena raona ihobona,
ꞌa hau weiana kehinahina hauna kiꞌana herenai kiꞌa rarina kerama.”
23 Ia kipokia ha ha tebakai bakai baiatakiai,
tai hanona aka weiana kebabaina.
Iꞌabana Haukia Tebaihara tae Tai Keapaꞌua.
24 Iꞌabana haukia kipokia baiatakiai tebaihara tae tai hanona keapaꞌua.
25 Iesu ehina benakia etibaha,
“Rama haeai obia arana haukia hanona ekia maearima Tiobia ainakia,
ekia nuatae weiakia ekia iha ꞌini baꞌanai ṯemiaho haukia hanona kateaparinakia ia maearima namokia.
26 ꞌA wai heremiai hanona ua aꞌi kehoma,
keapaꞌua baiatamiai hauna hanona aona mebamiorina,
neꞌuai ainimi hauna hanona matoha barai barai akana nibabaina hauna ꞌabana.
27 Tai hanona eapaꞌua,
weiana aniani ꞌekanai nemiaꞌau hauna ꞌao barai barai akana nibabaina hauna?
Weiana aniani ꞌekanai nemiati hauna hanona eapaꞌua.
Ia au wai baiatamiai hanona barai barai akana nibabaina haunai naeao.
28 “Wai hanona au kipokia hamiaho haeamo baihobo ikoikiai aokiai.
29 Hamaꞌu hiabu ebenaꞌu ena ꞌeka kaꞌimana,
ihobonai mo bariu Au hiabu kabenimi eꞌu ꞌeka katoꞌimana.
30 Weiana eꞌu obia aiaranai wai hanona eꞌu aniani ꞌekanai katoaniani katoinuinu,
haeamona obia imiaꞌaunai katomiaꞌau Isaraela itubuna harauhaea rua iꞌimana haumiai katoao.
Iesu Petero Ia Kebuniaina ꞌAbina Ehina ꞌUaina.
31 “Simona e,
Simona e,
Satani aba enoinoi ikoimiai kebarobonimi kehobonimi ihobona witi ꞌabana.
32 Iamo Simona au aba ahamuai abahubaꞌari emu aꞌikakauma aꞌi meꞌeho,
ba oi koraona kabe raninai uaho ꞌabamu abokiamo koba taburanakia.”
33 Petero ehore Iesu ehina bena etibaha,
“Obiapaka e,
au aba abaꞌoru oi kaꞌabaniꞌo kahaeao kahawapura ꞌao kahaꞌari.”
34 Iesu ena ꞌabi ebamuena etibaha,
“Petero e,
au oi nahina beniꞌo,
bariu rabi neianai kokoroꞌu aꞌi keꞌarara baha aonai,
oi rani aihau au kobuniainaꞌu,
au aꞌi oꞌiobinaꞌu ṉa kohoma.”
Iesu Eꞌabi Imakiai Taba Hauna Kateaꞌina.
35 Iesu ehore iꞌabana haukia ebakainakia etibaha,
“ꞌUainai auhu ahinimi,
toao mahoa ihiuaihiua,
mahoa mai tamaka ahaꞌi tokaꞌa raninai taba ha heremiai tokapu,
ꞌao?”
Ia teꞌabi tetibaha,
“Ahaꞌi.”
36 Ia ehina benakia etibaha,
“ꞌA bariu tai mahoa ihiuaihiua herenai hanona keaꞌina,
mahoa abomo keaꞌina,
mai tai kareba herena ahaꞌi hauna ena habuni kekawa kawa aina moninai kareba ha kekawana.
37 Pokina au wai nahina benimi,
tererena ‘Kakikaki haunai tebaona,’
ꞌabina neiana hanona au hereꞌuai ketohana,
taba tererena au ahaꞌuai hauna ibatohana ranina aba nimai.”
38 Iꞌabana haukia teꞌabi tetibaha,
“Obiapaka e,
moihana kareba rua neiakia.”
Weiana ia ehina benakia,
“Abetaina.”
Iesu Getesemane ai Ebahubaꞌari.
39 Iesu nibabai babai bena ihobonai ekarahi Olibe oeona eao,
iꞌabana haukia ia murinai teao.
40 ꞌEka weianai tekaraꞌau raninai ia ehina benakia etibaha,
“Tomobahubaꞌari baihobo aonai aꞌi tomototo.”
41 Herekiai ekaobo baiatakia ena homaꞌa matoha pihara ha pahakapona peao peꞌeho ihobonai weia ekaipehu ebahubaꞌari.
42 Eꞌabi etibaha,
“Hamaꞌu e,
konuatae raninai haiara ꞌerena neiana hereꞌuai koaꞌi obona,
iamo au eꞌu nuataeai ahaꞌi,
ꞌa oi emu nuatae mobabaina.”
43 Ba aneru ha kupai emai ia herenai ewaira tina,
ebataburana.
44 Aona earoꞌari,
ebahubaꞌari haeamona ebahubaꞌari tabura tabura,
maorona teꞌeho ꞌanoai ihobona aruaru kokomaꞌakia ꞌabana.
45 Ena bahubaꞌari murinai emikiri eao iꞌabana haukia herekia,
aokoꞌoai aba temahe harai buonai parua reakia etabu ahinakia.
46 Ehina benakia etibaha,
“Taba buonai tuparua?
Tomonoꞌa,
tomobahubaꞌari baihobo aonai aꞌi tomototo marikina.”
Iesu Teaꞌi ꞌInina.
47 Iesu niꞌabi oho mo aonai iꞌabana harauhaea rua haukia ꞌabakia ha atana Iuda toꞌu rarina eꞌuai ainakia temai,
ba ekahaha Iesu herena eao kepauna.
48 ꞌA Iesu ehore Iuda ehina bena etibaha,
“Oi hanona baipauai Maearima Nahuna nohinahinaina,
u?”
49 Weiakia herenai tekoroti haukia taba kerama hauna teꞌiobina aonai teꞌabi tetibaha,
“Obiapaka e,
karebai tamaharanakia,
u?”
50 Ba ꞌabakia ha robe haukia ꞌarakiai hauna ena taꞌara aꞌi hauna haiana itipana ehara obona.
51 ꞌA Iesu eꞌabi etibaha,
“Naiana mepua.”
Ba ia ehore hau weiana haiana eaꞌi ꞌapuana ebanamona.
52 Iesu ehore robe haukia apaꞌuakia marea robe ꞌima haukia mai aiara hau apaꞌuakia temai ia kateaꞌina haukia ehina benakia etibaha,
“Mai karebami mai puraꞌami tomai matoha bainao hauna katoaꞌina ꞌabana, u?
53 Rani ikoinai au hanona wai kipokia marea robe aonai,
iamo wai aꞌi toaꞌi ꞌininaꞌu.
ꞌA bariu rani neiana hanona wai emi rani,
wapura ena hiabu ranina.”
Petero Iesu Ebuniai aina.
54 Ia tehore Iesu teaꞌina tebakaꞌana teaoaina robe haukia ꞌarakiai hauna ena ituai,
ꞌa Petero hanona murikiai eao ia mo mai baiatakia.
55 Baika tehore ara aona ibuanai iruba tebaꞌarana ba temia kakaiarona,
Petero abomo weia baiatakia emiati.
56 Ba taꞌara aꞌi uahona ha iruba eanai Petero emiati eihana,
eiha iha haraina eꞌabi etibaha,
“Hau neiana hanona Iesu ꞌabana ha.”
57 ꞌA Petero ebuniai etibaha,
“Uaho e,
au ia aꞌi aꞌiobina.”
58 Rani aꞌi ehomaꞌa aonai,
hau ha ia eihana eꞌabi etibaha,
“Oi abomo ꞌabakia ha.”
Petero eꞌabi etibaha,
“Hau e,
au hanona ahaꞌi.”
59 Beraura hoana ha eao ꞌabana hau ha ia eihana ba eꞌabi tabura etibaha,
“ꞌAbi tohana hau neiana abomo ia ꞌabana ha,
pokina ia abomo Galilea hauna.”
60 Ba Petero eꞌabi etibaha,
“Hau e,
au aꞌi aꞌiobina oi taba robana nuahuna.”
Niꞌabi oho mo aonai kokoroꞌu eꞌarara.
61 Weiana Obiapaka eiha kabe Petero eihana.
Ba Petero ehore Obiapaka ena ꞌabi ehinana hauna eraona tinana,
“Oi bariu rani neianai kokoroꞌu aꞌi keꞌarara baha aonai au rani aihau kobuniai ainaꞌu.”
62 Weiana Petero ekarahi eao atapakai ehai kiꞌa.
Iesu Tebapoꞌona.
63 Hau weiakia Iesu teaꞌi ꞌinina haukia tebatae aina.
64 Mahana teꞌapa abunakia teꞌatina ba tebakaina tetibaha,
“Mohina benamai.
Tai oi eꞌatiniꞌo?”
65 Abomo ꞌabi kiꞌa obokia boꞌona herenai tehinanakia.
Iesu Bakai Ṯeꞌimana Haukia Wairakiai Ekoroti.
66 Erani aonai aiara hau apaꞌuakia,
robe haukia apaꞌuakia,
mai rauhubu poki haukia kipokia tetoꞌu ba Iesu temaiaina bakai apaꞌuana weiana wairakiai.
67 Bakai apaꞌuana haukia tebakaina tetibaha,
“Mohina benamai.
Oi hanona Keriso,
ꞌao?”
ꞌA Iesu ia ehina benakia etibaha,
“Pahina benimi hanona aꞌi patobatohanaꞌu.
68 Abomo pabakainimi hanona aꞌi patobamuena.
69 Ia bariu rani neiana keaoaina hanona Maearima Nahuna hiabu Tiramana imana itipana tainai kemiati.”