Iesu Teaꞌina Tebirina.
18
Iesu ena bahubaꞌari neiana ehinana epua murinai iꞌabana haukia kipokia Kidron tatairanai tekabanai teao Olibe haharuana aonai tekatoto.
2 Hinahina hauna Iuda abomo ꞌeka weiana eꞌiobina,
pokina rani boꞌona Iesu mai iꞌabana haukia kipokia ꞌeka weianai tetoꞌu.
Jesus betrayed and arrested (Ioane 18:1-14)
3 Weiana Iuda ehore robe haukia apaꞌuakia mai Parisea haukia ekia miori weiakia marea robe ṯeiha ꞌinina haukia mai huari haukia toꞌukiai ebakaꞌanakia,
imakia mai irubakia mai ramepakia abomo huari tabakia teaꞌi haharua weiana aonai tekatoto.
4 Iesu taba herenai katerama haukia ikoinai aba eꞌiobina,
ua buonai ekahaha eao herekia ebakainakia etibaha,
“Wai tai tutabuna?”
5 Ia teꞌabi tetibaha,
“Iesu Nasareta hauna.”
Ba Iesu eꞌabi,
“Au neiaꞌu.”
Hinahina hauna Iuda abomo weia kipokia tekoroti.
6 Iesu eꞌabi “Au neiaꞌu.”
raninai ia tetaꞌu tehemue teꞌeho ꞌanoai tenoti.
7 Iesu haeamona ebakai muenakia etibaha,
“Wai tai tutabuna?”
Ba ia teꞌabi mue tetibaha,
“Iesu Nasareta hauna.”
8 Iesu ehina benakia etibaha,
“Aba ahina benimi ‘au neiaꞌu.’
Wai au tutabunaꞌu raninai,
hau neiakia katohabonakia katekaꞌa.”
9 Babai neianai ena ꞌabi ꞌuaina ehinana hauna “Aba obenaꞌu haukia ikoinai ha aꞌi abaꞌakaumana.”
hauna ebatohana.
10 Simona Petero hanona mai ena kareba,
ba weiana eberi ꞌauna,
robe haukia arakiai hauna ena taꞌaraꞌi hauna haiana itipana ehara obona.
Taꞌaraꞌi hauna weiana atana hanona Malaku.
11 Weiana Iesu Petero eꞌabi pahihi bena etibaha,
“Kareba naiana iutana ꞌekanai moutana.
Haiara ꞌerena neiana Hamaꞌu ebenaꞌu hauna aꞌi kainu,
u?”
Iesu Teaoaina Anna Herena.
12 Weiana huari haukia ekia poki hauna kipokia mai Iuda haukia apaꞌuakia marea robe ṯeiha ꞌinina haukia kipokia Iesu teaꞌina tebirina,
13 Anna herena teaoai ꞌuaina,
pokina Anna hanona Kaiafa rawana.
Kaiafa hanona robe haukia ꞌarakiai hauna ihau weianai.
14 Weiana ꞌuainai Kaiafa ena raonai Iuda haukia apaꞌuakia ehina benakia etibaha,
“Namona hanona hau hamona keꞌari maearima ikoikiai paukiai.”
Petero Rani Koriꞌuaina Iesu Ebuniai aina.
15 Simona Petero mai Iesu iꞌabana hauna ha ohi Iesu murinai teao.
Iꞌabana hauna weiana hanona robe haukia arakiai hauna eꞌiobi haraina paunai ia hanona Iesu murinai robe haukia arakiai hauna ena itu parabuna aonai ekatoto.
Peter denies knowing Jesus and Annas questions Jesus (Ioane 18:15-27)
16 ꞌA Petero hanona uaꞌa paꞌabi ꞌakonai ebaiꞌima,
iꞌabana hauna weiana robe haukia arakiai eꞌiobi haraina hauna emue emai paꞌabi neꞌimana uahona ehina bena,
ba Petero ebatotona parabu aonai.
17 Paꞌabi neꞌimana uahona weiana Petero ebakaina etibaha,
“Oi abomo hau weiana iꞌabana haumu ha,
u?”
Petero etibaha,
“Au ahaꞌi.”
18 ꞌAma ranina buonai taꞌaraꞌi haukia mai marea robe ṯeiha ꞌinina haukia iruba tebaꞌarana herenai tekoroti eraranakia haukia katehiabunakia.
Petero abomo ia baiatakiai iruba eraranakia.
Robe Haukia ꞌArakiai Hauna Ehore Iesu Ebakaina.
19 Rani weianai robe haukia ꞌarakiai hauna Anna,
Iesu herenai iꞌabana haukia mai ena baꞌiobi ꞌabikia ebakai bakai ainakia.
20 Iesu ia ena ꞌabi ebamuena etibaha,
“Au hanona rani ikoikiai mako wairakiai aꞌabiꞌabi,
au rani ikoikiai Iuda haukia ekia toꞌu ꞌekakiai weia marea aokiai mai marea robe aonai abaꞌiobi,
au ꞌabi ha aꞌi abuni ꞌapuana.
21 Aehoma buonai oi au nubakainaꞌu?
Weiakia eꞌu ꞌabi teona haukia mobakainakia,
ia teꞌiobina au ꞌabi tabana ahinana.”
22 Iesu ua eꞌabi aiho raninai weia marea robe ṯeiha ꞌinina hauna ha emikiri Iesu wairana eboꞌana etibaha,
“Robe haukia ꞌarakiai hauna ena ꞌabi ua aꞌi kobamue aihona.”
23 Iesu eꞌabi etibaha,
“Au ꞌabi ha ahina kiꞌana raninai,
weiana hauna mohina karahina.
Ia au ꞌabi berona ahinana raninai taba buonai oboꞌanaꞌu?”
24 Weiana Anna ehore Iesu euhuna imana ibiri ꞌini eao Kaiafa robe haukia arakiai hauna herena.
Petero Iesu Ebuniai ai Muena.
25 Simona Petero hanona weia iruba herenai ekoroti erarana.
Weiana tebakaina tetibaha,
“Oi abomo ia iꞌabana haumu ha,
u?”
Ia ebuniai etibaha,
“Au hanona ahaꞌi.”
26 Robe haukia arakiai hauna ena taꞌaraꞌi hauna haiana Petero ehara obona hauna hatiaꞌana ha ehore Petero ebakaina etibaha,
“Weia haharua aonai oi Iesu kipokia aihanimi,
u?”
27 Petero haeamona ebuniai mue aonai,
kokoroꞌu beronai eꞌarara.
Iesu Pilato Wairanai.
28 Iuda haukia apaꞌuakia Iesu Kaiafa ena ituai tebakarahina tebakaꞌana teaoaina Kabana hauna ena aka itunai.
Kabana hauna hanona Romai emai.
Weiana hanona aba rani nirerena ba Iuda haukia apaꞌuakia hanona Kabana ena itu aonai aꞌi tekatoto,
pokina ia hanona ekia hoahoa tainai Tirama wairanai aꞌi kateꞌopu Kabanai tatuna aonai kateaniani paunai.
Pilate questions Jesus (Ioane 18:28-40)
29 Ua buonai Pilato ekarahi eao herekia ebakainakia etibaha,
“Hau neiana beho taba ebabaina buonai tomaiaina hereꞌu?”
30 Ia ena ꞌabi tebamuena tetibaha,
“Ia kiꞌa ahaꞌi ebabaina raninai ai hanona ia aꞌi patamaiaina oi heremu.”
31 Pilato ehina benakia etibaha,
“Wai kipomi tomoaoaina emi rauhubu ihobonai tomobabakaina.”
Iuda haukia apaꞌuakia teꞌabi tetibaha,
“Ai hau ha ꞌariai katahorotina hanona emai rauhubuai hiabu uahomana ahaꞌi.”
32 Neiana erama hanona Iesu ena ꞌabi ehinana hauna ia aea keꞌari aiho ꞌabina ketohana.
33 Pilato ena aka itunai etoto ba Iesu eaparina,
ebakaina etibaha,
“Oi hanona Iuda haukia ekia obia ꞌarana,
u?”
34 Iesu ia ena ꞌabi ebamuena etibaha,
“Bakaibakai naiana hanona oi kipomu emu raonai nohinana,
ꞌao maearima baika au robaꞌu teahuna heremuai hauna nohinana?”
35 Pilato Iesu ena ꞌabi ebamuena etibaha,
“Ba oi nuraonana au hanona Iuda hauꞌu?
Oi emu maearima tohakia mai robe haukia apaꞌuakia oi temaiainiꞌo hereꞌu.
Oi beho taba obabaina?”
36 Iesu eꞌabi etibaha,
“Eꞌu obia ꞌekana hanona hanopaka neiana ꞌeunai ahaꞌi.
Ia eꞌu obia ꞌekana hanopaka neiana ꞌeunai raninai,
eꞌu maearima pateꞌau ainaꞌu,
Iuda haukia apaꞌuakia imakiai patebamaurinaꞌu,
ia mo eꞌu obia aiarana hanona hanopaka neianai ahaꞌi.”
37 Pilato ia ebakaina etibaha,
“Oi hanona obia ꞌarana ha,
u?”
Iesu ia ena ꞌabi ebamuena etibaha,
“ꞌAbi mo naiana aba nohinana,
au hanona obia ꞌarana ha,
au arama amai hanopakai ena poki hanona ꞌabi tohana kabawaira tinana.
ꞌAbi tohana tainai ṯemiaho haukia hanona au aiaꞌu kateona.”
38 Pilato eꞌabi etibaha,
“ꞌAbi tohana hanona taba?”
Ua eꞌabi aiho,
ba ekarahi mue Iuda haukia apaꞌuakia ehina benakia etibaha,
“Hau neiana herenai beho ha aꞌi atabu ahina.
39 Weiana wai emi hoahoa tainai Kabanai tatuna ranina nitaina hanona wapura hauna ha nabakarahina heremi.
Ba wai ṯonuatae Iuda haumi emi obia ꞌarana Iesu neiana kabakarahina,
u?”
40 Weiana ena ꞌabi ioai tebamuena tetibaha,
“Ahaꞌi.
Hau naiana ahaꞌi.
Ai ṯanuatae Baraba kobenamai.”
Baraba hanona kakikaki hauna.