Iesu Iꞌabana Haukia Mai Aꞌikakauma Haukia Ikoikiai Paukiai Ebahubaꞌari.
17
Iesu ꞌabi neiana ehinana murinai,
eaꞌa taea kupa eihana ba ebahubaꞌari etibaha,
“Hamaꞌu e,
rani aba ekaraꞌau nahumu ena nuabi mobawaira tinana,
ba nahumu abomo oi emu nuabi kebawaira tinana.
2 Pokina oi hiabu obena maearima ikoikiai keꞌuai ainakia,
maearimakia ikoikia weiakia oi ohore nahumu obena haukia mauri banaibanai kebenakia.
Jesus prays for his followers (Ioane 17:1-26)
3 Mauri banaibanai hanona neiana,
maearima oi kateꞌiobiniꞌo,
oi hanona ikupaiamu mo Tirama tohamu,
abomo kateꞌiobina Iesu Keriso oi ouhuna hauna.
4 “Aka obenaꞌu kababaina hauna aba abaorena,
ba emu nuabi hanopaka ahanai aba abaiha baihaina.
5 Hamaꞌu e,
nuabi weiana hanopaka aꞌi erama baha aonai heremuai hamiaho aina hauna ihobonai bariu wairamuai eꞌu nuabi mobawaira tinana.
6 “Au atamu abawaira tinana maearima neiakia wairakiai,
ia hanona oi ꞌeumu oi ohore au obenaꞌu,
ba ia emu ꞌabi aiana tekaꞌaina.
7 Bariu ia aba teꞌiobina taba ikoikiai obenaꞌu haukia hanona oi heremuai temai.
8 Pokina ꞌabi weiakiai ohina benaꞌu haukia,
ia abaꞌiobinakia hanona teaꞌi taeanakia,
ba teꞌiobina au hanona oi heremuai amai abomo tebatohana oi hanona au ouhunaꞌu.
9 “Au ia paukiai nabahubaꞌari.
Au hanopaka maearimakia paukiai aꞌi nabahubaꞌari,
ia weiakia obenaꞌu haukia paukiai,
nabahubaꞌari pokina ia hanona oi ꞌeumu.
10 Au ꞌeuꞌu haukia ikoikiai hanona oi ꞌeumu,
oi ꞌeumu haukia ikoikiai hanona au ꞌeuꞌu,
ba ia paukiai eꞌu nuabi ewaira tina.
11 “Au hanona hanopaka nahabona ba kawahi oi heremu,
ꞌa ia hanona hanopakai ṯemiaho oho.
Hamaꞌu Robemu e,
atamu weiana obenaꞌu hauna hiabunai koꞌaeabunakia weiana ia ketehamomo ihobona aika habahamomo ꞌabana.
12 Au ia kipokia tamiaho aonai aꞌima harainakia oi atamu obenaꞌu hauna hiabunai aꞌaeabunakia.
Ha aꞌi eꞌakauma,
ꞌa keꞌakauma maearimana hamona hauna mo eꞌakauma,
puka robena ꞌabina kebatohana paunai.
13 Au hanona bariu nawahi oi heremu,
ia hanopakai namiaho oho aonai ꞌabi neiakia nahinanakia,
weiana ia aokiai eꞌu aonamo maikoina kateaꞌina.
14 “Emu ꞌabi aba abenakia ba hanopaka hanona aba niꞌoatanakia,
pokina au hanona hanopaka ꞌeuna ahaꞌi ihobona ia abomo hanopaka ꞌeuna ahaꞌi.
15 Eꞌu noi hanona hanopakai aꞌi koaꞌi parenakia ia tiaporo herenai koꞌaeabunakia.
16 Au hanona hanopaka ꞌeuna ahaꞌi ihobonai ia abomo hanopaka ꞌeuna ahaꞌi.
17 Emu ꞌabiai kobarobenakia emu maearima tohakiai kateao,
emu ꞌabi hanona ꞌabi tohana.
18 Oi au ouhunaꞌu amai hanopaka maearimakia baiatakiai amiaho ihobona mo au ia auhunakia teao hanopaka maearimakia baiatakiai ṯemiaho.
19 Ia paukiai au kipoꞌu abarobenaꞌu oi ꞌeumu,
weiana ia abomo kipokia kateba robenakia oi ꞌeumu.
20 “Au eꞌu bahubaꞌari hanona ia mo ikupaiakia ahakiai ahaꞌi,
ia ekia ꞌabiai au kateaꞌikakaumaꞌu haukia ahakiai abomo nabahubaꞌari.
21 Hamaꞌu e,
oi hanona au aoꞌuai mai au hanona oi aomuai,
ihobonai ia ikoikiai hanona aokia kehamona.
Ia abomo katemai aika aokai weianai hanopaka maearimakia kateꞌiobina oi hanona au ouhunaꞌu.
22 Nuabi obenaꞌu hauna aba ia abenakia,
weiana oi mai au aoka ehamona ihobonai ia abomo aokia kehamona.
23 Au hanona ia aokiai mai oi hanona au aoꞌuai.
Ba ia aokia kehamomo harai hanopaka maearimakia kateꞌiobina oi hanona au ouhunaꞌu,
au oraonaꞌau ainaꞌu ihobonai oi ia abomo nuraonaꞌau ainakia.
24 “Hamaꞌu e,
au nanuatae weiakia obenaꞌu haukia kipokia au aeꞌeai hanona ia abomo weia,
ba ia weia eꞌu nuabi kateihana,
nuabi weiana hanona hanopaka aꞌi obabai bahana aonai oi au oraonaꞌau ainaꞌu paunai obenaꞌu hauna.
25 Hamaꞌu bero haumu e,
hanopaka maearimakia hanona oi aꞌi ṯeꞌiobiniꞌo,
ia mo au hanona oi aꞌiobiniꞌo mai eꞌu maearima neiakia teꞌiobina oi hanona au ouhunaꞌu.
26 Au hanona oi atamu abaꞌiobinakia mai rani ikoinai kabaꞌiobi toꞌonakia,
pokina emu raonaꞌau hereꞌuai hauna hanona ia herekiai abomo kemiaho,
ba au abomo ia aokiai kamiaho.”