Pou namona neiana Luka ererena aonai ebaihanaka Iesu hanona hau weiana aba eꞌabiꞌuai aina kemai Isaraela haukia mai hanopaka maearimakia ikoikiai kebamaurinakia hauna. Luka hanona Iesu ena aka keaꞌi ramana raninai, Auba Robe ia ebabonu, weiana ia keao uraru haukia herekiai Pou Namona kehinana (4.18), haeamona maearima mai ekia puma aea ebarai aihonakia hauna robana eahu haraina. Taba weiakia Iesu ebabainakia hanona maearima neiakia ebaonamo kiꞌa bahanakia ba ia teaonamoai kiꞌa bahana. Maria ia ebaramana raninai maearima teaonamo (1.42-48; 2.10), haeamona puka aꞌenai Iesu auhao aokiai ekaraꞌau raninai ekia aonamo eapaꞌua kiꞌa baha (24.52).

Puka neiana iroꞌana rua aokiai (1–2 mai 9–19) taba baika hanona Luka mo ikupaiana ehina, matoha Aneru mai mamoe ihaꞌini haukia orina, Iesu miori papanai marea robe aonai, ꞌabi ibabataikia weiakia Samaria hauna namona mai Miori ha hamana ehabona hauna. Taba baika hanona Luka ehina taburanakia, rani ikoinai kahabahubaꞌari tabura taearana, Auba Robe ena aka, mai Tirama ena namoai maearima ikoikiai ekia kiꞌa ehina hao. Luka ehore babiꞌe tebabainakia tabakia boꞌokia ehinanakia.

Luka ena irere hanona neiamo aꞌi epua, ia ehore puka weiana ‘Iuhubeau haukia ekia aka’ abomo ererena weiana hanona Iesu ekaraꞌau kupa eao murinai taba tebabai haukia robakia eahunakia.