Pou Namona
LUKA
Ererena Hauna
Luka Marere Ererena Eao Teofilo herenai.
1
Obia haumu Teofilo e.
Maearima boꞌona baiatamai ai taba tohakia terama haukia aba tererenakia,
2 bahabanai mahakiai aka neiana teihana mai teiroro aina haukia tehina benamai ihobona.
3 Au aboꞌumo popouna ꞌakinai eaꞌi ramana ꞌabikia ikoinai atabu harainakia.
Ba naraonana enamo buonai au marere ha karerena oi ꞌeumu.
4 Weiana koꞌiobi haraina taba tebaꞌiobiniꞌo ꞌabikia hanona tohakia.
Luka 1:1-25
Aneru Sakaria Ehinabena Nahuna Ioane Kerama.
5 Heroda Iuda eobia aina raninai robe hauna ha weia atana Sakaria,
Abia ena itubu hauna,
atawana Elisabeta hanona Arona ena rama babiꞌena.
6 Terarua hanona aka bero maearimakia Tirama wairanai,
Obiapaka ena rauhubu mai bairobe teꞌima harainakia,
kiꞌa ha aꞌi tebabaina.
7 Iamo terarua hanona nahukia ahaꞌi pokina Elisabeta hanona ꞌoneꞌone haeamona terarua aba teanepaka.
8 Sakaria ena itubu haukia ekia aka raninai,
ia ehore robe akakia ebabai Tirama wairanai.
9 Robe haukia ekia hoahoa tainai,
puꞌiai ia teaꞌi taeana ꞌeka robena ketoto muramura timina ꞌorimona kekinena.
10 Ikinena ranina etaina,
bahubaꞌari haukia ikoikiai atapakai tetoꞌuna tibahubaꞌari.
11 Obiapaka ena aneru ha herenai ewaira tina muramura timina ꞌorimona ikinena itarana abihanai itipana tainai ekoroti.
12 Sakaria aneru eihana raninai nuana etae abomo etaꞌu kiꞌa baha.
13 Iamo aneru ia ehina bena etibaha,
“Sakaria e,
aꞌi kotaꞌu.
Emu bahubaꞌari ꞌuruna Tirama aba eona,
oi atawamu Elisabeta hanona nahumu hau ha kebaramana,
atana koaparina Ioane.
14 Aomu hanona kenamo,
mai koaonamo kiꞌa baha,
mako abomo ena ramai kateaonamo.
15 Pokina Obiapaka wairanai ia hanona keapaꞌua,
bine ꞌao muramura kirokia aꞌi keinu,
abomo hinana nuanai aꞌi kerama baha aonai Auba Robeai kebonu.
16 Ia kehore Isaraela maearimakia boꞌona ꞌakina kebaraona kabenakia Obiapaka ekia Tirama herena kateao.
17 Keꞌuai Obiapaka wairanai Elia ena aka mai ena hiabu ihobona,
hama mai nahu aokia keba hamomonakia,
mai aia oꞌo ahaꞌi haukia bero haukia ekia aotipa taearanai kebakaꞌanakia,
maearima kebaꞌorunakia Obiapaka ꞌeuna.”
18 Sakaria aneru ebakaina etibaha,
“Neiana hanona aea kaꞌiobi harai aihona?
Au hanona aba anepaka mai atawaꞌu abomo eanepaka.”
19 Aneru ena ꞌabi ebamuena etibaha,
“Au hanona Gabriel,
Tirama wairanai nakoroti,
euhunaꞌu pou namona neiana amaiaina heremu kabaꞌiobiniꞌo.
20 Bariu oi hanona maeamu kekiꞌa aꞌi koꞌabiꞌabi keaomo taba neiakia ekia rama ranina ketaina.
Pokina eꞌu ꞌabi rani weianai ketohana hauna aꞌi obatohana paunai.”
21 Maearima hanona Sakaria teꞌima ꞌarina abonamo aokia earoꞌari pokina marea robe aonai rani homaꞌana emiaho.
22 Ia ekarahi raninai ꞌabi kehinana hanona aꞌi etaina.
Weiana teꞌiobina ia hanona marea robe aonai taba ha eihana.
Hoahoa mo ebabai maeana ekiꞌa aꞌi eꞌabiꞌabi.
23 Ena aka beraurana ebaorena hanona emue ena itu eao.
24 Murinai ia atawana Elisabeta epuma,
nawa ima itu aonai mo emiaho.
25 Eꞌabi etibaha,
“Neiana hanona Obiapaka ena nuatae hoana hereꞌuai,
maearima baiatakiai eꞌu haumaea keaꞌi parena.”
Aneru Maria Ehinabena Iesu Kebaramana.
26 Elisabeta nawana ꞌabaihau aonai Tirama ehore aneru ha atana Gabriel euhuna Galilea aonai aiara ha atana Nasareta eao.
Luka 1:26-80
27 Uaho rari ha weia teꞌabi aina hau ha atana Iosepa keatawana Davida ena rama hauna,
uaho weiana atana hanona Maria.
28 Aneru eao herena ehina bena etibaha,
“Moaonamo.
Oi hanona enuataeai apaꞌuaniꞌo.
Obiapaka hanona oi heremuai.”
29 ꞌAbi weiana Maria aona ebaroꞌarina,
mai eraonaraona banamo weiana anina hanona taba.
30 Ia aneru eꞌabi etibaha,
“Maria e,
aꞌi motaꞌu,
Tirama ena nuatae aba oaꞌina.
31 Oi hanona kopuma,
miori ha kobaramana,
atana koaparina Iesu.
32 Ia hanona ketarahi mai kateaparina ꞌUbi toha tohana Hauna Nahuna,
Tirama Obiapaka kehore ꞌabaꞌabana Davida ena obia kebena.
33 Mai Iakobo ena itubu keobia aina keaomo banai banai,
ena obia hanona aꞌi kepua.”
34 Maria aneru ebakaina etibaha,
“Au hau ha aꞌi aꞌiobina.
Neiana hanona aea kerama aiho?”
35 Aneru ehina bena etibaha,
“Auba Robe keriri oi ahamuai,
ꞌUbi toha tohana Hauna ena hiabuai kebahu abuniꞌo,
Robe Hauna kerama atana kateaparina Tirama Nahuna.
36 Oi hatiaꞌamu Elisabeta teꞌabi ia hanona ꞌoneꞌone,
ia ena anepakai miori ha eaꞌina,
bariu nawana aba ꞌabaihau.
37 Tirama herenai hanona taba ha aꞌi epahihi.”
38 Maria eꞌabi etibaha,
“Au hanona Obiapaka ena taꞌaraꞌi babiꞌeꞌu.
Emu ꞌabi ihobona hereꞌuai merama.”
Ba aneru Maria ehabona.
Maria Eao Elisabeta Herena.
39 Rani weianai Maria eaꞌi aꞌi harai mai enoanoa eao oeo aiarana ha Iudea puroꞌonai.
40 Sakaria ena ituai etoto Elisabeta ebanamona.
41 Elisabeta Maria ena banamo ꞌuruna eona raninai nuana aonai miori eibiuibiu mai Auba Robe Elisabeta aona ebabonuna.
42 Weiana eꞌabi aota,
“Babiꞌe ikoikiai baiatakiai oi hanona onamo kiꞌa baha,
miori kobaramana hauna abomo enamo.
43 Eꞌu namo hanona taba eꞌu Obiapaka hinana hereꞌu emai!
44 Berona ꞌakinai emu banamo ꞌuruna aona raninai miori nuaꞌu aonai mai aonamona eibiu ibiu.
45 Aꞌikakauma babiꞌemu e,
aba onamo pokina Obiapaka ena ꞌabi ehina heremuai haukia katemai katetoha.”
Maria Ena Aonamo Huina.
46 Maria eꞌabi etibaha,
“Au aoꞌu Obiapaka nibanamona.
47 Mai aubaꞌu abomo eꞌu bamauri
Tiramana niaonamo aina,
48 pokina ena uraru mai taꞌaraꞌi
babiꞌeꞌu eraona tinanaꞌu paunai.
Bariu rani neianai keao
uru ikoikiai namoꞌu katehinana,
49 pokina hiabu Tiramana
taba rarikia ꞌeuꞌuai ebabainakia.
Ia atana hanona erobe,
50 uru ha keao uru ha
ena aokoꞌo hanona
nibawaira tinana weiakia
timariki aina haukia herekia.
51 Ia imanai ena tabura ebakarahina,
apa haukia ekia raona
ekipu otarainakia.
52 Ia ehore obia haukia taburakia
ekia obia ꞌekakiai ebaririnakia,
mai uraru haukia ebakaraꞌaunakia.
53 Mareꞌa tiꞌari haukia
taba namokiai ebabonu ꞌaunakia,
ia kepu haukia euhunakia
imakia ꞌabaeakia temue.
54 Ena ꞌabiꞌuai eraona tinana
ena taꞌaraꞌi itubuna
Isaraela haukia ebarainakia.
55 ꞌAbaꞌabaka herekiai
ehinana hauna ena aokoꞌo
ebawaira tinana Aberahamo
mai kupuna ꞌabaꞌabana herekiai
keaomo banai banai.”
56 Maria Elisabeta ohi temiaho nawa aihau ꞌabana ba emue eao ena aiara.
Elisabeta Nahuna Ioane Ebaramana.
57 Elisabeta ena mauri ranina etaina hanona nahuna hau ebaramana.
58 Herenai ṯemiaho haukia mai hatiaꞌana pou teona,
Obiapaka ena aokoꞌo rarina ꞌakina herenai ebawaira tinana hanona kipokia teaonamo haeamo.
59 Wapu ibaꞌababanina emai hanona ikoikiai temai miori itarena toꞌuna,
haeamona hamana Sakaria atana kateaparina.
60 Ia hinana etae etibaha,
“Ahaꞌi,
ia atana kahaparina Ioane.”
61 Ikoikiai tehina bena tetibaha,
“Hatiaꞌamu ha atana uahomana ahaꞌi.”
62 Weiana mahakia tebairu hamana herenai miori ata tabana keaparina.
63 Weiana ia rererere piharana ebakai bakai aina,
weia ahanai ṉa erere aihona,
“Atana hanona Ioane,”
raninai ikoikiai tetaꞌutaꞌu huri.
64 Mawaꞌeai pinana ekaikauna,
maeana ebero eꞌabiꞌabi mue,
Tirama ebanamona.
65 Herekiai ṯemiaho haukia ikoikiai tetaꞌu kiꞌa,
mai Iudea oeo aiarakia maikoinai pou neiana tehina otaraina.
66 Pou teona haukia aokiai teraona ꞌiniꞌinina tetibaha,
“Miori neiana aea homanai keao.”
pokina Tirama imana hanona ia ahanai.
Sakaria Ena Mahabanai ꞌAbina.
67 Miori hamana Sakaria aona Auba Robe ebabonuna,
ba Tirama ena ꞌabi ehinana etibaha,
68 “Obiapaka Isaraela ekia Tirama
kahabanamona,
pokina emai ena maearima
aba ekawa muenaka.
69 Bamauri Pokinaa ebamikirina
aika ꞌeuka ena taꞌaraꞌi hauna
Davida ena itubuai.
70 Aba waꞌi baha raninai
ena ꞌabi mahabanai robekia
pinakiai tehinana ꞌabana.
71 Eka ꞌou haukia mai
ꞌarika aꞌi tiꞌari haukia ikoikiai
imakiai kebamaurinaka.
72 Kupuka eaokoꞌo ainakia
mai ena ꞌabiꞌuai robena
eraona ꞌinina.
73 Kupuka Aberahamo herenai
ena ꞌabiꞌuai ehinana:
74 Eka ꞌou haukia imakiai
kebamaurinaka,
aꞌi kahataꞌu ena aka kahababaina
75 robeai mai beroai ia wairanai
eka miaho ranikia ikoikiai.
76 “Haeamona nahaꞌu e,
oi hanona kateapariniꞌo
ꞌubi toha tohanai hauna
ena mahabanai haumu.
Pokina oi koꞌuai
Obiapaka wairanai ena taeara
koaꞌiaꞌi haraina,
77 ena maearima bamauri aoberona
kobaꞌiobinakia
ekia kiꞌa ihina haonai keao.
78 Aika eka Tirama ena aokoꞌo paunai.
Beraura nitae eana kupai
keriri kemai hereka,
79 ꞌari aiaianai mai wapurai ṯemiaho
haukia ahakiai kerara,
weiana
aeka kebakaꞌanakia baibua
taearanai kebaka totonakia.”
80 Miori hauaniai eapaꞌua mai aubai etabura.
Ia hanoꞌakunai emiaho eaomo ekarahi Isaraela mako herekiai.