Iesu Erama.
2
Rani weiana aonai Augusto obia ꞌarana rauhubu ꞌabina ha euhuna eao Roma ena ihaꞌini hanopakana maikoinai ata katerere.
2 Neiana hanona ata rere koriꞌuaina Kurene Suria hanopakana eiha ꞌinina raninai.
Luka 2:1-20
3 Weiana maearima ikoikiai atakia katebaibeni paunai temue ikau ena aiara teao.
4 Iosepa abomo Nasareta Galilea hanonai emikiri eao Davida ena Aiara Betelehema Iudea ai,
pokina ia hanona Davida ena itubu mai ena rama hauna.
5 Atakia katebaibeni paunai ia teꞌabi aina babiꞌena Maria ohi teao,
Maria hanona mai nuana.
6 Terarua weia ṯemiaho aonai kemauri ranina etaina.
7 Weiana emauri nuahobo miorina hau ebaramana,
habuniai tebaroꞌa abuna poromakau ekia aniani ahiahinai tebaeno utana,
pokina ꞌimaꞌima itunai ꞌeka ahaꞌi.
Aneru Mamoe ꞌIma Haukia Tehina benakia.
8 Hano weiana hamona aonai mamoe ꞌima haukia baika tubuai rabi aonai ekia mamoe teꞌimanakia.
9 Obiapaka ena aneru ha herekiai ewaira tina,
Obiapaka nuabinai ebaea obonakia raninai tetaꞌu wairai.
10 Aneru ia ehina benakia etibaha,
“Aꞌi tomotaꞌu.
Au pou namona amaiaina weiana maearima ikoikiai aokia kebaonamonakia.
11 Bariu rani neianai Davida ena aiarai emi Bamauri hauna ha erama,
ia hanona Kerisoa Obiapaka.
12 Hoana hanona nahomana,
miori ꞌoruꞌoruna ha katotabu ahina,
habuniai teroꞌa abuna poromakau ekia aniani ahiahinai tebaeno utana.”
13 Mawaꞌeai kupai aneru toꞌuna tewaira tina aneru weiana herenai,
Tirama tebanamona tetibaha,
14 “Kupa ꞌubi toha tohanai
nuabi hanona Tirama ꞌeuna,
hanopakai ena baibua hanona
niaonamo ainakia haukia herekiai.”
Mamoe ꞌIma Haukia Teao Miori Kateihana.
15 Aneru toꞌuna ia herekiai tekaobo temue kupa raninai mamoe ꞌima haukia kipokia teꞌabiꞌabi tetibaha,
“Aika hamaeao Betelehema,
Obiapaka ebaꞌiobinaka taba weiana erama hauna kahaihana.”
16 Tenoanoa teao Maria Iosepa mai miori ꞌoruꞌoruna poromakau ekia aniani ahiahinai enouta tetabu ahinakia.
17 Weiana teihana raninai aneru miori robana eahuna ꞌabina maearima teba ꞌiobinakia,
18 mamoe ꞌima haukia pou weiana tehinana raninai aia teona haukia ikoikia tetaꞌu taꞌu huri.
19 Maria hanona ꞌabi weiakia ikoikiai aonai eraona ꞌininakia mai eraona raona ainakia.
20 Mamoe ꞌima haukia temue Tirama tekuti aina mai teapaina pokina taba weiakia ꞌurukia teoꞌo mai teiha haukia ikoikiai ia ehina benakia ihobona tohanai terama.
Miori Atana Iesu Teaparina.
21 Wapu ibaꞌababaninai ena itare ranina etaina hanona atana teaparina Iesu,
aneru ata ebena hinana nuanai aꞌi erama baha aonai.
Luka 2:21-52
Simeona Mai Ana Marea Robe Aonai Iesu Teraꞌuna.
22 Mose ena rauhubu ihobona ena kopa kopa ahu ranina eore murinai miori teaoaina Ierusalema Obiapaka wairanai katebawaira tinana.
23 Obiapaka ena rauhubuai tererena ihobona,
“Hobohobo miorikia hau ikoikiai hanona katebaibeni Obiapaka ꞌeuna.”
24 Obiapaka ena rauhubu eꞌabi ihobona barobe tabakia katebaibeni mumu rua ꞌao rauria nahu rua.
25 Weia Ierusalemai hau ha atana Simeona ia hanona bero hauna haeamona Tirama nimariki aina.
Isaraela ena bamauri hauna neꞌimana,
aona Auba Robe ebonu.
26 Auba Robe ia ehina bena ia aꞌi keꞌari keaomo Obiapaka ena Keriso keiha ꞌuaina.
27 Auba Robe ia ebakatotona Marea Robe aonai.
Maria Iosepa ohi Iesu teaoaina Marea rauhubu ena hoahoa katebabaina paunai.
28 Simeona imanai miori eraꞌuna Tirama ebanamona etibaha,
29 “Obiapaka e,
emu ꞌabiꞌuai ihobona
emu taꞌaraꞌi hauna bariu
mai baibuana aba nuhabona.
30 Pokina mahaꞌu ai
emu Bamauri Pokina aba aihana,
31 weiana oi aba obaꞌoruna
maearima ikoikiai wairakiai.
32 Eana neiana hanona
rama haeai haukia ibaeakia
abomo oi emu maearima
Isaraela ibanuabikia.”
33 Miori hamana hinana ꞌabi weiakia teoꞌo hanona tetaꞌu taꞌu huri.
34 Simeona ehore terarua eba namonakia haeamona hinana Maria ehina bena etibaha,
“Miori neiana hanona eꞌoru Isaraela haukia boꞌona ibaꞌehokiai mai ibamikirikiai keao,
abomo ena hoahoai kateꞌoatana,
35 maearima boꞌona ekia raona bunikia kabakarahinakia.
Mai kareba itatona ꞌabana kehore oi aomu abomo kebahaiarana.”
36 Weia hanona mahabanai babiꞌena ha atana Ana,
Panuela nahuna ena itubu hanona Asere,
aba eanepaka,
ena hawainibe ihauna ꞌabaihau hamomo atawana ohi temiaho,
37 ba ewapu emiaho bariu ihauna imabui harau aihau bani (84).
Ia marea robe aꞌi ehabo ꞌapuana Tirama ekuti aina rabi mai mararani eanirobe mai ebahubaꞌari.
38 Rani weiana hamona aonai Ana emai marea aonai Tirama ebanamona ba maearima ikoikiai Ierusalema kebamaurina hauna ṯeꞌimana haukia herekiai miori pouna ehinana.
Iesu Nasaretai Eapaꞌua.
39 Iosepa mai Maria ohi Obiapaka ena rauhubu eꞌabi ihobonai aka ikoikiai tebaorenakia raninai temue Galilea ekia aiara tohana Nasareta teao.
40 Miori eapaꞌua mai etabura;
aoberoai ebonu,
Tirama ena baraibarai ia ahanai emiaho.
Miori Iesu Marea Robe Aonai.
41 Ihau ikoinai hamana mai hinana Ierusalema teao kabanai tatuna paunai.
42 Iesu ihauna harau haea rua raninai,
teaihau teao Ierusalema ekia tatu hoahoana taina.
43 Tatu eore murinai hamana mai hinana temue ꞌa miori Iesu hanona Ierusalemai emiaho,
hamana mai hinana aꞌi teꞌiobina.
44 Teraonana ia hanona baiatakiai,
wapu hamona tekaꞌaina murinai tetabu ramana ꞌabana mai hatiaꞌa herekiai.
45 Aꞌi tetabu ahina paunai temue teao Ierusalemai weia katetabuna.
46 Wapu aihau teao murinai marea robe aonai tetabu ahina bamarere haukia baiatakiai emiati aia ebahuai mai ebakainakia.
47 Ena ꞌiobi mai ꞌabi bamueai aiana teona haukia ikoikiai tetaꞌu taꞌu huri.
48 Hamana mai hinana teihana raninai tetaꞌu taꞌu huri.
Weiana hinana ia ehina bena etibaha,
“Nahaꞌu e,
taba buonai nahomana heremaiai obabaina?
Au hamamu ohi aomai maihaina tatabu ꞌariniꞌo.”
49 Iesu ehina benakia etibaha,
“Taba buonai wai au tutabunaꞌu?
Aꞌi toꞌiobina au hanona hamaꞌu ena itu aonai namiaho,
u?”
50 ꞌA ia ena ꞌabi ehinana hauna obona aꞌi teobo.