Iesu ꞌAriai Emikiri Mue.
16
Beraura Robe eore murinai Maria Magadala babiꞌena Iakobo hinana Maria mai Salome tehoro timikia ꞌorimokia tekawa kateao Iesu hauanina kateutuna.
Mareko 16.1-20
2 Hui beraurana raurani ꞌamari ꞌamarinai,
beraura nitae aonai,
babiꞌe weiakia taearai tekaꞌa ꞌariahana teao aonai,
3 kipokia teꞌabiꞌabi tetibaha,
“Tai kebarainaka,
ꞌariahana paꞌabi piharana ketori parena.”
4 Mahakia eao ꞌariahana paꞌabina,
pihara rarina ꞌakina aba itori pare teihana.
5 Ia ꞌariahana aonai tekatoto hanona hau ꞌaruꞌaruna ha habuni porekia eba totonakia itipa tainai emiati teihana raninai tetaꞌu kiꞌa.
6 Hau weiana eꞌabi etibaha,
“Aꞌi tomotaꞌu.
Wai Iesu Nasareta hauna tekoko ꞌauna hauna tutabuna.
Ia hanona aba emikiri.
Ṉaꞌa ahaꞌi.
Tehorotina ꞌekana tomoihana.
7 Tomoao iꞌabana haukia mai Petero katohina benakia,
katotibaha,
‘Katoao Galileai,
Iesu aba keꞌuai uaꞌa,
katoihana eꞌabi ihobona!’”
8 Ua buonai babiꞌe weiakia tekarahi ꞌariahana tehabona mai nuataekia haeamona mai taꞌukia.
Tetaꞌu buonai tai ha haianai aꞌi teꞌabi.
Iesu Maria Magadala Herenai Mai Hau Rua Herekiai Ewaira Tina.
[
9 Hui beraurana raurani ꞌamarinai,
Iesu ꞌariai emikiri murinai,
Maria Magadala babiꞌena herenai ewaira tina ꞌuai,
ia hanona ꞌuainai Iesu auba kiꞌa obokia ꞌabaihau hamomo aonai euꞌu ahinakia babiꞌena.
10 Maria Magadala babiꞌena eao Iesu teꞌabana haukia tiaokoꞌo tihaihai herekiai Iesu pouna ehinana.
11 Maria herenai pou teona Iesu aba emauri,
haeamona eihana ṉa ehoma hanona ena ꞌabi aꞌi teaꞌi taeana.
12 Muriai Iesu ihana ebahaeaina hau rua taearai tekaꞌa ꞌuni tiao aonai,
herekiai ewaira tina.
13 Ba terarua temue teao ꞌabakia haiakiai teꞌabi.
Ia abokiamo aꞌi tebatohanakia.
Iesu Harau Haea Hamomo Herekiai Ewaira Tina.
14 Weiana murinai haukia harau haea hamomo tianiani aonai,
Iesu ewaira tina herekiai.
Ekia aꞌikakauma ahaꞌi haeamona ekia ao pahihi paunai ebatanakia.
Pokina emikiri murinai teihana haukia aiakia aꞌi tebatohana.
15 Ba ia ehina benakia etibaha,
“Katoao hanopaka ikoinai Pou Namona maearima ikoikiai herekiai katoiroro aina.
16 Keaꞌikakaumana mai ꞌuere robe keaꞌina hauna hanona mauri keaꞌina,
ꞌa aꞌi keaꞌikakaumana hauna hanona puma kehoaina.
17 Aꞌikakauma haukia hanona bataꞌutaꞌu huri akakia ṉahomakia katebabai.
Au ataꞌuai auba kiꞌa obokia kateuꞌu uꞌu ahinakia,
haeamona maea haeai haeai kateꞌabi,
18 imakiai ꞌerau kateaꞌinakia,
muramura kiꞌa obokia kateinu ia herekiai taba ha aꞌi kerama,
haeamona imakia inawa haukia ahakiai katehaoꞌau hanona ekia inawa katenamo.”
Iesu Eaꞌi Taeana Kupa Eao.
19 Obiapaka Iesu ia ehina benakia murinai,
ekaraꞌau eao kupa,
Tirama itipana tainai emiati.
20 Iꞌabana haukia ikoikiai weia tekarahi ꞌeka ikoikiai aokiai teiroro.
Obiapaka etai turinakia buonai hoa haeai haeai tebabai,
aka weianai ekia iroro ebatohanakia.]a
Mareko -credits