Iesu Pilato Wairanai.
15
Raurani wapuranai robe haukia apaꞌuakia,
aiara haukia apaꞌuakia,
rauhubu poki haukia mai bakai apaꞌuana haukia ikoikiai ꞌabi tebahamomona,
Iesu tebirina teaoaina Pilato tebena.
Mareko 15.1-26
2 Pilato Iesu ebakaina etibaha,
“Oi Iuda haukia ekia Obia ꞌarana haumu,
ꞌu?”
Iesu eꞌabi etibaha,
“Aba nuꞌabi mo naia.”
3 Robe haukia apaꞌuakia tehore ꞌabi boꞌokia Iesu ahanai tehina.
4 Pilato haeamona Iesu ebakai muena etibaha,
“Oi aꞌi koꞌabi,
ꞌu?
Oi oꞌiobina ꞌabi haeai haeai oi ahamuai ṯehinanakia.”
5 ꞌA Iesu ꞌabi ha aꞌi ebamuena,
weiana buonai Pilato ebaoao.
Pilato Eꞌabi Iesu Kateahu ꞌArina.
6 Pilato ena hoahoa rani ikoinai tatu aokiai maearima wapura hauna ha ṯenuatae aina hauna hanona nibakarahina.
7 Rani weianai hau ha atana Baraba ꞌabana kipokia tewapura.
Ia hanona Roma haukia teꞌoatanakia,
ꞌau aonai maearima baika eahu ꞌarinakia.
8 Ba toꞌu haukia tehore Pilato tenoina rani ikoinai hoahoa weiana nibabaina hauna kebabaina.
9 Pilato ehore ebakainakia etibaha,
“Ṯonuatae Iuda emi Obia ꞌarana hauna kabakarahina?”
10 Pokina Pilato aba eꞌiobina robe haukia apaꞌuakia hanona Iesu tiwamuru aina buonai teaꞌina ia imanai teutana.
11 ꞌA robe haukia apaꞌuakia temikiri toꞌu haukia tekai taꞌataꞌanakia,
kateꞌabi,
Pilato Baraba kebakarahina ia Iesu hanona kemiaho.
12 Pilato haeamona toꞌu haukia ebakai muenakia etibaha,
“ꞌA wai tuꞌabi Iuda ekia Obia ꞌarana hauna hanona aea kahomana?”
13 Ikoikiai teio tetibaha,
“Matiu ibiri ropo ꞌubinai kobaꞌarina!”
14 Pilato ehore ebakai muenakia etibaha,
“Aea ehoma,
ena beho taba?”
ꞌA ia teio aota tetibaha,
“Matiu ibiri ropo ꞌubinai kobaꞌarina!”
15 Weiana Pilato hanona toꞌu haukia aokia ibanamona enuatae aina buonai Baraba erubuna.
ꞌA Iesu hanona eꞌatina huari haukia ebenakia,
matiu ibiri ropo ahanai kateahu ꞌarina.
Huari Haukia Iesu Tebapoꞌona.
16 Huari haukia Iesu tebakaꞌana teaoaina rauhubu ituna apaꞌuana aonai ekia hau ikoikiai tebararonakia.
17 Habuni birona tebabatoto aina,
abomo ꞌini boaboa teaꞌi kaiarona ꞌaranai tehore ꞌauna.
18 Ekia bapoꞌo poꞌo teaꞌi ramana tetibaha,
“Iuda obia ꞌarana e,
komauri.”
19 Moheai ꞌarana teꞌatina teꞌatotina,
wairanai tekaipehu haeamona tekutiai baiꞌoina.
20 Tebapoꞌo nonoana murinai,
habuni birona haunai tebakuri ahina,
ena habuni tohana tebabatoto muena tebakarahina matiu ibiri ropo ꞌubinai kateahu ꞌarina teao.
Iesu Matiu Ibiriropo ꞌUbinai Tekoko ꞌAuna.
21 Kurene hauna ha atana Simona ꞌuniai emai Ierusalema niao,
ia hanona Alesanda mai Rufo hamakia.
Huari haukia Simona kipokia tebai tabu ahi aonai tebahi ahina Iesu ena matiu ibiri ropo kebuana.
22 Iesu tebakaꞌana teaoaina ꞌeka ha atana Golgota,
anina hanona ꞌAra Huriana ꞌEkana.
23 Ia tehore bine beina mabina mai haiara ibakoꞌikoꞌina muramurana kipokia teu kibukibuna tebena keinu.
Iesu hanona aꞌi einu.
24 Ba Iesu matiu ibiri ropo ꞌubinai tekoko ꞌauna.
Epua murinai huari haukia ena habuni puꞌiai tewatenakia ha ha kateaꞌi.
25 Raurani beraura ehiabu hiabu aonai (9 a.
m.)
Iesu matiu ibiri ropo ꞌubinai tekoko ꞌauna.
26 Ia ꞌarana ꞌubinai beho marerena ṉa terere aihona.
‘IUDA HAUKIA EKIA OBIA ꞌARANA.’
27 Kakikaki haukia rua Iesu kipokia rani hamomonai matiu ibiri ropo ꞌubikiai tekoko ꞌaunakia,
ha itipanai ha awarinai.
Mareko 15.27-47
29 Tekabanai haukia tehore ꞌabi kiꞌa obokia tehina herena,
abomo ꞌarakia tekapokapo teꞌabi tetibaha,
“Oi neiamu haumu Marea Robe korubuna haeamona wapu aihau kobakori muena.
30 Bariu naia matiu ibiri ropo ꞌubinai moriri,
kipomu mobamauriniꞌo.”
31 Taeara ihobonai mo Robe haukia apaꞌuakia mai rauhubu poki haukia Iesu teꞌabi papura aina tetibaha,
“Maearima baika ebamaurinakia,
ia kipona kebamaurina hanona aꞌi nitaina.
32 Keriso Isaraela ekia Obia ꞌarana,
bariu weia matiu ibiri ropo ꞌubinai meriri hamaihana ba kahaꞌikakaumana.”
Iesu kipokia matiu ibiri ropo ꞌubinai tekokonakia haukia terarua abomo ꞌabi kiꞌa obokia tehina herenai.
Iesu Ena ꞌAri.
33 Atiaha tohanai hanopaka maikoinai ewapura abuna eao mo beraura ebaeno hoana aihau ꞌabana.
34 Beraura ebaeno aonai Iesu eapari aota etibaha,
“Eloi Eloi,
lama sabakatani.”
Anina hanona ‘Eꞌu Tirama e,
Eꞌu Tirama e,
taba buonai ohabonaꞌu.’
35 Herenai tekoroti haukia baika Iesu aiana teona,
teꞌabi tetibaha,
“Tomobahu,
ia hanona Elia niaparina.”
36 Weiana hau ha ebeau eao poame eaꞌina bine beina mabina aonai ehao uhuna,
hiribo ai ekai toꞌona ba etiu taeana Iesu ebena keinu ba eꞌabi etibaha,
“Hamabaiꞌima,
hamaihana.
Elia paꞌe kemai keaꞌi obona.”
37 ꞌA Iesu eio aota,
ba eꞌari.
38 Rani weianai Marea Robe aonai iꞌaea huri habunina ibuanai etapa boana ꞌubi ai eriri eao baꞌa.
39 Huari poki hauna ha Iesu herena ꞌakinai ekoroti eihana ia eio aiana eona,
ua eꞌari aiho raninai eꞌabi etibaha,
“Hau neiana hanona Tirama Nahuna tohana.”
40 Babiꞌe baika abomo ataꞌuai tekoroti tebaiaruru,
baiatakiai hanona Maria Magadala babiꞌena Iakobo koꞌikoꞌi Iosepa ohi hinakia Maria mai Salome.
41 Babiꞌe neiakia hanona Galileai Iesu murinai tekaꞌa tebaraina.
Iesu kipokia Ierusalemai tekaraꞌau haeamo babiꞌekia boꞌokia abomo weia.
Iesu Tehorena.
42 Wapu weiana hanona Aꞌiaꞌi harai ranina,
kerani mara hanona Beraura Robe.
Beraura aba kaihu niaoaina aonai,
43 Iosepa Arimatea hauna aona ebanua koꞌona eao Pilato wairanai Iesu hauanina enoiaina.
Ia hanona Iuda ekia obia hauna ha maearima abomo timariki aina,
Tirama ena obia aiarana kemai neꞌimana hauna ha.
44 Pilato Iesu eꞌari noanoa pouna eona raninai etaꞌu taꞌu huri.
Ia emikiri huari poki hauna eaparina Iesu ena ꞌari ranina ebakai bakai aina.
45 Pilato Iesu ena ꞌari ꞌuruna huari poki hauna herenai eona murinai,
Iesu hauanina eꞌuahina Iosepa keaꞌina.
46 Iosepa ehore habuni namona tohana ha ekawana,
Iesu hauanina eaꞌi obona habuni weianai eꞌapana eaoaina ꞌariahana pihara ikui aonai ehorotina,
pihara rarina ha ebaherena ebahu abuna.
47 Maria Magadala babiꞌena mai Iosepa hinana Maria terarua Iesu hauanina tehorotina ꞌekana teihana.