Iesu Teaoaina Pilato Wairanai.
27
Raurani amarinai robe haukia apaꞌuakia mai Iuda ekia maearima apaꞌuakia ikoikiai terobahu ꞌabi tebahamona Iesu katebaꞌarina.
2 Ba Iesu tebirina tebakaꞌana teaoaina Kabana hauna Pilato imanai teutana.
Iuda Ena ꞌAri.
3 Weiana Iuda hinahina hauna Iesu eihana aba puma keaꞌina raninai eraona raona haraina,
Silba monina harau aihau emueaina eao robe haukia apaꞌuakia mai Iuda ekia maearima apaꞌuakia kebenakia,
4 eꞌabi etibaha,
“Au aba kiꞌa ababaina,
pokina ena beho ahaꞌi hauna hinahinana ahinahina.”
Ia ena ꞌabi tebamuena tetibaha,
“Weiana hanona ai ahaꞌi oi kipomu emu aroꞌari.”
5 Ua buonai Iuda moni weiana marea robe aonai ekapo totona ba ia ekarahi eao kipona ebatoꞌona eꞌari.
6 Robe haukia apaꞌuakia moni teaꞌina teꞌabi tetibaha,
“Neiana hanona aika eka rauhubu,
moni neiana marea robe mauanai aꞌi kahautana pokina ꞌari ꞌaranai eao.”
7 ꞌAri boi monina terobahu aina puanai puou babai hauna herenai hano tekawana,
hano weiana hanona maearima haeai ekia ꞌariahanai keao.
8 Weiana buonai hano atana teaparina ‘Aruaru Hanona’ emai mo bariu.
9 Ieremia mahabanai hauna rani weiana ena ꞌabi ehinana hauna emai etohana etibaha,
‘Isaraela haukia ꞌara teuahina ia ꞌaranai keao hauna Silba monina harau aihau teaꞌina,
10 moni weiana puou babai hauna ena hano tekawana Obiapaka ehina benaꞌu ihobona.’
Pilato Iesu Ebakaina.
11 Rani weianai Iesu Kabana wairanai ekoroti,
Kabana hauna ehore Iesu ebakaina etibaha,
“Oi hanona Iuda haukia ekia obia arana,
u?”
Iesu ia ena ꞌabi ebamuena etibaha,
“ꞌE,
aba nuꞌabi mo naiana.”
12 Ia robe haukia apaꞌuakia mai Iuda ekia maearima apaꞌuakia tehinau aina raninai Iesu hanona ekia ꞌabi ha aꞌi ebamuena.
13 Weiana Pilato ehore Iesu ehinabena etibaha,
“Ṯehinau ainiꞌo ꞌabikia haeai haeai tehina aiakia aꞌi nuona?”
14 Ba Iesu ꞌabi ha aꞌi ehina ꞌapuana,
buonai Kabana hauna aona earoꞌari.
Pilato Eꞌabi Iesu Kateahuꞌarina.
15 Kabanai tatukia ranikiai Kabana hauna ena hoahoa tainai maearima wapura hauna katenuatae aina hauna kebakarahi ꞌabaeana.
16 Rani weianai wapura hauna wapura itunai emiaho hauna Baraba atana teꞌiobi haraina.
17 Mako weia tetoꞌu aonai Pilato ebakainakia etibaha,
“Tai ṯonuatae aina kabakarahi ꞌabaeana,
Baraba ꞌao Iesu tuaparina Keriso hauna?”
18 Pokina Pilato eꞌiobi haraina Iuda ekia hau apaꞌuakia hanona Iesu tewamuruaina paunai imanai teutana.
19 Ia bakai imiaꞌaunai emiati aonai atawana ꞌabi etiu ahina eao herena,
“Hau naiana ena beho ahaꞌi hauna herenai taba ha aꞌi kobabaina,
pokina rabi ia anibi aina hanona aoꞌu earoꞌari kiꞌa baha.”
20 Aonai robe haukia apaꞌuakia mai Iuda ekia maearima apaꞌuakia mako tebahi ahinakia Baraba katenoi aina kebakarahina ia Iesu ꞌariai kehorotina.
21 Haeamona Pilato mako ebakainakia etibaha,
“Terarua neiakia tai ṯonuatae aina kabakarahina?”
Ia ena ꞌabi tebamuena tetibaha,
“Baraba.”
22 Pilato eꞌabi etibaha,
“Ba Iesu tuaparina Keriso hauna herenai taba kababaina?”
Ikoikiai teꞌabi tetibaha,
“Matiu ibiri ropo ꞌubinai kokoko ꞌauna!”
23 Pilato ebakainakia etibaha,
“Aehoma,
beho tabana ebabaina?”
Ia mo teio aota kiꞌa tetibaha,
“Matiu ibiri ropo ꞌubinai kokoko ꞌauna!”
24 Pilato eꞌiobina ena hiabu aba ahaꞌi,
weiana ꞌuriꞌuri rarina aba kerama.
Buonai bei eberi hahana mako wairakiai imana eutunakia etibaha,
“Au hau neiana ena ꞌari buona aꞌi kaꞌarana,
wai kipomi emi aroꞌari.”
25 Maearima ikoikiai teꞌabi tetibaha,
“Ia ena ꞌari pumana ai mai nahumai kipokia tamahoaina.”
26 Ba Pilato Baraba ebakarahina eao herekia,
ia Iesu ebenakia kateꞌatina matiu ibiri ropo ꞌubinai katekoko ꞌauna.
Huari Haukia Iesu Tebapoꞌona.
27 Kabana hauna ena huari haukia Iesu teaꞌina teaoaina Kabamani itunai,
ba huari haukia ikoikiai temai tekori kakaiarona.
28 Ia tehore Iesu ena habuni tebakuri ahina ia habuni birona tebabatotona.
29 Aranai kebauꞌuna hauna ꞌini boaboai tebahuna aranai tebabauꞌuna.
Bitobito ha imana itipanai tebaꞌina,
wairanai tekaipehu tebataeaina tetibaha,
“Iuda haukia ekia obia arana e,
oi onamo?”
30 Ba teꞌatotina bitobito teaꞌi boina,
aranai teꞌati ba teꞌati hao ꞌati haona.
31 Tebataeaina epua habuni birona weiana tebakuri ahina,
ia ena habuni tohakia tebabatotona.
Tebakaꞌana matiu ibiri ropo ꞌubinai katekoko ꞌauna.
Iesu Matiu Ibiriropo ꞌUbinai Tekokoꞌauna.
32 Huari haukia Iesu tebakaꞌana raninai Kurene hauna atana Simona tetabu ahina tebahi ahina Iesu ena matiu ibiri ropo kebuana.
33 ꞌEka hai tekaraꞌau atana Kolkota.
(Anina hanona ‘Ara huriakia ꞌekana’.)
34 Weia bine beina mai muramura mabina ha ohi tebarai haeamona Iesu tebena keinu,
etema hobona mo ia aꞌi einu.
35 Huari haukia Iesu matiu ibiri ropo ꞌubinai tekoko ꞌauna epua baiatakiai ena habuni puꞌiai tebinaꞌana.
36 Weiana murinai temiati mahakia hanona ia teiha ꞌinina.
37 Iesu arana ꞌubinai hinau baiꞌoi ꞌabina tererena teahu ꞌauna tetibaha,
‘NEIANA IESU,
IUDA HAUKIA EKIA OBIA ꞌARANA.’
38 Rani weianai kakikaki haukia rua Iesu kipokia ha ha ekia matiu ibiri ropo ꞌubinai tekoko ꞌaunakia,
ha itipana tainai mai ha awarina tainai.
39 Maearima weia tekabanai haukia arakia tekaiai kaiainakia mai bataeai bataeai ꞌabikia Iesu herenai tehina,
40 tetibaha,
“Oi oꞌabi marea robe koahu ꞌitiꞌitina wapu aihau aonai kobakori muena haumu,
oi Tirama nahuna raninai kipomu moba mauriniꞌo,
matiu ibiri ropo ꞌubinai moriri omai.”
41 Robe haukia apaꞌuakia rauhubu poki haukia mai Iuda ekia maearima apaꞌuakia abomo tebataeaina teꞌabi tetibaha,
42 “Ia maearima baika ebamaurinakia,
ia aehoma kipona aꞌi nibamaurina?
Ia hanona Isaraela ekia obia arana,
bariu matiu ibiri ropo ꞌubinai meriri emai hanona kahaꞌikakaumana.
43 Ia Tirama eaꞌikakaumana ba Tirama ia penuatae aina raninai bariu mebamaurina,
pokina eꞌabi ia hanona Tirama nahuna.”
44 Kakikaki haukia rua matiu ibiri ropo ꞌubinai tekoko ꞌaunakia haukia abomo ua teꞌabi pahihi aiho ia herenai.
Iesu Ena ꞌAri.
45 Atiaha hanona wapura rarina hanopaka maikoinai ekaiabuna eaomo beraura ebaeno hoana 3.
46 Beraura hoana 3 aonai Iesu eio etibaha,
“Eloi eloi lama sabakatani!”
Anina hanona ‘Eꞌu Tirama e,
Eꞌu Tirama e,
oi aehoma buonai ohabonaꞌu!’
47 Maearima baika weia tekoroti aiana teona haukia teꞌabi tetibaha,
“Hau neiana hanona Elia niaparina.”
48 Beronai ꞌabakia ha ebeau eao roraꞌe ha eaꞌina bine beina manoinai ehao uhuna,
matiuai etiu taeana Iesu keinu.
49 Ia baika teꞌabi tetibaha,
“Mohabona,
Elia kemai kebamaurina reꞌa kahaihana.”
50 Iesu haeamona eio aota kiꞌa murinai eꞌari.
51 Rani weianai marea robe iꞌaea hurina habunina etapa boana ꞌubiai eriri eao mo baꞌai.
Kanokau ekaꞌa pihara tepaꞌa.
52 ꞌAri ahana ꞌurikia tekaikau Tirama ena robe haukia boꞌokia teꞌari haukia temikiri temauri mauri.
53 Iesu emikiri mue murinai ekia ꞌariahakiai tekarahi Ierusalema ai tekatoto maearima boꞌokia herekiai tewaira tina.
54 Huari poki hauna ena huari haukia kipokia Iesu teꞌimana,
kanokau ekaꞌa mai taba terama haukia ikoikiai teihanakia raninai tetaꞌu wairai teꞌabi tetibaha,
“ꞌAbi tohana hau neiana hanona Tirama nahuna.”
55 Babiꞌe boꞌona abomo weia atauꞌai tekoroti teihana,
weiakia hanona Galilea ai Iesu murinai teꞌau mai taꞌarana teaꞌi babiꞌekia.
56 Baiatakiai hanona Maria Magadala babiꞌena mai Maria ha Iakobo Iosepa ohi hinakia mai Sebedeo nahuna rua hinakia.
Iesu Tehorena.
57 Rabirabi weianai kepu hauna ha emai atana Iosepa Arimatea hauna ia abomo Iesu teꞌabana hauna ha.
58 Ia Pilato herena eao ba Iesu hauanina enoiaina,
Pilato ꞌabi ebaibeni weiana Iesu hauanina Iosepa katebena.
59 Weiana Iosepa Iesu hauanina eaꞌi obona,
habuni mahamahana namonai eꞌapana.
60 ꞌAriahana mahamahana pihara ekuina ia kipona ꞌeuna hauna aonai ehorena,
pihara apaꞌuana ha ebaherena eao paꞌabina ebahu abuna ba ekaꞌa.
61 Maria Magadala babiꞌena ꞌabana Maria ha ohi hanona weia ꞌariahana abihanai temiati teihana.
Huari Haukia ꞌAriahana Teꞌimana.
62 Erani raurani beraura robenai robe haukia apaꞌuakia mai Parisea haukia teao Pilato herena,
63 teꞌabi tetibaha,
“Hau apaꞌuana e,
ai baiꞌoi hauna weiana maurinai emiaho aonai ena ꞌabi ehinana hauna ṯaraona ꞌinina etibaha,
‘Wapu ibaihaunai kamikiri mue.’
64 Ua buonai ꞌabi kobaibeni ꞌariahana kateꞌima haraina keao mo wapu ibaihaunai.
Pokina aꞌi enamo,
iꞌabana haukia kateao Iesu hauanina katebainao aina ba maearima haiakiai kateꞌabi ‘Ia hanona ꞌari haukia baiatakiai aba emikiri mue.’
Baiꞌoi neiana muriai hauna atetuana kekiꞌa wairai ba ꞌuaina hauna.”
65 Pilato ehinabenakia etibaha,
“Baiꞌima haukia tomoaoainakia,
ꞌariahana kateꞌima haraina.”
66 Ua buonai teao ꞌariahana ikaiabuna piharana tekaiabu haraina ahanai rauhubu maniꞌana tehorotina,
ba ꞌimaꞌima haukia weia tehabona kateiha ꞌinina.