Iesu Iahuꞌarina Taearana Tetabuna.
26
Weiana Iesu ꞌabi neiakia ikoikiai ebapuanakia murinai iꞌabana haukia ehinabenakia etibaha,
2 “Wai toꞌiobina Kabanai tatunaa hanona wapu rua mo wairai.
Weiana au maearima nahuna hanona hinahinaꞌu katehina matiu ibiri ropoai katekoko ꞌaunaꞌu kaꞌari.”
3 Rani weianai robe haukia apaꞌuakia mai Iuda ekia maearima apaꞌuakia kipokia,
robe haukia arakiai hauna atana Kaiapasi ena ituai tetoꞌu.
4 Ia terobahu temaea hamomo bunianai Iesu kateaꞌina kateahu ꞌarina.
5 ꞌA ia kipokia teꞌabi tetibaha,
“Tatu aonai aꞌi kahababaina maearima aꞌi hamaba ꞌuriꞌurinakia.”
Babiꞌe Ha Tehoroai Iesu ꞌArana Eheina.
6 Iesu Betani ai morumoru hauna Simona ena ituai emiaho aonai,
7 Babiꞌe ha kabapu mai tehorona ꞌarana rarinai pahakawana hauna eaꞌina emai Iesu aniani ꞌekanai emiati hanona arana eheina.
8 Iꞌabana haukia teihana raninai teopuere tetibaha,
“Taba buonai tehoro neiana nineꞌe ꞌabaeana?
9 Tehoro neiana ꞌarana rarinai pekawa kawaina monina uraru haukia pebenakia.”
10 ꞌA Iesu eꞌiobina taba robana tiahuna hanona ehina benakia etibaha,
“Taba buonai babiꞌe aona tuba aroꞌarina?
Ia aka namona ꞌakina au hereꞌuai ebabaina.
11 Uraru haukia hanona rani ikoinai wai heremiai katemiaho,
ia au hanona rani ikoinai heremiai aꞌi kamiaho.
12 Tehoro neiana ia eheina au ahaꞌuai hanona ihoreꞌu akana iaꞌi aꞌi haraina ebabaina.
13 ꞌAbi tohana au wai nahinabenimi,
hanopaka maikoina aonai pou namona kateiroro aina hanona babiꞌe aka neiana ebabaina hauna katehinana ia iraonanai keao.”
Iuda Eao Kehinahina.
14 Rani weianai iꞌabana haukia harau haea rua ꞌabakia ha atana Iuda Isakariote hauna hanona robe haukia apaꞌuakia herekia eao,
15 ebakainakia etibaha,
“Iesu imamiai kautana raninai taba katobenaꞌu?”
Weiana silba monikia harau aihau tebahunakia tebena.
16 Rani weiana eaoaina Iuda taeara etabu rani namona tabanai Iesu imakiai keutana.
Iesu Kabanai Anianina Iꞌabana Haukia Kipokia Teani.
17 Parawa ꞌabaeana ikine tatuna beraurana koriꞌuainai,
iꞌabana haukia temai Iesu herena tebakaina tetibaha,
“Kabanai tatuna anianina aeꞌeai kataꞌiaꞌi haraina koana?”
18 Ia ekia ꞌabi ebamuena etibaha,
“Tomoao aiarai hau weiana herenai katohina bena katotibaha,
‘Emai poki hauna eꞌabi,
“Eꞌu rani aba ekaibari,
Kabanai tatuna iꞌabaꞌu haukia kipokia emu ituai katababaina.” ’”
19 Ua buonai iꞌabana haukia Iesu ehinabenakia akana ihobonai tebabaina,
Kabanai tatuna anianina teaꞌiaꞌi haraina.
20 Erabirabi aonai Iesu mai iꞌabana haukia harauhaea rua kipokia aniani ꞌekanai temiati teaniani.
21 Tianiani aonai ia eꞌabi etibaha,
“ꞌAbi tohana au wai nahinabenimi,
wai ha hanona au hinahinaꞌu kohinahina.”
22 Iꞌabana haukia aokia earoꞌari ha ha tehore tebakaina tetibaha,
“Obiapaka e,
nuraonana au,
u?”
23 Ia eꞌabi etibaha,
“Hau weiana imana au imaꞌu ohi ꞌororo hamonai ṯahao uta hauna hinahinaꞌu kehinahina.
24 Au maearima nahuna hanona Puka robenai tererena ihobonai kaꞌari,
ia maearima nahuna hinahinana kehinahina hauna herenai kekiꞌa wairai maearima weiana aꞌi perama hanona penamo.”
25 Ehinahina hauna Iuda etibaha,
“Baꞌiobi haumu e,
nuraonana au,
u?”
Iesu eꞌabi etibaha,
“ꞌAbi mo naiana ohinana.”
Obiapaka Ena Ani Toꞌu.
26 Ia tianiani aonai Iesu parawa eaꞌina ebanamona ba ehobina,
iꞌabana haukia ebenakia eꞌabi etibaha,
“Tomoaꞌina tomoana,
neiana hanona au hauꞌu.”
27 Ba ꞌere ha eaꞌina ebanamona ba etiu benakia eꞌabi etibaha,
“Ikoimiai neiana tomoinu.
28 Neiana hanona au aruaruꞌu,
ꞌabi ꞌuai aruaruna mako paukiai kekiki oi kiꞌa ihina haona.
29 Au wai nahina benimi,
bine beina neiana au aꞌi kainu mue keao mo Hamaꞌu ena aiarai bine beina mahamahana wai kipokia kahainu haeamo.”
30 Weiana hui ha teaꞌina murinai tekarahi,
Olibe oeona teao.
Iesu Ehina ꞌUaina Petero Ia Kebuniaina.
31 Ba Iesu ehinabenakia etibaha,
“Bariu rabi neianai emi aꞌikakauma keꞌeho katohabonaꞌu,
pokina Puka robenai tererena,
‘Au mamoe iꞌimana hauna kahuna ba mamoe toꞌuna hanona kerama otaraina.’
32 Ia au kamikiri mue murinai au hanona kaꞌuai kaeao Galilea ba wai katoao.”
33 Petero etae eꞌabi etibaha,
“Ikoikiai oi katehaboniꞌo katebeau reꞌa,
au hanona oi aꞌi kahabo ꞌapuaniꞌo.”
34 Iesu Petero ena ꞌabi ebamuena etibaha,
“ꞌAbi tohana au oi nahina beniꞌo,
bariu rabi neiana kokoroꞌu aꞌi kearara baha aonai,
oi rani aihau au kobuniai ainaꞌu.
Koꞌabi oi au aꞌi oꞌiobinaꞌu.”
35 Petero haeamona eꞌabi etibaha,
“ꞌAbina ahaꞌi,
hararua pahaꞌari haeamo,
ia au hanona aꞌi kabuniai ainiꞌo.”
Ba iꞌabana haukia abokiamo ꞌabi hamona weiana tehinana.
Iesu Getesemaneai Ebahubaꞌari.
36 Iesu iꞌabana haukia kipokia teao ꞌeka atana Getesemane,
ba ehina benakia etibaha,
“Au kaeao weia kabahubaꞌari aonai wai hanona neia katomiati.”
37 Ia Petero mai Sebedeo nahuna rua ebakaꞌanakia teao.
Weiana aona eꞌabeꞌabe ena raona eore,
38 ba ehinabenakia etibaha,
“Au aoꞌu hanona niꞌabeꞌabe wairai matoha paꞌari moioina.
Neia katomiaho kipokia kahabaiꞌima.”
39 Ekaꞌa haha ꞌapua aonai ꞌanonai eꞌumuti ebahubaꞌari etibaha,
“Hamaꞌu e,
heremuai ketaina raninai haiara ꞌerena neiana hereꞌuai poaꞌi parena.
Ia au eꞌu nuataeai ahaꞌi,
oi emu nuatae ai.”
40 Ba emue emai iꞌabana haukia herekia hanona tiparua eihanakia,
ia ehore Petero ehinabena etibaha,
“Aehoma buonai wai toaihau beraura hoana hamona kipokia aꞌi naha baiꞌima?
41 Katobaiꞌima katobahubaꞌari baihobo aonai aꞌi tomototo marikina.
Aubami hanona nenuatae ia hauanimi mo niꞌabeꞌabe.”
42 Emue eao rani ibaruana ebahubaꞌari mue etibaha,
“Hamaꞌu e,
haiara ꞌerena neiana iaꞌi obona taearana ahaꞌi raninai kainu.
Ba emu nuatae akana kerama.”
43 Emue emai raninai tiparua eiha muekia pokina mahakia teparua kiꞌa baha.
44 Ua buonai ehabonakia emue rani ibaihauna ebahubaꞌari,
ꞌabi hamokia mo ehinanakia.
45 Ba emue emai iꞌabana haukia herekia ehinabenakia etibaha,
“Wai tuparua mai tuarai oho mo?
Tomoihana,
beraurana aba ekaraꞌau,
au maearima nahuna hanona aba kiꞌa haukia imakiai kateutanaꞌu.
46 Tomomikiri,
hamaeao.
Tomoihana ehinahinainaꞌu hauna aba nimai.”
Iesu Teaꞌi ꞌInina.
47 Iesu niꞌabi ohomo aonai iꞌabana haukia harau haea rua ꞌabakia ha Iuda ekaraꞌau,
maearima boꞌona kipokia kareba mai puraꞌa teaꞌinakia temai.
Ia hanona robe haukia apaꞌuakia mai Iuda ekia maearima apaꞌuakia teuhunakia haukia.
48 Hinahina hauna hoa ha eba ꞌiobinakia etibaha,
“Kapauna hauna maearimana mo weiana ba katoaꞌina.”
49 Iuda beronai ekaꞌa eao Iesu herena eꞌabi etibaha,
“Baꞌiobi haumu e,
oi onamo?”
Ba epauna.
50 Iesu Iuda ena ꞌabi ebamuena etibaha,
“Eꞌu hau e,
emu mai akana mobabaina.”
Ba tekaꞌa haha Iesu teaꞌi ꞌini haraina.
51 Weiana Iesu teꞌabana hauna ha etara kipona ena kareba eberi ꞌauna robe haukia arakiai hauna ena taꞌaraꞌi hauna ha haiana ehara obona.
52 Iesu ia ehinabena etibaha,
“Emu kareba ꞌekanai mohorotina,
pokina karebai tiꞌau haukia ikoikiai karebai kateꞌari.
53 Au hamaꞌu panoina raninai ia beronai aneru itubuna harau haea ruab peuhunakia hereꞌu hanona aꞌi oꞌiobina,
ꞌu?
54 Ua perama aiho raninai,
Puka robenai tererena au hereꞌuai kerama toha hauna aea ketoha aiho?”
55 Rani hamona weianai Iesu ehore toꞌu ehinabenakia etibaha,
“Au kakikaki hauꞌu buonai wai imami mai karebakia mai puraꞌakia tomai katoaꞌinaꞌu,
ꞌu?
Rani ikoinai au hanona wai kipokia marea robe aonai amiati abaꞌiobi,
ia aꞌi toaꞌinaꞌu aꞌi tobirinaꞌu.
56 Ia mahabanai haukia ekia rererere ketohana paunai neiakia ikoikiai ṉa terama aiho.”
Ba iꞌabana haukia ikoikiai Iesu tehabona tebeau ꞌakauma.
Iesu Bakai ꞌEkanai Ekoroti.
57 Weiakia Iesu teaꞌina hanona teaoaina robe haukia arakiai hauna Kaipasi herena,
rauhubu poki haukia mai Iuda ekia maearima apaꞌuakia hanona weia tebararona.
58 ꞌA Petero ehore ekaiturina atauꞌa tainai ekaꞌa,
teaomo robe haukia arakiai hauna ena parabu aonai tekatoto.
Ia etoto ꞌima haukia kipokia temiati taba kerama hanona keihana.
59 Robe haukia apaꞌuakia mai rauhubu poki haukia hinau baiꞌoi haukia titabu Iesu beho ꞌekanai katehorotina katebaꞌarina.
60 Maearima boꞌokia tekarahi baiꞌoi ꞌabikia herenai tehina,
taba ha aꞌi tetabu ahina puanai hau rua tekarahi,
61 teꞌabi tetibaha,
“Hau neiana eꞌabi Tirama ena marea robe hanona keahu ꞌitiꞌitina ba wapu aihau aonai kebakori muena hanona ketaina.”
62 Robe haukia arakiai hauna emikiri Iesu ebakaina etibaha,
“Mai emu ꞌabi ha?
Hau neiakia ibabehomu ꞌabina ṯehinana hanona ekia ꞌabi ꞌarana kobamuena ꞌao ahaꞌi?”
63 Ia Iesu ꞌabi ha aꞌi ehinana.
Robe haukia arakiai hauna haeamona ehinabena etibaha,
“Mauri Tiramana atanai nabakainiꞌo kobatohana.
Oi hanona Keriso Tirama nahuna raninai moꞌabi!”
64 Iesu eꞌabi etibaha,
“ꞌAbimo naiana aba ohinana.
Ikoimiai nahinabenimi,
bariu rani neiana keaoaina au maearima nahuna hiabu Tiramana itipanai kamiati mai kupa aiaranai auhao ahanai kamai katoihanaꞌu.”
65 Ba robe haukia arakiai hauna kipona ena habuni etapana eꞌabi etibaha,
“Ia hanona Tirama atana niaꞌi kiꞌana.
Taba buonai hinau ꞌabikia kahatabu?
Bariu kipomi haiamiai Tirama atana eaꞌi kiꞌana aiana aba tona.
66 Wai taba ṉa tuho?”
Maearima ena ꞌabi tebamuena tetibaha,
“Ia hanona ebeho buonai keꞌari.”
67 Ba Iesu wairana teꞌatotina mai teahuna,
ba baika teboꞌana,
68 teꞌabi tetibaha,
“Oi Keriso,
momahabanai tai eboꞌaniꞌo hauna mohina pouna.”
Petero Iesu Ebuniai Aina.
69 Rani weianai Petero hanona parabu aonai itu wairanai emiati,
ba taꞌaraꞌi uahona ha emai herena eꞌabi etibaha,
“Oi abomo Iesu Galilea hauna oꞌabana.”
70 Petero maearima ikoikiai wairakiai ebuniai etibaha,
“Au aꞌi aꞌiobina oi taba robana nuahuna.”
71 Ba Petero ekarahi eao paꞌabi ꞌakonai,
weia taꞌaraꞌi uahona haeai ha ehore ia eihana ba maearima ehinabenakia etibaha,
“Hau neiana hanona Iesu Nasareta hauna eꞌabana.”
72 Petero haeamona ebuniai mue eꞌabiꞌuai pahihi etibaha,
“ꞌUbi hauna eꞌiobina,
hau weiana au aꞌi aꞌiobina.”
73 Rani aꞌi ehomaꞌa murinai weia tekoroti haukia teao Petero herena teꞌabi tetibaha,
“ꞌAbi tohana oi abomo ꞌabakia ha,
pokina oi emu ꞌabi ꞌurunai ṯabaiꞌiobi.”
74 Ba ia eꞌabiꞌuai pahihi etibaha,
“ꞌUbi hauna eꞌiobina ꞌabi tohana nahinana.
Ahaꞌi raninai Tirama puma kebenaꞌu.
Hau naiana au aꞌi aꞌiobina.”
Beronai kokoroꞌu eꞌarara.
75 Ba Petero Iesu ena ꞌabi ehinana hauna eraona tinana,
“Kokoroꞌu aꞌi keꞌarara baha aonai oi rani aihau kobuniai ainaꞌu.”
Weiana ekarahi eao atapakai ehai kiꞌa.