Maria Iesu Aena Tehoroai Eheinakia.
12
Wapu ꞌabaihau wairai ṯemiaho Kabanai tatuna kerama hanona Iesu eao Betani Lasaro nemiaho aiarana,
hau weiana ꞌariai ebamikirina hauna.
2 Rabirabi Iesu iaꞌi taeana hoana anianina ha tebaꞌoruna,
ba Mareta hanona ia taꞌarakia eaꞌi,
ia Lasaro hanona Iesu mai maearima baika kipokia aniani ꞌekanai temiati.
Mary anoints Jesus (Ioane 12:1-11)
3 Ba Maria ehore tehoro kawapu hamona arana rarina ꞌakinai pahakawana hauna eaꞌina Iesu aena eheinakia ba buinai Iesu aena eutu ꞌororonakia.
Tehoro timana ꞌorimona weiana itu aona maikoinai ebabonu ꞌauna.
4 Iesu iꞌabana hauna ha Iuda Isakariote hauna wairai Iesu kehinahinaina hauna eꞌabi etibaha,
5 “ꞌEi,
tehoro neiana moni rarina ꞌakinaia patekawa kawaina ba monina uraru haukia patebenakia.”
6 Ia ꞌabi neiana ehinana hanona uraru haukia niraonanakia paunai ahaꞌi,
ꞌa ia hanona bainao hauna,
moni puteputena weiana eaꞌina haunai ia kipona nibaraina.
7 Ba Iesu eꞌabi etibaha,
“Tomohabo ꞌabaeana,
tehoro neiana hanona kebamauaina keaomo wapu weiana au katehorenaꞌu hauna ꞌeuna.
8 Rani ikoikiai uraru haukia hanona wai baiatamiai katemiaho,
ꞌa au hanona rani ikoikiai wai baiatamiai aꞌi kamiaho.”
Lasaro Iahuꞌarina Raonana Tebabaina.
9 Weiana Iuda haukia toꞌuna rarina Iesu pouna teona ia hanona aba Betani ai,
buonai teao ꞌeka weiana.
Iesu mo kipona aꞌi kateihana,
ia Lasaro ꞌariai ebamikiri muena hauna abomo kateihana.
10 Ia robe haukia apaꞌuakia teroba ahu Lasaro abomo kateahu ꞌarina,
11 pokina hoa weiana Lasaro herenai erama hauna paunai Iuda haukia boꞌona ia tehabonakia tekabanai Iesu teaꞌikakaumana.
Iesu Ierusalemai Ekatoto Matoha Obia ꞌArana ꞌAbana.
12 Erani wapu weianai toꞌu rarina tatu paunai temai haukia Iesu pouna teona nimai Ierusalema.
Triumphal entry (Ioane 12:12-19)
“Hosana!
Tirama kehore Obiapaka atanai
nimai hauna kebanamona!
Tirama kehore Isaraela ekia
obia ꞌarana kebanamona!”
14 Iesu toniki nahu ha etabu ahina ahanai emiaꞌau.
Weiana hanona Puka robenai tererena ihobona etibaha,
15 “Siona aiara apaꞌuana haumi e,
aꞌi katotaꞌu.
Tomoihana,
neiana hanona emi obia arana
toniki nahu ahanai emiaꞌau nimai.” Sek 9.9
16 Rani weianai iꞌabana haukia ꞌabi neiakia obokia aꞌi teobo eaomo Iesu ena nuabi ai emikiri mue murinai ba ia robana teahuna ꞌabikia tererenakia haukia mai taba neiakia ia herenai tebabai haukia teraona tinanakia.
17 Maearima weiakia Iesu Lasaro ꞌariai ebamikiri muena teihana haukia tehore ia hauna pouna tehina otaraina.
18 Maearima boꞌona Iesu bataꞌu taꞌu huri hoana weiana ebabaina pouna teona paunai tekarahi teao kateihana.
19 Ua buonai Parisea haukia kipokia baiatakiai teꞌabiꞌabi tetibaha,
“Tomoihana,
aika hanona aꞌi ketainaka maearima maikoinai aba ia murinai tikaꞌa.”
Helene Haukia Baika Iesu Titabuna.
20 Tatu weiana aonai weiakia teao Ierusalema Tirama katekuti aina haukia baiatakiai hanona Helene haukia abomo baika.
Jesus foretells his death (Ioane 12:20-36)
21 Ia temai Galilea Betesaida hauna Pilipo herena tehina bena tetibaha,
“Poki haumu e,
ai ṯanuatae Iesu kataihana.”
22 Pilipo eao Anderea ehina bena ba terarua teao Iesu tehina bena.
23 Iesu ekia ꞌabi ebamuena etibaha,
“Au Maearima Nahuna nuabi apaꞌuana kaꞌina beraurana hanona aba ekaraꞌau.
24 ꞌAbi tohana au wai nahina benimi,
witi uhona ha aꞌi keꞌeho hanoai aꞌi keꞌari raninai ia hanona uho ꞌabaeana mo kemiaho.
ꞌA keꞌari raninai uho boꞌona kebaramanakia.
25 Hau ha ena mauri ibanamona niraonana hauna hanona ena mauri kebaꞌakauma,
hau ha hanopaka neiana aonai ena mauri ibanamona robana aꞌi niahuna hauna hanona ena mauri keaꞌi ꞌinina keaomo banai banai.
26 Hau ha au taꞌaraꞌu keaꞌi hauna hanona muriꞌuai kemai,
ba au aeꞌeai hanona eꞌu taꞌaraꞌi hauna abomo weia.
Hau weiana taꞌaraꞌu niaꞌi hauna Hamaꞌu kehore ia keaꞌi taeana.
Iesu Kipona Ena ꞌAri Pouna Ehinana.
27 Bariu hanona aoꞌu niaroꞌari kiꞌa ba taba ṉa kahoma?
Au kaꞌabi,
‘Hamaꞌu,
beraura hoana neiana aonai mobamaurinaꞌu?’
Ahaꞌi.
Au amai ena pokina tohana hanona beraura hoana neianai kahaiara.
28 Hamaꞌu e,
atamu mobanuabina.”
Ba aia ha kupai emai etibaha,
“Au aba abanuabina,
haeamona kabanuabi muena.”
29 Toꞌu haukia aia weiana teona raninai teꞌabi tetibaha,
“Kupa niroꞌu,”
baika hanona teꞌabi tetibaha,
“Aneru ha Iesu ehina bena.”
30 Iesu ehina benakia etibaha,
“Aia neiana emai hanona wai keba namonimi paunai,
ia au ahaꞌi.
31 Bariu rani neiana hanona hanopaka kebakai ranina,
ba hanopaka neiana niobia aina hauna Satani bariu kateuꞌu ahina.
32 Weiana au hanopakai katetio taeanaꞌu aonai maearima ikoikiai kaberinakia katemai hereꞌu.”
33 Ia ꞌabi neiana ehinana hanona ia aea keꞌari aiho hauna ehina pouna.
34 Toꞌu haukia teꞌabi tetibaha,
“Ai rauhubuai aia taona eꞌabi Keriso hanona kemiaho banai banai,
ia aea homanai mo oi nuꞌabi notibaha,
‘Au Maearima Nahuna hanona katetio taeanaꞌu.’
Tai hanona Maearima Nahuna?”
35 Ba Iesu ekia ꞌabi ebamuena etibaha,
“Wai hanona rani papana mo ea kipokia katomiaho.
Ea toaꞌina aonai tomokaꞌa,
weiana wapura kehore aꞌi mekaiabunimi marikina.
Maearima wapura aonai nikaꞌa hauna hanona aꞌi eꞌiobina aeana niao.
36 Ea heremiai nemiaho oho aonai tomo aꞌikakaumana.
Weiana wai hanona ea nahunai katoao.”
Iesu ena ꞌabi neiana ebapuana murinai herekiai ekaobo eao epihi.
Iuda Haukia Boꞌona Iesu Aꞌi Teaꞌikakaumana.
37 Iesu bataꞌu taꞌu huri hoakia boꞌokia wairakiai ebabai,
iamo toꞌu haukia ia aꞌi teaꞌikakaumana.
Believers and unbelievers (Ioane 12:37-50)
“Obiapaka e,
tai emai ꞌabi
tahinana hauna eaꞌikakaumana,
haeamona Obiapaka imana
hiabuna hanona tai herenai
kebawaira tinana?” Isa 53.1
39 Neiana paunai toꞌu haukia kate aꞌikakaumana hanona aꞌi etaina.
Haeamona Isaia eꞌabi mue etibaha,
40 “Obiapaka ehore
mahakia ebaꞌiaunakia,
mai aokia ebapahihinakia,
weiana mahakiai aꞌi temeiha iha
mai ekia raonaraonai
obo aꞌi temeobo,
aꞌi temeraona kabe
aꞌi mabamaurinakia,
Tirama ua eꞌabi aiho.” Isa 6.10
41 Isaia ꞌabi neiana ehinana pokina Iesu ena nuabi eihana ba pouna ehinana.
42 Rani weianai Iuda haukia apaꞌuakia boꞌona Iesu teaꞌikakaumana.
Ia Parisea haukia tetaꞌu ainakia buonai ekia aꞌikakauma aꞌi tehina pou,
pokina marea aonai aꞌi temeba karahinakia taꞌuna.
43 Pokina ekia nuatae hanona maearima ia kateba namonakia,
ꞌa Tirama kebanamonakia hauna aꞌi tenuataeai haraina.
Iesu Ena ꞌAbi Katehore Maearima Kateba bakainakia.
44 Ba Iesu eio aota etibaha,
“Hau ha au niaꞌikakaumanaꞌu hauna hanona au mo aꞌi niaꞌikakaumanaꞌu ia weiana euhunaꞌu hauna abomo niaꞌikakaumana.
45 Hau ha au neihanaꞌu hauna hanona weiana au euhunaꞌu hauna abomo neihana.
46 Au hanona ea ꞌabana amai hanopakai,
ba maearima tiaꞌikakaumanaꞌu haukia ikoikiai hanona wapura aonai aꞌi katemiaho.
47 Hau ha eꞌu ꞌabi aiakia nioꞌo ia aꞌi nikaꞌainakia hauna,
au ia aꞌi kababakaina,
pokina au amai hanona hanopaka aꞌi kababakaina ia hanopaka ꞌarana kabamaurina.
48 Hau ha au nibakiꞌanaꞌu mai eꞌu ꞌabi aꞌi niaꞌi taeanakia hauna hanona mai ibabakaina hauna ha nemiaho,
rani orenai ꞌabi weiakia ahina haukia katehore ia katebabakaina.
49 Pokina au kipoꞌu eꞌu nuataeai aꞌi aꞌabi,
ꞌa Hamaꞌu euhunaꞌu hauna ena ꞌabi ebaibeni ꞌabina kahinana abomo kahinahina haraina hauna ahinana.
50 Ba au aꞌiobina ia ena ꞌabi ebaibeni hanona keaoainimi mauri banai banai ꞌekana,
ua buonai ꞌabi ahinanakia haukia hanona Hamaꞌu mo ehina benaꞌu ꞌabikia ahinanakia.”