Lasaro Aba Eꞌari.
11
Hau ha atana Lasaro,
Betani hauna,
ia hanona einawa,
Betani hanona Maria uahoꞌabana Mareta ohi ekia aiara.
2 Maria weiana kehore tehoro timina ꞌorimonai Obiapaka Iesu aena keheinakia ba buinai keutu ꞌororonakia babiꞌena,
ia haibuna hanona Lasaro weiana einawa.
Jesus raises Lazarus (Ioane 11:1-57)
3 Weiana buonai uahoꞌaba rua ꞌabi teuhuna eao Iesu herena tetibaha,
“Obiapaka e,
nuraonaꞌau aina hauna hanona neinawa.”
4 ꞌA Iesu pou neiana eona raninai eꞌabi etibaha,
“Inawa neiana hanona Lasaro aꞌi kebaꞌari baiha,
ia neiana erama hanona Tirama ena nuabi kewaira tina,
weianai Tirama Nahuna nuabi keaꞌina.”
5 Iesu hanona Mareta uahoꞌabana Maria ohi mai haibukia Lasaro kipokia eraonaꞌau ainakia.
6 Weiana Iesu Lasaro ena inawa pouna eona raninai,
ia ꞌekanai mo weia wapu rua emiaho.
7 Ba Iesu iꞌabana haukia ehina benakia etibaha,
“Aika hamamue hamaeao Iudea.”
8 Iꞌabana haukia teꞌabi tetibaha,
“Baꞌiobi haumu e,
maraniai mo Iuda haukia apaꞌuakia tenuatae piharai kateahu ꞌariniꞌo,
ia mo oi emu raona hanona komue koao weia?”
9 Iesu eꞌabi etibaha,
“Mararani hamona aonai beraura hoana hanona harau haea rua,
maearima ha mararani nikaꞌa hauna hanona aꞌi kekai,
pokina ia hanona hanopaka ena ea neihana.
10 Ia rabi kekaꞌa hauna hanona kekai,
pokina ia aonai hanona ea ahaꞌi.”
11 Iesu ꞌabi weiana ehinana murinai eꞌabi etibaha,
“Eka hau Lasaro hanona aba eparua rea.
Ia au hanona kaeao kabaona.”
12 Iꞌabana haukia teꞌabi tetibaha,
“Obiapaka e,
ia neinawa niparua raninai ia hanona aba kenamo mue.”
13 Iesu hanona Lasaro ena ꞌari robana eahuna,
ꞌa iꞌabana haukia teraonana ia hanona niparua ꞌabaea.
14 Weiana buonai Iesu ehinabe mahanakia etibaha,
“Lasaro hanona aba eꞌari.
15 Wai paumiai au weia ahaꞌi hanona aoꞌu ninamo,
pokina wai katohore au kato aꞌikakaumanaꞌu.
Aika hamaeao ia herena.”
16 Ba Toma (tiaparina Baiꞌapaea hauna) ꞌabana ehina benakia etibaha,
“Aika abomo hamaeao,
ia kipokia kahaꞌari haeamo.”
Iesu Hanona ꞌAriai Mikiri Mue Mai Mauri Pokina.
17 Iesu weia ekaraꞌau raninai tehina bena Lasaro hanona aba eꞌari hauanina wapu bani uri aonai nemiaho.
18 Ierusalema mai Betani baiatakia hanona aꞌi ehomaꞌa matoha maela rua ꞌabana.
19 Weiana Mareta mai Maria haibukia Lasaro eꞌari paunai Iuda haukia boꞌokia temai ia herekia aokia katebataburana.
20 Mareta Iesu emai pouna eona raninai,
ia ekarahi eao keihana,
ia Maria hanona ituai emiaho.
21 Mareta Iesu ehina bena etibaha,
“Obiapaka e,
oi neia pomiaho raninai haibuꞌu hanona aꞌi peꞌari.
22 Ia au aꞌiobina bariu taba Tirama herenai konoi aina hauna ia kehore kebeniꞌo.”
23 Iesu Mareta ehina bena etibaha,
“Oi haibumu hanona kemikiri mue.”
24 Mareta eꞌabi etibaha,
“Au aꞌiobina ia hanona kemikiri mue rani orenai.”
25 Iesu Mareta ehina bena etibaha,
“Au hanona mikiri mue abomo mauri.
Au niaꞌikakaumanaꞌu hauna hanona ꞌabi ṉa ahaꞌi peꞌari,
ia kemauri.
26 Ba timauri mai tiaꞌikakaumanaꞌu haukia ikoikiai hanona aꞌi kateꞌari ꞌapua ia katemauri banaibanai.
Oi ꞌabi neiana nuaꞌikakaumana,
u?”
27 Mareta eꞌabi etibaha,
“ꞌE,
Obiapaka,
au naꞌikakaumaniꞌo,
oi hanona Keriso,
Tirama Nahuna weiana kemai hanopakai hauna.”
Iesu Ehai.
28 ꞌAbi neiana ehinana murinai emue eao uahoꞌabana Maria eapari keꞌena ehina bena etibaha,
“Baꞌiobi hauna hanona aba emai oi nibakai bakai ainiꞌo.”
29 Maria ꞌabi neiana eona raninai emikiri noanoa eao Iesu herena.
30 Rani weianai Iesu hanona aiarai aꞌi ekatoto baha,
ia weia Mareta ohi tebaitabu ahi ꞌekanai emiaho oho.
31 Iuda haukia weiakia Maria kipokia ituai temiaho aona tebataburana haukia ia teihana emikiri noanoa ekarahi raninai murinai teao,
teraonana ia hanona niao ꞌariahanai weia kehai.
32 Maria hanona Iesu emiaho ꞌekanai ekaraꞌau ba eihana raninai beronai aena pokinai eꞌumuti eꞌabi etibaha,
“Obiapaka e,
oi neia pomiaho raninai haibuꞌu hanona aꞌi peꞌari.”
33 Iesu Maria ehai eihana mai Iuda haukia weiakia kipokia temai haukia tehai eihanakia hanona aona eaokoꞌo mai eꞌabeꞌabe.
34 Ia ebakainakia etibaha,
“Wai ia aeꞌeai tohorena?”
Ia ena ꞌabi tebamuena tetibaha,
“Obiapaka e,
omai moihana.”
35 Ba Iesu ehai.
36 Weiana Iuda haukia teꞌabi tetibaha,
“Tomoihana hama ua niraonaꞌauai aihona.”
37 Ia baika teꞌabi tetibaha,
“Hau neiana maha kiꞌa hauna mahana ebanamonakia ba ia pehore Lasaro ꞌariai pebaꞌorona aꞌi peꞌari.”
Iesu Lasaro ꞌAriai Ebamikirina Emauri Mue.
38 Iesu aona eaokoꞌo kiꞌa.
Ba eao ꞌariahana,
ꞌariahana weiana hanona pihara paparoꞌana ha pihara rarina temaiaina paꞌabina tebahu abuna.
39 Iesu eꞌabi etibaha,
“Pihara tomoaꞌi parena!”
Ia ꞌari hauna haibuna Mareta eꞌabi etibaha,
“Obiapaka e,
timina aba ṉa ekiꞌa,
pokina ia tehorena hanona wapuna aba ebani.”
40 Ba Iesu ia ehina bena etibaha,
“Au aba ahina beniꞌo,
oi koaꞌikakaumanaꞌu raninai Tirama ena nuabi koihana.”
41 Ua buonai ia tehore pihara teaꞌi parena.
Ba Iesu eaꞌa taea eꞌabi etibaha,
“Hamaꞌu e,
au nabanamoniꞌo pokina aiaꞌu aba nuona.
42 Au aꞌiobina oi hanona rani ikoinai aiaꞌu nuona,
ia au neiana nahinana ena poki hanona maearima neiakia neia tekoroti haukia paukiai.
Weiana kate aꞌikakauma oi ohore au ouhunaꞌu.”
43 Iesu ꞌabi neiana ehinana murinai eapari aota etibaha,
“Lasaro e,
naia mokarahi omai!”
44 Ba ꞌari hauna ekarahi emai,
imana mai aena hanona ꞌariahana habuninai teꞌapanakia haeamona wairana abomo habuni ha ai teꞌapana.
Iesu eꞌabi etibaha,
“ꞌAriahana habunikia tomorubunakia,
tomohabona meao.”
Iesu Iahuꞌarina Raonana Tebabaina.
45 Iuda haukia boꞌona temai Maria tetoana haukia hanona Iesu taba weiana ebabaina teihana ba teaꞌikakaumana.
46 Ia baika hanona teao Parisea haukia herekia ba Iesu taba ebabaina hauna robana teahuna.
47 Ba robe haukia apaꞌuakia mai Parisea haukia bakai apaꞌuana ṯeꞌimana haukia teaparina kipokia teꞌabiꞌabi,
“Bariu aika taba kaha babaina hau weiana aba bataꞌu taꞌu huri hoakia boꞌona nibabainakia.
48 Aika ia kahahabona hoa neiakia kebabai hao babai hao raninai maearima ikoinai ia kate aꞌikakaumana,
ba Roma haukia katemai eka marea robe mai eka hanopaka kateaꞌi boinaka.”
49 Ba ia ꞌabakia ha atana Kaiafa,
ihau weiana aonai ia hanona robe haukia arakiai hauna ha etae eꞌabi etibaha,
“Wai taba haꞌi toꞌiobi ꞌapuana.
50 Wai obo aꞌi tuobo,
namona hanona hau ha hamona peꞌari maearima paukiai,
ba hanopaka maikoina kekiꞌa hanona aꞌi enamo.”
51 Ia ꞌabi neiana ehinana hanona ia kipona ena raonai ahaꞌi.
ꞌA ihau weiana aonai ia hanona robe haukia ꞌarakiai hauna paunai,
ena mahabanaiai ua eꞌabi aiho Iesu keꞌari Iuda haukia paukiai,
52 Iuda haukia ikupaiakia mo paukiai ahaꞌi,
ia Tirama nahuna ꞌeka haeai haeai ṯemiaho haukia kebararonakia mai kebahamonakia.
53 Rani weiana eaꞌi ramana eaoaina aonai Iuda haukia apaꞌuakia hanona terobahu Iesu kateahu ꞌarina.
54 Ua buonai Iesu Iuda haukia baiatakiai aꞌi ekaꞌa maha.
Ia weia ekaobo eao hanoꞌakuna haianai aiara ha atana Eperaim,
weia iꞌabana haukia kipokia temiaho.
55 Iuda haukia ekia Kabanai tatuna aba ekaibari aonai Iuda maearimakia boꞌona aiara haeai haeai ai tekaraꞌau teao Ierusalema ai kateaꞌiaꞌi harai katerobe ꞌuai ba tatu kerama.
56 Ia Iesu tetabuna ba marea robe aonai tekoroti kipokia baiatakiai tebakai bakai tetibaha,
“Wai taba turaonana?
Ia tatu kemai ꞌao?”
57 ꞌA robe haukia apaꞌuakia mai Parisea haukia ꞌabi tebaibeni,
hau ha Iesu ena miaho ꞌekana eꞌiobina raninai ia keba ꞌiobinakia,
weiana ia katehore kateaꞌina.