Iesu Kateahu ꞌarina Taearana Tetabuna.
14
Beraura rua wairai temiaho Kabanai mai Parawa ꞌabaeana tatuna.
Robe haukia apaꞌuakia mai rauhubu poki haukia tebahamomo terobahu,
bunianai taeara tetabu Iesu kateaꞌina kateahu ꞌarina.
Mareko 14.1-31
2 Tetibaha,
“Aika tatu weiana aonai aꞌi kahababaina.
Toꞌu haukia ꞌuriꞌuri rarina aꞌi temebabaina taꞌuna.”
Babiꞌe Ha Iesu ꞌAranai Tehoro Eheina.
3 Iesu hanona Betaniai,
Simona morumoru hauna ena ituai,
uaꞌa nianiani aonai,
babiꞌe ha tehoro (atana Nado) timina ꞌorimona abomo ꞌarana rarina ꞌakina hauna kabapu namona ꞌakina eaoaina.
Ba eahu paꞌana Iesu ꞌaranai eheina.
4 Maearima baika weia hanona teopuere,
kipokia baiatakiai teꞌabiꞌabi tetibaha,
“Taba buonai tehoro neiana nibaore ꞌabaeana?
5 Mekawakawaina paꞌe Kina hinabu aihau petabu ahina,
monina weiana hanona uraru haukia pebenakia.”
Ia tehore babiꞌe weiana teururuai kiꞌana.
6 ꞌA Iesu ehina benakia etibaha,
“Tomohabona!
Taba buonai tuopuere aina?
Ia hanona aka namona au hereꞌu ai ebabaina.
7 ꞌA uraru haukia hanona rani ikoinai heremiai ṯemiaho,
katonuatae raninai rani teboꞌo emi banamo tabakia katobenakia.
Ia au hanona rani ikoinai heremiai aꞌi kamiaho.
8 Ena ꞌiobi ihobonai ebabaina hereꞌu ai.
Aꞌi tihore bahanaꞌu,
ia hauꞌu tehoroai eutuna,
wairai kerama hauna ebaꞌoru baihana.
9 ꞌAbi toha tohana mo au wai nahina benimi,
Pou Namona kateiroro aina hanopaka maikoinai babiꞌe neiana aka ebabaina hauna abomo katehinana,
ia iraonana.”
Iuda Kehinahina Eao.
10 Iuda Isakariote hauna harau haea rua haukia ꞌabakia ha eao Robe haukia apaꞌuakia herekia Iesu hinahinana kehinahina.
11 Robe haukia apaꞌuakia Iuda herenai ꞌuru weiana teona hanona aokia enamo kiꞌa,
teꞌabiꞌuai moni katebena,
ua buonai Iuda taeara etabu,
taeara namona tabanai hanona Iesu robe haukia apaꞌuakia imakiai keutana kateaꞌina.
Iesu Iꞌabana Haukia Kipokia Ekia Kabanai Tatuna Teaniani.
12 Parawa ꞌabaeana tatuna wapuna koriꞌuaina Kabanai tatuna mamoekia iahuꞌarikia berauranai,
Iesu iꞌabana haukia tehore tebakaina tetibaha,
“Nuraonana Kabanai tatuna anianina aeꞌe katabaꞌoruna koani.”
13 Iesu iꞌabana haukia rua euhunakia,
eꞌabi etibaha,
“Katoao aiara aonai katokatoto,
uaꞌa hau ha katoihana puou mai beina kebuana,
murinai katoꞌau katoao.
14 Ketoto itunai itu poki hauna katohina bena katotibaha,
‘Baꞌiobi hauna eꞌabi,
bakibaki ikaihurina aeꞌe ai?
Iꞌabaꞌu haukia kipokia Kabanai tatuna anianina katani.’
15 Ba ia kipona ikaihuri rarina ha ꞌubiai aba eꞌoru hauna keba ihanimi.
Weia eka aniani katoaꞌiaꞌi haraina.”
16 Iꞌabana haukia teao,
aiara aonai tekatoto hanona Iesu ehina benakia tabakia ikoikiai tetabu ahinakia.
Kabanai tatuna anianina teaꞌiaꞌi haraina.
17 Rabirabi eaoaina aonai,
Iesu iꞌabana haukia harauhaea rua kipokia temai.
18 Aniani ꞌekanai temiati tianiani aonai,
Iesu ehina benakia etibaha,
“ꞌAbi tohana au wai nahina benimi,
baiatamiai tararua ṯaniani oioi hauna ha au hinahinaꞌu kehinahina.”
19 Iꞌabana haukia aokia earoꞌari,
weiana ha ha tebakaina,
“Nuraonana au,
ꞌao?”
20 Iesu ekia ꞌabi ebamuena etibaha,
“Wai harauhaea rua haumi ha,
tararua ꞌororo hamonai ṯahao uta hauna.
21 Au Maearima Nahuna hanona kaꞌari Puka Robenai ererena ihobona,
ꞌa au Maearima Nahuna hinahinaꞌu kehinahina hauna aokoꞌona mo,
kiꞌa rarina ꞌakina ketabu ahina,
aꞌi perama hanona penamo.”
Obiapaka Ena Anitoꞌu.
22 Teaniani aonai,
Iesu ehore parawa eaꞌina,
Tirama ebanamona ba ehobina,
iꞌabana haukia ebenakia,
eꞌabi etibaha,
“Tomoaꞌina,
tomoana!
Neiana hauna au hauaniꞌu.”
23 Haeamona ꞌere ha eaꞌina,
Tirama ebanamona iꞌabana haukia ebenakia,
ikoikiai teinu.
24 Iesu eꞌabi etibaha,
“Neiana hanona au aruaruꞌu maearima boꞌokia paukiai kekiki oioi.
Au aruaruꞌu hanona maearima mai Tirama ekia baibua ꞌabiꞌuaina mahamahana ibatohana hoana.
25 Au wai nahina benimi,
bine beina ha aꞌi kainu mue keao mo Tirama ena obia aiarana aonai mahamahana kainu.”
26 Epua hui ha teaꞌina,
ba tekarahi Olibe oeona teao.
Iesu Petero Kehinana ꞌAbina Ehina ꞌUaina.
27 Iesu iꞌabana haukia ehina benakia etibaha,
“Ikoimiai katohabonaꞌu katobeau otaraina,
pokina Puka Robenai tererena,
‘Au kahore mamoe iꞌimakia hauna
kakomo ꞌarina,
weiana mamoe ikoinai
katebeau otaraina.’ Sek 13.7
28 ꞌA au ꞌariai kamikiri mue murinai kaꞌuai kaeao Galilea.”
29 Petero ehore Iesu ehina bena etibaha,
“ꞌAbaꞌu neiakia ikoikiai oi katehaboniꞌo reꞌa,
ia au hanona aꞌi kahabo ꞌapuaniꞌo.”
30 Iesu Petero ehina bena etibaha,
“ꞌAbi tohana au oi nahina beniꞌo,
bariu rabi neiana kokoroꞌu ibaruana aꞌi keꞌarara baha aonai,
oi rani aihau au kobuniai ainaꞌu.”
31 Petero eꞌabi pahihi etibaha,
“Aika hararua kahaꞌari haeamo reꞌa,
ꞌa au hanona oi aꞌi kabuniai ꞌapuaniꞌo.”
Iꞌabana haukia ikoikiai abomo ua teꞌabi aiho.
Iesu Getesemane ai Ebahubaꞌari.
32 ꞌEka ha atana Getesemane ai tekaraꞌau.
Weiana Iesu iꞌabana haukia ehina benakia etibaha,
“Wai ṉaꞌa tomomiati,
au kaeao kabahubaꞌari.”
Mareko 14.32-52
33 Ba Petero,
Iakobo,
mai Ioane mo ebakaꞌanakia,
aona eꞌabeꞌabe abomo earoꞌari.
34 Ua buonai ehina benakia etibaha,
“Au hanona aubaꞌu nihaiara matoha paꞌari moioina.
Neia kato miaho,
katomaha noꞌa katobaiꞌima.”
35 Papana ekaꞌa ha ha ꞌapua eao,
ba ꞌanoai eꞌumuti,
ebahubaꞌari,
pe mai taearana haiara ranina weiana ia herenai pekaobo.
36 Ia ebahubaꞌari etibaha,
“Hamaꞌu e,
Hamaꞌu e,
taba ikoikiai heremuai hanona tetai.
ꞌEre neiana hereꞌuai poaꞌi obona.
ꞌA au eꞌu nuatae ahaꞌi,
ia oi emu nuataeai mo.”
37 Iesu emue emai iꞌabana haukia aihau parua reakia etabu ahinakia,
ia ehore Petero ehina bena etibaha,
“Simona e,
oi nuparua,
ꞌu?
Rani papana pomaha noꞌa pobaiꞌima aꞌi petaina?
38 Katobahubaꞌari kato baiꞌima,
pokina baihobo ai aꞌi tomototo.
Auba hanona nenuatae tabura,
ia hauani mo niꞌabeꞌabe.”
39 Haeamona emue eao ebahubaꞌari,
ena bahubaꞌari ꞌabikia haeamokia ehina muenakia.
40 Weiana emue emai,
teaihau parua reakia etabu ahinakia,
pokina mahakia tepuma buonai,
herenai ꞌabi tabana katebamuena hanona aꞌi teꞌiobina.
41 Rani ibaihauna emue emai,
ehina benakia etibaha,
“Wai tuparua oho mo tuarai.
Hinokuꞌu,
tomoihana ranina aba ekaraꞌau.
Maearima Nahuna hanona kiꞌa haukia imakiai aba enouta.
42 Tomomikiri hamakaꞌa,
hinahinaꞌu ehinahina hauna aba nimai.”
Iesu Teaꞌi ꞌInina.
43 Iesu niꞌabi oho mo aonai,
Iuda weiana harauhaea rua haukia ꞌabakia ha hauna ekaraꞌau,
mako rarina imakia mai puraꞌakia abomo mai karebakia murinai teꞌau,
ikoikiai hanona Robe haukia apaꞌuakia mai Rauhubu poki haukia mai aiara haukia apaꞌuakia ekia ꞌabiai teao.
44 Hinahina hauna mako weiana aba ehina benakia etibaha,
‘Kapauna hauna hanona hau mo weiana katoaꞌi ꞌinina katoaoaina.’
45 Iuda ekarahi beronai eao Iesu herena,
“Baꞌiobi haumu e.”
Ba epauna.
46 Murinai Iesu teaꞌina ba tebirina.
47 ꞌA Iesu kipokia tekoroti haeamo hauna ha emikiri kareba eberi ꞌauna,
Robe haukia ꞌarakiai hauna ena taꞌaraꞌi hauna haiana ehara obona.
48 Iesu ehore ehina benakia etibaha,
“Wai imami mai karebakia mai puraꞌakia tomai au katoaꞌinaꞌu ihobona kakikaki hauꞌu ai tubaonaꞌu.
49 Rani ikoikiai au hanona wai kipokia Marea Robe aonai abaꞌiobi,
ia aꞌi toaꞌinaꞌu.
ꞌA neiana hanona Puka Robeai terere ꞌuaina ꞌabina ketohana paunai.”
50 Weiana iꞌabana haukia ikoikiai Iesu tehabona tebeau otaraina.
51 Hau ꞌaruꞌaruna ha Iesu murinai eꞌau,
habuni hamona mo eroꞌabuna.
Maearima tehore hau weiana teaꞌi ꞌinina aonai,
52 ena habuni imakiai ehabona hauna ꞌabaeana ebeau ꞌakaumana.
Iesu Iuda Ekia Obia Haukia Wairakiai Ekoroti.
53 Ia tehore Iesu tebakaꞌana teaoaina Robe haukia ꞌarakiai hauna herena,
ba Robe haukia apaꞌuakia,
aiara haukia apaꞌuakia mai Rauhubu poki haukia ikoikiai weia tetoꞌu.
Mareko 14.53-72
54 Petero hanona Iesu ekaiturina,
ia mai baiatakia teao Robe haukia ꞌarakiai hauna ena ara aonai,
uaꞌa baiꞌima haukia baika kipokia temiati haeamo,
iruba eraranakia.
55 Weiana Robe haukia apaꞌuakia mai Iuda ekia obia haukia tehore Iesu ibaꞌarina taearana tetabuna,
ia beho ha aꞌi tetabu ahina.
56 Maearima boꞌona ꞌakina tehore hinau ꞌabikia tehina herenai,
ia ekia hinau ꞌabikia hanona ha aꞌi teihobo.
57 Haeamona maearima baika temikiri ekia baiꞌoi ꞌabina neiana tehinana Iesu herenai,
tetibaha,
58 “Ai aiana taona,
eꞌabi etibaha,
‘Au Marea Robe neiana maearima imakiai tebabaina hauna hanona karubuna,
wapu aihau aonai maearima imakiai aꞌi katebabaina Marea Robena ha kababaina.’”
59 ꞌA ekia baiꞌoi ꞌabikia neiakia abomo aꞌi teihobo.
60 Weiana Robe haukia ꞌarakiai hauna emikiri toꞌu wairakiai ekoroti Iesu ebakaina etibaha,
“Oi emu ꞌabi ha ahaꞌi ꞌabi neiakia ṯehina haukia ahakiai?”
61 ꞌA Iesu hanona ꞌabi ha aꞌi ehinana abomo ena ꞌabi aꞌi ebamuena.
Weiana Robe haukia ꞌarakiai hauna haeamona ebakai muena etibaha,
“Oi Keriso,
tibanamona Tiramana Nahuna,
u?”
62 Iesu eꞌabi etibaha,
“Au mo neiaꞌu,
ikoimiai hanona au Maearima Nahuna katoihanaꞌu,
hiabu ꞌubi tohana Tiramana imana itipanai kamiati,
kupa ꞌauhaonai kamai.”
63 Robe haukia ꞌarakiai hauna ꞌabi weiana ꞌuruna eona raninai aona ehaiara kiꞌa,
kipona ena habuni etapana,
eio etibaha,
“ꞌAbi tabana nahatabuna?
64 Tirama niaꞌi kiꞌana ꞌabina aba tona,
emi raona taba?”
Weiana ikoikiai teꞌabi,
keꞌari.
65 Weiana baika tehore Iesu teꞌatotina,
haeamona mahana teꞌapa abuna abomo teahuna,
teꞌabi tetibaha,
“Moꞌabi,
tai ehore eahuniꞌo?”
ꞌIma haukia abomo teboꞌana.
Petero Iesu Ebuniai aina.
66 Petero hanona ara aonai ꞌanoai,
ba Robe haukia ꞌarakiai hauna ena taꞌaraꞌi uahona ha emai.
67 Ia Petero iruba nirarana eihana raninai,
eiha ꞌiniꞌinina ehina bena etibaha,
“Oi abomumo Iesu Nasareta hauna oꞌabana.”
68 ꞌA Petero hanona ebuniai etibaha,
“Taba robana nuahuna hauna hanona au aꞌi naꞌiobina.”
Ba ekapare eao paꞌabi ꞌakonai.
69 Uaꞌa uaho weiana haeamona eiha muena,
ba baiaruru haukia ehina benakia etibaha,
“ꞌAbakia ha neiana.”
70 Ia haeamona ebuniai mue.
Rani aꞌi ehomaꞌa Petero kipokia tekoroti haeamo haukia tehina bena tetibaha,
“ꞌAbi tohana,
oi abomumo ia ꞌabakia ha.
Pokina oi abomo Galilea haumu.”
71 Weiana Petero ia ehinabe pahihinakia etibaha,
“Wai taba ṯoꞌuahina hauna hanona au aꞌi naꞌiobina.
Nabaiꞌoi reꞌa Tirama puma mebenaꞌu.”
72 Ba kokoroꞌu ibaruana eꞌarara.
Weiana Petero Iesu ehinana ꞌabina eraona tinana,
‘Kokoroꞌu ibaruana aꞌi keꞌarara baha aonai,
oi rani aihau kobuniai ainaꞌu.’
Weiana ia ehai kiꞌa.