Iesu Marea Robe Kerabu Taꞌina Pouna Ehinana.
13
Iesu Marea Robeai ekarahi aonai,
iꞌabana hauna ha ehore ehina bena etibaha,
“Baꞌiobi haumu e,
Marea Robe namo abuna piharai tebabaina,
moihana.”
Mareko 13.1-27
2 Iesu eꞌabi etibaha,
“Itu rarikia ꞌakikia neiakia noihanakia?
Maikoikiai katerabu tai ore,
katehere obo,
pihara ha pihara ha ahanai aꞌi kenoꞌau aꞌi kemiaho.”
Kateꞌoinimi Mai Kateba haiaranimi.
3 Iesu Olibe oeonai emiati Marea Robe ewairana,
Petero,
Iakobo,
Ioane mai Anderea abomo teao herena tebakai bunina.
4 “Mobaꞌiobinamai,
taba neiakia aita katerama?
Haeamona katerama ranina hoana hanona aea homana?”
5 Iesu ehina benakia,
etibaha,
“Katoꞌima ꞌima harainimi,
hau ha aꞌi meꞌoinimi.
6 Maearima boꞌokia au ataꞌuai katemai kateꞌabi katetibaha,
‘Au hanona Keriso’,
maearima boꞌokia kateꞌoinakia.
7 “Huari ꞌurukia mai poukia katoꞌo raninai,
nuami aꞌi katetae,
taba neiakia katerama,
ia puana hanona wairai.
8 Itubu ha kemikiri itubu ha kehuarina,
hanopaka ha kemikiri hanopaka ha kehuarina.
Kanokau kekaꞌa ꞌeka haeai haeai,
ꞌarobo rarikia katerama.
Neiakia hanona matoha miori nirama haiarana koriꞌuaina ꞌabana.
9 “Kipomi katoꞌima ꞌima harainimi,
pokina kateaꞌi ꞌininimi bakai ꞌekakiai katehorotinimi marea aokiai kateꞌatinimi.
Au pauꞌuai rauhubu haukia mai hanopaka obiakia wairakiai katokoroti,
herekiai pouꞌu katohinana.
10 Puana hanona aꞌi kemai baha keao mo pou namona kateiroro aina itubu ikoikiai herekiai.
11 Kateaꞌi ꞌininimi bakai ꞌekanai katehorotinimi raninai,
taba katouahina hauna aꞌi katoraonana,
rani ketaina kebenimi ꞌabina mo katohinana,
pokina wai aꞌi katoꞌabi,
ia Auba Robe keꞌabi.
12 Aꞌa hati katehore kipokia hinahinakia katehinahina,
hama katehore nahukia hinahinakia katehinahina kateahu ꞌarinakia.
Nahu katehore hinakia hamakia kateba kiꞌanakia kateaoainakia,
kateahu ꞌarinakia.
13 Au pauꞌuai maearima ikoinai kateꞌoatanimi,
ia tai kebapahihi keao puanai hauna hanona kemauri.
Orenai Rani Kiꞌa Obona Tohana.
14 “Bakiꞌa mai bataꞌu hauna aꞌi pekoroti ꞌekanai kekoroti katoihana.
(Tuabituabi haumu,
ꞌabi neiana anina koꞌiobi haraina.)
Rani weianai Iudeai ṯemiaho haukia hanona katebeau ꞌakauma kobio kateao.
15 Maearima ha ena itu kapenai reꞌa ia hanona aꞌi keriri itu aonai aꞌi ketoto ena taba aꞌi keaꞌinakia,
ia kebeau ꞌakaumana.
16 Umai niaka hauna abomo aꞌi kemue itu ena habuni aꞌi keaꞌina.
17 Rani weiakia aokiai babiꞌe mai nuakia haeamona batutu babiꞌekia herekiai hanona kekiꞌa kiꞌa baha.
18 Katobahubaꞌari Tirama herenai taba neiakia ꞌipi mai hiribo aokiai aꞌi katerama.
19 Pokina rani weiakia ekia kiꞌa hanona katekiꞌa kiꞌa baha,
ba Tirama hanopaka ebabai ramana raninai emai mo bariu rani neiana ena kiꞌa kipokia aꞌi kateihobo ꞌapua,
muriai haeamona uahomana ha aꞌi kerama mue.
20 ꞌA Obiapaka rani weiakia aꞌi pebakoꞌonakia hanona tai ha aꞌi pemauri ꞌapua,
ꞌa ia ena aꞌitaea maearimakia buokiai rani weiakia kebakoꞌonakia.
21 “Rani weianai hau ha kehina benimi,
‘Tomoihana,
Keriso neiana’ ꞌao ‘Tomoihana,
Keriso weiana’ hanona aꞌi katobatohana.
22 Pokina Keriso baiꞌoikia mai mahabanai baiꞌoikia haukia katemai,
hoa haeai haeai mai hiabu haeai haeai katebabai,
ekia nuatae hanona Tirama ena aꞌi taea maearimakia kate ꞌoinakia,
iamo aꞌi ketainakia.
23 Ua buonai katoꞌima ꞌima harainimi,
wairai uaꞌa aꞌi tirama baha tabakia ikoikiai aba nabaꞌiobinimi.
Au Maearima Nahuna kamai.
24 “Kiꞌa weiana keore murinai,
Beraura hanona kewapura abuna,
nawa aꞌi kerara.
25 Bihiu kupai kateꞌeho,
abomo kupai hiabu tabakia
haeai haeai kateibiuibiu. Isa 13.10; 34.4
26 Rani weianai maearima hanona au Maearima Nahuna kateihanaꞌu ꞌauhao ahanai kamai mai hiabuꞌu abomo mai nuabiꞌu.
27 Weiana eꞌu aneru kauhunakia kateao ꞌuni puakia bani baura timai ꞌekakiai,
eꞌu aꞌitaea maearimakia katebararonakia hanopaka puana keao puana.
Kuropou Kahaihana.
28 “Kuropou herenai ihaiha namona katoihana,
Kuropou kehubuhubu rauna mahamahakia katoihanakia hanona katoꞌiobina ihau aba nikaibari.
Mareko 13.28-37
29 Wai abomimo taba ṉahomakia katoihanakia raninai katoꞌiobina ia aba herekai paꞌabi ꞌakonai.
30 ꞌAbi tohana au wai nahina benimi,
uru neiana aꞌi keore baha keao mo taba neiakia katerama.
31 Kupa mai hanopaka kateꞌakauma,
ia au eꞌu ꞌabi hanona aꞌi keꞌakauma.
Tai Ha Aꞌi Eꞌiobina Rani Tabanai.
32 “Beraura hoana ꞌao ranina tai ha aꞌi eꞌiobina,
ena aneru kupai aꞌi teꞌiobina,
Nahuna abomo aꞌi eꞌiobina,
ia Hamana ikupaiana mo eꞌiobina.
33 “Katomaha noꞌa,
katobaiꞌima pokina rani kemai hanona wai aꞌi ṯoꞌiobina.
34 Ihobona hau ha harima eao raninai,
ena taꞌaraꞌi haukia hiabu ebenakia ena itu kateꞌimana,
ha ha ekia aka katebabai abomo paꞌabi iꞌimana hauna ehina bena kemaha noꞌa kebaiꞌima.
35 Ua buonai wai katobaiꞌima,
pokina itu hauna ena mue hanona aꞌi ṯoꞌiobina rabi,
wapukaꞌa,
kokoroꞌu ai,
ꞌao rani tainai kemai.
36 Ia kebataꞌu kemai reꞌa,
parua reami aꞌi metabu ahinimi.
37 Wai nahina benimi ꞌabina maearima ikoikiai abomo nahina benakia natibaha,
‘Katobaiꞌima!’”