Iesu Marea Robe Kerabutaina Pouna Ehinana.
24
Iesu marea robeai ekarahi taearai nikaꞌa aonai iꞌabana haukia tekaꞌa haha herena marea robe ituna robana teahuna.
2 Iesu ia ehina benakia etibaha,
“Taba neiakia ikoikiai ṯoihanakia?
ꞌAbi tohana au wai nahinabenimi,
pihara ha pihara ha ahanai aꞌi kenoꞌau aꞌi kemiaho,
ikoikiai hanona kateriri kateꞌeho.”
Iesu Eꞌabi, Haiara Boꞌona Katerama.
3 Iesu olibe oeonai emiati aonai iꞌabana haukia tekabuni teao herena tehinabena tetibaha,
“Moba ꞌiobinamai,
taba neiakia aita katerama?
Emu mai mue abomo hanopaka puana hoana hanona aea homana?”
4 Iesu ekia ꞌabi ebamuena etibaha,
“Katoꞌimaꞌima harainimi,
hau ha aꞌi meꞌoinimi.
5 Pokina au ataꞌuai maearima boꞌona katemai kateꞌabi katetibaha,
‘Au Keriso neiaꞌu,’
ba maearima boꞌona kateꞌoinakia.
6 Wai hanona huari ꞌurukia mai poukia katoꞌo raninai nuami aꞌi katetae,
taba uahomakia katerama ia puana hanona wairai.
7 Hanopaka ha kehore hanopaka ha kehuarina,
itubu ha kehore itubu ha keꞌoatana.
ꞌEka haeai haeaiai ꞌarobo katerama mai ꞌeka boꞌonai kanokau katekaꞌa.
8 Neiakia ikoikiai hanona miori nirama haiarana koriꞌuaina ꞌabana.
9 Weiana wai hanona kateaoainimi katebahaiaranimi,
kateahu ꞌarinimi,
au buoꞌuai hanopaka ikoikiai wai kateꞌoatanimi.
10 Rani weiana maearima boꞌona ekia aꞌikakaumai kateꞌeho haha kipokia hinahinakia katehina,
abomo katebaiꞌoata.
11 Weiana mahabanai haukia baiꞌoikia boꞌona abomo katewaira tina maearima boꞌona kateꞌoinakia.
12 Aka kiꞌa hanona keapaꞌua buonai maearima boꞌona ekia raonaꞌau keꞌabeꞌabe.
13 Ia kekori ꞌini keao puanai hauna hanona mauri keaꞌina.
14 Tirama ena obia aiarana pouna namona neiana hanona hanopaka maikoina aonai kateiroro aina,
itubu ikoikiai kateꞌiobina,
ba murinai hanopaka puana kemai.
Rani Kiꞌa Obona Tohana.
15 Ua buonai kaibaꞌuku kiꞌa obona tohana weiana mahabanai hauna Daniela robana eahuna hauna ꞌeka robenai kekoroti katoihana raninai,
(tuabi tuabi hauna meꞌiobina.)
16 weiakia Iudai ṯemiaho haukia hanona oeo aokiai katebeau toto.
17 Weiana itu kapenai hauna hanona aꞌi keriri ena taba itu aonai haukia aꞌi keaꞌinakia.
18 Mai weiana umai nemiaho hauna aꞌi kemue ena itu ena habuni iaꞌina aꞌi keao.
19 Rani weiakia aokiai babiꞌe mai nuakia abomo miori ꞌoruꞌorukia tibaꞌaenakia babiꞌekia herekiai hanona kekiꞌa kiꞌa baha.
20 Katobahubaꞌari Tirama herenai,
emi beau obo ipi mai hiribo ꞌao beraura robenai aꞌi merama paunai.
21 Pokina atetua rarina ꞌakina kerama,
weiana hanopaka eaꞌi ramana emai mo bariu uahomana ha aꞌi erama,
muriai abomo ihobona ha aꞌi kerama.
22 Tirama beraura weiakia aꞌi pebakoꞌonakia raninai maearima ha aꞌi kemauri,
ꞌa ia ena tinaꞌa maearimakia paukiai beraura weiakia kebakoꞌonakia.
23 Rani weianai hau ha kehina benimi ketibaha,
‘Tomoihana Keriso neiana’,
ꞌao ‘Ia weiana,’
raninai aꞌi katobatohana.
24 Pokina Keriso baiꞌoikia mai mahabanai baiꞌoikia hanona katewaira tina bataꞌu taꞌu huri akakia mai hoa rarikia katebabai,
petaina raninai Tirama ena tinaꞌa maearimakia abomo kateꞌoinakia.
25 Katoraona ꞌinina Au aba nabaꞌiobi ꞌuainimi.
26 Ua buonai ia katehina benimi katetibaha,
‘Keriso weia hanoꞌakunai’ raninai aꞌi katoao,
ꞌao ‘Ia neiana ikaihuri aonai’,
raninai aꞌi katobatohana.
27 Pokina kupa neimare taetana niaomo tibotaina ꞌabana au maearima nahuna eꞌu mai hoana abomo ua homana.
28 ꞌAri hauanina enoti ꞌekanai,
poꞌi abomo weia katetoꞌu.
Au Maearima Nahuna Kamai.
29 ‘Atetua weiakia kateore murikiai
beronai beraura kewapura,
nawa aꞌi kerara,
bihiu hanona kupai kateꞌeho,
kupa hiabu tabakia ikoikiai
kateibiu ibiu.’ Isa 13.10; 34.4
30 Weiana maearima nahuna au eꞌu mai hoana hanona kupai kewaira tina,
ba hanopaka maearimakia ikoikiai hanona katehai,
au maearima nahuna hiabu mai nuabi rarina aonai auhao ahakiai kamai kateihanaꞌu.
31 Pihi kateubainakia urukia rarikia aonai eꞌu aneru kauhunakia kupa puanai keao kupa puana baura bani ꞌekakiai atinaꞌanakia maearimakia katebararonakia.
Kuropouai ꞌIobi Kahaꞌina.
32 Kuropou matiuna herenai ꞌiobi katoaꞌina.
Kuropou kehubu rauna kateahu boa raninai,
wai aba katoꞌiobina hioro aba nikaibari.
33 Taeara ihobonai taba neiakia katoihanakia raninai,
wai aba katoꞌiobina rani hanona aba herekai au hanona aba paꞌabi herenai.
34 ꞌAbi tohana au wai nahinabenimi,
uru neiana aꞌi keꞌari ore keao mo taba neiakia ikoikiai katerama.
35 Kupa mai hanopaka hanona kateꞌakauma,
ia au eꞌu ꞌabi hanona aꞌi keꞌakauma.
Tai Ha Aꞌi Eꞌiobina Rani Tabanai.
36 Eꞌu mai beraurana abomo beraurana hoana hau ha aꞌi eꞌiobina,
kupa anerukia aꞌi teꞌiobina Nahuna abomo aꞌi eꞌiobina,
ia Hamaꞌu ikupaiana mo eꞌiobina.
37 Noa ena raniai ꞌabana,
au maearima nahuna eꞌu mai ranina abomo ua kehoma.
38 Tou rarina aꞌi nimai baha aonai maearima hanona teaniani teinuinu tehawainibe eao mo wapu weianai Noa aunohiai etoto.
39 Aꞌi teꞌiobi ꞌapuana taba kerama eao mo tou apaꞌuana ekara ꞌau,
ba ikoikiai tetono ꞌari.
Au maearima nahuna eꞌu mai rarinai abomo ua kehoma.
40 Rani weianai hau rua umai kateaka,
Tirama kehore hamona keaꞌi taeana ꞌabana kehabona.
41 Babiꞌe rua witi ibautuna piharana katebaherena aonai,
Tirama kehore hamona keaꞌitaeana ꞌabana kehabona.
42 Ua buonai katomaha noꞌa pokina emi Obiapaka ena mai beraurana hanona aꞌi toꞌiobina.
43 Ia neiana katoraona ꞌinina,
itu poki hauna peꞌiobina rabi hoana tabanai bainao hauna kemai hanona ia aba pemaha noꞌa,
ba ena itu aꞌi patetapana aꞌi patetoto.
44 Ua buonai wai abomimo katobaꞌoru rani ikoinai,
pokina au maearima nahuna hanona rani weiana wai aꞌi tubahu bahuaina aonai kamai.
Taꞌaraꞌi Hauna Namona Mai Taꞌaraꞌi Hauna Baiꞌoina.
45 Tai hanona taꞌaraꞌi hauna namona mai aoberona ia ena poki hauna kehore keaꞌi taeana ena itu iꞌimanai keao,
taꞌaraꞌi miorikia ekia aniani kebenakia aniani ranina tohanai?
46 Ia aka weiana nibabaina aonai ena poki hauna kemue keihana raninai ia hanona kenamo.
47 ꞌAbi tohana au wai nahinabenimi,
poki hauna kehore ia keaꞌi taeana ena taba ikoikiai iꞌimakia haunai kebaona.
48 Ia taꞌara aꞌi hauna kiꞌa obona hanona keꞌabi ketibaha,
‘Eꞌu poki hauna aꞌi nimai baha.’
49 Ba ia kehore ꞌabana taꞌaraꞌi haukia keahunakia abomo inuinu haukia kipokia kateaniani kateinuinu haeamo.
50 Rani ha taꞌaraꞌi hauna weiana ena poki hauna aꞌi nibahu bahu aina abomo beraura hoana aꞌi eꞌiobina aonai ia kekaraꞌau.
51 Poki hauna kehore ia keahu kiꞌana keuhu ahina bahaorea haukia kipokia ꞌeka hamonai,
weia ia kehai mai ꞌakiꞌakina kearaoꞌi araoꞌi.”