Ori Ibabataina Uaho Harau Haea.
25
“Rani weiana Tirama ena obia aiarana hanona matoha uaho harau haea ꞌabakia,
ekia ramepa teaꞌi teao hawainibe mahamaha hauna kipokia katebaitabu ahi.
2 Ima hanona teaopoꞌo ꞌa ima hanona teaobero.
3 Weiana aopoꞌo uahokia ekia ramepa teaꞌinakia,
ia karatini harikia aꞌi teaꞌi.
4 ꞌA aobero uahokia ekia ramepa tebaharu abomo karatini harikia teaꞌi.
5 Hawainibe mahamaha hauna hanona aꞌi emai baha,
ba uaho parua eaꞌi kiꞌanakia teako rai tenoti teparua.
6 Wapukaꞌa ibuanai io aiana teona etibaha,
‘Hawainibe mahamaha hauna aba nimai,
tomokarahi kipokia katobaitabu ahi.’
7 Ba uaho ikoikiai tenoꞌa temikiri,
ekia ramepa teaꞌiaꞌi harai.
8 Weiana ao poꞌo uahokia tehore ao bero uahokia tenoinakia tetibaha,
‘Emi karatini harua tomobenamai emai ramepa aba kateꞌao.’
9 Ia ekia ꞌabi tebamuena tetibaha,
‘Ahaꞌi.
Wai mai ai kipokia kahabaharu hanona aꞌi ketaina.
Namona hanona tomoao tikawa kawa ꞌekanai ꞌeumi tomokawa.’
10 Ao poꞌo uahokia kawakawa ꞌekana teao aonai hawainibe mahamaha hauna ekaraꞌau,
tebaꞌoru uahokia ima kipokia teao hawainibe tatuna aonai tekatoto ba paꞌabi tekaiabuna.
11 Murinai ao poꞌo uahokia temai teapari tetibaha,
‘Poki haumu e,
Poki haumu e,
paꞌabi mokaikauna tamatoto.’
12 ꞌA ia ekia ꞌabi ebamuena etibaha,
‘ꞌAbi tohana au wai nahina benimi,
au wai aꞌi aꞌiobinimi.’
13 Weiana paunai katomaha noꞌa,
beraura mai beraura hoana hanona wai aꞌi toꞌiobina.
ꞌAbi Ibabataina Taꞌaraꞌi Haukia Aihau Moni Teꞌima.
14 Haeamona Tirama ena obia aiarana hanona matoha hau ha harima keao ꞌeka homaꞌana ꞌabana,
ena taꞌaraꞌi haukia eaparinakia,
ehinabenakia ena taba ikoikiai kateꞌimanakia.
15 Poki hauna weiana ehore ena taꞌaraꞌi haukia ha ha ekia tabura ihobokiai moni ebenakia,
hamona kina hinabu ima ebena,
ha kina hinabu rua,
ha hanona kina hinabu hamomo ebena ba ia harima eao.
16 Kina hinabu ima eaꞌina hauna hanona beronai eao akana ebabaina ba ahanai kina hinabu ima ha ebabaina.
17 Kina hinabu rua eaꞌina hauna abomo uamo ehoma,
ba ahanai kina hinabu rua ha ebabaina.
18 ꞌA kina hinabu hamona eaꞌina hauna eao ꞌuri ehabina poki hauna ena moni ehano abuna.
19 Rani homaꞌana eao murinai taꞌaraꞌi haukia weiakia ekia poki hauna emue emai ena moni ebakai bakai ainakia.
20 Kina hinabu ima eaꞌi hauna kina hinabu ima ha kipokia emaiainakia etibaha,
‘Poki haumu e,
kina hinabu ima obenaꞌu.
Ba moihana,
ahanai kina hinabu ima ha neiakia ababainakia.’
21 Poki hauna eꞌabi etibaha,
‘Taꞌaraꞌi haumu namomu aka bero haumu,
obabai harai,
taba papakia oꞌima harainakia buonai bariu taba apaꞌuakia iꞌimakiai kabaoniꞌo.
Omai eꞌu aonamo aonai mototo.’
22 Kina hinabu rua eaꞌi hauna abomo emai eꞌabi etibaha,
‘Poki haumu e,
kina hinabu rua obenaꞌu.
Ba moihana,
ahanai kina hinabu rua ha neiakia ababainakia.’
23 Poki hauna eꞌabi etibaha,
‘Taꞌaraꞌi haumu namomu aka bero haumu,
obabai harai,
taba papakia oꞌima harainakia buonai bariu taba apaꞌuakia iꞌimakiai kabaoniꞌo.
Omai eꞌu aonamo aonai mototo.’
24 ꞌA kina hinabu hamona eaꞌina hauna emai eꞌabi etibaha,
‘Obiapaka e,
au aꞌiobina oi hanona hau pahihimu,
maearima haeai tebato bato ꞌekakiai nueueu mai maearima haeai uho tekapo kapo otarai ꞌekakiai nubararo bararo.
25 Ua buonai au ataꞌu aeao emu moni hinabu hamona hano aonai ahano abuna ba namaiaina.
Moihana oi emu moni ꞌekanai mo neiana.’
26 Poki hauna eꞌabi etibaha,
‘Taꞌaraꞌi haumu kiꞌa obomu abomo oꞌaboro,
oi nuraonana au maearima baika tebato bato ꞌekakiai naeueu mai maearima tekapo kapo otarai ꞌekakiai nabararo bararo,
ꞌu?
27 Ua homana raninai moni iꞌimana haukia herekiai pohorotina ba amue amai raninai ahanai papana ha perama kipokia paꞌi haeamona.
28 Bariu hanona herenai kina hinabu hamona tomoaꞌi boina,
kina hinabu harau haea eaꞌi hauna tomobena.
29 Pokina mai ꞌeuna hauna hanona boꞌona kabena,
ena taba keboꞌo kiꞌa,
ꞌa ekapu hauna hanona papana herenai nemiaho hauna abomo kaꞌi boina.
30 Taꞌaraꞌi hauna neiana ena namo ahaꞌi hauna tomokapo ahina meao ꞌeka wapuranai weia kehai mai ꞌakiꞌakina kearaoꞌi araoꞌi.’
Bakai Apaꞌuana Orena ꞌAkina.
31 Au maearima nahuna mai nuabiꞌu eꞌu aneru ikoikiai kipokia katamai raninai eꞌu imiaꞌau nuabina ahanai kamiaꞌau.
32 Hanopakai itubu ikoikiai au wairaꞌuai katebararona,
ba au kahore maearima kabahu boanakia,
mamoe ꞌima hauna mamoe mai nani nibahu boana ꞌabana.
33 Au kahore mamoe hanona itipaꞌu tainai,
nani hanona awariꞌu tainai kahorotinakia.
34 Ba au Obia arana kahore itipaꞌu tainai haukia kahina benakia katibaha,
‘Hamaꞌu ebanamonimi haumi,
tomai kupa aiarana neiana hanopaka ebabaina raninai ebaꞌoruna wai ꞌeumi hauna tomoaꞌina wai barimi ai keao.
35 Pokina au mareꞌa aꞌari hanona wai aniani tobenaꞌu ani,
ꞌakoꞌu eꞌororo hanona wai bei tobenaꞌu ainu.
Au maearima haeai hauꞌu hanona wai toaꞌi taeanaꞌu emi ꞌekai.
36 Hereꞌuai habuni ahaꞌi hanona wai habuni tobabatotonaꞌu.
Au ainawa hanona wai au toꞌimanaꞌu.
Au wapura ꞌekanai hanona wai totoanaꞌu.’
37 Ba bero haukia ena ꞌabi katebamuena katetibaha,
‘Obiapaka e,
aita raninai mareꞌa oꞌari,
ba tabanianiniꞌo,
ꞌao aita raninai ꞌakomu eꞌororo ba bei tabeni oinu?
38 Aita raninai taihaniꞌo maearima haeai haumu ba taꞌi taeaniꞌo emai ꞌekai,
ꞌao aita raninai heremuai habuni ahaꞌi ba habuni tabeniꞌo?
39 Aita oinawa ꞌao owapura raninai ba tatoaniꞌo?’
40 Weiana au Obia arana ia kahinabenakia katibaha,
‘ꞌAbi tohana au wai nahinabenimi.
Uahoꞌabaꞌu urarukia neiakia ha herekiai ua tobabai aiho hanona au hereꞌuai abomo aba ua tobabai aihona.’
41 Ba au Obia arana kahore awariꞌu tainai haukia kahinabenakia katibaha,
‘Tirama eururu ainimi haumi,
hereꞌuai tomokapare tomoao niara banai banai irubana tebaꞌoruna tiaporo mai ena miori kipokia ꞌeukia hauna aonai katototo.
42 Pokina au mareꞌa aꞌari hanona aꞌi tobanianinaꞌu,
abomo ꞌakoꞌu eꞌororo hanona bei aꞌi tobenaꞌu aꞌi ainu.
43 Au maearima haeai hauꞌu hanona emi ꞌekanai aꞌi toaꞌi taeanaꞌu,
hereꞌuai habuni ahaꞌi hanona habuni ha aꞌi tobabatotonaꞌu.
Au ainawa mai wapura ꞌekanai hanona aꞌi totoanaꞌu.’
44 Ia abokiamo ena ꞌabi katebamuena kateꞌabi katetibaha,
‘Obia arana e,
aita raninai taihaniꞌo,
mareꞌa oꞌari,
ꞌao ꞌakomu eꞌororo,
ꞌao maearima haeai haumu,
ꞌao habuni heremuai ahaꞌi,
ꞌao oinawa abomo wapura ꞌekanai,
ba aꞌi tabarainiꞌo?’
45 Weiana au ia kahinabenakia katibaha,
‘ꞌAbi tohana au wai nahinabenimi,
uahoꞌabaꞌu urarukia neiakia ha herekiai ua aꞌi tobabai aiho raninai au abomo hereꞌuai ua aꞌi tobabai aiho.’
46 Ba ia haukia hanona keuhunakia haiara banaibanai ꞌekana kateao,
ꞌa bero haukia hanona keuhunakia mauri banaibanai ꞌekana kateao.”