Iesu Mai Sakaio.
19
Iesu Ieriko ai ekatoto nikabanai aonai,
2 hau ha weia atana hanona Sakaio,
takiti aꞌi haukia ekia poki ha,
ia hanona kepu hauna.
Luka 19:1-48
3 Ia ena nuatae hanona Iesu keihana,
ia aꞌi etaina pokina maearima eboꞌo ia hanona ekoꞌo koꞌo.
4 Ua buonai ebeau ꞌuai eao matiuai etae Iesu taeara weianai kekabanai hanona keihana.
5 Iesu emai ꞌeka weianai ekarahi raninai eaꞌa taea eihana ehina bena etibaha,
“Sakaio e.
Moriri biai.
Bariu rani neianai au hanona oi emu ituai kamiaho.”
6 Ia beronai eriri biai mai aonamona Iesu eaoaina ena ituai eaꞌi taeana.
7 Maearima ikoikiai teihana hanona teururu tetibaha,
“Ia hanona aba kiꞌa hauna ena bakiai niao.”
8 ꞌA Sakaio ekoroti Obiapaka ehina bena etibaha,
“Obiapaka e.
Bariu eꞌu kepu abirana maikoinai uraru haukia kabenakia,
abomo hau ha ena kepu aꞌi ꞌabaeana hanona rani bani ena kepu ꞌarana kabamuena.”
9 Iesu ia ehina bena etibaha,
“Bariu rani neianai bamauri hanona itu neianai aba ekaraꞌau,
pokina hau neiana ia abomo Aberahamo nahuna.
10 Maearima Nahuna emai ena poki hanona teꞌakauma haukia ketabunakia kebamaurinakia.”
ꞌAbi Ibabataina Aka Haukia Gold Monina Teaꞌina.
11 Maearima aia weiana tiona aonai ꞌabi ibabatai ha ehina benakia pokina ia aba emai Ierusalema herenai abomo teraonana Tirama ena obia aiarana hanona aba kewaira tina.
12 Ba Iesu etibaha,
“Obia hauna ha eao hanopaka haeai weia ena obia arana hoana katebena ba kemue.
13 Aꞌi ekaꞌa baha aonai ena taꞌaraꞌi haukia harauhaea eaparinakia,
gold monikia atakia minaa ha ha ebenakia etibaha,
‘Moni neiakia hanona katoaka ainakia keaomo au kamue.’
Ba ekaꞌa.
14 ꞌA ena aiara haukia aꞌi tenuatae aina ekia iuhubeau baika teuhunakia murinai teao katetibaha,
‘Ai hau naiana aꞌi ṯanuatae aina,
emai obia ꞌaranai aꞌi keao.’
15 Hau weiana obia ꞌarana hoana aba eaꞌina emue emai raninai,
ena taꞌaraꞌi haukia moni ebenakia haukia eaparinakia aea teaka aiho hauna keꞌiobina.
16 Hau kori ꞌuaina emai eꞌabi etibaha,
‘Eꞌu poki haumu e,
emu mina hamonai mina harauhaea atabu ahinakia.’
17 Poki hauna ia ena ꞌabi ebamuena etibaha,
‘Eꞌu taꞌaraꞌi haumu namomu e,
obabai harai.
Taba papana ꞌakina ia oꞌima haraina buonai aiara harauhaea ekia obia haunai koao.’
18 Hau ibaruana emai etibaha,
‘Eꞌu poki haumu e,
emu mina hamona ahanai mina ima atabu ahinakia.’
19 Poki hauna ehina bena etibaha,
‘Oi hanona aiara ima ekia obia haunai koao.’
20 Haeamona taꞌaraꞌi hauna ha emai etibaha,
‘Eꞌu poki haumu e,
emu mina hamona neiana,
habuniai aꞌapana ahore buni haraina.
21 Au oi ataꞌu ainiꞌo,
pokina oi hanona hau pahihimu,
aꞌi ohoroti tabana nuaꞌi parena haeamona aꞌi obato tabana nukabe hurina.’
22 Poki hauna ia ehina bena etibaha,
‘Taꞌaraꞌi haumu kiꞌa obomu,
emu ꞌabiai kababakainiꞌo,
oi oꞌiobina au hau pahihiꞌu,
aꞌi ahorotina tabana ṉaꞌi parena haeamona aꞌi abatona tabana nakabe hurina.
23 Ba taba buonai eꞌu mina moni itunai aꞌi ohorotina,
ba amue hanona ahanai ha patabu ahina.’
24 Herenai tekoroti haukia ehina benakia etibaha,
‘Ena mina hamona tomopuhu boina,
weiana mina harauhaea ebabaina hauna tomobena.’
25 ꞌA ia teꞌabi tetibaha,
‘Poki haumu e,
ia mina harauhaea aba imanai.’
26 Ekia ꞌabi ebamuena etibaha,
‘Au wai nahina benimi,
maearima ha mai ena taba hauna boꞌona katebena,
ia taba ahaꞌi hauna hanona herenai papana nemiaho hauna abonamo kateaꞌi obona.
27 Abomo au eꞌu ꞌou haukia,
aꞌi ṯenuatae,
au aꞌi kaobia haukia tomaiainakia neia,
au wairaꞌu ai katoahu ꞌarinakia.’”
Iesu Ierusalemai Ekaraꞌau Obia ꞌArana ꞌAbana.
28 Iesu ꞌabi neiakia ehinanakia murikiai eꞌuai ainakia Ierusalema teao.
29 Ekaꞌa eao Betefage mai Betani aiarakia aba herekiai Olibe oeonai,
Iesu iꞌabana haukia rua euhunakia,
30 ehina benakia etibaha,
“Katoao aiara wairakai hauna aonai katokatoto,
toniki nahuna ha uaꞌa tetoba ꞌauna katoihana,
ahanai hau ha aꞌi nemiaꞌau ꞌapua,
katorubuna katomaiaina hereꞌu.
31 Hau ha kebakainimi,
‘Taba buonai naiana ṯorubuna?’
Wai katohina bena,
‘Obiapaka nenuatae aina.’”
32 Euhunakia teao haukia ehina benakia ihobonai mo tetabu ahina.
33 Toniki nahuna terubuna aonai poki haukia tebakainakia,
“Taba buonai doniki nahuna ṯorubuna?”
34 Ia ekia ꞌabi tebamuena tetibaha,
“Obiapaka nenuatae aina.”
35 Teaoaina Iesu herena,
ekia habuni toniki nahuna kapenai teabari ꞌaunakia,
ba Iesu emiaꞌau.
36 Eao aonai maearima ekia habuni taearai teabarinakia.
37 Teao aiara aba herekiai,
taeara Olibe oeonai eriri ꞌekanai tiꞌabana haukia ikoikiai mai aonamokia teio Tirama tebanamona hiabu akakia ebabai teiha haukia paukiai.
38 Ia tetibaha,
“Aika eka Obia Arana Obiapaka
atanai nimai hauna hamabanamona.
Baibua kupai,
nuabina hanona
ꞌubi ꞌakinai.” Sal 118.26
39 Parisea haukia baika mako baiatakiai Iesu tehina bena tetibaha,
“Baꞌiobi haumu e,
iꞌabamu haukia morikenakia temeunu.”
40 Iesu ekia ꞌabi ebamuena etibaha,
“Au wai nahina benimi,
neiakia kateunu raninai pihara kateio.”
Iesu Ierusalema Ehaiaina.
41 Iesu ekaꞌa eao Ierusalema herena tainai mahana eao aiara eihana raninai ehai aina.
42 Etibaha,
“Ierusalema e,
bariu rani neianai emu baibua pokina poꞌiobina hanona penamo,
ꞌa mahamu ebuni.
43 Beraura weiana ketaina aonai,
oi emu ꞌou haukia ꞌanoai kekepirimu katekai kakaiarona,
katekori kaiaroniꞌo,
haia haia ikoikiai katekaiabunakia.
44 Katekaponiꞌo koao ꞌano tohanai oi mai nahumu emu pihia aonai ṯemiaho haukia maikoinai kateꞌari ore,
pihara ha aꞌi katehabona pihara ha ahanai pokina Tirama kemai heremu beraurana aꞌi oꞌiobina.”
Iesu Kawakawa Haukia Marea Robe Aona Euꞌu Ahinakia.
45 Ba Iesu Marea Robe aonai ekatoto,
weia tikawakawa haukia euꞌu ahi ramanakia,
46 Ehina benakia etibaha,
“Aba Puka Robenai ererena,
‘Eꞌu itu hanona bahubaꞌari itunai keao’,
ia wai hanona kakikaki haukia ekia paparoꞌai tubaona.”