Iesu Ierusalemai Ekatoto Obia ꞌArana ꞌAbana.
11
Ierusalema tetabuna teao,
temai Olibe oeonai,
Betefage Betani herekiai,
weia Iesu iꞌabana haukia rua euhu ꞌuainakia,
Mareko 11.1-19
2 eꞌabi etibaha,
“Katoao aiara weiana wairakai hauna aonai katokatoto,
doniki nahu ha katotabu ahina hau ha aꞌi nemiaꞌau ꞌapua hauna uaꞌa aba tetoba ꞌau,
katorubuna katomaiaina.
3 Hau ha kebakainimi,
ketibaha,
‘Taba buonai naiana tubabaina?’
raninai,
katohina bena katotibaha,
‘Obiapaka nenuatae aina,
rani papana haeamona kemueaina.’”
4 Terarua teao doniki nahu ha tetabu ahina aiara ibuanai itu ha paꞌabina ꞌakonai itoba ꞌau teihana.
Ṯerubuna aonai,
5 maearima baika weia tekoroti haukia tebakainakia,
tetibaha,
“Taba buonai doniki nahu ṯorubuna?”
6 Iesu ehinana ihobonai mo maearima weiakia tehina benakia hanona tehabonakia.
7 Doniki nahu temaiaina Iesu herena raninai,
kapenai ekia habuni teabari ꞌaunakia,
ba Iesu emiaꞌau.
8 Maearima boꞌona ekia habuni taearai teabari,
ꞌa baika hanona taeara haianai matiu raukia tehara huri teabarinakia.
9 Wairanai mai murinai tekaꞌa haukia teio tetibaha,
“Hosana!
Obiapaka atanai
nimai hauna hamabanamona.
10 ꞌAbaꞌabaka Davida ena obia
aiarana aba nimai hauna
hamabanamona.
Hosana,a
ꞌubi toha tohana Tiramana
hamabanamona.”
11 Iesu Ierusalemai ekaraꞌau Marea Robe aonai ekatoto,
taba ikoikiai eihanakia,
ia beraura ekoꞌikoꞌi buonai iꞌabana haukia harau haea rua kipokia temue teao Betani.
Iesu Suke Matiuna Ena.
12 Erani Betani tehabona hanona Iesu mareꞌa eꞌari.
13 Suke mai rauna atauꞌai eihana,
eao herena keiha haraina buana ha reꞌa,
rau ꞌabaeakia mo taba ahaꞌi etabu ahina,
pokina Suke ekia buaꞌa ranina ahaꞌi.
14 Iesu matiu weiana ehina bena etibaha,
“Oi buabuamu hau ha aꞌi keani ꞌapuana keao mo banai banai.”
Iꞌabana haukia aiana weiana teona.
Iesu Marea Robe ai Etoto.
15 Ierusalemai tekaraꞌau,
Iesu Marea Robe ai ekatoto kawakawa haukia euꞌu ahinakia,
moni tiaꞌi banai haukia ekia itara ebakuꞌa banainakia haeamona rauria tikawakawa ainakia haukia ekia imiaꞌau tabakia etori kuꞌa banainakia.
16 Iesu ekia taeara ekaiabunakia ha ena kawakawa tabana aꞌi kebua banaina Marea Robe iꞌaeana aonai.
17 Weiana maearima ebaꞌiobinakia etibaha,
“Puka Robenai tererena,
Tirama eꞌabi,
‘Eꞌu itu hanona maearima ikoikiai kateaparina ekia bahubaꞌari ituna’,
ia wai aba kakikaki haukia ekia paparoꞌai tubaona.”
18 Robe haukia apaꞌuakia mai Rauhubu poki haukia ꞌuru neiana teona buonai,
iahuꞌarina taearana tetabuna,
ia tetaꞌu aina pokina maearima ikoikiai hanona ena baꞌiobi ꞌabikia weiakia teaonamo ainakia buonai.
19 Rabirabi hanona aiara apaꞌuana weiana tehabona.
Suke Matiuna Aba Epaea.
20 Raurani tekabanai raninai,
Suke weiana teihana aba eꞌororo eao mo ramunai epua.
Mareko 11.20-33
21 Petero eraona tinana ba Iesu ehina bena etibaha,
“Baꞌiobi haumu e!
Moihana.
Suke orikena hauna hanona aba eꞌororo.”
22 Iesu ehina benakia etibaha,
“Tirama katoaꞌikakauma.
23 ꞌAbi tohana au wai nahina benimi.
Hau ha oeo neiana pehina bena,
‘Kipomu momikiri ꞌaku aonai moeno uhu’,
kebatohana aona aꞌi kekaiꞌau kaiꞌau raninai tabana kerama.
Ia nenuatae aina hanona keaꞌina.
24 Ua buonai au wai nahina benimi,
ṯonuatae ainakia tabakia ikoikiai bahubaꞌari ai katonoi,
weiana katoaꞌikakauma hanona katotabu ahinakia wai ꞌeumi.
25 Weiana bahubaꞌari aokiai katokoroti raninai,
teaꞌi kiꞌanimi haukia ekia kiꞌa katohina haonakia,
ba Hamami kupai hauna emi kiꞌa abomo kehina haonakia.
26 ꞌA ekia kiꞌa aꞌi katohina haonakia raninai,
Hamami kupai nemiaho hauna emi kiꞌa abomo aꞌi kehina haonakia.”
Iesu Ena Hiabu Tebakai bakai Aina.
27 Haeamona Ierusalemai tekaraꞌau,
Iesu eao Marea Robe wairanai nikabanai aonai,
Robe haukia apaꞌuakia,
Rauhubu poki haukia,
abomo aiara haukia apaꞌuakia teao Iesu herena.
28 Tebakaina,
teꞌabi tetibaha,
“Hiabu tabanai aka neiakia nubabainakia,
abomo tai hiabu ebeniꞌo?”
29 Iesu eꞌabi etibaha,
“Au abomo bakaibakai ha kabenimi,
anina katobenaꞌu raninai tai ena hiabuai aka neiakia nababai hanona kabaꞌiobinimi.
30 Ioane ena baꞌuere robe hanona kupai emai ꞌao maearima herekiai emai?
Tomoꞌabi.”
31 Kipokia baiatakiai terobahu aina tetibaha,
“‘Kahaꞌabi kupai emai’ raninai kebakainaka ‘Taba buonai aꞌi tubatohana?’
32 ꞌAo kahaꞌabi ‘Maearima herekiai emai reꞌa’...”
Ia maearima mo tetaꞌu ainakia,
pokina maearima ikoinai teꞌiobina Ioane hanona maha banai hauna tohana.
33 Weiana ia Iesu tehina bena tetibaha,
“Aꞌi taꞌiobina.”
Iesu abomo ehina benakia etibaha,
“Au aboꞌumo hiabu tabanai aka neiakia nababai hanona aꞌi kabaꞌiobinimi.”