Iesu Ierusalema ai Ekatoto Obia ꞌArana ꞌAbana.
21
Iesu iꞌabana haukia kipokia Ierusalema aba wairakiai Betefage ai tekaraꞌau Olibe oeonai,
weia Iesu ehore iꞌabana haukia rua euhu ꞌuainakia,
2 ehina benakia etibaha,
“Katoao aiara aonai toniki ha tetoba ꞌauna mai nahuna ohi katotabu ahinakia,
katorubunakia katomai ainakia hereꞌu.
3 Hau ha ꞌabi ha kehinana raninai katoꞌabi,
‘Obiapaka nenuatae ainakia,’
ba beronai kebenimi.”
4 Neiana hanona Mahabanai hauna ena ꞌabi ibatohana etibaha,
5 “Siona aiara haukia
kohina benakia,
Tomoihana,
emi obia ꞌarana
nimai heremi.
Ia mai ꞌaiaununa toniki kapenai
emiaꞌau,
toniki nahuna ahanai emiaꞌau.” Sek 9.9
6 Iꞌabana haukia teao Iesu ehina benakia akakia ihobona tebabainakia.
7 Toniki mai nahuna ohi temaiainakia,
ekia habuni ahanai teabari ꞌaunakia ba Iesu emiaꞌau.
8 Mako rarina ekia habuni taearai teabarinakia,
baika abomo matiu rekia tehara obonakia taearai teabarinakia.
9 Iesu wairanai mai murinai tekaꞌa haukia teio tetibaha,
“Hosana,a
Davida Nahuna ꞌeuna!
Obiapaka atanai nimai hauna
Tirama kehore kebanamona!
Hosana ꞌubi toha tohanai!”
10 Iesu Ierusalemai ekatoto raninai aiara haukia teꞌuriꞌuri tebakaibakai tetibaha,
“Neiana hanona hau tabana?”
11 Mako teꞌabi tetibaha,
“Neiana hanona Iesu mahabanai hauna Galilea Nasareta ai emai.”
Iesu Marea Robeai Kawakawa Haukia Euꞌu Ahinakia.
12 Iesu marea robe aonai ekatoto weia tikawakawa haukia ikoikiai euꞌu ahinakia,
moni aꞌi banai haukia ekia itara mai rauria tikawakawai haukia ekia imiaꞌau etori tori kuꞌa banainakia.
13 Ehinabenakia etibaha,
“Puka robenai aba tererena,
‘Eꞌu itu hanona kateaparina bahubaꞌari ituna,’
ia wai hanona kakikaki haukia ekia paparoꞌai tubaona.”
14 Mahakia tekiꞌa haukia mai ꞌome haukia teao Iesu herena marea robe aonai,
ba ia ehore ebanamonakia.
15 Robe haukia apaꞌuakia mai rauhubu poki haukia Iesu bamauri hoakia ebabai teihana abomo miori marea aonai teio tetibaha,
‘Hosana Davida Nahuna ꞌeuna!’
raninai ia aokia teopuere,
16 tebakaina tetibaha,
“Oi miori tiꞌabi aiakia hanona nuona?”
Iesu ekia ꞌabi ebamuena etibaha,
“ꞌE,
aiakia aba naona.
Wai ꞌabi neiana aba totuabina?
‘Miori ꞌoruꞌorukia mai
ꞌae tiana miorikia pinakiai
atamu tibanamona.’” Sal 8.2
17 Ba Iesu ehabonakia aiara apaꞌuanai ekarahi eao Betani ai erabi weia emiaho.
Iesu Matiu Eururuaina.
18 Erani raurani amarinai Iesu emue aiara apaꞌuana niao aonai mareꞌa eꞌari.
19 Suke matiuna ha taeara haianai eihana eao herena.
Ia buana ha aꞌi eihana ꞌa rau ꞌabaeakia mo,
ba ehinabena etibaha,
“Oi aꞌi kobuaꞌa mue!”
Matiu weiana beronai rauna tepaea ba eꞌororo.
20 Iꞌabana haukia hoa weiana teihana hanona tetaꞌu taꞌu huri tetibaha,
“Aehoma buonai rani aꞌi ehomaꞌa matiu weiana aba eꞌororo?”
21 Iesu ehinabenakia etibaha,
“ꞌAbi tohana au wai nahina benimi,
patoaꞌikakauma aomi aꞌi patekaiꞌau kaiꞌau raninai,
Suke herenai erama hauna ikupaiana mo ahaꞌi,
ia kobio patohinabena,
‘Moao ꞌakuai moeno uhu,’
weiana abomo kerama.
22 Taba ikoinai bahubaꞌari ai katonoi ainakia mai aꞌikakaumami hanona katoaꞌinakia.”
Iesu Ena Hiabu Tebakaibakai aina.
23 Iesu haeamona Marea Robe ai ekatoto ebaꞌiobi aonai,
robe haukia apaꞌuakia mai Iuda ekia maearima apaꞌuakia temai herena tebakaina tetibaha,
“Hiabu tabanai aka neiakia nubabai,
abomo tai hiabu ebeniꞌo?”
24 Iesu ekia ꞌabi ebamuena etibaha,
“Au abomo wai bakai bakai hamona kabenimi,
eꞌu ꞌabi katobamuena raninai au hiabu tabanai aka neiakia nababai haukia kabaꞌioibinimi.
25 Ioane ena baꞌuere robe hiabuna hanona aeꞌe ai emai?
Kupai emai ꞌao maearima herekiai emai?”
Ia kipokia baiatakiai teꞌabiꞌabi tetibaha,
“Kahaꞌabi,
‘Kupai emai.’
hanona kebakainaka ketibaha,
‘Aehoma buonai aꞌi toaꞌi taeana?’
26 ꞌA kahatibaha,
‘Maearima herekiai emai.’
raninai,
toꞌu haukia neiakia abomo kahataꞌuainakia,
pokina ia ikoikiai tiraonana Ioane hanona mahabanai hauna.”
27 Ua buonai ia Iesu ena ꞌabi tebamuena tetibaha,
“Ai aꞌi ṯaꞌiobina.”
Ba Iesu ehinabenakia etibaha,
“Au aboꞌumo hiabu tabanai aka neiakia nababai hanona aꞌi kabaꞌiobinimi.”
Ori Ibabataina Miori Rua.
28 “Wai taba ṉa tuhoma?
Hau ha nahuna hanona rua,
ba eao pakana hauna herena ehinabena etibaha,
‘Nahaꞌu e,
bariu beraura neianai koao eꞌu bine haharuanai koaka.’
29 Miori hamana ena ꞌabi ebamuena etibaha,
‘Aꞌi kaeao.’
ꞌA muriai eraonaraona haraina ba eao eaka.
30 Haeamona hamakia eao nahuna ibaruana herena ꞌabi ihobonamo ehinana,
ba miori eꞌabi,
‘ꞌE,
hamaꞌu,
kaeao.’
Ia aꞌi eao.
31 Weiakia terarua hanona aeana hauna hamakia ena nuatae akana ebabaina?”
Ia teꞌabi tetibaha,
“Kori ꞌuaina hauna.”
Iesu ia ehina benakia etibaha,
“ꞌAbi tohana au wai nahina benimi,
moni bararo haukia mai maha porepore babiꞌekia hanona Tirama ena obia aiaranai katekatoto ꞌuai ba wai.
32 Pokina baꞌuere robe hauna Ioane emai heremi bero taearana ebaihanimi,
ia wai aꞌi toaꞌi taeana ꞌa moni bararo haukia mai mahaporepore babiꞌekia hanona teaꞌi taeana.
Wai haeamona hoahoa weiana toihana,
iamo aꞌi toraona kabe aꞌi toaꞌi taeana.”
Ori Ibabataina Haharua Iꞌimana Haukia Kiꞌa Obokia.
33 “Tomobahu ꞌabi ibabatai ha neiana.
Hano hauna ha ena bine haharuana ebabaina,
arana eoko kakaiarona,
bine buakia kehari ꞌiti ꞌitina urina ehabina mai baiꞌima ituna ebakorina.
Haharua hanona biraura haukia baika ebaꞌimaꞌimanakia,
ꞌa ia hanona eharima hano haeai eao.
34 Bine buana iaꞌina ranina aba ekaibari,
poki hauna emikiri ena taꞌaraꞌi haukia baika euhunakia buabua ibararokia teao.
35 Haharua teꞌimana haukia tehore taꞌaraꞌi haukia teaꞌi ꞌininakia ha teahu kiꞌana ha teahu ꞌarina ha piharai tekuina.
36 Haeamona poki hauna taꞌaraꞌi haukia euhunakia teao,
ꞌuaina hanona bita mo bariu hanona boꞌona teao,
ia hoa ihobonamo ia herekiai tebabaina.
37 Muri ꞌakinai hanona poki hauna nahuna euhuna eao herekia etibaha,
‘Au nahaꞌu buonai aba katemarikiaina.’
38 Haharua ṯeꞌimana haukia poki hauna nahuna teihana raninai kipokia teꞌabiꞌabi tetibaha,
‘Kepoki hauna neiana.
Tomai hamahuꞌarina,
haharua hanona aika ꞌeukai keao.’
39 Ba weia teaꞌina haharua aonai teberi ahina teaoaina parabu kapenai teahuꞌarina.
40 Ba wai turaonana,
haharua poki hauna kemai raninai haharua teꞌimana haukia herekiai taba kebabaina?”
41 Ia ena ꞌabi tebamuena tetibaha,
“Poki hauna kehore iꞌimana haukia kiꞌa obokia keahuꞌari orenakia,
ꞌa haharua hanona haharua iꞌimana haukia haeai kebenakia kateꞌimana,
bine ekia buaꞌa raninai buakia kateaoainakia ia ꞌeuna.”
42 Iesu ia ehinabenakia etibaha,
“Wai puka robena aꞌi totuabi ꞌapuana,
u?
Ṉa terere aihona,
‘Itu babai haukia
tebakiꞌana piharana hanona aba
pihara apaꞌuana tohanai eao.
Babai neiana hanona
Obiapaka ebabaina,
nahaihana nahataꞌu taꞌu huri!’ Sal 118.22
43 Ua buonai au wai nahinabenimi,
Tirama ena obia aiarana heremiai keaꞌi parena,
buabua nibaramanakia itubuna maearimakia kebenakia.
44 Hau ha keꞌeho pihara neiana ahanai hanona kepaꞌa,
ia pihara keꞌeho hau ha ahanai hauna hanona keꞌiti ꞌiti apuroroai keao.”