ꞌAbi Ibabataina Aka Haukia Bine Haharuanai.
20
“Tirama ena obia aiarana hanona hano poki hauna ha ꞌabana,
raurani ꞌamarinai ekarahi eao aka haukia etabunakia ena bine haharuanai kateaka.
2 Poki hauna kipokia ꞌabi tebatohana ꞌarakia beraura hamona aonai kina harau haea kateaꞌina,
ba euhunakia ena haharua teao.
3 Beraura hoana 9 ꞌabana hanona ekarahi eao aiara ibuanai weia maearima baika tekoroti ꞌabaea eihanakia.
4 Ba ehinabenakia etibaha,
‘Wai abomo tomoao eꞌu haharuai katoaka,
ꞌarami kahorenakia.’
5 Ba ia abomo teao kateaka.
Atiaha ekarahi eao haeamona rabirabi beraura hoana 3 ꞌabana ekarahi mue eao hoahoa hamonamo weiana ebabaina.
6 Haeamona rabirabi beraura hoana 5 ꞌabana ekarahi eao hanona baika mo tekoroti ꞌabaea eihanakia,
ebakainakia etibaha,
‘Aehoma buonai neia tukoroti rabi ꞌabaea taba ha aꞌi tubabai ꞌapuana?’
7 Ena ꞌabi tebamuena tetibaha,
‘Pokina tai ha aka ha aꞌi ebenamai.’
Ba ehinabenakia etibaha,
‘Wai abomo tomoao eꞌu haharuai katoaka.’
8 Beraura ekaihuna,
haharua poki hauna haharua iꞌimana hauna ehinabena etibaha,
‘Teaka haukia koaparinakia ꞌarakia kobenakia,
muri ꞌakinai temai teaka haukia herekiai koaꞌi ramana keaomo temai ꞌuai haukia herekiai kobapuana.’
9 Rabirabi beraurana hoana 5 ꞌabanai tetoto teaka haukia temai ha ha kina harauhaea harauhaea ebenakia teaꞌi.
10 Ba teaka ꞌuai haukia temai,
ekia raona hanona ꞌarakia keapaꞌua,
ꞌa ia abokiamo ha ha kina harauhaea harauhaea teaꞌinakia.
11 Ekia moni teaꞌinakia aonai haharua poki hauna teururuaina,
12 teꞌabi tetibaha,
‘Muriai temai haukia hanona beraura hoana hamonamo teaka,
ꞌa ai hanona beraura neiana ena aroꞌari ena hiabu maikoina tahoaina,
ia kipokia ꞌaramai obaihobona.’
13 Haharua poki hauna aka hauna ha ena ꞌabi ebamuena etibaha,
‘Eꞌu hau e,
heremuai aꞌi abeho.
Aika hararua ꞌabi aba habatohana koaka beraura hamona aonai kina harau haea kabeniꞌo.
14 Oi ꞌeumu hauna moaꞌina moao.
Au eꞌu nuataeai muriai emai eaka hauna ꞌeuna kabena oi ꞌeumu abeniꞌo hauna ihobonai.
15 Au kipoꞌu eꞌu taba kipoꞌu eꞌu nuataeai aꞌi kababaina,
u?
Au eꞌu namo paunai nuwaeꞌe ainaꞌu, u?
16 Taeara ihobonai temurihai haukia kateꞌuai,
ꞌa teꞌuai haukia katemurihai.’”
Iesu Rani Ibaihauna Ena ꞌAri Pouna Ehinana.
17 Iesu taearai ekaꞌa niao Ierusalema aonai iꞌabana haukia harauhaea rua ebakaparenakia haiahaiai ehinabenakia etibaha,
18 “Bariu aika hanona Ierusalema ai kahakaraꞌau,
au Maearima Nahuna hanona robe haukia apaꞌuakia mai rauhubu poki haukia imakiai kateutanaꞌu behoai katehorotinaꞌu kateahu ꞌarinaꞌu.
19 Au hanona rama haea haukia imakia kateutanaꞌu katebataeainaꞌu kateꞌatinaꞌu mai matiu ibiri ropo ꞌubinai kateahu ꞌarinaꞌu,
ꞌa wapu ibaihaunai kamikiri mue.”
Babiꞌe Nahuna Paukiai Iesu Enoina.
20 Sebedeo nahuna rua hinakia kipokia temai Iesu herena,
hinakia Iesu wairanai ekaipehu ena nuatae tabana ha enoiaina.
21 Iesu ia ebakaina etibaha,
“Taba nonuatae?”
Ia eꞌabi etibaha,
“Moꞌabi ꞌuai hereꞌuai,
nahaꞌu neiakia rua ha itipamu tainai ha awarimu tainai katemiati emu kupa aiarana aonai.”
22 Iesu eꞌabi etibaha,
“Wai aꞌi toꞌiobina taba tunoiaina?
Haiara ꞌerena kainu hauna wai katoinu ketaina,
u?”
Terarua teꞌabi,
“Katainu ketaina.”
23 Iesu ia ehinabenakia etibaha,
“ꞌAbi tohana eꞌu ꞌere hanona katoinu,
ꞌa itipaꞌu mai awariꞌu tainai katemiati haukia hanona au aꞌi katinaꞌanakia,
ia ꞌeka weiana hanona aba Hamaꞌu ebaꞌoruna etinaꞌanakia haukia mo kebenakia.”
24 Iꞌabana haukia harauhaea aia weiana teona raninai uahoꞌaba rua weiakia teopuere ainakia.
25 Ua buonai Iesu iꞌabana haukia ikoikiai eaparinakia temai herena ehina benakia etibaha,
“Wai toꞌiobina rama haeai haukia ekia obia haukia hanona ekia nuataeai maearima tipoki ainakia ekia hau apaꞌuakia abomo ekia hiabuai tibaeheꞌau maearima tiaiahunakia.
26 ꞌA wai heremiai hanona ua aꞌi kehoma,
hau ha baiatamiai nenuatae keapaꞌua hauna hanona ikoimiai emi taꞌaraꞌi haunai keao.
27 Abomo hau ha baiatamiai nenuatae keꞌuai hauna hanona ikoimiai emi taꞌara iaꞌinai keao.
28 Ihobona au Maearima Nahuna amai hanona taꞌaraꞌu aꞌi kateaꞌi ia maearima taꞌarakia kaꞌi,
abomo eꞌu mauri kabaibeni maearima ekia kiꞌai kabakarahinakia paunai.”
Iesu Maha Kiꞌa Haukia Rua Mahakia Ebanamonakia.
29 Iesu iꞌabana haukia kipokia Ieriko tihabona aonai mako rarina ia murinai tekaꞌa.
30 Maha kiꞌa haukia rua taeara haianai temiati herekiai Iesu ekabanai ꞌuruna teona raninai,
teapari aota tetibaha,
“Obiapaka,
Davida Nahuna e!
Moaokoꞌo ainamai!”
31 ꞌA mako ia terikenakia kateunu.
ꞌA terarua teapari aota kiꞌa,
“Obiapaka,
Davida Nahuna e!
Moaokoꞌo ainamai!”