Kana Aiaranai Hawainibe Tatuna Ha.
2
Wapu rua murinai Galilea Kana aiarana aonai hawainibe tatuna ha erama.
Iesu hinana hanona weia,
2 Iesu mai iꞌabana haukia kipokia abomo tebeaunakia teao hawainibe tatuna weianai.
3 Tatu aonai bine beina teinu orena raninai Iesu hinana ehore Iesu haianai eꞌabi etibaha,
“Ia herekiai bine beina aba eore.”
4 Iesu eꞌabi etibaha,
“Hinaꞌu,
taba buonai ekia aroꞌari hauna au nubenaꞌu.
Au eꞌu rani aꞌi nitai bahana.”
The miracle at Cana (Ioane 2:1-12)
6 Weia pihara puoukia ꞌabaihau tekoroti,
Iuda haukia ekia hoahoa taikia weia bei kateraiꞌau imakia mai aekia kateutu,
puou ha ha aokiai beibei matoha harau rua ꞌao harau aihau ꞌabakia.
7 Iesu taꞌaraꞌi haukia ehina benakia etibaha,
“Puou aokiai bei tomoba bonunakia.”
Ua buonai teheinakia tebabonu teao ꞌakoꞌakokiai.
8 Ba ia ehina benakia etibaha,
“Bariu harua tomorai ꞌaunakia tomoaoaina tatu ihaꞌini hauna tomobena.”
Ba harua teraina teaoaina ia tebena.
9 Tatu neiha ꞌinina hauna bei weiana bine beinai eao hauna einu hobona,
aeꞌe ai emai hanona ia aꞌi eꞌiobina,
taꞌaraꞌi haukia bei teraina haukia mo teꞌiobina.
Ba ihaꞌini hauna hawainibe mahamaha hauna eaparina haiahaiai,
10 eꞌabi etibaha,
“Maearima ikoikiai hanona bine beina namona tibeni ꞌuainakia,
ba ṯeinu ꞌari murinai bine beina ꞌamaꞌamana tibenakia,
ia oi hanona bine beina namona obamauaina emai mo bariu obaibeni.”
11 Iesu bataꞌutaꞌu huri hoana koriꞌuaina neiana ebabaina Galilea Kana aonai.
Ena nuabi ebawaira tinana ba iꞌabana haukia ia teaꞌikakaumana.
12 Tatu neiana murinai Iesu hinana hatina mai iꞌabana haukia kipokia teao Kaperanauma uaꞌa temiaho wapu baika teao.
Iesu Ehore Kawakawa Haukia Marea Robeai Euꞌu Ahinakia.
13 Iuda haukia ekia Kabanai tatuna beraurana ekaibari buonai Iesu ekaraꞌau Ierusalema eao.
Jesus in the Temple courtyard (Ioane 2:13-25)
14 Uaꞌa marea robe aonai hanona poromakau,
mamoe,
rauria tikawakawa ainakia haukia mai moni tiaꞌi banai haukia temiati eihanakia.
15 Ba iꞌatiꞌati ꞌanauana ha ebabaina ꞌanauai marea robe aonai poromakau mai mamoe ikoikiai eura ahinakia,
moni aꞌibanai haukia ekia moni ebarobo otarainakia ekia itara etori kuꞌa banainakia.
16 Weiakia rauria tikawakawa ainakia haukia herekiai eꞌabi etibaha,
“Neiakia tomoaꞌi katuꞌanakia ꞌeka neianai.
Hamaꞌu ena itu hanona wai emi kawakawa ꞌekanai aꞌi tomobaona!”
17 Ba iꞌabana haukia Puka robena aba tererena ꞌabina teraona tinana,
“Oi emu itu iraonaꞌau aina hanona au aoꞌuai iruba niara ꞌabana.”
18 Ba Iuda haukia apaꞌuakia tehore Iesu tebakaina tetibaha,
“Bataꞌutaꞌu huri hoana tabana ai kobaihanamai hanona katabatohaniꞌo oi mai emu bero neiakia ikoikiai nubabai.”
19 Iesu ekia ꞌabi ebamuena etibaha,
“Marea robe neiana tomoahu ꞌitiꞌitina,
au wapu aihau aonai kabakori muena.”
20 Iuda haukia apaꞌuakia teꞌabi tetibaha,
“Marea robe neiana tebabaina ihauna hanona bariabui ꞌabaihau,
ia wapu aihau aonai aea kobakori mue aihona?”
21 ꞌA Iesu marea robe robana eahuna hauna hanona ia kipona hauanina.
22 Weiana Iesu ꞌariai emikiri mue murinai ia iꞌabana haukia ena ꞌabi ehinana hauna teraona tinana.
Ba Puka robena mai Iesu ehina ꞌabikia tebatohanakia.
Iesu Maearima Ekia Hoahoa Aba Eꞌiobinakia.
23 Iesu Kabanai tatuna aonai Ierusalema ai emiaho,
maearima boꞌona bataꞌutaꞌu huri hoakia ebabai teihana hanona teaꞌikakaumana.
24 ꞌA Iesu kipona hanona maearima aꞌi ebatohanakia pokina ia hanona ikoinai eꞌiobinakia.
25 Iesu kipona maearima aokiai ṯemiaho tabakia aba eꞌiobinakia paunai,
hau ha aꞌi kehore maearima poukia ia herenai aꞌi kehinanakia.