Pou Namona
IOANE
Ererena Hauna
ꞌAbi Hanona Maearima Hauaninai Emai.
1
Bahabana ꞌakinai hanopaka aꞌi erama baha aonai ꞌAbi hanona aba uaꞌa,
ꞌAbi hanona Keriso,
ꞌAbi hana Tirama ohi temiaho,
ꞌAbi hanona Tirama.
2 Ia hana bahabana ꞌakinai Tirama ohi temiaho.
The Word (Ioane 1:1-18)
3 Tirama ebabai tabakia ikoikiai hana ꞌAbi weianai terama,
terama tabakia ikoikiai hanona ha kipona aꞌi erama.
4 ꞌAbi hanona mauri pokina,
ba mauri weiana hanona maearima ekia ea.
5 Ea hanona eꞌara wapura aonai,
ia wapura hana ea aꞌi nihao abuna.
6 Tirama hau ha euhuna emai,
ia atana hanona Ioane.
7 Ia emai maearima herekiai ea pouna kehinana,
ia paunai maearima ikoikiai ea pouna kateona ba kateaꞌikakauma.
8 Ia kipona hanona ea weiana ahaꞌi,
ia ea pouna kehinana paunai emai.
9 Ea tohana hanona emai hanopakai maearima ikoinai herekiai kebaeanakia.
10 Ia hanona hanopaka aonai,
hanopaka hanona ia ꞌeunai erama,
iamo hanopaka hanona ia aꞌi eꞌiobina.
11 Ia ena hanopaka tohana haukia herekia emai,
ia kipona ena maearima tohakia hanona aꞌi teaꞌi taeana.
12 Ia tiaꞌi taeana mai atana tiaꞌikakaumana haukia ikoikiai hanona bero ebenakia Tirama nahunai kateao.
13 Tirama nahunai teao haukia hanona maearima ekia rama taearanai ahaꞌi,
ꞌao hauani ena nuataeai ahaꞌi,
ꞌao maearima ha ena nuataeai ahaꞌi,
ia Tirama ena nuataeai terama.
14 ꞌAbi weiana hanona maearima hauaninai emai,
baiatamai ai kipokia tamiaho.
Ena nuabi taihana,
nuabina weiana hanona Hamana herenai emai Nahuna hamohamona ꞌeuna,
ia aonai aokoꞌo hoana mai ꞌabi tohana ebonu ꞌauna.
15 Ioane ehore ia pouna ehinana eio etibaha,
“Au pouna ahinana hauna hanona neiana,
atibaha,
‘Au muriꞌuai nimai hauna etara haonaꞌu pokina ia hauna emiaho ꞌuai ba au arama.’”
16 Ia aokoꞌo hoanai ebonu ꞌauna ba aika ikoikai banamo ia herenai nahaꞌihao aꞌihaona.
17 Tirama rauhubu ebenaka Mose imanai,
ia aokoꞌo hoana mai ꞌabi tohana hanona Iesu Keriso herenai temai.
18 Hau ha Tirama aꞌi eiha ꞌapuana,
ꞌa Nahuna hamohamona Tirama herena ꞌakinai nemiaho mai ia kipona abomo Tirama,
ia hauna ehore Tirama ebaꞌiobinaka.
Baꞌuere Robe Hauna Ioane Eꞌabi ‘Au Hanona Keriso Ahaꞌi’.
19 Weia Ierusalemai Iuda haukia apaꞌuakia tehore robe haukia mai Lebi haukia teuhunakia teao Ioane herena katebakaina ia hanona tai.
John Baptizes Jesus (Ioane 1:19-34)
20 Ioane aꞌi ebuniai ia ehina pou haraina etibaha,
“Au hanona Kerisoa ahaꞌi.”
21 Ia tebakaina tetibaha,
“Ba oi hanona tai?
Oi hanona Elia?”
Ia eꞌabi etibaha,
“Au Elia ahaꞌi.”
Ia tebakai muena tetibaha,
“Oi mahabanai haumu ꞌao?”
Ekia ꞌabi ebamuena etibaha,
“Ahaꞌi.”
22 Ua buonai ia tehina bena tetibaha,
“Mohina benamai oi hanona tai.
Emu ꞌabi kataeaoaina teuhunamai haukia katahina benakia.
Oi kipomu poumu aea nohina aihona?”
23 Ioane ekia ꞌabi ebamuena etibaha,
“Au hanona mahabanai hauna Isaia ena rererere ꞌabina,
ia eꞌabi etibaha,
‘Aia ha hanoꞌakunai eio hauna
etibaha,
Obiapaka ena kaꞌa taearana
tomobaberona kekana.’” Isa 40.3
24 Baika hanona Parisea haukia teuhunakia haukia,
25 haeamona tebakaina tetibaha,
“Oi Keriso ahaꞌi ꞌao Elia ahaꞌi ꞌao mahabanai haumu ahaꞌi raninai aehoma buonai nubaꞌuere robe?”
26 Ioane ehina benakia etibaha,
“Au beiai nabaꞌuere robenimi,
ꞌa wai baiatamiai aꞌi ṯoꞌiobina hauna ha ekoroti.
27 Ia hanona muriꞌuai nimai,
iamo ia eapaꞌua ba au,
ia ena tamaka warokia karubunakia abomo hereꞌuai aꞌi ketaina.”
28 Neiakia ikoikiai hanona Ioane Ioridana ate abirana Betaniai ebaꞌuere robe aonai terama.
Iesu Hanona Tirama Ena Mamoe Nahu.
29 Erani Ioane ehore Iesu ekaꞌa herena nimai hanona eihana ba eꞌabi etibaha,
“Tomoihana Tirama ena mamoe nahuna hanopaka ena kiꞌa ibua parena hauna.
30 Maraniai au robana ahuna hauna neiana atibaha,
‘Muriꞌuai nimai hauna hanona au etara haonaꞌu,
pokina ia emiaho ꞌuai ba au arama.’
31 Au kipoꞌu ia aꞌi aꞌiobina,
ia au amai beiai kabaꞌuere robe hana ia kabawaira tinana Isaraela haukia ia kateꞌiobina paunai.”
32 Ba Ioane ia pouna ehinana etibaha,
“Au Auba Robe aihana rauria ꞌabana kupai eriri ia ahanai ehiriꞌau.
33 Au aꞌi aꞌiobi bahana,
ia weiana euhunaꞌu beiai kabaꞌuere robe ṉa ehoma Tiramana ehina benaꞌu etibaha,
‘Ahanai Auba Robe keriri kehiriꞌau koihana hauna koꞌiobina ia hanona Auba Robe ai kebaꞌuere robe.’
34 Au mahaꞌuai aba aihana ba nahina pouna neiana hana Tirama Nahuna.”
Iesu Iꞌabana Haukia Koriꞌuaikia.
35 Erani Ioane haeamona weia iꞌabana haukia rua kipokia tekoroti.
The disciples follow Jesus (Ioane 1:35-51)
36 Ia Iesu nikabanai eihana raninai eꞌabi etibaha,
“Tomoihana Tirama ena mamoe nahuna.”
37 Ioane iꞌabana haukia rua ia eꞌabi aiana teona raninai teao Iesu murinai tekaꞌa.
38 Iesu eiha kabe murinai tikaꞌa haukia eihanakia ba ebakainakia etibaha,
“Wai taba ṯonuatae aina?”
Ia ena ꞌabi tebamuena tetibaha,
“Rapi e,
oi aeꞌeai nomiaho?”
(Maeakiai Rapi anina hanona ‘baꞌiobi hauna.’)
39 Ia ehina benakia etibaha,
“Tomai tomoihana.”
Ba teao ena emiaho ꞌekana teihana,
weiana hanona beraura ebaeno hoana bani,
ia kipokia temiaho.
40 Weiakia terarua Ioane eꞌabi aiana teona abomo Iesu murinai teao haukia ha hanona Anderea,
ia hanona Simona Petero hatina.
41 Anderea beronai aꞌana Simona etabu ahina ba ehina bena etibaha,
“Ai Mesia aba tatabu ahina.”
(Mesia anina hanona Keriso,
Bamauri hauna.)
42 Ba ia Simona eaoaina Iesu herena.
Iesu Simona eiha ꞌini ꞌinina eꞌabi etibaha,
“Oi atamu hanona Simona,
Ioane nahuna,
bariu oi atamu kateaparina Kepa.”
(Kepa hanona ihobona Petero,
anina hanona pihara.)
Iesu Pilipo Mai Natanaela Ohi Eaparinakia.
43 Erani Iesu enuatae keao Galilea aonai,
Pilipo etabu ahina ba ehina bena etibaha,
“Muriꞌuai omai.”
44 Pilipo hanona Betesaida hauna Anderea mai Petero ꞌabakia.
45 Pilipo ehore Natanaela etabu ahina ehina bena etibaha,
“Mose rauhubu aonai pouna ererena abomo mahabanai haukia ekia pukai tererena hauna ai aba tatabu ahina.
Ia hanona Nasareta hauna Iesu,
Iosepa nahuna.”
46 Natanaela ehore ebakai bakai,
“Nasareta ai taba namona ha uaꞌa ha kerama ketaina,
u?”
Pilipo etibaha,
“Omai mo,
moihana.”
47 Iesu Natanaela ekaꞌa herena nimai eihana raninai pouna ehinana,
“Ia hana Isaraela hauna tohana.
Ia aonai baiꞌoi hoana ha ahaꞌi.”
48 Natanaela ehore ebakaina,
“Aea oꞌiobi aihonaꞌu?”
Iesu ia ena ꞌabi ebamuena etibaha,
“Oi suke matiuna baꞌanai aiha ꞌuainiꞌo ba Pilipo eapariniꞌo.”
49 Ba Natanaela eꞌabi etibaha,
“Baꞌiobi haumu e,
oi hana Tirama nahuna.
Oi hana Isaraela ekia obia arana.”
50 Iesu ia ehina bena etibaha,
“Au aꞌabi suke matiuna baꞌanai aihaniꞌo buonai nuaꞌikakaumanaꞌu,
u?
Neiana mo ahaꞌi,
wairai oi hana taba rarikia koihanakia.”
51 Haeamona ehina benakia etibaha,
“ꞌAbi tohana au wai nahina benimi,
kupa kekaikau Tirama ena aneru katekaraꞌau kateriri au Maearima Nahuna ahaꞌuai katoihanakia.”