Baꞌuere robe Hauna Ioane Eiroro.
3
Rani weianai Ioane Baꞌuere robea hauna ewaira tina Iuda hanoꞌakunai ena iroro eaꞌi ramana etibaha,
2 “Emi kiꞌai tomoraona kabe,
pokina Tirama ena obia aiarana hanona aba ekaibari.”
3 Neiana hanona mahabanai hauna Isaia ꞌabina ehinana hauna etibaha,
“Hau ha hanoꞌakunai eio etibaha,
‘Obiapaka ena taeara
tomobaꞌoruna,
Ena kaoao boana
tomobaberona.’” Isa 41.3
4 Ioane ena habuni hanona mahi atana Kamela buirana tanatananai ebabaina,
mai huana ꞌapana hanona poromakau paruana ehaina,
ena aniani hanona pekaupekau mai hoho beina.
5 Ierusalema maearimakia mai Iuda aonai aiara maikoina,
haeamona Ioridana ate herenai aiara ikoinai haukia temai herena aiana kateona.
6 Ekia kiꞌa tehina pounakia,
haeamona ebaꞌuere robenakia Ioridana ate aonai.
7 Ioane Parisea haukia mai Sadukea haukia boꞌokia temai herenai kebaꞌuere robenakia eihanakia raninai ehinabenakia etibaha,
“ꞌErau nahuna haumi e.
Tai ehinabenimi puma weiana Tirama aba ketiuahina hauna herenai katobeau pare?
8 Raonakabe buabuana tomobawaira tinana.
9 Aomiai aꞌi katoꞌabi wai hanona Aberahamo ꞌabaꞌabana buonai puma weiana herenai katobeau pare.
Au wai nahinabenimi Tirama hanona mai hiabuna pihara neiakiai Aberahamo ꞌabaꞌabana kebabainakia!
10 Wapira hanona aba eꞌoru matiu pokinai,
buabua namokia aꞌi tibaramanakia matiukia ikoinai hanona keꞌuinakia iruba aonai kekapo totonakia.
11 Au hanona beiai mo nabaꞌuere robenimi emi raona kabe hoana,
ia weiana muriꞌuai nimai hauna hanona Auba Robeai mai irubai kebaꞌuere robenimi.
Ia hanona eapaꞌua kiꞌa baha ba au,
au aꞌi anamo ena tamaka kabuanakia.
12 Ena ikomo matiuna imanai eaꞌina,
ikomo ꞌekana eaꞌi aꞌi haraina uho weiakia ikoinai kekomonakia paruakia kebaꞌehonakia,
uho namokia ikoinai kebararonakia paraboa aonai keroꞌanakia,
ia hamarakia hanona weiana aꞌi niꞌao ꞌapua irubana aonai kehuhu orenakia.”
Ioane Iesu Ebaꞌuere Robena.
13 Rani weianai Iesu hanona Galilea ai emai Ioridana atena Ioane herenai kebaꞌuere robena.
14 Ia Ioane ebaoao etibaha,
“Oi au pobaꞌuere robenaꞌu hanona penamo.
Iamo omai au hereꞌu.”
15 Iesu Ioane ena ꞌabi ebamuena etibaha,
“Bariu hanona neiana oi kobabaina.
Aka neianai Tirama ena bero akakia ikoikiai kahabatohanakia.”
Ba Ioane ehore Iesu ebaꞌuere robena.