Aotipa Haukia Taetana Tainai Temai.
2
Heroda Obia ꞌarana Iuda eobia aina raninai,
Iesu hanona Iuda aonai Betelehemai erama.
Rani weianai aotipa haukia taetana taina hanopaka haeai ai temai Ierusalema teao,
2 ba tebakai bakai tetibaha,
“Iuda ekia Obia ꞌarana erama miorina hanona aeꞌeai?
Ia ena bihiu taetana tainai taihana buonai tamai katakuti aina”.
Visit of the Magi (Mataio 2:1-23)
3 Heroda Obia ꞌarana ꞌabi weiana eona raninai nuana etae,
mai Ierusalema ai maearima ikoinai abomo nuakia etae.
4 Ia ehore Iuda ekia robe haukia apaꞌuakia mai rauhubu poki haukia ikoikiai eaparinakia ebakainakia etibaha,
“Keriso hanona aeꞌeai kerama?”
5 Ia ena ꞌabi tebamuena tetibaha,
“Iuda Betelehema aonai.
Mahabanai hauna ṉa erere aihona.
6 ‘Oi Betelehema,
Iuda hanona aonai,
Iuda ṯeiha ꞌinina aiarakia
baiatakiai oi hanona
aꞌi okoꞌikoꞌi kiꞌa baha,
pokina oi heremuai
poki hauna ha kemai
ia hanona eꞌu Isaraela
maearimakia keꞌuai ainakia
mamoe iꞌimana hauna ꞌabana.’” Mik 5.2
7 Ua buonai Heroda aotipa haukia eapari buninakia ebakainakia keꞌiobi haraina rani tabana tohanai hanona bihiu weiana ewaira tina.
8 Euhunakia kateao Betelehema eꞌabi etibaha,
“Katoao miori ꞌoruꞌoruna weiana katotabu haraina.
Katotabu ahina hanona katobaꞌiobinaꞌu,
ba au abomo kaeao ia kakuti aina.”
9 Aotipa haukia Heroda obia ꞌarana aiana teona murinai tekaꞌa,
taearai teao aonai bihiu weiana taetana tainai teihana hauna eꞌuai ainakia eaomo miori nemiaho ꞌekanai hanona eꞌoro.
10 Bihiu weiana teihana raninai aokia enamo banaina.
11 Itu weiana aonai tetoto hanona miori hinana Maria ohi teihanakia ba tekaipehu miori tekuti aina.
Murinai obia ꞌabana iberuberu bena tabakia gold,
muramura timina orimona,
mai muramura taburana hauani katetarona hauna tetara ꞌaunakia teberuberu bena.
12 Ba nibiai Tirama eharabunakia aꞌi katemue Heroda herena,
weiana taeara haeai tekana temue teao ekia hanopaka.
Iesu Teꞌuru aina Aikupito Teao.
13 Aotipa haukia tekaꞌa murikiai Obiapaka ena aneru nibiai Iosefa herenai ewaira tina eꞌabi etibaha,
“Momikiri miori hinana ohi moba kaꞌanakia moꞌuru ainakia moao Aigupito.
Weia katomiaho keaomo au kahina beniꞌo,
pokina Heroda hanona aba miori ketabuna keahu ꞌarina.”
14 Epua,
Iosefa emikiri miori hinana ohi ebakaꞌanakia rabi weianai tekaꞌa teao Aikupito,
15 weia temiaho keaomo Heroda keꞌari.
Weiana Obiapaka ena mahabanai hauna pinanai ehinana hauna ibatohana,
“Au Aikupito ai
Nahaꞌu apari ahina.” Hos 11.1
16 Heroda eꞌiobina aotipa haukia aꞌi katemue herena,
weiana aona eopuere kiꞌa,
aotipa haukia ebakainakia ranina eraonana ihobonai ꞌabi ebaibeni ena huari haukia Betelehema mai aiara herenai haukia aokiai miori ikoinai ihaukia rua mai baꞌai haukia teahuꞌarinakia.
17 Rani weianai mahabanai hauna Ieremia ehinana ꞌabina hanona etohana,
18 “Aia ha Rama ai teona
hai mai aokoꞌo rarina ꞌakina,
Rahela nahuna nihai ainakia,
ia aona katebakirona hanona
aꞌi nenuatae
pokina ikoinai aba teꞌari ore.” Ier 31.15
Aikupitoai Temue aina Nasareta Teao.
19 Heroda eꞌari murinai Aigupito ai Obiapaka ena aneru Iosefa herenai nibiai ewaira tina,
20 eꞌabi etibaha,
“Momikiri miori hinana ohi moba kaꞌanakia katomue Isaraela hanonai,
weiakia miori kateahu ꞌarina haukia hanona aba teꞌari”.
21 Ba Iosefa emikiri miori hinana ohi ebakaꞌanakia teao Isaraela.