Tiaporo Ehore Iesu Ehobona.
4
Weiana Auba Robe ehore Iesu eaoaina hanoꞌakunai tiaporoa kehore kehobona.
2 Iesu wapu ikoinai bariabui erobe aniani ha aꞌi eani,
murinai hanona mareꞌa eꞌari kiꞌa.
3 Aonai baihobo hauna emai herena eꞌabi etibaha,
“Peoi Tirama nahuna raninai,
pihara neiakia mohina benakia pohamai temeao.”
4 Ia Iesu eꞌabi etibaha,
“Puka robenai aba tererena,
‘Maearima hanona pohamai mo
aꞌi katemauri,
ia Tirama ena ꞌabi ehina haukia
ikoinai kateaꞌinakia hanona
katemauri.’”
5 Weiana tiaporo ehore Iesu eaoaina Ierusalema aiara robena,
Marea robe ꞌubina ꞌakinai ebakori ꞌauna,
6 ba ehinabena etibaha,
“Peoi Tirama nahuna raninai,
kipomu naia morobo ahi.
Pokina Puka robenai aba tererena,
‘Tirama ena aneru kehina benakia
kateꞌimaniꞌo imakiai
kateaꞌi taeaniꞌo,
weiana piharai aemu
aꞌi mokaina taꞌuna.’” Sal 91.11, 12
7 Iesu ia ena ꞌabi ebamuena etibaha,
“Puka robenai abomo ṉa terere aihona,
‘Obiapaka emu Tirama
baihobo ꞌekanai aꞌi kohorotina.’”
8 Haeamona tiaporo ehore Iesu eaoaina ꞌubi ꞌakina kobiona kaipanai ebaehe ꞌauna,
ba hanopaka aiarakia maikoina nuabina ebaihana.
9 Tiaporo eꞌabi etibaha,
“Kokaipehu kokuti ainaꞌu raninai,
neiakia maikoinai oi kabeniꞌo.”
10 Iesu haeamona eꞌabi etibaha,
“Satani e,
mokatuꞌa!
Puka robenai ṉa terere aihona,
‘Obiapaka emu Tirama
iamo ikupaiana kokuti aina,
mai taꞌarana koaꞌi.’”
11 Weiana tiaporo Iesu herenai ekaobo,
ba aneru temai tebaraina.
Iesu Ena Aka Eaꞌi Ramana Galileai.
12 Iesu Ioane aba wapura itunai tehorotina pouna eona raninai emue eao Galilea hanonai.
13 Weia Nasareta aiaranai aꞌi emiaho,
ia eao Sebulon mai Napatali hanokiai Galilea obu haianai aiara ha atana Kaperanauma uaꞌa emiaho.
14 Neiana erama hanona Isaia mahabanai hauna eꞌabi hanona kebatohana etibaha,
15 “Sebulon hanonai
mai Napatali hanonai,
obu haianai,
Ioridana ate
abihanai,
Galilea rama haeai haukia
ekia hano ai!
16 Maearima weiakia
wapurai ṯemiaho haukia
ea rarina ꞌakina kateihana.
Weiakia ꞌari aiaiakia hanokiai
ṯemiaho haukia herekiai
ea kerara.” Isa 9.1, 2
17 Rani weianai Iesu ena iroro eaꞌi ramana etibaha,
“Emi kiꞌai tomoraona kabe,
pokina Tirama ena obia aiaranab hanona aba ekaibari!”
Iesu Baꞌeha Haukia Bani Eaparinakia.
18 Iesu Galilea ꞌobu poena haiana ekana eao aonai,
aꞌa hati rua Simona,
teaparina Petero,
uaho ꞌabana Anderea ohi eihanakia ekia reꞌe ꞌobu aonai tehorenakia,
pokina ia hanona baꞌeha haukia.
19 Iesu ehina benakia etibaha,
“Muriꞌuai tomai.
Au kahore maearima ibaꞌeha benikia haumiai kabaonimi.”
20 Beronai ekia reꞌe tehabonakia murinai teao.
21 Ekaꞌa haha eao hanona aꞌa hati rua Iakobo mai Ioane hamakia Sebedeo kipokia ekia ahi ahanai ekia reꞌe tiahu abunakia eihanakia ba eaparinakia.
22 Beronai ekia ahi mai hamakia tehabonakia Iesu murinai teao.
Iesu Eiroro mai Inawa Ebanamonakia.
23 Iesu Galilea hanona maikoina aona ekana,
Iuda haukia ekia marea aokiai ebaꞌiobi,
Tirama ena obia aiarana pouna namona eiroro aina,
mai maearima ekia inawa haeai haeai mai hau haiara haeai haeai ikoinai ebanamonakia.
24 Suria hanopakana maikoina aonai pouna erama otaraina,
weiana maearima tehore inawa haeai haeai haukia temaiainakia Iesu herena,
hau haiara haeai haeai haukia,
aokiai auba kiꞌa obokia haukia,
nawa tiꞌari aina haukia,
mai ꞌome haukia.
Ia ehore ikoinai ebanamonakia.
25 Toꞌu rarina ꞌakina Galileai mai weiakia Aiara Harauhaeai,
Ierusalemai mai Iudai,
Ioridana atena abiranai hanokia maearimakia Iesu murinai tekaꞌa.