3 Iesu ekia ꞌabi ebamuena etibaha,

“Wai paꞌe Davida orina aꞌi totuabi ꞌapuana.

Ia mai ꞌabana kipokia mareꞌa teꞌari raninai taba ebabaina?

4 Ia Tirama ena ituai etoto tebarobena parawakia robe haukia ikupaiakia mo kateani haukia eaꞌinakia eani mai iꞌabana haukia ebenakia.”

5 Haeamona ehina benakia etibaha,

“Maearima Nahuna hanona Beraura Robe obiana.”

6 Beraura robe haeai ha ai Iesu Iuda haukia ekia mareai etoto ebaꞌiobi.

Hau ha weia imana itipana hanona ekobe kobe.

7 Rauhubu poki haukia mai Parisea haukia ia teꞌitimana Beraura Robeai kebamauri ꞌao,

Iesu beho ꞌekanai katehorotina taearana tetabu.

8 ꞌA Iesu ekia raona eꞌiobina,

weiana ima kobe kobe hauna ehina bena etibaha,

“Momikiri baiatakiai mokoroti.”

Ba emikiri ekoroti.

9 Iesu ehina benakia etibaha,

“Au wai nabakainimi,

aeana hauna ebero Beraura Robeai kahabanamo ꞌao kahabakiꞌa,

kahabamauri ꞌao kahabaꞌari?”

10 Iesu ikoikiai eiha kakaiaronakia murinai ima kobe hauna ehina bena etibaha,

“Imamu motiu berona.”

Ia ebabaina hanona imana ebero mue.

11 ꞌA ia hanona aokia teopuere kiꞌa,

kipokia teroba ahu Iesu herenai taba katebabaina.

12 Rani weianai Iesu oeoai ekaraꞌau kebahubaꞌari,

rabi maikoina ebahubaꞌari Tirama herenai.

13 Aba rani nimaiaina aonai ia iꞌabana haukia eaparinakia temai,

baiatakiai harau haea rua eaꞌi taeanakia ata ebenakia iuhubeau haukia.

14 Ia hanona Simona atana eaparina Petero mai hatina Anderea ohi,

Iakobo mai Ioane ohi,

Pilipo mai Batolomeo ohi,

15 Mataio,

Toma,

Alepeo nahuna Iakobo,

mai Simona teaparina Selote hauna ohi,

16 Iakobo nahuna Iuda mai Isakariote hauna Iuda ia hinahinana kehina hauna.

17 Iesu iꞌabana haukia kipokia oeoai teriri hano beronai tekoroti.

Iꞌabana haukia toꞌuna rarina weia mai maearima boꞌona ꞌakina Iudea hanona ꞌekakia ikoikiai Ierusalema ai Turo mai Sidono poe hanokia ikoikiai temai,

18 aiana kateona mai ekia inawa katenamo.

Auba kiꞌa obokia tebaro ꞌarinakia haukia abomo temai ebanamonakia.

19 Toꞌu maikoina tebahobona kateaꞌi ꞌapuana pokina hiabu ia aonai ekarahi ikoikiai ebamaurinakia.

20 Iesu iꞌabana haukia eihanakia ena ꞌabi eaꞌi ramana etibaha,

23 Rani weianai aomi katenamo katorobo katoaonamo wairai,

pokina kupai arami rarina ꞌakina.

Weiana ihobona tohanai ꞌabaꞌabakia ua tebabai aiho mahabanai haukia herekiai.

27 “Iamo aiaꞌu tuona haumi nahina benimi.

Emi ꞌou haukia katoraonaꞌau ainakia,

weiakia ꞌarimi aꞌi tiꞌari haukia herekiai katobabai harai.

28 Weiakia ṯeururu heremiai haukia katoba namonakia,

tibabai kiꞌa heremiai haukia ahakiai katobahubaꞌari.

29 Hau ha mekemu keboꞌana raninai,

kokeꞌe banai abirana abomo kobena.

Mai hau ha emu kota keaꞌi parena raninai,

emu habuni ibatoto aꞌi koubo aina.

30 Maearima heremuai taba tinoiai haukia kobenakia,

mai hau ha emu taba ha eaꞌina rea imue aina robana aꞌi koahuna.

31 Wai emi nuatae maearima ua patebabai aiho heremiai,

wai abomo ua katobabai aiho maearima herekiai.

32 “Weiakia tiraonaꞌau ainimi haukia mo katoraonaꞌau ainakia hanona ena namo taba wai heremiai?

Aka kiꞌa haukia abomo tiraonaꞌau ainakia haukia ua tiraonaꞌauai aihonakia.

33 Weiakia heremiai tibabai harai haukia herekiai mo tubabai harai hanona ena namo taba?

Aka kiꞌa haukia abomo ua tibabai aiho.

34 Weiakia taba katebamue haukia mo tubenakia hanona ena namo taba wai heremiai?

Aka kiꞌa haukia abomo aka kiꞌa haukia tibenakia weiana ꞌarakia katebamue.

35 ꞌA emi ꞌou haukia katoraonaꞌau ainakia,

mai katobabai harai herekiai,

mai katobaibeni tabakia ꞌarakia ibamuekia aꞌi katoraonanakia.

Weiana ꞌarami apaꞌuana katoaꞌina,

mai wai hanona ꞌubi toha tohana Tirama nahunai katoao,

pokina Ia hanona aꞌi tibanamona haukia mai kiꞌa haukia abokiamo eaokoꞌo ainakia.

36 Aokoꞌo akakia katobabai Hamami ꞌabana,

Ia hanona mai ena aokoꞌo.

37 “ꞌAbami aꞌi katoba bakainakia ba Tirama abomo wai aꞌi mebabakainimi,

ꞌabami aꞌi katobakiꞌanakia ba Tirama abomo wai aꞌi mebakiꞌanimi,

ꞌabami ekia kiꞌa katohina hao ba Tirama abomo wai emi kiꞌa kehina hao.

38 Katobaibeni ꞌabami herekiai ba Tirama abomo kebenimi,

ihobona taba ha kebonu ꞌauna ꞌabana kehao ꞌinina keahu ꞌinina kekiki oioi,

ua kebeni aihonimi.

Pokina tobaibeni ihobonai Tirama abomo wai kebeni muenimi.”

39 Iesu ꞌabi ibabatai neiana ehina benakia etibaha,

“Maha ꞌiau hauna ha kehore maha ꞌiau hauna ha aꞌi kebakaꞌana,

weiana kebabaina raninai terarua ꞌuri aonai katetoa.

40 Marere miorina ha ena baꞌiobi hauna aꞌi ketara haona,

ꞌa marere miorikia ekia marere katebaore haraina hanona baꞌiobi hauna kipokia kateihobo.

41 “Taba buonai matiu nabunabuna weiana ꞌabamu mahana aonai noihana,

ꞌa arakoꞌo rarina oi mahamu aonai hauna aꞌi nuraonana.

42 Oi kipomu mahamu aonai arakoꞌo rarina weiana aꞌi noihana raninai,

aea homanai uahoꞌabamu kohina bena,

‘Uahoꞌabaꞌu e,

mahamu aonai matiu nabunabuna maꞌi ahina.’

Bahaorea haumu e,

mahamu aonai arakoꞌo rarina moaꞌi ahi ꞌuaina,

murinai uahoꞌabamu mahana aonai matiu nabunabuna koiha haraina koaꞌi ahina.”

43 “Weiana matiu namona buabua kiꞌa obona aꞌi kebaramana,

abomo matiu kiꞌa obona buabua namona aꞌi kebaramana.

44 Pokina matiu haha buabuakiai ꞌiobi nirama,

weiana maearima ꞌini boaboai ororo aꞌi ṯebubu obona,

haeamona awa ꞌiniꞌiniai ꞌaruhi aꞌi tiaꞌina.

45 Hau namona ehore aonai taba namokia ebararo ꞌekanai taba namokia nitaraꞌau,

hau kiꞌa obona ehore aonai kiꞌa tabakia ebararo ꞌekanai kiꞌa tabakia nitaraꞌau.

Pokina aonai taba ebonu hauna pinanai nehinana.

46 “Wai taba buonai tuaparinaꞌu,

‘Obiapaka e,

Obiapaka e,’

ia eꞌu ꞌabi aꞌi tuaꞌi taeana.

47 Maearima hereꞌu timai mai eꞌu ꞌabi aiana tiona mai akana tibabaina haukia kabaihanimi ia hanona aea homakia.

48 Ia hanona matoha hau ha itu ebabaina,

ꞌuri ehabi ꞌourana pihara ahanai hoboro ebakorinakia,

tou ekarahi raninai itu etorina ꞌa itu aꞌi ebaibiuna,

pokina itu hanona ebakori harai kiꞌa bahana.

49 Iamo aia eona akana aꞌi ebabaina hauna ihobona matoha hau ha itu ꞌano ahanai ebakorina hoborona ahaꞌi,

tou ekarahi itu etouna,

beronai mo itu epobu,

itu epobu hanona earu otaraina.”