Beraura Robe Obiana.
12
Rani weiana beraura robenai Iesu witi umana aonai ekabanai.
Iꞌabana haukia mareꞌa teꞌari buonai witi buakia teꞌini huri teani.
2 Parisea haukia babai weiana teihana raninai Iesu tehinabena tetibaha,
“Moihana,
oi iꞌabamu haukia hanona beraura robenai taba aꞌi katebabaina hauna tibabaina.”
3 Iesu ekia ꞌabi ebamuena etibaha,
“Wai,
Davida teꞌabana haukia kipokia mareꞌa teꞌari aonai taba ebabaina hauna aꞌi totuabina?
4 Ia Tirama ena ituai etoto,
weia parawa robena eaꞌina,
parawa weiana hanona erobe,
robe haukia ikupaiakia mo kateana hauna,
ia mai teꞌabana haukia kipokia teana.
5 Haeamona robe haukia marea robe aonai beraura robe akana tibabai kiꞌana iamo aꞌi tibeho,
rauhubuna weiana aꞌi totuabina?
6 Au wai nahinabenimi,
hau ha neia hauna ehore marea robe etara haona.
7 ‘Au nanuatae aokoꞌo,
ia aꞌi nanuatae baibeni tabakia.’
Hos 6.6
Puka robenai ꞌabi neiakia anikia patoꞌiobi raninai maearima aꞌi tebeho haukia behoai aꞌi katohorotinakia.
8 Pokina au Maearima nahuna hanona beraura robe obiana.”
Iesu Ehore Ima Kobekobe Hauna Imana Ebanamona.
9 Iesu ꞌeka weiana ehabona eao ekia marea ha aonai etoto,
10 hau ha imana kobekobena abomo weia,
maearima baika taeara tetabu Iesu beho ꞌekanai katehorotina,
ba Iesu tebakaina tetibaha,
“Beraura robenai inawa kahabanamo hanona behona ahaꞌi?”
11 Iesu ehinabenakia etibaha,
“Wai ha emu mamoe beraura robenai ꞌuriai petoa raninai aꞌi poaꞌi ꞌauna, u?
12 Maearima hanona mamoe etara haona.
Ua buonai beraura robenai namo kahababaina hanona ebero.”
13 Ba Iesu hau weiana ehinabena etibaha,
“Imamu motiu berona.”
Weiana imana etiu berona hanona maikoina enamo ihobona imana abihana ꞌabana.
14 ꞌA Parisea haukia tekarahi teao teroba ahu aea katehoma Iesu kateahuꞌarina.
Tirama Etinaꞌana Hauna.
15 Iesu aba eꞌiobina paunai ꞌeka weianai ekapare.
Maearima boꞌona ꞌakina murinai teꞌau,
ekia inawa ikoikiai ebanamonakia,
16 ehara abunakia tai ha haianai aꞌi kateꞌabi ia hanona tai.
17 Neiana hanona Isaia mahabanai hauna ehinana ꞌabina ibatohana.
18 ‘Tomoihana ia hanona
atinaꞌana eꞌu taꞌaraꞌi hauna,
naraonaꞌau aina
mai naonamo aina.
Au eꞌu Auba Robe ia ahanai
kahorotina,
bero keiroroaina hanopaka haukia herekiai.
19 Ia hanona aꞌi kebaihara tae
ꞌao aꞌi keio abomo aiana aiara ibuakiai aꞌi kateona.
20 Ia hiribo aba nimohu hauna
matoha ꞌabeꞌabe haukia ꞌabana
ia aꞌi kebamohu hurina,
abomo baubaea aba niꞌao hauna matoha ekia buabeni eꞌaera ꞌaera haukia ꞌabana ena buabeni aꞌi kebaꞌaona keaomo bero akana kebawaira tinana.
21 Hanopaka maearimakia ikoikiai
ekia buabeni ia atana ahanai
katehorotinakia.’ Isa 42.1-4
Iesu Mai Belesebulo.
22 Hau ha aonai auba kiꞌa obona emiaho hauna temaiaina Iesu herena ia hanona mahana tekiꞌa mai maeana ekiꞌa,
Iesu ehore ebanamona,
weiana ia eꞌabiꞌabi mai eihaiha mue.
23 Maearima ikoikiai tetaꞌu taꞌu huri tetibaha,
“Paꞌe hau neiana hanona Davida Nahuna.”
24 ꞌA Parisea haukia pou neiana teona raninai teꞌabi tetibaha,
“Neiana hanona auba kiꞌa obokia ekia poki Belesebulo ena hiabuai auba kiꞌa obokia naiakia neuꞌu ahinakia.”
25 Iesu ekia raona eꞌiobina buonai ehinabenakia etibaha,
“Hanopaka ha kipona kebapaꞌana kateꞌau hanona keꞌitiꞌiti,
mai aiara ha kipona ꞌao itubu ha kipona kebapaꞌana kateꞌau raninai kekori ꞌini hanona aꞌi ketaina.
26 Ba Satani kehore Satani keuꞌu ahina raninai ia hanona kipona nibapaꞌana,
weiana ena hanopaka hanona aea kekori ꞌini aiho?
27 Au Belesebulo hiabunai auba kiꞌa obokia nauꞌu ahinakia raninai tai ꞌeunai wai emi maearima auba kiꞌa obokia ṯeuꞌu ahi?
Ua buonai emi maearima katehore behoai katehorotinimi.
28 ꞌA au Tirama ena Auba hiabunai auba kiꞌa obokia nauꞌu ahinakia raninai weiana Tirama ena obia aiarana hanona aba emai wai heremiai.
29 Hau ha tabura hauna ena itu aꞌi keahu paꞌana ena taba aꞌi keaꞌi parenakia keaomo ia tabura hauna keaꞌina kebiri ꞌuaina,
ba ena taba kebainao ainakia.
30 Maearima ha taiꞌu aꞌi nitai hauna hanona au niꞌoatanaꞌu,
mai maearima ha au tararua aꞌi ṯabararo bararo hauna hanona nikapo kapo otarai.
31 Weiana buonai au wai nahina benimi,
maearima ekia aka kiꞌa mai ekia ꞌabi kiꞌa ikoikiai hanona kehina hao ketaina,
ia Auba Robe herenai eꞌabi kiꞌa hauna hanona aꞌi kehina hao ꞌapuana.
32 Hau ha keꞌabi kiꞌa Maearima nahuna herenai hanona kehina hao ketaina,
ꞌa hau ha Auba Robe herenai keꞌabi kiꞌa hauna hanona aꞌi kehina hao ꞌapuana bariu mauri neianai mai mauri wairai abomo.
Matiu Hanona Buabuakiai Kahaꞌiobinakia.
33 Matiu namonai hanona buabua namokia katerama,
matiu kiꞌa obonai hanona buabua kiꞌa obokia katerama,
pokina matiu aea homana hanona buabuanai iꞌiobina nirama.
34 ꞌErau nahukia e,
emi raona tekiꞌa aeahomanai mo ꞌabi namokia katohina?
Pokina pina hanona aoai taba ebonu hauna nehinana.
35 Hau namona aonai taba namokia euta haukia namokia nibakarahi,
hau kiꞌa obona aonai taba kiꞌa obokia euta haukia kiꞌa obokia nibakarahi.
36 Au wai nahinabenimi,
maearima ikoinai teꞌabi ꞌabaea haukia ikoikiai Tirama ena bakai berauranai ꞌara katebaibeni toha.
37 Ua buonai emu ꞌabi kehore bero kebeniꞌo abomo emu ꞌabi kehore puma kebeniꞌo.”
Tenuatae Hiabu Hoana Kateihana.
38 Ba Parisea haukia mai rauhubu poki haukia baika Iesu tehinabena tetibaha,
“Baꞌiobi haumu e,
ai ṯanuatae oi heremuai hiabu hoana ha pobabaina pataihana.”
39 Iesu ekia ꞌabi ebamuena etibaha,
“Uru neiana kiꞌa obona mai aꞌikakauma ahaꞌi haumi,
aehoma buonai hiabu hoana tubakai bakai aina?
Ia hoa kabenimi hauna hanona mahabanai hauna Iona mo ena hoa.
40 Iona mararani aihau mai rabi aihau maia apaꞌuana nuana aonai emiaho,
ihobona mo au maearima nahuna abomo mararani aihau mai rabi aihau hano aonai kamiaho.
41 Bakai ranina kemai Nineba maearimakia uru neiana haumi beho ꞌekanai katehorotinimi,
pokina Iona ena iroroai teraona kabe.
Ia bariu Iona etara haona hauna hanona neia.
42 Ahitaina hanopakana obia babiꞌenaa bakai ꞌekanai kemikiri uru neiana haumi beho ꞌekanai kehorotinimi,
pokina ia hanopaka puanai emai Solomon ena aobero ꞌabikia eoꞌo.
Ia bariu Solomon etara haona hauna hanona neia.”
Auba Kiꞌa Obona Emue.
43 “Auba kiꞌa obona hau ha aonai ekarahi raninai eao hano ꞌororonai ekaoao ꞌeka etabu kearai,
ia ꞌeka ha aꞌi etabu ahina,
44 ba kipona eꞌabi etibaha,
‘Au hanona kamue eꞌu itu ahabona hauna kaeao’,
weiana emue eao itu ꞌabaeana etabu ahina aba tetarona mai eꞌoru harai.
45 Ba ekarahi eao ꞌabana baika ꞌabaihau hamomo tekiꞌa kiꞌa baha haukia emaiainakia tetoto weia temiaho.
Hau weiana ꞌuainai ena miaho ekiꞌa,
ia bariu hanona ekiꞌa kiꞌa baha.
Weiana hanona uru kiꞌa obona neiakia haukia herekiai ua kerama aiho.”
Iesu Hinana Mai Uahoꞌabana.
46 Iesu maearima nehinabe ohonakia aonai hinana mai uahoꞌabana tekaraꞌau.
Mahanai tekoroti tenuatae Iesu kipokia kateꞌabiꞌabi.
47 Hau ha ia ehinabena etibaha,
“Hinamu mai uahoꞌabamu hanona mahanai tekoroti,
oi ṯenuatae ainiꞌo katoꞌabiꞌabi.”
48 Iesu ia ena ꞌabi ebamuena etibaha,
“Tai hauna au hinaꞌu,
mai tai haukia au uahoꞌabaꞌu?”
49 Imana etiu iꞌabana haukia eꞌuahinakia etibaha,
“Neiakia haukia hanona au hinaꞌu mai au uahoꞌabaꞌu.
50 Pokina maearima ha au Hamaꞌu kupai nemiaho hauna ena nuatae nibabaina hauna hanona au uahoꞌabaꞌu,
haibuꞌu mai hinaꞌu.”