2 Maearima baika aba weia Iesu teꞌitimana beho ha kebabaina reꞌa kateihana,

hau weiana kebamaurina Beraura Robeai hanona behoai katehorotina.

3 Iesu ima kobekobe hauna ehina bena etibaha,

“Momikiri,

omai ṉaꞌa maearima wairakiai.”

4 Iesu ehore maearima ebakainakia etibaha,

“Eka Rauhubu taba eꞌuahina kahababaina Beraura Robeai?

Namo kahababaina ꞌao kiꞌa kahababaina?

Maearima kahaba maurina ꞌao kahabaꞌarina?”

Weia hanona taba ha aꞌi tehinana,

aꞌi aia aiakia.

5 Iesu mai opuerena eiha ꞌiniꞌininakia,

haeamona eaokoꞌo ainakia,

pokina ekia aopahihi paunai.

Ima kobekobe hauna ehina bena etibaha,

“Imamu motiu pahihina!”

Imana etiu pahihina hanona beronai enamo.

6 Ua buonai Parisea haukia mareai tekarahi,

beronai teao Heroda titaina haukia kipokia tetoꞌu,

Iesu iahuꞌarina taearana terobahu aina.

7 Iesu iꞌabana haukia kipokia tekarahi teao Galilea ꞌObuna hanona mako rarina Galileai murikiai teao.

8 Abomo maearima Iudeai,

Ierusalemai,

Idumeai,

Ioridana ate abirana taetana haukia,

Turo mai Sidono haukia abomo temai,

ena poki hanona Iesu hoa weiakia ebabai poukia teoꞌo paukiai.

9 Mako rarina ꞌakina buonai,

Iesu iꞌabana haukia ehina benakia ahi ha katebaꞌoruna,

maearima taeara aꞌi temekaikai abuna marikina.

10 Iesu maearima boꞌona ꞌakina ebamaurinakia buonai,

inawa haukia taeara tetabu hanona tebaituaina,

Iesu kateaꞌi ꞌapuana ṉa tehoma.

11 Abonamo aokiai auba kiꞌa obokia ṯemiaho haukia Iesu teihana raninai,

temai wairanai teꞌeho teio tetibaha,

“Oi hanona Tirama Nahuna!”

12 ꞌA Iesu hanona auba kiꞌa obokia eharabunakia,

pouna aꞌi katehinana ia hanona tai.

13 Iesu oeoai ekaraꞌau enuatae ainakia haukia eaparinakia,

teao herena.

14 Haukia harauhaea rua eaꞌi taeanakia,

atakia ehinana Iuhubeau haukia,

ia kateꞌabana,

keuhu ahinakia kateiroro,

15 abomo hiabu kebenakia auba kiꞌa obokia kateuꞌu ahinakia.

16 Harauhaea rua haukia neiakia.

Simona (Iesu ata ibaruana ebena Petero),

17 Sebedeo nahuna Iakobo,

hatina Ioane ohi (Iesu ata ebenakia hanona Boanere,

anina hanona ‘Kupa niroꞌu nahuna.’)

18 Anderea,

Pilipo,

Batolomeo,

Mataio,

Toma,

Alepeo nahuna Iakobo,

Tadeo,

Simona Kanana hauna,

19 mai Iuda Kariote hauna Iesu hinahinana ehinahina hauna.

20 Iesu ituai etoto,

maearima haeamona tetoꞌu mue,

iꞌabana haukia kipokia kateaniani hanona aꞌi etaina.

21 Hatiaꞌana pouna teona raninai teao katebakaꞌana,

pokina maearima teꞌabi ia hanona nibeau ꞌari.

22 Rauhubu poki haukia baika Ierusalemai temai haukia teꞌabi tetibaha,

“Auba kiꞌa obokia ekia poki hauna Belesebulo Iesu aonai etoto,

hiabu ebena,

auba kiꞌa obokia neuꞌu ahinakia.”

23 Ua buonai Iesu eaparinakia temai herena ꞌabi ibabataiai ehina benakia etibaha,

“Aea homanai Satani hanona Satani keuꞌu ahina?

24 Hanopaka ha kipona kebapaꞌana ba terarua katehuari raninai,

hanopaka weiana hanona aꞌi kekori ꞌini ꞌapua.

25 Itubu ha abomo kipona kebapaꞌana ba kateꞌau raninai,

itubu weiana abomo aꞌi kekori ꞌini.

26 Satani abomo ena itubu kebapaꞌana ba kipokia katehuarinakia raninai,

ena itubu aꞌi kekori ꞌini,

ia kepua.

27 Hau ha aꞌi kehore tabura hauna ena itu aꞌi ketoto ꞌapua,

ena itu kepukia aꞌi kebainaoai ꞌapua,

keao mo ia kebiri ꞌuaina ba ena itu tabakia kebainao ainakia.

28 ꞌAbi tohana mo au wai nahina benimi,

Tirama hanona maearima ekia kiꞌa ikoikiai abomo ekia ꞌabi kiꞌa obokia ikoikiai kehina haonakia mai taearana.

29 ꞌA hau ha Auba Robe herenai keꞌabi kiꞌa hauna ena kiꞌa aꞌi kehina hao ꞌapuana kemiaho keao mo banai banai.”

30 Iesu ua eꞌabi aiho,

pokina baika tetibaha,

“Ia aonai hanona auba kiꞌa obona nemiaho.”

31 Ba Iesu hinana mai hatina temai atapakai tekoroti,

ꞌabi mo teuhuna eao herena.

32 Toꞌu rarina ꞌakina Iesu temia kaiarona haukia tehina bena tetibaha,

“Oi hinamu mai hatimu hanona atapakai,

ṯenuatae ainiꞌo.”

33 Iesu ekia ꞌabi ebamuena etibaha,

“Tai hanona au hinaꞌu mai hatiꞌu?”

34 Iesu maearima temia kaiarona haukia eihanakia ba ehina benakia etibaha,

“Neiakia hanona au hinaꞌu mai uahoꞌabaꞌu.

35 Tirama ena nuatae akakia tibabai haukia hanona au uahoꞌabaꞌu,

haibuꞌu mai hinaꞌu.”