ꞌAbi Ibabataina Batobato Hauna.
4
Iesu haeamona eao Galilea ꞌobu poenai ebaꞌiobi mue.
Toꞌu rarina ꞌakina teao herena tekori abuna buonai,
Iesu ahi ha ahanai ekaraꞌau emiati.
Ahi papana ekarahi ꞌapua ꞌourai,
toꞌu haukia ikoikiai hanona poeai tekorina.
Mareko 4.1-20
Ena baꞌiobi aonai ṉa eꞌabi aiho.
3 “Tomobahu.
Biraura hauna ha eao ena uho kebatonakia.
4 Ia uho umai ekapo kapo otarainakia aonai,
baika hanona taearai teꞌeho,
ba roborobo temai teani orenakia.
5 Baika hanona bohuai teꞌeho,
teꞌomu noanoa,
pokina ꞌano enibinibi ꞌaki.
6 Ia beraura etae eraranakia hanona tepaea teꞌororo,
pokina ramukia aꞌi teriri harai.
7 Baika hanona awa ꞌiniꞌinikia aokiai teꞌeho.
Teꞌomu,
ia awa ꞌiniꞌinikia tetaꞌa taꞌa abunakia buonai,
aꞌi tebuaꞌa.
8 Haeamona baika hanona hano namonai teꞌeho,
ba teꞌomu harai tebuaꞌa,
baika buakia harau aihau,
baika imabui harau haea,
mai baika hinabu hamomo.”
9 ꞌAbi puanai Iesu ehina benakia etibaha,
“Mai haiana hauna hanona aia keona.”
Iesu ꞌAbi Ibabataiai Eꞌabi Ena Poki.
10 Iesu eikupai aonai,
iꞌabana haukia harau haea rua mai maearima baika murinai tiꞌau haukia kipokia teao herena tebakaina ꞌabi ibabatai anikia kehina harainakia.
11 Iesu ehina benakia etibaha,
“Tirama ena obia aiarana ꞌabikia bunikia hanona wai heremiai tewaira tina harai,
ꞌa kapeai ṯemiaho haukia taba ikoikiai hanona ꞌabi ibabataiai mo nahina benakia.
12 Ua buonai,
‘Ṯeihana ia aꞌi mo ṯeiha tinana,
abomo tibahu aia tiona
ia aꞌi mo ṯeꞌiobina.
Pokina aꞌi temeraona kabe,
Tirama ekia kiꞌa aꞌi mehina
haonakia marikina.’” Isa 6.9, 10
ꞌAbi Ibabataina Anina.
13 Iesu haeamona ebakainakia etibaha,
“ꞌAbi ibabataina ꞌamaꞌamana neiana aꞌi ṯoꞌiobina,
u?
Ba ꞌabi ibabatai baika hanona aea katoꞌiobi aihonakia.
14 Biraura hauna uho weiana ekapo kapo otaraina hanona Tirama ena ꞌabi ekapo kapo otaraina.
15 Uho weiakia taearai teꞌeho hanona maearima baika ꞌabana Tirama ena ꞌabi ꞌuruna tiona,
ia Satani nimai hanona niaꞌi parenakia.
16 Uho weiakia bohuai teꞌeho hanona Tirama ena ꞌabi ꞌuruna tiona mai aonamokia tiaꞌi taea noanoana haukia ꞌabana.
17 ꞌA ramukia aꞌi teriri harai ꞌano aonai buonai,
rani papana mo katemiaho,
ba Tirama ena ꞌabi paunai kateꞌoatanakia ꞌao kateba haiaranakia raninai,
kateꞌeho.
18 Uho weiakia awa ꞌiniꞌinikia aokiai teꞌeho haukia hanona maearima baika ꞌabana Tirama ena ꞌabi uruna tiona.
19 ꞌA hanopaka ena aoaroꞌari mai kepu inuataekia tihore Tirama ena ꞌabi aokiai haukia tiaꞌi parenakia.
Ua buonai buakia hanona ahaꞌi.
20 ꞌA uho weiakia hano namonai teꞌeho hanona maearima Tirama ena ꞌabi ꞌuruna tiona mai aokiai tiaꞌi taeana,
buakia tirama baika hanona harau aihau,
baika imabui harau haea,
baika hinabu hamomo.”
Ramepa Ihao ꞌAuna ꞌEkanai Kehao ꞌAuna.
21 Iesu haeamona ehina benakia etibaha,
“Hau ha ramepa kebaꞌarana raninai,
uro aonai aꞌi keutana ꞌao maua aonai aꞌi keutana.
ꞌA ramepa ihao ꞌauna ꞌekana tohanai kehao ꞌauna.
Mareko 4.21-41
22 Pokina taba tebuni haukia ikoikiai katewaira tina,
abomo tehore buni tabakia ikoikiai hanona katekarahi,
taba ha aꞌi kebuni ꞌapua.
23 Mai haiana hauna hanona aia keona.”
24 Haeamona ehina benakia etibaha,
“Tuoꞌo ꞌabikia hanona tomoraona harainakia.
Emi baibeni ihobokiai mo Tirama kebenimi,
haeamona weiakia ahakiai harua kehore ꞌau.
25 Pokina mai ena taba hauna ahanai kehore ꞌauna kebena,
ꞌa herenai ha ahaꞌi hauna hanona ꞌeunai papana nemiaho hauna abomo keaꞌi obona.”
ꞌAbi Ibabataina Uho Eꞌomu.
26 Iesu eꞌabi etibaha,
“Tirama ena obia aiarana hanona nahomana,
hau ha uho umai ekapo kapo otaraina.
27 Hau weiana rabi eparua mararani emiaho,
ia uho hanona teꞌomu tehubu,
aꞌi eꞌiobina aea teꞌomu aiho.
28 Hano kipona anina ebaramana,
uho ebaꞌomuna,
hubuna etae erewa,
ba murinai buana ebaramana.
29 Buana ekiro iarina beraurana etaina raninai,
biraura hauna ena akiua eaꞌina eao,
earina.”
ꞌAbi Ibabataina Tuaba Uhona.
30 Iesu haeamona eꞌabi mue etibaha,
“Tirama ena obia aiarana hanona tabai kahababataina?
Ori tabanai ꞌabi ibabatai kahabaihobona?
31 Tirama ena obia aiarana hanona matoha tuaba uhona ꞌabana,
uho ikoikiai baiatakiai hanona ia mo papana ꞌaki,
ba ꞌanoai ebatona,
32 muriai ia eꞌomu raninai,
aniani matiukia ikoikiai eberenakia,
abomo eapaꞌua kiꞌa.
Ia rena rarikia tekarahi,
ꞌubi roborobokia ikoikiai temai ꞌarunai tiarai.”
33 Iesu hanona maearima weiakia ekia ꞌiobi ihobonai ꞌabi ibabatai boꞌokia ebaꞌiobinakia.
34 ꞌA ia ꞌabi ibabatai ai mo ehina benakia,
iꞌabana haukia kipokia teikupai hanona ꞌabi anikia ebaꞌiobi harainakia.
Iesu Baura Mai Roio Ebaꞌomatanakia.
35 Beraura weiana mahabu mahabunai Iesu iꞌabana haukia ehina benakia etibaha,
“Hamakabanai hamaeao ꞌobu abirana.”
36 Iꞌabana haukia toꞌu tehabona teao,
ahi weiana Iesu emiaꞌau aina haunai teheꞌau kipokia teao.
Ahi baika abomo murikiai teao.
37 Baura rarina ꞌakina eabu ꞌau,
roio emikiri bei ahi aonai etoto,
hereka ꞌakinai pateuhu.
38 Iesu hanona ena iuna eunana ahi murinai enoti eparua.
Iꞌabana haukia teao herena,
tebaona tetibaha,
“Baꞌiobi haumu e,
aika kahatono hauna aꞌi nuraonana?”
39 Iesu emikiri baura erikena haeamona roio ehina bena etibaha,
“Tomoꞌoro!”
Baura eꞌoro,
roio abomo eꞌomata.
40 Weiana Iesu iꞌabana haukia ebatanakia etibaha,
“Aehoma ṉa tutaꞌu aiho?
Emi aꞌikakauma niahaꞌi oho mo?”
41 ꞌA ia ikoikiai tetaꞌu kiꞌa,
tebaihamai aina,
tetibaha,
“Ṉahuna tai?
Baura mai roio abomo aiana tiona!”