ꞌAbi Ibabatai Hau Ha Uho Ebatonakia.
13
Beraura hamona weianai Iesu ituai ekarahi eao ꞌobu poenai emiati.
2 Herenai toꞌu eapaꞌua kiꞌa baha buonai emikiri ahi hai eheꞌau emiati,
maearima ikoikiai hanona poeai tekoroti.
3 Ba ia ehore taba boꞌona ꞌabi ibabataiai ehinanakia etibaha,
“Biraura hauna ha ekarahi eao ena umai uho kebatonakia.
4 Ena uho ekapo kapo otarainakia aonai,
baika hanona taearai teꞌeho,
weiana roborobo temai teani orenakia.
5 Baika bohuai teꞌeho,
teꞌomu noanoa pokina hano enibinibi.
6 Ba beraura ekaraꞌau raninai hubukia tepaea abomo teꞌororo pokina ramukia ahaꞌi.
7 Uho baika ꞌini boaboa aokiai teꞌeho,
ia ꞌini boaboa teꞌomu tetara tara abunakia.
8 ꞌA uho baika hano namonai teꞌeho.
Weiana buakia terama baika hanona hinabu hamomo,
baika imabui harauhaea,
mai baika harau aihau.
9 Mai haiana hauna aia keona.”
ꞌAbi Ibabatai Pokina.
10 Ba iꞌabana haukia temai Iesu herena tebakaina tetibaha,
“Taba buonai maearima ꞌabi ibabataiai ṉohina benakia?”
11 Iesu ekia ꞌabi ebamuena etibaha,
“Tirama ena obia aiarana aotipana bunikia hanona aba heremiai tewaira tina,
ꞌa ia herekiai hanona ahaꞌi.
12 Pokina maearima ha mai ꞌeuna hauna boꞌona katebena,
weiana ia ꞌeuna hanona keboꞌo harai.
Maearima ha ꞌeunai ahaꞌi hauna herenai papana nemiaho hauna abomo kateaꞌi boina.
13 ꞌAbi ibabataiai nahina benakia ena poki hanona neiana,
kateihana mo ia aꞌi kateiha tinana,
katebahu mo ia aia aꞌi kateona mai obona aꞌi kateobo.
14 Ua buonai ꞌeka neianai Isaia ena mahabanai ꞌabina hanona emai etohana,
‘Wai aia katobahu ai ꞌarimo
ia obona aꞌi katobo,
wai katoiha toꞌo baihana mo
ia aꞌi katoiha tinana.
15 Weiana hanona maearima neiakia
aokia tewapura,
haiakia teꞌou abunakia
mai mahakia tekaiabunakia,
pokina mahakiai aꞌi temeihaiha,
haiakiai aia aꞌi temeoꞌo,
aokiai obo aꞌi temeobo,
aꞌi temeraona kabe hereꞌuai,
aꞌi mabamaurinakia paunai.’ Isa 6.9, 10
16 “Wai hanona Tirama nibanamonimi,
pokina mahamiai ṯoiha mai haiamiai aia tuoꞌo.
17 ꞌAbi tohana au nahina benimi,
mahabanai haukia mai bero haukia boꞌokia tenuatae kiꞌa baha taba ṯoiha haukia pateiha,
ia aꞌi teiha,
mai taba wai tuoꞌo haukia pateoꞌo,
ia aꞌi teoꞌo.”
ꞌAbi Ibabatai Anina.
18 “Ba tomobahu ꞌabi ibabataiai batobato anina hanona taba.
19 Hau ha Tirama ena obia aiarana ꞌabina pouna niona ꞌa obona aꞌi niobo aonai tiaporo nimai taba aonai tebatona hauna niaꞌi parena.
Neiana hanona uho weiakia taearai teꞌeho ꞌabakia.
20 Uho bohu ahanai eꞌeho hanona hau ha Tirama ena ꞌabi aiana niona mai aonamona niaꞌi taea noanoana.
21 Ia ramuna aꞌi teriri harai buonai aꞌi nemiaho homaꞌana.
Tirama ena ꞌabi weiana paunai atetua ꞌao baiꞌoata timai raninai beronai mo niꞌeho.
22 Ba uho ꞌini boaboa baiatakiai eꞌeho hanona hau ha Tirama ena ꞌabi aiana niona ꞌa hanopaka aoanina mai kepu raonaraonakia tihore ꞌabi weiana titaꞌa taꞌa abuna ba aꞌi nebuaꞌa.
23 ꞌA uho hano namonai eꞌeho hanona hau ha Tirama ena ꞌabi aiana niona mai obona niobo.
Ia hanona nebuaꞌa buabuana hinabu hamomo nibarama,
baika imabui harauhaea,
mai baika harau aihau.”
ꞌAbi Ibabatai Witi Mai Awa.
24 Iesu ꞌabi ibabatai ha herekiai ehinana.
“Tirama ena obia aiarana hanona matoha hau ha uho namokia ena umai ebatonakia.
25 ꞌA maearima ikoikiai teparua rea aonai,
ena ꞌou hauna emai witi baiatakiai awa ebatonakia ba ekaꞌa.
26 Witi teꞌomu buakia tekapo ahi raninai,
awa abomo tekere.
27 Poki hauna ena taꞌaraꞌi haukia temai herena teꞌabi tetibaha,
‘Poki haumu e,
oi emu umai uho namokia obatonakia,
ia awa hanona aeꞌeai temai?’
28 Ia ekia ꞌabi ebamuena etibaha,
‘ꞌOu hauna ha naiana ebabaina.’
Ena taꞌaraꞌi haukia tetibaha,
‘Nonuatae kataeao awa katapuhu ꞌaunakia?’
29 Ia eꞌabi etibaha,
‘Ahaꞌi,
pokina awa katopuhu ꞌaunakia raninai witi abomo awa kipokia aꞌi tomopuhu ꞌaunakia marikina.
30 Tomohabonakia terarua temeꞌomu haeamo keaomo witi iarikia ranina.
Rani weianai hanona iarina haukia kahina benakia,
“Awa tomobararo ꞌuainakia katotoba ꞌininakia kateꞌara,
ba witi kato bararonakia katomaiainakia eꞌu paraboa aonai.” ’”
ꞌAbi Ibabatai Tuaba Uhona.
31 Iesu ꞌabi ibabatai ha herekiai ehinana.
“Tirama ena obia aiarana hanona matoha tuaba uhona ꞌabana.
Weiana hau ha eaꞌina ena umai ebatona.
32 Uho ikoikiai baiatakiai ia hanona eꞌaera ꞌaera ꞌaki,
iamo eomu raninai ia hanona eapaꞌua ba umai batobato tabakia ikoikiai eberenakia,
matiu hai eao ubi roborobokia timai weia kakanai tiarai.”
ꞌAbi Ibabatai Bakupu Muramurana.
33 Iesu ꞌabi ibabatai ha haeamona ehinana.
“Tirama ena obia aiarana hanona matoha bakupu muramurana ꞌabana.
Babiꞌe ha bakupu mura murana eaꞌina pani rarina aonai parawa boꞌona kipokia eu banai eu banaina eaomo parawa maikoina ekupu.”
ꞌAbi Ibabatai Ekia Aka.
34 Iesu ꞌabi neiakia ikoikiai toꞌu haukia ehinabenakia hanona ꞌabi beronai aꞌi ehina benakia,
ia ꞌabi ibabataiai mo ehinabenakia.
35 Neiana hanona mahabanai hauna ehinana hauna nibatohana.
“Kaꞌabi benakia raninai ꞌabi
ibabataiai kahina benakia,
hanopaka erama raninai emai mo
bariu taba bunikia haukia
au kahore kahina pounakia.” Sal 78.2
Witi Mai Awa ꞌAbi Ibabataina Anina.
36 Ba mako ehabonakia eao itu aonai etoto,
iꞌabana haukia temai herena teꞌabi tetibaha,
“ꞌAbi ibabatai neiana awa uma aonai hauna heremaiai mohina hina haraina.”
37 Iesu eꞌabi etibaha,
“Weiana uho namona ebatona hauna hanona au maearima nahuna.
38 Uma hanona hanopaka,
uho namokia hanona Tirama ena obia aiarana maearimakia,
awa hanona hau kiꞌa obona ena maearima.
39 ꞌOu hauna weiana awa ebatonakia hauna hanona tiaporo.
Iarina ranina hanona hanopaka puana,
ariari haukia hanona aneru.
40 Awa ipuhu ꞌau ibararo irubai kateꞌara ihobona hanona hanopaka puanai kerama.
41 Au maearima nahuna eꞌu aneru kauhu ahinakia eꞌu aiara aonai beho tibaramana haukia mai aka kiꞌa tibabai haukia ikoinai katebararonakia.
42 Ia katehore iruba aꞌi niꞌao ꞌapua ꞌekana aonai katekapo totonakia,
weia katehai mai ꞌakiꞌakikia katearaoꞌi araoꞌi.
43 Ba bero haukia hanona Hamakia ena obia aiarana aonai katea matoha beraura ꞌabana.
Mai haiana hauna aia keona.
Tirama Ena Obia Aiarana ꞌAbina Ibabataikia Aihau.
44 “Tirama ena obia aiarana hanona matoha kepu namona uma aonai ihore buni ꞌabana.
Hau ha etabu ahina raninai ehore buni muena,
mai aonamona eao ena taba maikoinai ekawa kawa ainakia moninai hano weiana mai umana ekawana.
45 Haeamona Tirama ena obia aiarana hanona matoha kawakawa hauna ha hoea raia namona nitabuna ꞌabana.
46 Ba hoea raia namona ꞌakina ha etabu ahina raninai,
ia eao ena taba maikoinai ekawa kawa ainakia moninai hoea raia weiana ekawana.
47 Abomo Tirama ena obia aiarana hanona matoha reꞌe ꞌobuai tehorena weiana maia haeai haeai terewa ꞌabana.
48 Baꞌeha haukia reꞌe ebonu raninai teberi ꞌauna poeai,
ba temiati maia namokia pohea aonai teutanakia,
ꞌa kiꞌa obokia hanona teneꞌenakia.
49 Hanopaka ena puai hanona ua kerama aiho.
Aneru katemai bero haukia mai kiꞌa haukia katebinaꞌanakia.
50 Kiꞌa haukia hanona iruba aꞌi niꞌao ꞌapua ꞌekana aonai katekapo totonakia,
weia katehai mai ꞌakiꞌakikia katearaoꞌi araoꞌi.”
Kepu Mahamahakia Mai ꞌAiꞌaikia.
51 Ba Iesu ebakainakia etibaha,
“ꞌAbi neiakia ikoikiai obokia aba tuobo?”
Ena ꞌabi tebamuena tetibaha,
“ꞌE,
obokia aba ṯaobo.”
52 Ia ehina benakia etibaha,
“Weiana paunai rauhubu poki haukia weiakia Tirama ena obia aiarana pouna aba teꞌiobina haukia ha ha hanona matoha itu poki hauna ꞌabana,
ena roꞌaroꞌa ikaihurinai kepu mahamahakia mai ꞌaiꞌaikia niaꞌi ahinakia.”
Iesu Ena Aiara Haukia Tebakiꞌana.
53 Iesu ꞌabi ibabatai neiakia ehinanakia murinai ꞌeka weiana ehabona,
54 emai ena aiarai marea aonai maearima ebaꞌiobinakia hanona tetaꞌu taꞌu huri.
Tebakai bakai tetibaha,
“Hau neiana aobero mai hiabu akakia neiakia aeꞌeai eaꞌinakia?
55 Ia hanona kamuta hauna nahuna tohana,
ia hinana atana Maria,
uahoꞌabana hanona Iakobo,
Iosepa,
Simona mai Iuda.
56 Haibuna ikoikiai hanona neia kipokia nahamiaho.
Ba hau neiana taba neiakia ikoikiai aeꞌeai eaꞌinakia?”
57 Weiana ia tehore Iesu tebakiꞌana.
ꞌA Iesu ia ehina benakia etibaha,
“Mahabanai hauna hanona katemariki aina,
ia ena aiarai mai ena itu haukia hanona aꞌi katemariki aina.”
58 Weiana ekia aꞌikakauma ahaꞌi paunai hiabu hoakia boꞌokia weia aꞌi ebabai.