Iesu Nasaretai Tebakiꞌana.
6
Iesu ꞌeka weiana ehabona,
iꞌabana haukia kipokia teao ia ena aiara tohana.
Mareko 6.1-29
2 Beraura robeai ia ena baꞌiobi eaꞌi ramana.
Mareai aiana teona haukia ikoikiai tetaꞌu taꞌu huri,
tetibaha,
“Aotipa neiana tai ebena?
Hiabu aeꞌeai emai hoa neiakia nibabai.”
3 Ia tebakiꞌana,
teꞌabi tetibaha,
“Ia hanona kamuta hauna,
Maria nahuna,
Iakobo,
Iosepa,
Iuda mai Simona aꞌakia,
haibuna baiatakai ṯemiaho.”
4 Iesu ehina benakia etibaha,
“Mahabanai hauna hanona ꞌeka ikoikiai aokiai kateaꞌi taeana,
ꞌa ena aiara tohanai mai hatiaꞌana tohakia hanona aꞌi kateaꞌi taeana.”
5 Weia hanona hoa boꞌokia aꞌi ebabainakia,
ia inawa haukia bita ꞌaki mo ahakiai ehao ꞌau,
ebamaurinakia.
6 Etaꞌu taꞌu huri pokina ekia aꞌikakauma ahaꞌi buonai.
Ia eao aiara haeai baika aokiai ebaꞌiobi.
Iesu Iꞌabana Haukia Harau Haea Rua Euhu Ahinakia.
7 Haeamona Iesu iꞌabana haukia harau haea rua eaparinakia temai herena,
hiabu ebenakia,
rua rua euhunakia auba kiꞌa obokia kateuꞌu parenakia.
8 Erobenakia eꞌabi etibaha,
“Emi kaoao aokiai taba ha aꞌi katoaꞌinakia,
ikaiꞌini mo hamona katoaꞌina.
Mahoa,
aniani abomo moni ha aꞌi katoaꞌina.
9 Emi tamaka katoabaꞌau,
ibatoto ibaruakia aꞌi katoaꞌinakia.
10 Katokaraꞌau ituna weianai mo katomiaho keao mo aiara weiana katohabona.
11 Aꞌi kateaꞌi taeanimi ꞌao aiami aꞌi kateona raninai katohabonakia,
aemi apurorokia katotabu tabu obonakia ekia behoai keao ekia kiꞌa ibatohana.”
12 Weiana iꞌabana haukia teao,
teiroro maearima katebaraona kabenakia,
13 abomo auba kiꞌa obokia boꞌokia teuꞌu uꞌu ahinakia,
inawa haukia boꞌokia tehoro ai tetaronakia tebamaurinakia.
Baꞌuere Robe Hauna Ioane Ena ꞌAri.
14 Heroda obia hauna pou weiana eona,
pokina Iesu atana aba tehina otaraina.
Baika teꞌabi tetibaha,
“Baꞌuere robe hauna Ioane ꞌari ai aba emikiri mue ba hiabu akakia neiakia nibabainakia.”
15 Haeamona baika teꞌabi tetibaha,
“Neiana hanona Elia.”
Baika tetibaha,
“Neiana hanona mahabanai hauna ha,
mahabanai ꞌuaikia ꞌabakia.”
16 ꞌA Heroda uru weiana eona raninai,
eꞌabi etibaha,
“Ioane,
ꞌakona akabe hurina hauna ꞌari ai aba emikiri mue.”
17 ꞌUainai Ioane aꞌi eꞌari baha aonai,
Heroda hanona aba ebaiuhu,
Ioane teaꞌina tebirina wapura itunai tekaiabuna,
weiana ebabaina hanona Herodia paunai.
Heroda ehore hatina Pilipo atawana Herodia eatawana.
18 Ba Ioane ehore Heroda ehina bena etibaha,
“Oi ohore hatimu atawana oatawa boina hanona obeho.”
19 Weiana Herodia hanona Baꞌuere robe hauna Ioane eopuere aina,
iahu ꞌarina taearana etabuna,
ꞌa ena taeara ahaꞌi.
20 Pokina Heroda hanona Ioane etaꞌu aina,
eꞌiobina ia hanona aka bero abomo robe hauna,
ua buonai ia ehore eꞌima haraina.
Rani boꞌokia Heroda Ioane ena ꞌabi ꞌurukia eoꞌo,
aona earo ꞌari,
ia enuatae aiana keona.
21 Heroda ena rama ranina ekaraꞌau buonai tatu apaꞌuana ha tebabaina,
aiara obiakia,
huari poki haukia,
abomo Galilea maearimakia apaꞌuakia tebeaunakia temai.
22 Herodia nahuna uahona emai toꞌu haukia wairakiai ewa.
Heroda mai ena baki haukia ikoikiai aokia enamo,
ba Heroda ehore uaho weiana ehina bena etibaha,
“Nonuatae aina tabana koꞌuahina hanona kabeniꞌo.”
23 Herenai eꞌabiꞌuai tabura etibaha,
“Taba konuatae aina hanona kabeniꞌo,
eꞌu hanopaka abirana konoi aina reꞌa abomo kabeniꞌo.”
24 Weiana uaho ekarahi eao hinana ebakaina etibaha,
“Au taba kanoiaina?”
Hinana eꞌabi etibaha,
“Baꞌuere robe hauna Ioane ꞌarana konoiaina.”
25 Uaho haeamona emue ebeau toto eao Heroda obia ꞌarana hauna ehina bena etibaha,
“Bariu bariu mo Baꞌuere robe hauna Ioane ꞌarana tihu ai koutana,
kobenaꞌu.”
26 Heroda obia ꞌarana hauna aona earoꞌari,
ia aba eꞌabiꞌuai uaho taba kenuatae aina hauna kebaibeni mo,
abomo ena baki baki haukia weia teaniani haeamo haukia ena ꞌabiꞌuai ꞌuruna teona buonai keubo hanona taearana ahaꞌi.
27 Ua buonai Heroda obia ꞌarana hauna huari hauna ha euhuna keao Baꞌuere robe hauna Ioane ꞌarana kemaiaina.
Huari hauna weiana eao wapura itunai Baꞌuere robe hauna Ioane ꞌakona ekabe hurina.
28 ꞌArana tihu ai eutana eaoaina uaho ebena,
uaho ehore eaoaina hinana ebena.
29 Baꞌuere robe hauna Ioane iꞌabana haukia pouna teona raninai teao hauanina teaꞌina teaoaina ꞌariahanai tehorena.
Iesu Taha Ima (5,000) Ebanianinakia.
30 Iesu ena iuhubeau haukia temue teao herenai tetoꞌu mue,
tebabai tabakia mai tebaꞌiobi ꞌabikia ikoikiai haianai tehinanakia.
Mareko 6.30-56
31 Mako rarina tiao timai buonai iꞌabana haukia ekia aniani ꞌekana ahaꞌi,
ia emikiri ehina benakia etibaha,
“ꞌEka ꞌabaeana ha hamaeao,
uaꞌa katoarai.”
32 Ua buonai ahiai tehe ꞌau,
tebeau banai ꞌeka ꞌabaeana ha teao.
33 Ekia beau ahi ai maearima boꞌona tehore teihanakia,
teꞌiobinakia,
aiara maearimakia ikoikiai tebeau raina teꞌuai teao ꞌeka weianai tekarahi.
34 Tebahaha ꞌau aonai Iesu mako ranina eihana hanona eaokoꞌo ainakia matoha mamoe iꞌimakia hauna ahaꞌi ꞌabana.
Ua buonai mauri ꞌabikia ebaꞌiobinakia.
35 Rabirabi beraura aba kekaihuna ba iꞌabana haukia teao herena,
tehina bena tetibaha,
“Neiana hanona hanoꞌakuna abomo beraura aba kerabi.
36 Ua buonai maearima neiakia pouhunakia pateao umai abomo aiarai weia ekia aniani patekawa pateani.”
37 Iesu ehina benakia etibaha,
“Wai kipomi aniani ha tomobenakia,
temeani.”
ꞌA iꞌabana haukia ia tehina bena tetibaha,
“Ai katahore 200 kina anianina katakawana,
katabenakia,
ꞌu?”
38 Iesu ebakainakia etibaha,
“Aniani bita heremiai?
Tomoao,
tomoihana.”
Teao teiha harai temue temai,
tehina bena tetibaha,
“Parawa ikine ima mai maia rua.”
39 Iesu iꞌabana haukia ehina benakia,
maearima katewatenakia toꞌutoꞌukia ha ha tubu ahakiai katemiati.
40 Ua buonai maearima ikoikiai hinabu ha ha mai imbui ha ha tebamiatinakia.
41 Ba ia ehore parawa ima abomo maia rua eaꞌinakia eaꞌa taea kupa eihana aniani ebanamonakia.
Parawa ehobinakia iꞌabana haukia ebenakia tewatenakia mako ikoikiai tebenakia.
Maia rua abomo ua tewate aihonakia.
42 Teaniani ikoikiai teani ꞌari.
43 Parawa mai maia harikia tebararonakia,
areha ikoinai harau haea rua tebonu.
44 Teaniani haukia baiatakiai hau ꞌabaeana hanona taha ima (5,000).
Iesu Bei Kapenai Ekaꞌa.
45 Iesu beronai iꞌabana haukia euhunakia ahi ai kateheꞌau kateꞌuai kateao Betesaida abirana.
ꞌA ia hanona toꞌu haukia euhunakia.
46 Maearima tekaꞌa murikiai ia ekaraꞌau eao oeo ai kebahubaꞌari.
47 Beraura emahabu mahabu raninai ahi obu ibuanai,
ꞌa ia ikupaiana hanona ꞌanoai.
48 Ia eihanakia tipara tiaroꞌari pokina rani wairakiai emai buonai.
Kokoroꞌu ekia ꞌarara hoanai Iesu ꞌaku kapenai ekaꞌa eao herekia matoha ahi pekahaona moioina.
49 Ia teihana ꞌaku kapenai ekaꞌa eao teraonana biriua reꞌa tetaꞌu teio.
50 Ikoikiai teihana nuakia etae.
Ia beronai ehina benakia etibaha,
“Aꞌi tomotaꞌu,
tomonua koꞌo.
Ṉa Au.”
51 Ahiai eheꞌau ba rani eꞌoko hanona tetaꞌutaꞌu huri.
52 Pokina Iesu maearima parawa ebenakia teani,
iꞌabana haukia hoa weiana obona aꞌi teobo,
aokia tetubu abuna.
Iesu Genesaretai Inawa Haukia Ebanamonakia.
53 Iesu iꞌabana haukia kipokia ahiai tebeau banai Genesareta poenai toꞌo teneꞌena.
54 Ahiai teriri hanona maearima beronai Iesu teꞌiobina.
55 Teka otaraina hano weiana aonai ekia inawa haukia totoꞌeai tebuanakia teao Iesu pouna teona nemiaho ꞌekakia.
56 Iesu eao ꞌekakia ikoikiai aiara papakia mai aiara apaꞌuakia.
Maearima inawa haukia tebuanakia teaoainakia kawakawa ꞌekakiai tehorotinakia,
tenoina ena habuni korina mo pateaꞌi ꞌapuana.
Ena habuni teaꞌi ꞌapuana haukia ikoikiai hanona temauri.