Iesu Taha Ima (5,000) Ebanianinakia.
6
Rani baika teao murinai Iesu ekabanai eao Galilea ꞌobu abiranai.
(Weiana atana haeai hanona Tiberia ꞌobuna.)
2 Iesu inawa haukia ebanamonakia,
bataꞌutaꞌu huri hoakia weiakia teiha paunai mako rarina ia murinai teraꞌa teao.
Jesus feeds a multitude (Ioane 6:1-15)
3 Ba Iesu oeoai ekaraꞌau eao iꞌabana haukia kipokia temiati.
4 Iuda haukia ekia Kabanai tatuna hanona aba ekaibari.
5 Iesu mahana eao mako rarina timai herena eihanakia raninai,
Pilipo ebakaina etibaha,
“Aniani aeꞌeai kaha kawanakia maearima neiakia kateani?”
6 Ia kebabaina hauna aba eraonana,
iamo Pilipo kehobona paunai ua ebakai bakai aiho.
7 Pilipo ia ena ꞌabi ebamuena etibaha,
“Moni boꞌona ꞌakinaia aniani pahakawanakia abomo aꞌi petaina,
papakia ꞌakimo pateani.”
8 Iꞌabana haukia ha atana Anderea,
Simona Petero hatina etae etibaha,
9 “Miori papana ha neia ena parawa papakia ima mai ena maia papakia rua.
Ia weiana hanona aeamo kaha homanakia pokina maearima hanona eboꞌo kiꞌa baha?”
10 Iesu iꞌabana haukia ehina benakia etibaha,
“Maearima tomoba miatinakia.”
ꞌEka weiana hanona panapana ꞌekana,
maearima ikoikiai temiati hau ꞌabaeana ikoinai taha ima (5,000).
11 Iesu parawa eaꞌinakia Tirama ebanamona ba ebenakia weiakia temiati haukia teani eaomo ekia nuatae etaina,
ba maia abomo ihobonai ebabaina.
12 Weiana ikoikiai teani ꞌari aonai Iesu iꞌabana haukia ehina benakia etibaha,
“Harikia ikoikiai katobararonakia ha papana aꞌi katohabona.”
13 Ua buonai parawa ima teani ꞌari harikia weiakia tebararonakia areha harau haea rua tebabonunakia.
14 Iesu bataꞌutaꞌu huri hoana weiana ebabaina teihana murinai maearima teꞌabi tetibaha,
“ꞌAbi tohana,
mahabanai hauna kemai hanopakai hauna hanona neiana.”
15 Iesu eꞌiobina ia ekia taburai kateaꞌi taeana ekia obia ꞌarana haunai katebaona,
ua buonai ia kipona haeamona ekaobo oeoai ekaraꞌau.
Iesu Bei Ahanai Ekaꞌa.
16 Erabirabi raninai iꞌabana haukia teriri teao weia obuai,
Jesus walks on the water (Ioane 6:16-22)
17 ahiai teheꞌau tebeau banai Kaperanauma tiao hanona aba ewapura abuna,
Iesu hanona ia baiatakiai ahaꞌi.
18 Baura apaꞌuana eabuꞌau roio ebuataea ehurehure kiꞌa.
19 Ia tepara homaꞌana matoha maela aihau ꞌao bani ꞌabana aonai Iesu bei kapenai ekaꞌa herekia eao,
teihana raninai tetaꞌu kiꞌa.
20 Iesu ehina benakia etibaha,
“Ṉahuna au.
Aꞌi tomotaꞌu.”
21 Ia aokia mai namokia ahiai tebaeheꞌauna,
beronai mo ṯenuatae aina poenai tebahahaꞌau.
Maearima Iesu Tetabuna.
22 Erani mako weia ꞌobu abiranai ṯemiaho haukia teꞌiobina ahi hamona mo uaꞌa Iesu hanona iꞌabana haukia baiatakiai aꞌi eheꞌau iꞌabana haukia ikupaiakia mo tebeau ahi tekaꞌa.
The Bread of Life (Ioane 6:22-71)
23 Ba ahi baika Tiberia ai temai Obiapaka parawa ebanamona ebaibeni maearima ebenakia teani ꞌekana herenai tebahoa.
24 Weiana mako teꞌiobina Iesu mai iꞌabana haukia kipokia wairakia ahaꞌi,
ba ahi weiakiai teheꞌau Kaperanauma Iesu itabuna teao.
Iesu Hanona Mauri Parawana.
25 Ia ꞌobu abiranai uaꞌa Iesu tetabu ahina raninai tebakaina tetibaha,
“Baꞌiobi haumu e,
oi hanona aita mo okabanai omai neia?”
26 Iesu ekia ꞌabi ebamuena etibaha,
“ꞌAbi tohana au wai nahina benimi,
wai au tutabunaꞌu hanona bataꞌutaꞌu huri hoana toihanakia paunai ahaꞌi ia parawa toani nuami tebonu paunai.
27 Aniani weiana kekiꞌa hauna akanai aꞌi katoaroꞌari ia aniani weiana kemiaho keao mauri banaibanai akanai katoaroꞌari,
weiana au Maearima Nahuna kabenimi.
Hamaka Tirama hanona hiabu weiana ebenaꞌu.”
28 Ba ia tebakaina tetibaha,
“Ai Tirama ena aka tabana katababaina?”
29 Iesu ekia ꞌabi ebamuena etibaha,
“Tirama ena aka hanona neiana.
Euhuna hauna hamona mo kato aꞌikakaumana.”
30 Ua buonai ia tebakaina tetibaha,
“Bataꞌutaꞌu huri hoana tabana kobabaina kataihana ba kata aꞌikakaumaniꞌo?
Tabana hauna kobabaina?
31 Aika ꞌabaꞌabaka hanoꞌakunai mana teana,
Puka robenai tererena ihobona,
‘Kupai emai parawana hauna Mose ebenakia teana.’”
32 Iesu ehina benakia etibaha,
“ꞌAbi tohana au wai nahina benimi,
kupa parawana ebenimi hauna Mose ahaꞌi,
ia au Hamaꞌu ehore kupa parawana tohana wai ebenimi.
33 Tirama ena parawa hanona neiana,
ia kupai eriri emai hauna hanopakai mauri nibaibeni.”
34 Ia tehina bena tetibaha,
“Obiapaka e,
aniani neiana hanona rani ikoinai kobenamai.”
35 Ba Iesu ia ehina benakia etibaha,
“Au hanona mauri anianina,
hereꞌu kemai hauna hanona mareꞌa aꞌi keꞌari ꞌapua,
abomo keaꞌikakaumanaꞌu hauna hanona ꞌakona aꞌi keꞌororo ꞌapua.
36 Ia au aba ahina benimi,
wai aba toihanaꞌu iamo aꞌi tuaꞌikakaumanaꞌu.
37 Hamaꞌu nibenaꞌu haukia ikoikiai hanona katemai hereꞌu,
ba nimai hereꞌu hauna hanona aꞌi kauꞌu ahi ꞌapuana.
38 Pokina au kupai ariri amai hanona kipoꞌu eꞌu nuataeai aꞌi kababaina,
ia euhunaꞌu hauna ena nuataeai akana kababaina.
39 Ba euhunaꞌu Tiramana ena nuatae hanona neiana,
weiakia ebenaꞌu haukia ikoikiai ha aꞌi kabaꞌakaumana,
ia rani orenai kabamikiri muenakia.
40 ꞌAbi tohana au Hamaꞌu ena nuatae hanona neiana,
Nahuna kateihana mai kate aꞌikakaumana haukia ikoikiai hanona mauri banaibanai kateaꞌina,
ba rani orenai hanona kabamikiri muenakia.”
41 ꞌAbi neiana paunai Iuda haukia ia teururu aina,
pokina ia eꞌabi,
“Au hanona mauri anianina kupai ariri amai.”
42 Ba ia teꞌabi tetibaha,
“Iesu neiana hanona Iosepa nahuna,
hamana mai hinana nahaꞌiobinakia.
Ia bariu aehoma buonai ṉa niꞌabi aiho,
‘Au kupai ariri amai.’?”
43 Iesu ekia ꞌabi ebamuena etibaha,
“Kipomi baiatamiai ururu naiana tomobapuana.
44 Hau ha ena nuataeai hereꞌu aꞌi kemai ꞌabaea ia Hamaꞌu euhunaꞌu hauna kebakaꞌanakia haukia katemai hereꞌu,
ba au rani orenai kabamikiri muenakia.
45 Mahabanai haukia Puka robenai aba tererena,
‘Ikoikiai hanona Tirama aba kebaꞌiobinakia.’
Hamaꞌu tibahuaina abomo herenai ꞌiobi tiaꞌina haukia ikoikia timai hereꞌu.
46 Hau ha Hamaka aꞌi eiha ꞌapuana,
ia Tirama herenai emai hauna ikupaiana mo Hamaka eihana.
47 ꞌAbi tohana au wai nahina benimi.
Tiaꞌikakaumanaꞌu haukia hanona mauri banaibanai teaꞌina.
48 Mauri anianina hanona Au neiaꞌu.
49 Wai ꞌabaꞌabami hanoꞌakunai mana teana,
iamo ikoikiai teꞌari.
50 Ia hau ha aniani neiana kupai eriri emai hauna keana hanona aꞌi keꞌari.
51 Au hanona aniani maurina weiana,
kupai ariri amai.
Hau ha aniani neiana keana hanona kemauri banaibanai.
Aniani neiana au kabaibeni hauna hanona au bitioꞌu,
weianai hanopaka haukia mauri kateaꞌina.”
52 Weiana Iuda haukia kipokia baiatakiai tebaihara tae teꞌabi tetibaha,
“Hau neiana bitiona aea kebeni aihonaka kahana?”
53 Iesu ehina benakia etibaha,
“ꞌAbi tohana au wai nahina benimi.
Wai au Maearima Nahuna bitioꞌu aꞌi katoana mai aruaruꞌu aꞌi katoinu raninai wai aomiai mauri aꞌi kemiaho.
54 Au bitioꞌu niana mai aruaruꞌu neinu hauna hanona mauri banaibanai aba niaꞌina abomo rani orenai hanona kabamauri muena.
55 Pokina au bitioꞌu hanona aniani tohana abomo aruaruꞌu hanona inuinu beina tohana.
56 Au bitioꞌu niana mai aruaruꞌu neinu hauna hanona ia aoꞌuai nemiaho au abomo ia aonai namiaho.
57 Hamaꞌu nimauri hauna ehore euhunaꞌu,
au hanona Hamaꞌu paunai namauri ihobonai mo au hauꞌu keana hauna hanona au pauꞌuai kemauri.
58 Au aniani neiaꞌu hanona kupai ariri amai.
ꞌAbaꞌabami mana teana ꞌabana ahaꞌi,
teani iamo teꞌari,
ia hau ha aniani neiaꞌu keaninaꞌu hauna hanona kemauri banaibanai.”
59 Iesu Kaperanaumai weia ebaꞌiobi raninai ꞌabi neiana ehinana Iuda haukia ekia marea aonai.
Mauri Banaibanai ꞌAbikia.
60 Aiana teona murinai tiꞌabana haukia boꞌona teꞌabi tetibaha,
“ꞌAbi neiana hanona epahihi,
tai kehore ꞌabi neiana keaꞌi taeana?”
61 Iesu aba eꞌiobina tiꞌabana haukia ꞌabi weiana ṯeururu aina ba ehina benakia etibaha,
“ꞌAbi neiana aomi nibaroꞌarina, u?
62 Au Maearima Nahuna pakaraꞌau amiaho ꞌuai ꞌekana paeao patoihanaꞌu raninai aea patohoma?
63 Auba Robe hanona mauri nibaibeni,
ꞌa hauani hanona taba ha aꞌi nibaramana.
Ahina benimi ꞌabikia neiakia hanona auba ꞌabikia mai mauri ꞌabikia.
64 Ia baiatamiai baika hanona aꞌi tuaꞌikakauma.”
Popounai Iesu aba eꞌiobina baiatakiai tai aꞌi tiaꞌikakauma mai tai ia hinahinana kehinahinaina.
65 Ia haeamona ehina benakia etibaha,
“Ua buonai aba ahina benimi atibaha,
‘Hamaꞌu maearima aꞌi kemaiaina raninai hau ha kemai hereꞌu taearana ahaꞌi.’”
66 Iesu ena ꞌabi weiana buonai teꞌabana haukia boꞌokia tehabona Iesu murinai aꞌi tekaꞌa mue.
67 Ba Iesu iꞌabana haukia harau haea rua ebakainakia etibaha,
“Wai abomo ṯonuatae katohabonaꞌu,
u?”
68 Simona Petero ehore ehina bena etibaha,
“Obiapaka e,
ai tai herena kataeao?
ꞌAbi weiana mauri nimaiaina hauna hanona oi heremuai nemiaho.
69 Ai aba ṯaꞌikakauma mai ṯaꞌiobina oi hanona robe haumu tohamu Tirama herenai omai.”