Iesu Uahoꞌabana Ia Aꞌi Teaꞌikakaumana.
7
Weiakia murikiai Iesu Galilea aonai ekaoao kaoao,
ia aꞌi enuatae keao Iudea pokina Iuda haukia apaꞌuakia hanona ṯeꞌimana kateahu ꞌarina.
2 Weiana Iuda haukia ekia Iꞌaua tatuna ranina ekaibari.
Jewish leaders want to kill Jesus (Ioane 7:1-24)
3 Iesu hatina tehore tehina bena tetibaha,
“ꞌEka neiana kohabona koao Iudea ba weia bataꞌutaꞌu huri hoakia kobabai tiꞌabaniꞌo haukia kate ihanakia.
4 Pokina hau ha kipona ibawaira tinana nenuatae aina raninai taba ha buniakiai aꞌi nibabai,
neiakia aba nubabainakia buonai moba karahiniꞌo hanopaka wairakiai temeꞌiobiniꞌo.”
5 Ua teꞌabi aiho pokina hatina abokiamo aꞌi teaꞌikakaumana.
6 Ba Iesu ehina benakia etibaha,
“Eꞌu rani tohana hanona aꞌi nimai baha.
Ia wai heremiai hanona rani mo ꞌakina ikoikiai tetai.
7 Hanopaka hanona aꞌi keꞌoatanimi ia au niꞌoatanaꞌu,
pokina au ia pouna ṉahinana weiana ia nibabaina hauna hanona ekiꞌa.
8 Wai tomoao tatu ꞌekana,
au hanona aꞌi kawahi tatu ꞌekana naiana pokina eꞌu rani tohana hanona aꞌi nitai bahana.”
9 Ia ꞌabi neiana ehinana ba Galileai emiaho.
Iesu Eao Ierusalema Iꞌaua Tatuna Aonai.
10 Hatina tatu ꞌekana teao murikiai ia abomo tatu ꞌekana eao bunianai mo toꞌu wairakiai ahaꞌi.
11 Ba tatu weiana aonai Iuda haukia apaꞌuakia hanona Iesu titabuna tibakai bakaiaina,
“Hauna weiana hanona aeꞌe?”
12 Weia toꞌu aonai hanona tebateteaina,
baika teꞌabi,
“Ia hanona hau namona.”
Ia baika teꞌabi,
“Ahaꞌi,
ia hanona maearima neꞌuaiai behonakia.”
13 Ia Iuda haukia apaꞌuakia tetaꞌu ainakia paunai,
hau ha toꞌu wairakiai ia ꞌabina aꞌi ehina ꞌapuana.
14 Weia tatu ranina ibuanai Iesu ekaraꞌau marea robeai ebaꞌiobi ramanakia.
15 Ba Iuda haukia apaꞌuakia tetaꞌutaꞌu huri teꞌabi tetibaha,
“Hau neiana marere ꞌekana ha aꞌi eao,
ia marere mahakia aea eꞌiobi aihonakia?”
16 Iesu ekia ꞌabi ebamuena etibaha,
“Eꞌu baꞌiobi ꞌabikia hanona au kipoꞌu ꞌeuꞌu ahaꞌi,
ia euhunaꞌu Tiramana herenai timai.
17 Hau ha Tirama ena nuatae akana kebabaina raninai ia aba keꞌiobina,
au eꞌu baꞌiobi hanona Tirama herenai nimai ꞌao au kipoꞌu eꞌu ꞌabi.
18 Hau ha kipona ꞌeuna nehinana hauna hanona kipona ena namo nitabuna ꞌa euhuna hauna ena namo nitabuna hauna hanona ebero,
ia aonai beho ahaꞌi.
19 Mose rauhubu aba ebenimi,
aonai ha hamomomu rauhubu neiana aꞌi toꞌinibena.
Taba buonai katoahu ꞌarinaꞌu taearana tutabuna?”
20 Toꞌu haukia ena ꞌabi tebamuena tetibaha,
“Oi hanona nubeau ꞌari,
tai nenuatae keahu ꞌariniꞌo?”
21 Iesu ehina benakia etibaha,
“Au beraura robenai bataꞌutaꞌu huri hoana hamona ababaina,
ba wai ikoinai totaꞌutaꞌu huri.
22 Mose itare akana wai ebenimi buonai wai miori papakia beraura robenai itare tubenakia.
(Itare akana hanona Mose herenai aꞌi emai,
ia wai kupumi ꞌabaꞌabami herekiai emai.)
23 Bariu miori beraura robe aonai tutarenakia hanona Mose ena rauhubu aꞌi tomokabena marikina.
Taba buonai beraura robe aonai hau ha hauna maikoinai abanamona hanona tuopuere ainaꞌu?
24 Taba ihakiai aꞌi katobaihobo,
ia taba ekia bero tohakiai katobaihobo.”
Ia Hanona Keriso ꞌAo?
25 Rani weianai Ierusalema maearimakia baika tebakai bakai tetibaha,
“titabuna kateahu ꞌarina hauna hanona neiana ꞌao?
Jewish leaders try to arrest Jesus (Ioane 7:25-53)
26 Hauna mo naiana toꞌu wairakiai neiroro ba ꞌabi ha ia herenai aꞌi ṯehina ꞌapuana,
hau apaꞌuakia paꞌe aba teraona haraina ia hanona Keriso ꞌao?
27 Keriso kemai raninai ena mai ꞌekana tai ha aꞌi keꞌiobina,
ia hau neiana ena mai ꞌekana aika nahaꞌiobina.”
28 Ba Iesu marea robe ai nibaꞌiobi aonai eio etibaha,
“Wai au toꞌiobinaꞌu,
aeꞌeai amai abomo toꞌiobina.
Au kipoꞌu eꞌu nuatae ai aꞌi amai Tirama euhunaꞌu ba amai,
ia hanona ꞌabi tohana.
Wai ia aꞌi toꞌiobina.
29 ꞌA au hanona ia naꞌiobina pokina au ia herenai amai abomo Ia au euhunaꞌu.”
30 ꞌAbi neiana teona aonai ia katebirina hanona teraonana ꞌa hau ha ia ahanai aꞌi ehaoꞌau pokina ena rani aꞌi nitai bahana.
31 Toꞌu aonai maearima boꞌona ia teaꞌikakaumana ba teꞌabi tetibaha,
“Keriso kemai raninai,
bataꞌutaꞌu huri hoakia boꞌokia kebabai ba hau neiana?
Paꞌe ahaꞌi.”
Baika Tenuatae Iesu Katebirina.
32 Parisea haukia mako Iesu tebatete aina ꞌuruna teona ba robe haukia apaꞌuakia mai Parisea haukia tehore marea robe ṯeꞌimana haukia teuhunakia Iesu katebirina.
33 Ba Iesu eꞌabi etibaha,
“Au bariu rani papana wai heremiai kamiaho ba kamue kaeao euhunaꞌu hauna herena.
34 Weiana wai katotabunaꞌu iamo aꞌi katotabu ahinaꞌu.
Au kamiaho ꞌekana wai katoao hanona aꞌi ketaina.”
35 Ba Iuda haukia apaꞌuakia kipokia baiatakiai teꞌabiꞌabi tetibaha,
“Hau neiana hanona aeana keao,
ba niꞌabi aika ia aꞌi kahatabu ahina?
Weia Iuda haukia terama otaraina Helene haukia baiatakiai ṯemiaho haukia herekiai keao ba Helene haukia kebaꞌiobinakia,
ꞌao?
36 Ena ꞌabi ‘Wai hanona katotabunaꞌu iamo aꞌi katotabu ahinaꞌu.’
abomo ‘Kamiaho ꞌekana katoao hanona aꞌi ketaina.’
weiana anina hanona taba?”
Mauri Kebaibeni Beina.
37 Tatu ranina orenai rani apaꞌuanai Iesu ekoroti eꞌabi etibaha,
“ꞌAkona niꞌororo hauna emai hereꞌu bei keinu.
38 Puka robenai tererena ꞌabana,
‘Au niaꞌikakaumanaꞌu hauna hanona ia aonai mauri beina keharu ate ꞌabana.’”
39 Neiana hanona Auba Robe ꞌabina ehinana ia weiakia teaꞌikakaumana haukia muriai kebenakia,
pokina Iesu ena nuabi aꞌi niaꞌi bahana buonai Auba Robe hanona aꞌi nibaibeni baha.
Maearima Baiatakia Epaꞌa.
40 Iesu ena ꞌabi neiakia urukia teoꞌo raninai maearima baika teꞌabi tetibaha,
“ꞌAbi tohana hau neiana hanona mahabanai hauna.”
41 Baika teꞌabi tetibaha,
“Ia hanona Keriso.”
ꞌa baika tebakai bakai tetibaha,
“Ia aea homanai Keriso hanona Galileai kemai?
42 Puka robenai ṉa aꞌi eꞌabi aiho?
Keriso hanona Davida nininai kerama Davida emiaho aiarana Betelehema aonai.”
43 Ua buonai maearima baiatakia epaꞌa Iesu paunai.
44 Baiatakiai baika tenuatae katebirina,
ia mo hau ha imana ia haunai aꞌi ehaoꞌau.
Iuda Poki Haukia Iesu Aꞌi Teaꞌikakaumana.
45 Murinai marea robe ṯeꞌimana haukia weiakia temue teao robe haukia apaꞌuakia mai Parisea haukia herekia,
ba ia tehore tebakainakia tetibaha,
“Aehoma buonai aꞌi tobakaꞌana aꞌi tomaiaina?”
46 ꞌImaꞌima haukia ekia ꞌabi tebamuena tetibaha,
“Ua raninai emai mo bariu hau ha ua aꞌi niꞌabi aiho ꞌapua hau neiana niꞌabi ꞌabana.”
47 Ba Parisea haukia teꞌabi pahihi tetibaha,
“Wai abomimo aba ebakaꞌa behonimi,
uhe?
48 Wai turaonana hau apaꞌuakia ꞌao Parisea haukia ha ia niaꞌikakaumana?
Ahaꞌi.
49 Toꞌu haukia weiakia Mose ena rauhubu aꞌi teꞌiobina haukia hanona Tirama ena puma katehoaina.”
50 Ia ꞌabakia ha Nikodemo,
rani ha eao Iesu herena hauna,
ehore ehina benakia etibaha,
51 “Aika eka rauhubu tainai hau ha puma aꞌi kahabeni ꞌabaeana,
ia aiana kahaoꞌo ꞌuaina,
ia taba ebabaina hauna kahaꞌiobi ꞌuaina.”
52 Ia tehina bena tetibaha,
“Oi abomo Galileai omai,
u?
Puka robena koraona haraina mahabanai hauna hanona Galileai aꞌi kemai.”
53 [Ba maearima ikoikiai temue ikau ena itu teao.