Enabau Kiꞌa Aonai Tetabu Ahina Babiꞌena.
8
ꞌA Iesu hanona Olibe oeona eao.
2 Erani raurani ꞌamarinai Iesu haeamona eao marea robe aonai maearima ikoinai ia herena teao tetoꞌuna,
ba ia emiati ebaꞌiobinakia.
Jesus forgives a condemned woman (Ioane 8:1-11)
3 Rauhubu poki haukia mai Parisea haukia babiꞌe ha enabau kiꞌa aonai tetabu ahina temaiaina.
Toꞌu wairakiai tebakorotina,
4 ba Iesu tehina bena tetibaha,
“Baꞌiobi haumu e,
babiꞌe neiana hanona ninabau kiꞌa aonai tatabu ahina.
5 Ba Mose ena rauhubu aonai ṉa ehinabe aihonaka,
babiꞌe nahomakia hanona piharai kahahu ꞌarinakia.
Ia bariu oi hanona taba ṉa nuhoma?”
6 Bakaibakai neiana teaoaina ia herenai hanona weianai patebarewana Iesu behoai patehorotina.
Ia Iesu hanona ehiriti imana kiriꞌunai ꞌanoai erererere.
7 Ia tehore tebakai hao bakai haona,
ba emikiri ehina benakia etibaha,
“Hau ha baiatamiai emu kiꞌa ahaꞌi haumu,
pihara mokapo ꞌuaina babiꞌe neiana moahuna.”
8 Haeamona ehiriti ꞌanoai erere rere mue.
9 Ba ꞌabi neiana teona haukia hanona kipokia ekia kiꞌa teraonanakia ba hamohamo tekaobo kironai eaꞌi ramana eaomo ꞌaruꞌarunai epua,
Iesu ikupaiana tehabona babiꞌe ia herenai ekoroti.
10 Iesu emikiri tai ha aꞌi eihana babiꞌe mo weia,
ba ebakaina etibaha,
“Babiꞌe e,
maearima neiakia aeꞌe?
Tai ha puma aꞌi ebeniꞌo?”
11 Babiꞌe eꞌabi etibaha,
“Obiapaka e,
tai ha ahaꞌi.”
Iesu ia ehina bena etibaha,
“Au aboꞌumo oi puma ha aꞌi kabeniꞌo,
moao kiꞌa ha aꞌi kobabai muena.”]
Iesu Hanona Hanopaka Eana.
12 Haeamona Iesu maearima ehinabe muenakia etibaha,
“Au hanona hanopaka eana.
Hau ha au muriꞌuai kekaꞌa hauna hanona wapura aonai aꞌi kekaꞌa,
weiana ia hanona mauri eana keaꞌina.”
Jesus is the light of the world (Ioane 8:12-30)
13 ꞌAbi neiana teona raninai Parisea haukia ṉa tehinabe aihona,
“Oi kipomu poumu nohinana,
emu pou hanona aꞌi ebero.”
14 Iesu ehina benakia etibaha,
“Kipoꞌu pouꞌu nahinana hanona ebero pokina amai ꞌekana mai kaeao ꞌekana au aꞌiobina ia wai hanona au amai ꞌekana ꞌao kaeao ꞌekana aꞌi toꞌiobi ꞌapuana.
15 Wai maearima ekia hoahoa ihobonai au tukaiahinaꞌu.
Au hanona tai ha aꞌi nakaiahina.
16 Ia au eꞌu kaiahi pababaina reꞌa,
eꞌu ꞌabi hanona ebero,
pokina au hanona ikupaiaꞌu ahaꞌi,
Hamaꞌu euhunaꞌu hauna abomo hereꞌuai.
17 Emi rauhubu aonai abomo ṉa erere aihona,
maearima rua ekia ꞌabi kehamona hanona ꞌabi tohana.
18 Au hauꞌu kipoꞌu pouꞌu nahinana mai Hamaꞌu euhunaꞌu hauna abomo pouꞌu nehinana.”
19 Ba ia tebakaina tetibaha,
“Hamamu hanona aeꞌe?”
Iesu eꞌabi etibaha,
“Wai aꞌi ṯoꞌiobinaꞌu buonai Hamaꞌu abomo aꞌi ṯoꞌiobina.
Wai au patoꞌiobinaꞌu raninai Hamaꞌu abomo patoꞌiobina.”
20 Iesu marea robe aonai baibeni monina ihorotina ꞌekanai ꞌabi neiakia ebaꞌiobi ainakia.
Weiana hau ha ia aꞌi ebirina pokina ia ena rani aꞌi nitai bahana.
Au Naeao ꞌEkana Wai Katoao Aꞌi Ketaina.
21 Iesu haeamona ia ehina benakia etibaha,
“Au hanona nakaꞌa ꞌakaumana,
ia wai hanona au katotabunaꞌu ia emi kiꞌa aonai katoꞌari.
Au kaeao ꞌekana katoao hanona aꞌi ketainimi.”
22 ꞌAbi neiana paunai Iuda haukia apaꞌuakia kipokia tebakai bakai tetibaha,
“Ia ṉa niꞌabi aiho,
‘Au kaeao ꞌekana hanona wai aꞌi katomai,’
weiana hanona ia kipona keahu ꞌarina,
ꞌao?”
23 Iesu ehina benakia etibaha,
“Wai hanona baꞌa ai tomai au hanona ꞌubiai amai,
wai haumi hanona hanopaka neiana ꞌeuna,
au hauꞌu hanona hanopaka neiana ꞌeuna ahaꞌi.
24 Au aba ahina benimi,
‘Emi kiꞌa aonai katoꞌari,’
weiana Au miaho banaibanai hauꞌu aꞌi kato aꞌikakaumanaꞌu raninai wai hanona emi kiꞌa aonai katoꞌari.”
25 Ia tebakai bakai tetibaha,
“Ba oi hanona tai?”
Iesu ekia ꞌabi ebamuena etibaha,
“Au tai hanona aba ahinabe hinabe benimi ꞌuainai emai mo bariu.
26 Wai paumiai au ꞌabi boꞌona pahinana abomo puma rarina pabahoainimi,
ia euhunaꞌu hauna hanona toha tohana,
au ia herenai naona hauna mo hanopaka nahina bena.”
27 Ia Hamana robana eahuna hanona obona aꞌi teobo.
28 Ua buonai Iesu ia ehina benakia etibaha,
“Au Maearima Nahuna katotiu taeanaꞌu raninai aba katoꞌiobina au hanona Keriso,
abomo au kipoꞌu taba ha aꞌi nababaina ia Hamaꞌu ebaꞌiobinaꞌu haukia mo nahinanakia.
29 Abomo euhunaꞌu hauna hanona niꞌabanaꞌu ia au aꞌi nihabo ꞌabaeanaꞌu,
pokina ia ena nuatae akakia rani ikoinai nababainakia.”
30 ꞌAbi neiakia ehinanakia hanona maearima boꞌona ia teaꞌikakaumana.
Aberahamo Bibirana.
31 Ba Iesu Iuda haukia teaꞌikakaumana haukia ehina benakia etibaha,
“Eꞌu ꞌabi katoꞌini benakia raninai wai hanona au iꞌabaꞌu haumi tohami.
Jesus confronts false disciples (Ioane 8:31-59)
32 Weiana ꞌabi tohana katoꞌiobina,
ba ꞌabi tohana kehore kerubunimi.”
33 Ia Iesu tehina bena tetibaha,
“Ai Aberahamo bibirana haumai abomo tai ha taꞌarana aꞌi ṯaꞌi.
Aehoma buonai porubunamai ṉa ṉuho?”
34 Iesu ehina benakia etibaha,
“ꞌAbi tohana au wai nahina benimi,
kiꞌa nibabaina hauna hanona kiꞌa ena taꞌara iaꞌina haunai niao.
35 Taꞌaraꞌi hauna hanona poki hauna ena ituai aꞌi kemiaho banaibanai,
nahuna hanona itu weianai kemiaho banaibanai.
36 Ua buonai Nahuna kehore kerubunimi raninai wai hanona aba erubu tai baihanimi.
37 Au aba aꞌiobinimi wai Aberahamo bibirana haumi,
ia eꞌu ꞌabi aomiai aꞌi nemiaho paunai ṯonuatae katoahu ꞌarinaꞌu.
38 Au hanona Hamaꞌu wairanai aihana hauna nahina benimi,
mai wai hanona hamami herenai tuoꞌo haukia tubabainakia.”
39 Ia ena ꞌabi tebamuena tetibaha,
“Aberahamo hanona ai hamamai.”
Ba Iesu ehina benakia etibaha,
“Wai Aberahamo nahuna raninai Aberahamo ebabai akakia patobabai.
40 ꞌAbi tohana Tirama herenai aona hauna nahina benimi,
ia wai hanona taearaꞌu tutabuna katoahu ꞌarinaꞌu.
Aberahamo hanona ṉa aꞌi ebabai aiho.
41 Wai hamami ebabai tabakia hanona wai tubabainakia.”
Ia Iesu tehina bena tetibaha,
“Ai hanona tubu miorimai ahaꞌi,
ai hamamai hanona hamona Tirama mo ikupaiana.”
42 Iesu haeamona ehina benakia etibaha,
“Wai hamami Tirama raninai au patoraonaꞌau ainaꞌu.
Pokina au Tirama herenai akarahi amai neia.
Au hanona kipoꞌu eꞌu nuataeai aꞌi amai ia Hamaꞌu euhunaꞌu.
43 Aehoma buonai nahinanakia ꞌabikia hanona aomi aꞌi tiea?
Pokina wai eꞌu ꞌabi iaꞌi taeana aꞌi ṯonuatae aina.
44 Wai hamami hanona tiaporo,
emi nuatae hanona hamami ena nuatae akana katobabaina.
Ia hanona ahuahu hauna bahabanai emai mo bariu,
ꞌabi tohanai aꞌi ekoroti,
pokina ia aonai ꞌabi tohana ha aꞌi nemiaho.
Ia baiꞌoi nehinana hanona ia ena hoahoa tohana,
pokina ia hanona baiꞌoi hauna abomo baiꞌoi ikoikiai hamakia.
45 Au ꞌabi tohana nahinana paunai wai au eꞌu ꞌabi aꞌi tuaꞌi taeana.
46 Ba naia haumi tai ha au eꞌu kiꞌa oꞌiobina raninai ꞌekana koꞌuahina.
Au ꞌabi tohana nahinana raninai aehoma buonai eꞌu ꞌabi aꞌi tuaꞌi taeana?
47 Tirama nahuna hauna hanona Tirama ena ꞌabi aiakia nioꞌo,
ia wai aia aꞌi tuona ena poki hanona wai Tirama nahuna ahaꞌi.”
Iesu Mai Aberahamo.
48 Iuda haukia apaꞌuakia Iesu ena ꞌabi tebamuena tetibaha,
“Oi hanona Samaria haumu aomuai auba kiꞌa obona nemiaho,
weiana hanona aba taꞌabi harai ꞌao?”
49 Ba Iesu ehina benakia etibaha,
“Au aoꞌuai hanona auba kiꞌa obona ahaꞌi.
Au hanona Hamaꞌu namariki aina ia wai au aꞌi tumariki ainaꞌu.
50 Au hanona kipoꞌu eꞌu nuabi aꞌi natabuna,
ia Tirama kehore eꞌu nuabi ketabuna abomo bakai kebabaina au pauꞌuai.
51 ꞌAbi tohana au wai nahina benimi,
eꞌu ꞌabi neꞌinibena hauna hanona aꞌi keꞌari ꞌapua.”
52 Weia Iuda haukia apaꞌuakia tehina bena tetibaha,
“Bariu ai ṯaꞌiobi harainiꞌo,
oi hanona aomuai auba kiꞌa obona nemiaho.
Aberahamo eꞌari mahabanai haukia abomo teꞌari iamo oi nuꞌabi emu ꞌabi peꞌinibena hauna hanona ꞌari abiabina aꞌi keonobaina.
53 Oi hanona Aberahamo otara haona,
u?
Ia eꞌari mahabanai haukia teꞌari,
ba nuraonana oi hanona tai?”
54 Iesu ia ehina benakia etibaha,
“Kipoꞌu pabanuabinaꞌu raninai eꞌu nuabi anina ahaꞌi.
Au Hamaꞌu hauna tohana wai tuꞌabi ‘Emi Tirama’ hauna nihore au nibanuabinaꞌu.
55 Wai ia aꞌi toꞌiobina au mo aꞌiobina.
Ba au paꞌabi au ia aꞌi aꞌiobina raninai au hanona baiꞌoi hauꞌu wai ꞌabami.
Ia au aꞌiobina mai ena ꞌabi naꞌinibenakia.
56 Wai hamami Aberahamo eꞌu rani keihana paunai eaonamo,
ba eihana hanona aona enamo.”
57 Iuda haukia apaꞌuakia teꞌabi tetibaha,
“Oi ihaumu hanona imabui aꞌi niaꞌi bahana,
ia Aberahamo aba hamo oihana,
u?”
58 Iesu ehore ehina benakia etibaha,
“ꞌAbi tohana au wai nahina benimi.
Aberahamo aꞌi erama baha au hanona aba amiaho.”
59 ꞌAbi weiana teona raninai ia pihara teaꞌi Iesu kateahuna,
ia Iesu hanona kipona epihi toꞌu baiatakiai ekaobo marea robe ehabona ekaꞌa.