Iesu Maha Kiꞌa Hauna Mahana Ebanamonakia.
9
Iesu taeara ekana eao aonai maha kiꞌa hauna ha eihana,
ia hanona mahana kiꞌakiai erama.
2 Iꞌabana haukia Iesu tebakaina tetibaha,
“Baꞌiobi haumu e,
tai ena kiꞌa paunai hau neiana mai ꞌiauna erama,
hau neiana ena kiꞌai ꞌao hinana hamana ekia kiꞌai?”
Jesus heals a blind man (Ioane 9:1-41)
3 Iesu ekia ꞌabi ebamuena etibaha,
“Hau neiana ena kiꞌa ahaꞌi abomo hinana hamana ekia kiꞌa ahaꞌi,
ia Tirama ena hiabu akakia ia haunai kewaira tina hauna kateihana paunai.
4 Au euhunaꞌu Tiramana ena aka mararani kahababaina.
Rabi kemai aonai hau ha keaka hanona aꞌi ketaina.
5 Au hanopakai namiaho aonai au hanona hanopaka ena ea.”
6 Iesu ꞌabi neiana ehinana murinai ꞌanoai eꞌatoti ba ꞌatotinai tipu emakana,
ꞌiau hauna mahana rua etaronakia.
7 Ba ehina bena etibaha,
“Moao,
Siloama obunai wairamu koutuna.”
(Siloama anina hanona ‘baiuhu.’)
Hau weiana eao wairana eutuna,
emue emai mahana aba tenamo.
8 Herenai haukia mai maearima baika ia ꞌuainai enoi baꞌame teihana haukia kipokia tebakai bakai tetibaha,
“Hau neiana ꞌuainai weia emiati enoi baꞌame hauna,
u?”
9 Harua etibaha,
“Hauna mo naiana.”
Baika tetibaha,
“Ahaꞌi,
ihana mo ia teaobena.”
Ia kipona ehina benakia etibaha,
“Au mo neiaꞌu.”
10 Ia tehore tebakaina tetibaha,
“Bariu mahamu aea tehoma noihaiha?”
11 Ia ekia ꞌabi ebamuena etibaha,
“Hau atana teaparina Iesu hauna tipu emakana mahaꞌu etaronakia,
ba ehina benaꞌu kaeao Siloama obuna wairaꞌu kautuna.
Ua buonai aeao wairaꞌu autu ba naiha iha.”
12 Ia tebakaina tetibaha,
“Hau weiana hanona aeꞌe?”
ꞌIau hauna eꞌabi etibaha,
“Au aꞌi aꞌiobina.”
Parisea Haukia Maha Tenamo Hauna Tehobona.
13 Ia tehore weiana ꞌuainai mahana tekiꞌa hauna tebakaꞌana teaoaina Parisea haukia herekia.
14 Wapu weiana Iesu tipuai ꞌiau hauna mahana etaronakia tekaikau hanona beraura robena.
15 Ua paunai Parisea haukia abomo ia tebakaina mahana aea tenamo aiho.
Maha kiꞌa hauna eꞌabi etibaha,
“Ia tipuai mahaꞌu etaronakia,
autunakia ba bariu aba naihaiha.”
16 Parisea haukia baika teꞌabi tetibaha,
“Hau neiana hanona Tirama herenai aꞌi emai pokina ia beraura robe aꞌi neꞌinibena.”
Ia baika teꞌabi tetibaha,
“Kiꞌa hauna ha hoa ṉahomakia aea kebabai aiho?”
Weiana paunai ia kipokia baiatakia epaꞌa.
17 Haeamona Parisea haukia maha kiꞌa hauna tebakai muena tetibaha,
“Ia ehore mahamu ekaikaunakia,
ba oi nuraonana ia hanona tai?”
Hau weiana eꞌabi etibaha,
“Ia hanona mahabanai hauna.”
18 Iuda haukia apaꞌuakia maha kiꞌa hauna mahana aba tenamo hauna aꞌi tebatohana eao mo hau weiana hinana mai hamana teaparinakia temai.
19 Ba ia tebakainakia tetibaha,
“Neiana hanona wai nahumi,
u?
Mahana kiꞌa obokiai erama hauna neiana?
Ia bariu hanona mahana aea tenamo aiho ba neihaiha?”
20 Hinana mai Hamana ia ekia ꞌabi tebamuena tetibaha,
“Ai taꞌiobina ia hanona ai nahumai abomo ia hanona mahana kiꞌa obokiai erama.
21 Ia bariu aeahoma neihaiha abomo tai ehore ia mahana ekaikaunakia hanona ai aꞌi ṯaꞌiobina.
Tomobakaina,
ia abeapaꞌua kipona robana meahuna.”
22 Hinana mai hamana Iuda haukia apaꞌuakia tetaꞌu ainakia paunai ua teꞌabi aiho.
Iuda haukia aba teroba ahu hau ha Iesu kehina pouna ia hanona Keriso raninai mareai katebakarahina.
23 Weiana buonai hinana mai hamana teꞌabi,
“Ia hanona abeapaꞌua tomobakaina.”
24 Maha kiꞌa hauna rani ibaruana teaparina tehina bena tetibaha,
“Koꞌabiꞌuai Tirama wairanai ba ꞌabi tohana kohinana.
Ai ṯaꞌiobina hau neiana ebanamoniꞌo hanona kiꞌa hauna.”
25 Hau weiana ekia ꞌabi ebamuena etibaha,
“Ia kiꞌa hauna ꞌao ahaꞌi au aꞌi aꞌiobina.
Taba hamona au aꞌiobina hanona mahaꞌu tekiꞌa ia bariu aba naihaiha.”
26 Ba ia tebakaina tetibaha,
“Oi heremuai taba ebabaina?
Mahamu aea ekaikau aihonakia?”
27 Ia ekia ꞌabi ebamuena etibaha,
“Au aba waꞌi baha ahina benimi,
ia aiaꞌu aꞌi toꞌona.
Bariu aehoma buonai ṯonuatae katoo muena?
Wai abomo ṯonuatae ia iꞌabana haumiai katoao,
u?”
28 Ia tehore terike kiꞌana ba ṉa teꞌabi aiho,
“Oi hanona maearima weiana iꞌabana haumu,
ia ai hanona Mose iꞌabana haumai.
29 Ai ṯaꞌiobina Tirama ehore Mose ehina bena,
ia maearima naiana aeꞌe ai emai hanona aꞌi ṯaꞌiobina.”
30 Hau weiana ekia ꞌabi ebamuena etibaha,
“Bariu taba haeai tohana erama pokina ia mahaꞌu ekaikaunakia iamo wai hanona ena mai ꞌekana aꞌi ṯoꞌiobina.
31 Aika haꞌiobina Tirama kiꞌa haukia aiakia aꞌi nibahu ainakia.
Ia hanona ṯekuti aina haukia mai weiakia ena nuatae akana tibabaina haukia mo aiakia nibahu ainakia.
32 ꞌUainai hanopaka erama raninai emai mo bariu hau ha ehore mahana tekiꞌa erama hauna mahana ekaikaunakia pouna ha aꞌi haoꞌo ꞌapuana.
33 Hau neiana Tirama herenai aꞌi emai raninai ia hanona aka ṉa homana ha aꞌi pebabaina.”
34 Ia ena ꞌabi tebamuena tetibaha,
“Oi hanona kiꞌa aonai orama ba oi nuhore ai kobamarerenamai,
u?”
Ia tehore mareai tetori ahina.
Aꞌi Tiaꞌikakauma Haukia Hanona Maha Kiꞌa ꞌAbana.
35 Iesu hau weiana tetori ahina pouna eona ba etabu ahina raninai ia ebakaina etibaha,
“Oi Maearima Nahuna nuaꞌikakaumana,
u?”
36 Hau weiana Iesu ena ꞌabi ebamuena etibaha,
“Hau apaꞌuana e,
ia hanona tai?
Mohina benaꞌu au kahore ia kaꞌikakaumana.”
37 Iesu eꞌabi etibaha,
“Oi bariu ia aba noihana hauna naiana oi nehina beniꞌo.”
38 Ba hau weiana eꞌabi etibaha,
“Obiapaka e,
au naꞌikakauma.”
Ba ia Iesu ekuti aina.
39 Iesu haeamona eꞌabi etibaha,
“Kabakai paunai amai hanopaka neianai,
weiakia maha kiꞌa haukia kateihaiha,
ia neiakia ṯeihaiha haukia mahakia katekiꞌa.”
40 Parisea haukia baika ia herenai haukia ꞌabi weiana teona hanona tebakaina,
“ꞌAbi tohana ai abomo mahamai tekiꞌa,
u?”
41 Iesu ehina benakia etibaha,
“Wai mahami patekiꞌa raninai heremiai kiꞌa peahaꞌi.
Ia bariu wai tuꞌabi ṯoihaiha buonai emi kiꞌa hanona ꞌekakiai ṯemiaho.”